Luk. 1
1
Emalas
1Ekapolon Teopilo,
Ageut ŋikalalak akigir ŋiemuto a ŋakiro a ŋuna etiyakinosi alokidiŋ yok. 2Ikote nenipei ikilimokinitotor iwon ŋituŋa ŋulu aanyunito ka kiseraete daŋ anageunet. 3Aŋun, esibit ejok ayoŋ daŋ akigir ŋakiro ŋun iriyan neni kon, anerae adau ayoŋ akimimaun ŋakiro ŋun daadaŋ, ameun anakisyakinet kec. 4Etiyae ayoŋ ŋun, ikotere toyenunia iyoŋ abeit kire ŋina a ŋakiro a ŋuna kikitatamianakinio iyoŋ.
Todwar emalaika akidouno a Yoana ke Ekebatisan
5Ŋirwa ŋulu araakar Erode erwosit a Yudaya, ayai esacaradoti ŋolo anyaritae Sakariya, ŋolo ka atukot a ŋina ka Abiya. Ayai iŋes aberu ŋina anyaritae Elisabet, ŋina arae ŋina anateker ka Aron. 6Eyookino ikes daadaŋ alokiŋaren Akuj, ericakinito ŋakiciketa ka Ŋikisila ŋulu ke Ekapolon, emam akisec. 7Nai amamukatar ikes ikoku, anerae akolupana Elisabet; nabo daŋ amojoŋito ikes.
8Apeikoloŋit etiyae Sakariya ekeetic ŋolo ke esacaradoti alokiŋaren Akuj, akoloŋit ŋina araakar akitiyaet ŋina ka atukot a ŋina a ŋisacaradotin a ŋulu ayai Sakariya. 9Aponi iŋes toseunae alomar Kai ka Akuj a Ekapolon akicunyakin eminae ŋolo ke ekinyate a Namuroet, ikwaŋina ecikakinitere ŋisacaradotin. 10Elipi asepic a ŋituŋa alokiŋa nen apaki ŋina ecunyakinere eminae ŋolo ke ekinyate.
11Apaki ŋin, totakanu emalaika ŋolo ke Ekapolon neni keŋ ewuoi aloteten Namuroet ŋina ecunyere eminae ŋolo ke ekinyate. 12Ani iŋolikini Sakariya emalaika, toryaŋakin tobul. 13Nai tolimok emalaika iŋes tema, “Nyikuryaniar Sakariya, anerae eira Akuj akonikilip, idouni akoniberu Elisabet ikoku ŋini sapat, ilimokini iyoŋ ekeekiro Yoana. 14Iryamuni iyoŋ alelyan ka alakara, elakarosi nooi ŋikalalak aŋuna ka akidouno keŋ; 15anerae erwoniar iŋes alokiŋaren Ekapolon. Nyitemokino iŋes tomat epiini kori idiobore ŋini ikitemerakini, ilelebun iŋes Etau ŋolo Asegan, tari eriŋa eyai nakook a toto keŋ. 16Inyakuni iŋes ŋituŋa ŋulu alalak ŋulu a Isirael neni ke Ekapolon Akuj kec. 17Iŋarenikini iŋes Ekapolon, etitiny ka togogoŋ ikwa ekadwaran Eliya. Imorikini iŋes atapapa ka ŋidwe, tocamunos; nabo ibelekini iŋes ŋulu eŋerito Akuj kiwuapa aosou a ŋulu itiyaete ŋuna iyookino, kitemok ŋituŋa kidarut Ekapolon.”
18Kiŋit Sakariya emalaika tema, “Ekokini ayoŋ aanyuni ŋakiro ŋun ai? Anerae amojoŋit ayoŋ, akaaberu daŋ alunyarosi ŋikaru keŋ.” 19Toboŋok emalaika tema, “Ayoŋ Gaburiel, ŋolo awuoi alokiŋaren Akuj. Ekeyakuunitae ayoŋ neni kon, alimokin iyoŋ ŋakiro ŋuna ajokak ŋun. 20Tokona aŋuna iwuounia iyoŋ akinup ŋakiro kaŋ ŋuna iyookin apeikoloŋit, ikisililiŋio iyoŋ nyirworik akitodol akoloŋit ŋina iyookinotor ŋakiro ŋun.”
21Apaki ŋin edarito ŋituŋa Sakariya, toumokinito daŋ aŋuna adidiyo iŋes alo Kai ka Akuj. 22Ani elomuni iŋes kiŋa, nyepedo akisirwor ikes. Toyenut nai ikes atemar keanyu iŋes atakanikinet alo Kai ka Akuj. Kisirwor iŋes ikes a ŋakan, ido torubak pa irworo.
23Ani kelunyar ŋirwa ŋulu ke etic keŋ, tolot Sakariya lore keŋ. 24Ekaku a ŋirwa a ŋul, abu akeeberu Elisabet topoti, kiboi iŋes alokai ŋilapyo ŋikan ebala, 25“Erae nu ŋuna etiyak Ekapolon neni kaŋ, ŋirwa lu ŋulu ekesyonio iŋes ayoŋ; alema ŋileec kaŋ alotuŋa!”
Todwar emalaika akidouno a Yesu
26Ani edoli Elisabet ŋilapyo ŋikanikapei epoti, kiyakiya Akuj emalaika Gaburiel nakwap ŋina a Galileya, lotaun ŋolo anyaritae Nasaret; 27neni ka apese a ŋina pa eryamakina ka ekile, ŋina eikinitere Yosepu ŋolo anateker a Daudi. Arae ekiro ka apese Maria. 28Tolot emalaika toloma kai ŋina ayai Maria, kimala iŋes tema, “Maata iyoŋ ŋina ikitojokit Akuj! Iyakasi iyoŋ ke Ekapolon!”
29Tosuri etau a Maria nooi totamatama ebala, “Okoe, alimalas lo?” 30Tolimok emalaika iŋes tema, “Nyikuryaniar Maria, anerae ikiseu Akuj iyoŋ, 31ipotiuni iyoŋ kidou ikoku ŋini sapat, tolimok ekeekiro Yesu. 32Erwoniar iŋes ka enyarao Lokoku ka Akuj a ŋina alokidiama nooi. Isiboikini Akuj iŋes lokicoloŋ a papa keŋ Daudi. 33Ipukae iŋes ateker a Yakobo ŋikaru ka ŋikaru, nabo nyedaun Apukan keŋ!”
34Tolimok Maria emalaika tema, “Arae ayoŋ apese ŋina nyikiryamakina ka ekile, epedor ŋakiro ŋun ikwaani?”
35Toboŋok emalaika tema, “Ebuni Etau ŋolo Asegan neni kon, nabo ikirapuwari iyoŋ apedor ŋina ka Akuj a ŋina alokidiama, ikwa aribo ŋina ke edou. Aŋun, ikoku ŋini idouni iyoŋ, eruwor ŋini ka Akuj ka enyarao Lokoku ka Akuj. 36Toanyu mono iyoŋ tari nakaaya kon daŋ Elisabet, ŋina sek ebookoi akolup, adol ŋilapyo ŋikanikapei epoti ikoku ŋini sapat, tari kemojoŋit daŋ. 37Anerae emam ibore ŋini ipiyori Akuj.”
38Tema nai Maria, “Arae ayoŋ aketiyan ŋina ke Ekapolon; kitiyakin neni kaŋ ikwaŋinapei ilimunio iyoŋ.” Kelunyar ŋun, tonyou emalaika tolot.
Kilaar Maria neni ke Elisabet
39Alorwa a ŋulupei, abu Maria tonyou atipei, tolot nakwap ŋina a ŋikamukumukui lotaun ŋolo a Yudaya. 40Toloma iŋes lore a Sakariya, kimala Elisabet. 41Ŋolopite eirarya Elisabet emalas a Maria, kicurok ikoku anakook keŋ, kilelebikin Etau ŋolo Asegan tooma keŋ. 42Kiworou iŋes a etoil a ŋolo apolon tema, “Irereŋ iyoŋ alokidiŋ ŋaberu ka ikoku ŋini ipoti iyoŋ erereŋ iŋes daŋ. 43Okoe, anukiro apolok etiyakin neni kaŋ nu, ŋuna abunio tari toto ke Ekapolon kaŋ neni kaŋ? 44Anerae ŋolopite eirarya ayoŋ emalas kon, kicurok ikoku ka alelyan anakook kaŋ. 45Irereŋ iyoŋ aŋuna inupya atemar iyookin akirot ŋina ke Ekapolon aneni kon!”
Eete ŋolo epuror Maria Akuj
46Tema Maria,
“Itopoloorit ekaatau Ekapolon;
47elelyani etau kaŋ aŋuna ka Akuj Ekaiunan kaŋ,
48anerae adau iŋes akiŋolikin akitiditeuna a aketiyan keŋ.
Ameun tokona, akanyaraete ayoŋ
ŋanyameta daadaŋ akarereŋon,
49anerae Akuj ŋina ka apedor
eketiyak ayoŋ ŋakiro ŋuna apolok,
eseg ekiro keŋ.
50Eyai akisyon keŋ neni a ŋulu
ekerito iŋes ananyameta a daadaŋ.
51Etiya iŋes ŋakiro ŋuna apolok a akeekan,
eela ŋulu eturok alotai kec.
52Ekota iŋes ŋikapolok alokicoloŋo kec,
ka etopoloo ŋulu itiditeuna alotai kec.
53Esimwon a ŋiboro a ŋulu ajokak ŋulu enyamit akoro,
erita ŋulu abarak eokito ŋakan.
54Eŋarak iŋes Isirael eketiyan keŋ,
aŋuna atamunia akisyon keŋ;
55ikwaŋina kirworor neni atapapaa yok,
Aburaam ka ŋiletok keŋ ŋikaru ka ŋikaru.”
56Kiboyoto nai Maria ka Elisabet ŋilapyo ŋiuni; ani ekaku, toboŋo lore kec.
Akidouno a Yoana ke Ekebatisan
57Todol ŋirwa ŋulu edounio Elisabet, kidou iŋes ikoku ŋini sapat. 58Kiirasi ŋikeekidunyet ka ŋikeeyeneta atemar esyon Akuj iŋes, tolakaros ka iŋes kaapei.
59Ani edoli ŋirwa ŋikanikauni ŋulu kileŋeret ikoku, kiitana ŋituŋa alimokin iŋes ekiro ŋolo anyaritae Sakariya, ekiro a papa keŋ. 60Tema toto keŋ, “Nyenyarao iŋes ikoŋina, elimokinio Yoana.”
61Temasi ikes, “Emam anateker kon ituŋanan elimokinitae ekiro ŋol.” 62Toketut nai ikes papa keŋ akiŋit ekiro ŋolo ecamit iŋes tolimokinae ikoku.
63Kilipu iŋes abao ŋina kigira, kigir ebe, “Erae ekeekiro Yoana.” Toumokis ŋituŋa daadaŋ. 64Anenipei tolacakin aŋajep a Sakariya, toŋaar etoil keŋ, togeu iŋes akipuro Akuj. 65Min akuryanu lokidunyet daadaŋ, tokeikin daŋ ŋakiro ŋun akwap ŋina a Yudaya daadaŋ ŋina a ŋikamukumukui. 66Ŋulu daadaŋ eirarete, apotu totamatamata alotai kec temasi, “Okoe, eruwor ikoku en nyo? Anerae ileere atemar eyai apedor ŋina ke Ekapolon neni keŋ.”
Ŋakiro ŋuna adwari Sakariya
67Kilelebun Etau ŋolo Asegan neni a Sakariya todwar iŋes tema,
68“Kipuroe Ekapolon Akuj a Isirael,
anerae abu iŋes lotuŋa keŋ alacakin ikes.
69Ikiinak iwon Ekaiunan ŋolo etiron
anateker a Daudi eketiyan keŋ.
70Erae nu ŋuna koloŋ ikiikinit iŋes iwon
alorwor a ŋikadwarak a ŋulu ka Akuj
71ebe, itemokino iwon itoiun alomoe yok
ka anapedor a ŋulu ikiremokino iwon.
72Etoodik iŋes atapapaa yok akisyon keŋ
ka atamu Acamunet keŋ ŋina asegan.
73akikoŋiet ŋina koloŋ ekoŋi iŋes neni a papa yok Aburaam.
74Erae akikoŋiet keŋ aiun iwon alomoe yok,
opedoryata nai iwon akitiya ekeetic emam akuryanu.
75Oruworotor iwon ŋulu asegak ŋulu ikiyookino aneni keŋ
ŋirwa daadaŋ ŋulu ikiyarya iwon.
76Iyoŋ ikoku ŋini cici,
ikinyarao ekadwaran ŋolo ka Akuj a ŋina alokidiama nooi;
anerae iŋarenikini iyoŋ Ekapolon,
kitemonok ŋirotin keŋ.
77Tolimonok ikes atemar eiunio ikes
aŋuna isyoniyere ŋasecisya kec.
78Epatana nooi Akuj yok ka isyoniono.
Abu aiuno keŋ neni yok
ikoni neni ipiripirunia akoloŋ
79ka ayau akica neni a ŋulu eyakasi nakiryonut
ŋina ka asecit ka atwanare,
ikitena iwon lorotin ŋulu ke ekisil.”
80Topolou ikoku togogoŋior alotau keŋ; kiboi iŋes anariet akitodol akoloŋit ŋina etoodikinere iŋes neni a Ŋisirael.
Ngakarimojong Interconfessional Bible © Bible Society of Uganda, 2008.