YOHANET 3
3
Nikotemùt Yesùt oba wagaikesik eperak weneane isukwa wene
1Apùnì Yahuri mene inoe kain ap Parisi mene inawene hesogo welagaike mene aike etage Nikotemùt. 2At ap atì o hùako ineki aike sapùl Yesùt oba wagaikesik he, mel yogosike:
“Noe. Ap aike Ala eperak hutik lek halok he, hat en elalin mene hagarìk nìkì lagen atì hak, hagasusak motok mea. Atì nen he, hat en wene yakùlnisoagalùk Ala nen lakhagei wagama wagen ìlùk ninelu aga,” ìlùk yogosike. 3Atì'nogo yogosikomo, at Yesùt en he, mel yogosike:
“Apùnì Ala nen inebe hobuk inapotkwe taginapì'lek halok he, at awe a'ma hisikere'ma atoma ineileken hogoin motok lek o, ìlùk, nane eberogoat yogohetì lagì,” ìlùk yogosikomo, 4at Nikotemùt en he, mel yogosike:
“A! Apùnì inalùge ba nen nìkì'nogo hobuk taginabusak akegen. Inagosalak ina'la kìlì'mo nen hobuk elok taginabusak nogo? Mea o,” ìlùk, yogosikomo, 5at Yesùt en he, mel isike:
“Apùnì i ba mel, Ala Areagùn nen mel, taginapì'lek halok, Ala nen awe a'ma hisikere'ma atoma kugun motok lek o, ìlùk, nane eberogoat yogohetì lagì. 6Nen, apùnì nen taginaparek atì, apùnìat ta'lagaikarek o. Nen, Ala Areagùn nen taginaperek atì, Ala Areagùn meneat ket ta'lagaikarek o. 7Hit hinebe lopok hobuk hinapotkwe ket ta'lasusak, ìlùk yogohetì atì nen,
Egi! Nayùk e, ìlùk, halabut hìtùn o. 8Sogoi atì, we, abusagat yùgùnat hunhikenem he, ane nek hasuk holhetek meneat he, ebe re, koma nen heat wìrì'logo. Nen, komakwe heat lìlì'logo. Hokot atì. Atì hak he, apùnì Ala Areagùn nen inebe lopok atì'nogoat taginaperek o,” ìlùk yogosike. 9Atì'nogo yogosikomo, at Nikotemùt en he, mel yogosike:
“Wene egen atì nìkì'nogo hagarinabusak en egen,” ìlùk hinok wokhasikomo re, 10at Yesùt en he, mel yogosike:
“Noe. Hat hebe re, apùnì Yahuri mene wene yakùlisegetek meneat he, an nen wene yogohetì atì hùthegen le'ma hìgì. Ì a? 11Nit en wene ninelu meneat yogohisìgìk, nineileken hogo meneat eberogoat ìlùk, pìlìngìrogo yogohisìgìk, ogorek meneat he, ninane atì holhì'lek hinobaken nene hagatì lagep ìlùk, nane eberogoat yogohetì lagì. 12An nen wene kweangma mene hesik yogohisikenem he, hit en eberogoat ìlùk hùthìkì lagep lek halok he, wene pogot oba mene hesik yogohisamo hobuk nìkì'nogo nen wene atì eberogoat ìlùk hùthogoin akegep. Hùthogoin motok lek o,” ìlùk yogosike. 13Atì'nogo yogosikesik he, mel yogosike:
“Ap aike kweangma nen pogot oba motok lagagì'lek. We, an pogot oba nen abat ta'lasi pi wagagi a'nogoat o.
14-15Nen, ap Musa o leimo apùnì le'ma atoma logolìk, walo hake hagarogo e ba menhesike atì hak, it apùnì yoma inetaùken an abat ta'lasi wagagi mene yì noba hìpìrethogoin mene hùgì, inebe lopok ineluk motok logouagalùk, an atì'nogoat menhanusak obaat menhanugunat o. 16Yì apùnì tì apùnì Ala etawì motok en, inetaùken an noba hìpìrethogoin mene hùgì inebe lopok wa'la'lùk he, nongagì'lek ineluk motok logouagalùk, aput an nebe omakeat tago mene wogisasike. 17Nen, an Ala aput kweangma yoma lakhani wagaike atì re, yì apùnì tì apùnì ùkùm inoba hìlìk weagarinabuagalùk lakhani wagaike hùk. We, inebe telinabuagalùk lakhani wagaike o. 18Halok, sa nen etaùken an noba hìpìrethiko halok he, Ala nen ùkùm oba hìlìk weagathegein lek meneat he, an nen etaùken an Ala aput omakeat tago mene yì noba hìpìrethìgì'lek atì nenat, weagathegein mene ùkùm arat oba hikomo werek o. 19Nen, Ala nen ùkùm inoba hikerek atì re, ebe yì'nogo. An nen lìa hagarinapìrek mene nebe arat kweangma pi wagagi meneat he, apùnì inoabùt weak hagatarek atì nen he,
At lìa atì ninabìt o. At he, o mùm atìat walok, ìlùk ina'la akagarek. 20Nen, it apùnì weak hagarì'lùgì mene inebe lopok ina'la nen akìkì logolìk he,
Nit lìa atì ba logoin halok, nit weak hagatorek mene hukalarìk weinam asinogo, ìlùk, akagaresik, an lìa mene yì inapsìrì nen he, noba wagì'lek kamo egarek. 21Atì'nogo ina'la akagarek meneat he, it aike inoabùt higit hogo hagarì'lùgì mene hùgì inebe lopok, ina'la akìkì logolìk he,
Ala ninom hutik logolìk yì'nogo hano hagatì lagoma, ìlùk, weinam asuagalùk, an lìa mene noba wagaikarek o,” ìlùk yogosike.
Yohanet en Yesùt abok pak hogo yogoisasike wene
22Atì'nogo arat yogo'lùk he, hobuk at Yesùt ebe mel, agoromì ane wanhì lagaukwa mene mel, inom o Yurea pisukwasik, apùnì ima pelaginapì logolìk ineki hamùlùgat negen welagaukwa. 23-24Atì'nogo hagatì lagaukwa atem sat he, Yohanet eki hele warogo o ineki hele warek hisagarek oba oan kelakhìgì'le'ma logolìk he, o etage Ainon o Salim era'lu atoma i apik atì nen apùnì ima pelaginabuagalùk, oba waganem he, ima pelaginapì lagaikeat.
25Atì'nogo ima pelaginapo were'ma, at Yohanet agoromì ane wanhì lagaukwa mene mel, it ap Yahuri mene aike mel, inom, it apùnì Yahuri mene nen yì mene tì mene oba sobalogo nek hagataresi'mo nogo nen he, wene atì hesik apik palhì lagaukwa. 26Wene palhì lagaukwasik, Yohanet oba lagaukwasik he, mel yogosukwa:
“Noe. Ap aike hat heperak i Yoretan aik ìlì bakwe logolìk, at hesik abok pìlìngìrogo yogonisasigin mene a'nogo nen ima pelaginapenem apùnì inebe obogat at oba wìrì'lùgì o,” ìlùk, yogosukwa. 27Atì'nogo yogosukwama, at en he, mel yogoisasike:
“Ap sanì. Nagoromì. Ap aike Ala nen yogotì'le'ma, at okawerek a'la nen kagalogo elok hagasusak mea o. 28Ap atì nen apùnì telinabuagalùk Ala nen ayoko hìlìk lakhei wesigin isike a'nogo re, an he, lek meneat he, at hobuk wesigìlùk an alebagìk lakhani wagama wagì o, ìlùk, yogohisikenem hit arat hinasuk holhì lagagip akìgì. 29Nen, ap aike agwe ìkhike halok, he atì agùn, ap atìat o. Nen, ap agwe ìkhegein werek atì agaiyak aike era'lu metek logolìk, at ane ikenem asuk hologo logolìk a'la nen hai hakikerek atì hak, an yogotak atì'nogoat na'la hai apik hakìkì lagì o. 30Ap atì etagewerek asusak obaat etagewerek agìk, an netage lek asusak obaat, netage lek agìk, igin o,” ìlùk yogoisasike.
Pogot oba nen pi wagaike mene wene
31Nen, apùnì obogat he, inetage lek enek. We, at po a'loma nen pi wagaike mene atìat kain etagewerek o. Ap aike ebe kweangma nen tago mene halok, ebe kweangma meneat ma, wene kweangma meneat ikerek o. It apùnì obogat inetage lek negen werek kolek he, ap aike pogot oba nen pi wagaike mene atìat esin etagewerek o. 32At eileken hasike mene mel, asuk holhike mene mel, pak hogo yogoisiko kolek meneat he, it apùnì obogat en he, at en wene pìlìngìrogo yogoisikerek mene atì, inobaken nene heraksìlì'lùgì o. 33Atì'nogo heraksagarek meneat he, it apùnì aike nen he,
At en wene pìlìngìrogo yogonisikerek mene atì eberogoat ìlùk wìlì'lùgì mene hùgì nen he, Ala ane atì eberogoat ìlùk wanharek o. 34At Ala nen lakhei wagaike mene atì, Ala Areagùn amùkwì agì'lek motogat wogosike atì nen, Ala aneat yogonisikerek o. 35At opase nen aput ebe etaùken hutik logolìk, yì mene tì mene obogat at esewerek logouagalùk wogosike. 36Halok, sa nen etaùken Ala aput oba hìpìrethìlì'logo halok, ineluk logogun mene ese agasik werek o. Meneat he, sa nen, at aput atì ane holhì'lek obaken nene heraksìlì'logo halok, ineluk motok logogun mene atì ese asigin lek. We, Ala a'mage oba hìlìk logogin o.
