YOHANET 13
13
Yesùt en agoromì inesok obakwe sobalinapike wene
1Nen, hùenkwe pesta Paskah a'nogo mene nùogolùk logolìk, at Yesùt en,
“An apùnì o kweangma yoma hisalak nopase oba napotkwe lagagin atì arat hakok i waga,” ìlùk, at elu welagaike. Nen, at okawerek agoromì kweangma mene etaùken hutik welagaikesik, hobuk inebe abìt agì'lek etaùken hutik motogat welagaike. 2Logolìk he, at agoromì amanogo inom o hùako sùpùrùk omakìma nikenem, Yùrat, Simon Isikariot aput a'nogo, a'la Ibilit kisikesik he, Yesùt ebe wasuak en he,
“Yoko lan o,” ìlùk a'la kagalhike. 3Atì'nogo a'la kagalhikomo, at Yesùt a'la nen he,
“Nopase nen yì mene tì mene obogat an neki ba hikomo werek akìgì. Nen, an nebe Ala were'ma nen pi wagagisik, hobuk napotkwe at oba lagagin akìgì,” ìlùk elu welagaikeat. 4Atì'nogo elu logolìk, sùpùrùk nìkì lagaikesik ebe melagaikesik he, asu ebe laberek mene nokologo hìlìk he, su kume warìk inoba amusu tetarek mene wanhìkesik oake hele pùk hogo isike. 5Atì'nogo isikesik he, sogoloak lemek mene ba i keralogo kelakhesikesik he, at agoromì ane wanhì lagaukwa mene amanogo inesok obakwe sobalinapikesik he, su oake hele pùk hogo isike a'nogo ba amusu horinabìk lagaike. 6Atì'nogo hagarìk laga lagaikesik, hùlì at Simon aike etage Peterùt a'nogo oba asi waganem he, at en he, mel yogosike:
“Noe, hat Hetagepogot en an nesok obakwe sobaligìlùk? Mea o,” ìlùk yogotì lagaikomo, 7at Yesùt en he, mel yogosike:
“Nagot e. An hagatì yì, ebe kì'nogo mene he, hat hokot o. Meneat he, hobuk en helu asigin o,” ìlùk yogotì lagaikomo, 8at Peterùt en he, mel yogosike:
“Noe Hat en an nesok obakwe sobalnabusak motok lek o!” ìlùk yogotì lagaikomo, at Yesùt en he, mel yogosike:
“An nen hat sobalhabusak lek halok he, hat hebe an esewerek logogin lek o,” ìlùk yogotì lagaikomo, 9at Simon Peterùt en he, mel yogosike:
“Atì halok he, noe. Nesok obakwe nek sobalnapùn o. Neki mel, nùkùloak mel, obogat sobalnabin o,” ìlùk yogosikomo re, 10at Yesùt en be, mel yogosike:
“At sa nen, ebe kume arat warek werek halok, at ebe sobalek motok werek atì nen he, hobuk sobalusak mea o. We, esok enek sobalusak elok o,” ìlùk yogosikesik, it obogat yogoisìkì logolìk he,
“Hit atì'nogo sobalek motok welagep meneat he, hinebe obogat sobalek welagep hùk. Aike sobale'lek werek o,” ìlùk, yogoisasike. Wene atì'nogo yogoisasike atì re, at a'la nen he,
11“At atì nen an nebe noasuagalùk yoko legein,” ìlùk elu logolìk nogo nen he, mel yogoisasike:
“Hit sobalek motok welagep meneat he, hinebe obogat sobalek welagep hùk. Lek o,” ìlùk yogoisasike atì. 12Ati'nogo inesok obakwe arat sobalinapikesik he, asu nokologo hesike mene a'nogo labesikesik, apotkwe hùrek welagaike ba hù'lagaikesik he, mel yogoisasike:
“An nen hit hagathinapì atì hùthegep a? Lek a. 13Nen, hit en an yogonetì logolìk he,
Ninoe Etagepogot wene yakùlnisegetek mene, ìlùk yogonetì lagep atì re, an nebe hinoe Netagepogot wene yaktùlhisìgìrek mene eberogoat halogat ìkì lagep o. 14Atì'nogo, an nebe hinoe Netagepogot wene yakùlhisìgìrek mene nen hit hinesok obakwe sobalhinapì halok he, hit en atì'nogoat hit-hit hinesok obakwe sobal-sobal ìkì logousak o. 15An nen hit hagathinapì atì hak, hit en an noabùt waganogo atì'nogoat hagatì logouageip en ìlùk yakùlhisìgì o. 16Wene aike yì yogohìsak:
Ap kain aike inawe a'ma negen werek kolek, at atitigeke mene esin negen welagarek lek o. Atì hak, ap yoko laksikerek mene inawe a'ma negen werek kolegat he, at yoko lagarek mene atì esin negen welagarek motok lek o, ìlùkk eberogoat yogohisìgì. 17An nen wene yogohisìgì atì hinelu arìk hagatì logogun halok he, hina'la hai hakìkì logogun o.
18 # Mzm.41:9=TB 41:10 “An nen wene atì hit hinebe obogat hesik yogohisìgì hùk. Lek o. Hit yì an nenat hinebe wenakhinapigi mene nelu meneat he, wene atì hesik Ala ane ba mel ìlùk helal waganogo hesukwa:
Ap aike sùpùrùk neperak omakima nìkì lago mene yì nen weaga'nabigìlùk melaga o,
ìlùk isukwama helal waganek werek atì sùge asigin lek. Ebeat asigin o. 19Wene atì hobuk arat eberogoat haga'laga halok,
At esok motok welagarek mene a'nogo arat o, ìlùk hùthanuageip en ìlùk, yogotak wene atì oan haga'lagì'lek werek kolek abok yogohisìgì o,” ìlùk yogoisasikesik he, wene aike mel yogoisasike:
20“At sa nen, apùnì an nen laksegein mene woginape halok he, anat wo'nabigin o. Nen, at sa nen an wo'nape halok he, at an lakhani wagaike mene a'nogoat wanigin o, ìlùk eberogoat yogohisìgì,” ìlùk yogoisasike.
Yesùt en Yùrat hagasigin mene elurogo yogosike wene
(Mat.26:20-25; Mrk.14:17-21; Luk.22:21-23)
21At Yesùt en, wene atì'nogo arat yogoisasikesik oba nen, at a'la weak agaikomo, ane pak hogoat mel yogoisasike:
“Hit ap hinebe ya mene aike nen an nebe noasuagalùk yoko legein o, ìlùk eberogoat yogohisìgì,” ìlùk yogoisasike. 22Atì'nogo yogoisìkì lagaikomo, it en he,
“Atì sa nen hagasigin mene ike,” ìlùk inoake palagaikesik he, ineileken aike nen aike lakhìgìk, isukwa. 23Atì'nogo la'-lak iko kolek he, it at Yesùt ane wanhì lagaukwa mene aike at etaùken hutik mene era'lu horok hogo hùrek welagaike. 24Atì'nogo hùrek were'ma, ap Simon etage aike Peterùt egarek a'nogo nen eki tùm pìlìng ap a'nogo yogotì logolìk he, mel yogosike:
“Ap sa hesik ìkì lagen, ìlùk, oba hinok wanin o,” ìlùk yogosikomo, 25ap a'nogo hobuk at Yesùt era'lu horok hogoat hìgìilha lìlìk he, mel yogosike:
“Noe, atì sa hesik egen nogo?” ìlùk yogosikomo, 26at Yesùt en he,
“Ebe re, an nen sùpùrùk horoti mene i magasogo nen wogosigin atìat o,” ìlùkk isikesik he, sùpùrùk horoti a'nogo i magasogo wanhìkesik he, Yurat, Simon Isikariot aput a'nogo wogosike. 27Atì'nogo wogosikomo, at Yùrat sùpùrùk horoti mene a'nogo ekim wanho kolek aremnogoat a'la Ibilit kisike. Atì'nogo kisikomo, at Yesùt en yogotì logolìk he,
“Hat en hagasigìlùk akegen mene atì hepogat hagasin o,” ìlùk yogosike. 28Atì'nogo yogotenem, it hùrek logolìk sùpùrùk nìkì lagaukwa mene amanogo nen he,
“Atì nìkì'nogo mene hesik at Yurat yogote he,” ìlùkk hùthìgì'lek wongothasukwa. 29Atì'nogo hùthìgì'legat logolìk, at Yùrat atì agaiya'lak inom inauang awìka hesogo welagaresi'mo nogo nen he, mel akasukwa:
“Yesùt en nit pesta hagasusak hesik yì mene tì mene oko pali loagalùk yogote he a? Ì a, at he, apùnì inagarok lek mene uang aike omakìtek sùpùrisa loagalùk yogote he a,” ìlùk ina'la akasukwa. 30Atì'nogo akiko kolek, at Yùrat sùpùrùk horoti mene ekim wanhike mene a'nogo wolok he, o motok hùako agaikesi'mo eta'ma pìkìt wùlìpike.
At Yesùt en wene ket mene yogoisasike wene
31At Yùrat atì'nogo arat wùlìpikomo logolìk, at Yesùt en he, mel yogoisasike:
“Nagoromì. An abat ta'lasi wagagi a'nogo Ala nen esinethanhenem, apùnì nen Ala hogorasugun oba yogotak arat asi waga o. 32Nen, an nen hagasigin atì ba Ala hogorato halok, at okawerek ebe hogoratarek atì hak, an neperagat hogo'ninapì logouagalùk, at an hepok esinethanigin o. 33Nagainapùrì. An neki hamùlùgat enek ninom logopik en legein o. Lamo, hit en an nebe hera'napì logogun meneat he, alebat an nen ap Yahuri mane yogoisasigi hak, o an legeinmo atoma hit en hera'nabìk logoin lek o, ìlùk, yogotak hit yogohisìgìat o,” ìlùk yogoisasike. 34Atì'nogo yogoisasikesik, wene aike mel yogoisasike:
“Hit en hagatì logousak mene wene ket mene aike yogohisak:
An nen hit netawìrogo welagìrek atì hak, hit atì'nogoat, hit-hit netawì-hetawìrogo hagatì logoino o. 35Hit-hit atì'nogo netawì-hetawìrogo hagatì logogun halok, it apùnì obogat ineileken hisìlìk,
It yì Yesùt agoromì eberogoat hìgì, ìlùk inelu asugun o,” ìlùk yogoisasike.
At Yesùt en Peterùt hagasigin mene elùrogo yogosike wene
(Mat.26:31-35; Mrk.14:27-31; Luk.22:31-34)
36Yesùt en atì'nogo yogoisìkì lagaikomo, ap Simon etage aike Peterùt egarek a'nogo nen he:
“Noe. Hat o koma lagalùk en egen,” ìlùk, yogosikomo, at Yesùt en he, mel yogosike:
“An legeinmo atoma, hat nopolik lopok hogo legein lek o. We, hobuk nopolik wesigin o,” ìlùk, yogotì lagaikomo, 37at Peterùt en at oba hinok wokhìkì logolìk he,
“Noe. An hat hesik wa'lasusak welagì meneat he, hat en he, yogotak an nopolik wesusak mea egen atì nenahalok,” ìlùk yogotì lagaikomo, 38at Yesùt en he, mel yogosike:
“Hat an hesik eberogoat wa'lasusak welagen a? Lek o. Sùe ayam ane ìgì'lek werek kolek, hat en,
An Yesùt nokot, ìlùk heki hìnagan oba labelì'mo nen ayam ane igin o, ìlù eberogoat yogohetì” ìlùk yogosike.
