Mar. 8
8
Kisimuj Yesu ŋituŋa ŋalipyo ŋaomwon
(Mat. 15:32-39)
1Alorwa a ŋul, tocunakin nabo asepic ace ŋina alalan. Aŋuna amamukar ikes ibore ŋini nyamat, tonyarau Yesu ŋikeekasyomak tema, 2“Ekesyon ayoŋ asepic, anerae ikiruk ka ayoŋ ŋirwa ŋiuni emam ibore ŋini nyamat. 3Nai kemyek ayoŋ ikes toloto lorerya enyamit akoro, ilelenyi alorot, aŋuna eponitotor ŋice aneni alwanan.” 4Kiŋita ŋikasyomak keŋ Yesu temasi, “Ai eryamunotor ŋamugati ŋuna itemokin ŋituŋa lu daadaŋ analoŋisat a na?”
5Kiŋit Yesu ikes tema, “Ŋamugati ŋayai iyakatar iyes?” Toboŋokis ikes temasi, “Ŋakanikaarei.”
6Tolimok Yesu asepic akiboikin; tolemu ŋamugati ŋunakanikaarei, tolakar neni ka Akuj, tonyilinyili, inak ŋikeekasyomak, tokorakis lotuŋa. 7Ayakatar nabo ŋikasyomak ŋikolya ŋidikudyo ŋulu cicik. Kilipak Yesu ŋulu daŋ tema, “Tokorakisi lotuŋa.” 8Kimuja ikes kimwoko; tocunakis ŋikasyomak ŋapiyanunet, kilelebun ŋaditae ŋakanikaarei. 9Arae ŋituŋa ŋulu emujete ŋalipyo ŋaomwon. Tolimok nai Yesu ŋituŋa alosit lorerya kec. 10Ekaku a ŋun, todokasi Yesu kaapei ka ŋikeekasyomak nataker, toloto tari nakwap ŋina anyaritae Dalamanuta.
Kiitana Ŋiparisayon akujuwuanut aneni a Yesu
(Mat. 16:1-4)
11Potu Ŋiparisayon ŋice neni a Yesu, togeut akitepeg iŋes; aŋuna acamitotor alokun iŋes. Kiitana akujuwuanut ŋina itoodiunit atemar ebunit iŋes aneni ka Akuj. 12Kieŋak Yesu nooi tema, “Nyo ecamitor anyamet na akujuwuanut? Akalimokini ayoŋ iyes kire atemar, emam akujuwuanut ace ŋina itoodikinio iŋes.”
13Kimyek nai iŋes ikes a nen, torotok todoka nabo nataker, tolot ekekwaye anam.
Ŋakinyalet ŋuna a Ŋiparisayon
(Mat. 16:5-12)
14Kebu kimuryak ŋikasyomak akiya ŋamugati ŋuna itemokino; ayaito ikes amugati apei bon nataker. 15Kicik Yesu ikes tema, “Tocoikinito ŋakinyalet ŋuna a Ŋiparisayon ka ŋuna ke Erode.”
16Kirworikinos ikes make temasi, “Irworo iŋes ŋun, aŋuna emamukatar iwon ŋamugati.”
17Ayeni Yesu ŋakiro ŋuna erworosi ŋikasyomak, tosodi nai kiŋit ikes tema, “Nyo irworotor iyes ibaakatar emam ŋamugati iyakatar? Eriŋa iyes nyeanyuna ka nyeyenuna a? Eninik ŋakusitameta a? 18Ikwapei eyakatar iyes ŋakonyen, nyiteete a? Ikwapei eyakatar iyes ŋaki, nyipupete a? Ka nyitamunito mono iyes, 19apaki ŋina anyilinyilia ayoŋ ŋamugati ŋakan aŋuna a ŋituŋa a ŋalipyo a ŋakan a? Ŋayai ŋaditae ipotu iyes kilelebikis ŋapiyanunet?” Toboŋokis ikes temasi, “Ŋatomon ka ŋaarei.”
20Kiŋit nabo Yesu ikes tema, “Ani bo ŋina paaran anyilinyilia ayoŋ ŋamugati ŋakanikaarei aŋuna a ŋituŋa a ŋalipyo a ŋaomwon, ŋaditae ŋayai ipotu iyes kilelebikis ŋapiyanunet?” Toboŋokis ikes temasi, “Ŋakanikaarei.”
21Kiŋit Yesu ikes tema, “Eriŋa iyes nyiirara a?”
Kitaŋaleu Yesu emudukanot alo Betesaida
22Ani edolunete ikes Betesaida, yaut ŋituŋa ŋice emudukanot neni a Yesu, kimaimaa ikes iŋes temasi, “Totap iŋes.” 23Kikamu Yesu emudukanot akan, toriko nawae ere, kimwaak ŋakimul nakonyen keŋ. Kidokok ŋakeekan kidiama keŋ, kiŋit iŋes tema, “Ite iyoŋ idiobore a?”
24Kireo emudukanot kidiama tema, “Ete ayoŋ ŋituŋa; ikote ikes ŋikito, nai elosete.”
25Totapak nabo Yesu ŋakeekan nakonyen ke emudukanot. Tojokut jik ŋakonyen, toanyuwa iŋes ibore daadaŋ ileere. 26Tolimok nai Yesu iŋes tema, “Tolot jik lore kon, nyitor nabo Betesaida.”
Toboŋok Petero Yesu tema, “Irae iyoŋ Kristo”
(Mat. 16:13-20; Luk. 9:18-21)
27Torotokis Yesu ka ŋikeekasyomak tari lorerya ŋulu a Kaisaria Pilipi. Kiŋit iŋes ŋikeekasyomak alorot tema, “Ebasi mono ŋituŋa ŋae ayoŋ?”
28Toboŋokis ikes temasi, “Ebasi Yoana Ekebatisan, nai ebasi ŋice Eliya ka ŋice ebasi epei alokadwarak.”
29Kiŋit iŋes ikes nabo, “Ani bo iyes, ibasi ŋae ayoŋ?” Toboŋok Petero tema, “Irae iyoŋ Kristo.”
30Kicik Yesu ikes nyiteyenut iŋes idiotuŋanan.
Kirwor Yesu ŋuna ka atwanare ka ayarun keŋ
(Mat. 16:21-28; Luk. 9:22-27)
31Togeu Yesu akitatam ŋikeekasyomak tema, “Isicanio Lokoku a Ituŋanan nooi ka eŋerete iŋes ŋikatukok, ŋisacaradotin ŋulu apolok ka ŋiketatamak a Ŋikisila. Nabo earyo, nai kelunyar ŋirwa ŋiuni iteyarunio iŋes.” 32Erworo iŋes ŋakiro ŋun ileerete. Toriko Petero Yesu nawae, kiŋenyak iŋes nooi. 33Toboboŋ Yesu kiŋolik ŋikeekasyomak, kiŋenyak iŋes Petero tema, “Tolot aneni kaŋ, Satan, anerae ŋatameta kon nyeponito aneni ka Akuj, nai eponito alotuŋa.”
Etyono aruwor ekewuapan ŋolo a Kristo
34Tonyarau Yesu asepic ka ŋikeekasyomak, tolimok ikes tema, “Ŋinituŋanan ecamit akiwuapakin ayoŋ, itemokino iŋes toŋero bon, toryoŋ emusalaba keŋ ekewuapak ayoŋ. 35Ituŋanan ŋini ecamit aiun akiyar keŋ, itotwaniari, nai ŋini itotwaniyari akiyar keŋ aŋuna kaŋ ka aŋuna a Ŋakiro a ŋuna Ajokak, eiuni. 36Alipoida eryamuni ituŋanan erae keŋata akwap daadaŋ, ido kitotwaniya akeekiyar? 37Nyo epedorya ituŋanan akisyeca akeekiyar? 38Anerae ŋinituŋanan irumete ŋileec aŋuna kaŋ ka aŋuna a ŋakaakiro ananyamet a na a ŋina aloman ka a ŋina asecesecan; Lokoku a Ituŋanan daŋ irumete ŋileec aŋuna keŋ apaki ŋina eboŋunio iŋes ka apedor a Papa keŋ kaapei ka ŋimalaikan ŋulu ka Akuj.”
Ngakarimojong Interconfessional Bible © Bible Society of Uganda, 2008.