LUKAT 21
21
It apùnì ineilmo Wùlalhak mene mel, he sage eilmo lek mene mel, inom en uang Ala hesik hisasukwa wene
(Mrk.12:41-44)
1At Yesùt en atì'nogo yogoisasikesik, elokwe lagak hogo eileken yerisasike hak, it apùnì ineilmo wùlalhak mene aike uang Ala hesik peti a'la hisagarek oba kelapenem eileken yerisek welagaike. 2Yerisek were'ma, at he soge eilmo lek mene aike wagaikesik he, uang sen motok hamùlùk mene pìre kelapenem eileken hasikeat. 3-4Atì'nogo kelapenem eileken yerisasikesik he, apùnì mel yogoisasike:
“It apùnì inauang api'mo oba hilarogo hisaga atì, hamùlùgat negenat o. Meneat he, at he soge eilmo lek mene atì hamùlùgat apùrùk oko palogo nasak mene obogat hisike atì nek he, motok apik negenat hisike o, ìlùk eberogoat yogohisìgì,” ìlùk yogoisasike.
“Ala awì wùrìk apùnì nen motok mesalugun o,” ìlùk yogoisasike wene
(Mat.24:1-2; Mrk.13:1-2)
5Ati'nogo yogoisasikesik, Ala awì helep elokoken hano wusukwa mene mel, o eil lebelogo yì mene tì mene Ala hesik hisasukwa mene mel, ineileken hìrogo logolìk hogoratenem, at Yesùt en he, mel yogoisasike:
6“Hit o hineileken lakhìkì lagep aroma, hobuk helep aike hebìgì'lek motok mesalogo laksogoin oba werek o,” ìlùk yogoisasike.
“Alebagìk tì'nogo weak hagathinabugun,” ìlùk yogoisasike wene
(Mat.24:3-14; Mrk.13:3-13)
7Wene atì'nogo yogoisasikomo, it en, at Yesùt oba hinok wokhìkì logolìk he, mel yogosukwa:
“Noe! Wene yogonisegen a'nogo re, mera nen haga'lasigin. Ebe haga'lasigìlùk iko kolek he, kì mene tak haga'laganem ninetaùken wekelasigin,” ìlùk yogosukwama, 8at Yesùt en he, mel yogoisasike:
“Apùnì nen lalhinabinogo nen he, hinoabùt hebelogo logoino o. Apùnì inebe apigat en, inetage an netage mene salogo nen mel ìlìk wesugun:
At wesigin isukwa a'nogo an nebe wagì yìat o, ìgìk,
Haga'lasigin a'nogo arat hakok i waga, ìgìk, ìlìk wesugun a'naga, it atì inane hinasuk holhìlìk inopolik lagùp o. 9It aike nen,
Weim yabì'lùgì, ìgìk,
Inebe omakeat mene nen holim hìbìrogo mùk hogo wulaksìlì'lùgì, ìgìk, ìlùk iko halok he, hina'maken lìlìk hinetaùken abolok ùgùp o. Emakum agìk atì'nogo haga'lasigin meneat he, o wùrep oba haga'lasigin mene atì re, hepok haga'lasigin lek o,” ìlùk yogoisasikesik he, 10wene aike mel yogoisasike:
“Apùnì inùkùl etage lopok weim kagalhìk, ap inetagepogot inagoromì inawe a'ma mene lopok weim kagalhìk, kagalhìlìk yapo kolek, 11lugul hùko inayùk mene langathìgìk, o yì awì tì awì sùpùrùk motok no agìk, ou oabùt weak mene inoba agìk, yì mene tì mene inayùk mene haga'lagìk, pogot oba nen hagasusak lek mene elalagìk, igin o.
12“Mene re, atì obogat oan haga'lagì'lek werek kolek he, emakum agìk he, apùnì nen hinebe hakhikìlik, yì aik tì aik hagathinapìk, o sapan egare'ma wokhisek lagìk, hele warogo hisagare'ma kelakhikìgik, ap inetagepogot mel, ap kain gubernur lak mel inoba wokhisek lagìk, ugun atì re, it en he, an netage ìkì logolìk,
Hit at agoromì, ìlùk atì'nogo hagathinabugun o. 13Atì'nogo hagathinabugun atì ba re, an hagatenem hineileken nììkì lagep mene yì abok pak hogo yogoisoagalugat hanoasuak haga'lasigin o. 14-15Atì sat he, hit en wane oko yogoisogoin mene, an nen hina'la kagalogo yogohisamo re, it ùkùm hinoba hogoin mene atì nen,
Hit hinane atì lek o, ìlùk oko usak lek asigin. Atì nen he, oan hagathinapì'lek werek kolek, hit hina'la nen,
Wena atì'nogo mene noba hiko halok, nebe elele helagalùk he, oko ki mene yogoisegein, ìlùk hinalabut hìtì'legat logoino. 16Nen, hinopase hinagosalak en, hinogogì hjnagoromì nen, hinagaiya'lak en, hit wokhisek he, o ùkùm inoba hìgìk, kotìk, egarek oba hika lagìk, hinebe aike motok hinoatìk, ugun o. 17Nen, it apùnì obogat en he, an netage ìlìk,
Hit he, at agoromì, ìlùk hinebe inabìt motok hikogoin. 18Meneat he, hinebe nong asugun lek, u hak he, hinesi hinùkùloa'ma atoma omakeat halok aike nalasigin motok lek o. 19Halok he, hinetaùken hapuguthakìlìk he, hinepe morogoat logogun halok he, nabùlal-habùlal helogoin o,” ìlùk yogoisasike.
O Yerusalem apùnì etakwe mene nen sebelugun isike wene
(Mat.24:15-21; Mrk.13:14-19)
20At Yesùt en atì'nogo yogoisasikesik, wene aike mel yogoisasike:
“It ap tentara mene nen o kota Yerusalem arì motok yùka wùrogo hebaga halok he,
O larogo wùlì talogo ninoasugun a'nogo arat hakok i waga hìgì o, ìlùk, hina'la akano. 21-22Atì sat he, yì'nogo haga'lasigin, tì'nogo haga'lasigin, ìlùk, it ap Ala ane helal waganogo hesukwa mene amanogo nen isukwa atì eperak higit asuagalùk he, apùnì weak hagarì'lùgì mene ùkùm yogotak ya ba wogisegein atì nen, hit o Yurea ya ta logogun mene halok, tom oba hese lagagìk, o Yerusalem logogun mene halok, o kota heraksalùk hese pùugùlhìk, ini o. Nen, o etakwe ìgawìla logogun mene halok he, a kota ki wagùp o. 23Atì sat he, o yoma motok wiik-weak hogo hagarinapìk, Ala a'mage apùnì yoma inoba hìgìk, haga'lasigin atì nen he, it hìmì omalik ina'ma mene mel, ineagwì ketago ineilak wogisìlì'lùgì mene mel, weak hogoin atì eigo! Netawìlak e! 24Apùnì heta re, karok oba inoatìk, heta re, hele warogo o yì awì tì awì hisa lagìk, ugun o. Nen, o kota Yerusalem arì, apùnì etakwe mene inesok en al lebelogo hìlìk, o sebeli ki wìrìk logogun meneat he, motok sebelek logogun lek o. We, Ala nen,
It apùnì etakwe mene, o Yerusalem hùlì tì hùlì baat sebelek logogun, ìlùk akasike higit hogoat logogun o,” ìlùk Yesùt en yogoisasike.
“An abat ta'lasi wagagi a'nogo hobuk wesigìlùk iko kolek, tì'nogo haga'lasigin,” ìlùk yogoisasike wene
(Mat.24:29-31; Mrk.13:24-27)
25At Yesùt en atì'nogo yogoisasikesik he, hobuk aike mel yogoisasike:
“Hinetaùken wekelogo re, mo mel, tùgì mel, hesagal mel, atì hùnogoat mene elalaganem hogoin o. Nen, kweangma yoma i laut moge hùko yekelek welagarek a'nogo ha'labu omamerogo waga logolìk he, i eitep ane hùkorogo ìkì logoumo re, it apùnì inùkùl etage lopok inayùk arìk inalabut hisigin o. 26Nen, pogot oba inomame apik mene inabologothìkì logoumo, apùnì nen he:
Yì haga'lagìk, tì haga'lagìk, igin a'nogo arat haga'lasigin hìgì, ìlùk inayùk en inetaùken motok lek asigin o. 27Atì sat he, an abat ta'lasi wagagi a'nogo nomamerogo ohena a'la pi waganem, ineileken nììlìk apik hogo'nabugun o. 28Wene obogat haga'lasigin ìgì atì, elopit ero ba werelaga halok he, hit hina'la nen he,
Telninabigin a'nogo arat horok asi waga o, ìlùk, hinebe melarìk hinot leguogo logoino,” ìlùk yogoisasike.
Wene e ara oba lìrogo yogoisasike wene
(Mat.24:32-35; Mrk.13:28-31)
29At Yesùt en atì'nogo yogoisasikesik he, wene aike oba lìrogo mel yogoisasike:
“Yì e, tì e mel, e ara mel, hagaterek a'nogo hùtheni! 30E atì eka lologo pikeresik hobuk sabelho halok he,
Yogo. O yogotak hìbì asigin hìgì, ìlùk hinabusagat hina'la nen hùthegesep akìgì. 31Atì hak he, an nen,
Yì'nogo haga'lasigin, tì'nogo haga'lasigin, ìlùk yogohisìgì a'nogo ebe haga'laganem hineileken hìlìk hina'la nen he,
Ala nen awe a'ma hinegein a'nogo arat horok asi waga hìgì, ìlùk hina'la akano. 32Yì'nogo haga'lasigin, tì'nogo haga'lasigin, ìlùk yogohisìgì atì, apùnì o yogotak werek mene inebe aike lek agì'lek oan werek kolegat, obogat haga'lasigin o, ìlùk eberogoat yogohisìgì. 33Pogot mel, kweang mel, lek asigin meneat he, an nane atì lek asigin motok lek o,” ìlùk yogoisasike.
Inepe hebelogo logouagalùk inasuk wasike wene
34At Yesùt en wene atì'nogo yogoisìlìk he, aike mel yogoisasike:
“Yì mene tì mene isago werago hinalabut ning hogo nìkìk, i lùgùlùgì paluogolùk nekarek mene nìkìk, yì mene tì mene kweangma mene hesik wenesùgì uan horo ebetìk, atì'nogo hagarìk nìkì logolìk hinepe hebele'lek wonogat were'ma, 35paik sa'na nen al lebelogo waterek hak, an wene ìgì atì omake like hagatì logolìk, apùnì kweangma mene obogat motogat weagarinapì logolìk, hit hinom weagathinabinogo nen he, hinepe hebelogo logoino. 36Yì'nogo tì'nogo obogat haga'lasigin ìgì a'nogo haga'laga kolek he, hinomamerogo hinepe morogo logopik, hinekalì legat nelokoma metek were'ma, an abat ta'lasi wagagi a'nogo hisa wesik en he, ninhùp-nanhùp sapanat ìkì logolìk he, hinepe hebelogo logoino o,” ìlùk yogoisasike. 37Wene atì'nogo yogoisasikesik he, hobuk, at Yesùt o we ikenem Ala awì wùrì'mo, wene yakùlisìgìk, o hi ikenem tom Saitun punu ba sapan i lagagìk, ìkì lagaike. 38Atì'nogo ikenem, apùnì obogat amanogo at ane holuogolùk he, Ala awì wùrì'mo hùp siak hogo atogosi waga lagaukwa.
