LUKAT 24
24
Yesùt ebe eluk agaike wene
(Mat.28:1-10; Mrk.16:1-8; Yoh.20:1-10)
1Ineki sabìt oba Ala hesik welegat welagaukwasik, hùenkwe hari Minggu ba hùp siak hogoat it hìmì amanogo nen amusu tegelogo hesukwa mene amanogo wolok he, omoula warek hesukwa ba a'nogo wagaukwa. 2Wagaukwasik ineileken hìthasukwa re, omoula warek helep mene te'mek hogo yagarogo hesukwa a'nogo lìpìlogo lakhesukwama kwe hùrìk were'ma ineileken hasukwa. 3Hasukwasik, inebe omoulama ki lagaukwa re, at ninoe Etagepogot Yesùt warek ebe le'ma ineileken hasukwa. 4Warek ebe le'ma hasukwasik he,
“Yì ki'nogo haga'lagama,” ìlùk inoake palarìk wenesùgì ebetenem, ap inebe pìre inasu apipin apik mene laberogo, it hìmì ineilhanem aremnogo ka nen heat inera'lu melasi wagaukwa. 5Wagaukwama re, it hìmì amanogo inayùk en inot somarek were'ma re, it ap pìre aremnogo nen hìmi amanogo mel yogoisasukwa:
“Hit he, at eluk welagarek mene a'nogo apùnì warek mene welagaikare'ma nahalok heratì lagep. 6At ebe yoma lek o. Ala nen arat eluguthikomo. 7At alep hit hinom o Kalilea logolìk, mel yogohisasike mene a'nogo hina'la ebe'ni. At en he,
An abat ta'lasi wagagi a'nogo noasuagalùk nebe ap weak mene ineki ba hanumo, e ba menhanìlìk noasumo, neki pìre warek logopik he, neki aike nen neluk asigin o, ìlùk yogohisasike a'nogo hina'la ebe'ni o,” ìlùk yogoisasukwama, 8it hìmì amanogo hobuk wene Yesùt en yogoisasike mene a'nogo ina'la ebesukwa. 9Ina'la ebethùlùk, omoulama atoma nen inapotkwe ouma lagaukwasik he, it ap inebe 11 en amanogo mel, it inagaiya'lak he'nakìt amanogo mel, pìlìngìrogo yogoisasukwa. 10It hìmì amanogo inebe re, Maria awì Maktala mene a'nogo mel, Yohana mel, Maria Yakobùt agosa mel, hìmì he'nakìt amanogo inomat inebe obogat en pìlìngìrogo Yesùt agoromì laksagalùk inayoko hesike mene amanogo yogoisa lagaukwa. 11Atì'nogo yogoisa lagaukwa meneat he, it amanogo eberogoat ìlùk ina'la ebetì'lek. We, inapeliak ìlì'lùgì, ìlùk akasukwa meneat he, 12at Peterùt a'nogo nek he, siak hogo mel arìk, humusek omoula warek hesukwa ba a'nogo eileken ha wagaike. Wagaikesik ot soma ìlìk eileken kelakhasika mene re, we su kut mene a'nogo nek nokolek were'ma hasike. Atì'nogo were'ma eileken hìlìk he,
“Yì kì'nogo haga'laga. Nayùk e,” ìlùk alabut hìrìk ouma lagaike.
Ap inebe pìre Yesùt inom o Emaùt waga logolìk ebe ineileken hasukwa wene
(Mrk.16:12-13)
13O atì likeat he, Yesùt agoromì ane wanhì lagaukwa mene amanogo inebe pìre kota Yerusalem en o etage Emaùt atoma, we, 3 jam hake wagaikarek oba wesuogolùk wagaukwa. 14Waga logolìk he, yì mene tì mene obogat haga'lagaike mene amanogo abok pìlìngirìk wagaukwa. 15Wene abok pìlìngìrìk waga logolìk he, at aike nen, at aike yogotìk, at aike nen, at aike yogotìk, ìlìk waganem he, at Yesùt inagap hakha wagaikesik inomat wagaukwa. 16Inom wagaukwa meneat he, it ap aremnogo nen enagat hùthanogo ìlùk ineil apùnak salagaikomo re, ebe enagat hùthìgì'lek. 17Waganem he, at Yesùt en, it aremnogo mel yogoisasike:
“Hit heperagat ebekwe laga logolìk, wene nena wene ìlìk laga lagep,” ìlùk yogoisasikomo inelokoken sùmùrùmù arìk he, melagaukwa. 18Melarìk he, it aremnogo, at aike etage Keleopat en he, mel yogosike:
“Wene age yìat haga'laga atì, it ap pok o Yerusalem wìrìk elama hesik werek mene he'nakìt obogat inelu meneat he, hat yì nek he, hokot welagenma hìgì,” ìlùk yogosikomo, 19at Yesùt en he:
“Wene atì nìkì'nogo haga'laga mene egen,” ìlùk yogosikomo, it aremnogo nen he, mel yogosukwa:
“Ap etage Yesùt, awì o Nasaret mene atì, ebe Ala ane yogoisikerek meneat logolìk he, Ala eilhanem, nit apùnì obogat nineilhanem, wene yogoisìgìk, yì mene tì mene hagatìk, omamerogo ìkì laga meneat he, 20it ap Ala esewerek mene inogogì kaintek mel, nit ninogogì kaintek mel, inom en ùkùm oba hìlìk e ba menhìlìk wasuagalùgat ineki ba hagama wata o. 21Nit apùnì Isirael mene, at en telninabigin ìlùk nina'la akìkì lago meneat he, eigo! Atì'nogo arat haga'lagasi'mo nen, nineki pìre nogo ogo yì o. 22Nen, it hìmì nit mene aike nen nina'maken lasi lagaikaat o. It atì hùp siak hogoat warek omoulama haga ba wagaika mene re, 23warek ebe le'ma haga o. Ebe lek en ineileken halùk lagaikasik he, wene yogonisìkì logolìk,
Malaikat pogot oba mene nen he,
Lek o. At ebe eluk agama, ìlùk yogonisagama wago, ìlùk, atì'nogo egama nina'maken laga o. 24Nen, nit ninagaiya'lak he'nakìt omoulama warek haga ba atì ha wagaika mene re, ebe le'ma nen he,
Hìmì yogonisa lagaika a'nogo eberogoat hìgì, ìlùk, Yesùt ebe ineileken hìgì'lek lagaikaat o,” ìlùk Yesùt yogosukwa. 25Atì'nogo yogosukwama, at Yesùt en he,
“Eige! Hinebe kepù a? Ap Ala ane yogoisìkì lagaukwa mene amanogo nen wene obogat yogoisìkì lagaukwa a'nogo eberogoat ìlùk hit hepok hùthahùk welagep yì rì! 26At Karìsùt Ala nen ayoko hesike a'nogo, yì aik tì aik hìgì'le'ma hogorasusak nogo? Lek o. Hikenem en hogorasusak o. Hit en egep atì hagasusak higit hogoat hagata o,” ìlùk yogoisasike. 27Atì'nogo yogoisasikesik he, at okawerek hesik Musa nen helal wanhike amanogo hùlì nen pìkìt he, it ap Ala ane yogoisìkì lagaukwa mene nen helal wanhukwa amanogo, obogat tùkùm hogo pìlìngìrogo yogoisasike.
28Atì'nogo yogoisasikesik, o Emailt wesuogolùk wagaukwa a'nogo arat asi wagaukwasik he, at Yesùt kwe pìkìrat wesigìlùk negen hagasike. 29Atì'nogo hagasikomo re, it ap aremnogo nen he, mel yogosukwa:
“A! O hi igìlùk, mo arat kobok ike yoma re, ninom yoma nogo uok o,” ìlùk, hakhesukwama re, inom nogo uogolùk ouma kisukwa. 30Kisukwasik inom sùpùrùk nùogolùk he, hù'lagaikesik sùpùrùk horoti mene ekim wanhikesik he, Ala hai warogo kùrogo it aremnogo sùpùrisasike. 31Atì'nogo hagatenem, it aremnogo haga ineil apùnak salagaike mene hukalarìk he, enagat hùthasukwa. Enagat hùthasukwa meneat he, at ebe it ina'la nen ka laga heat nalagaike. 32Atì'nogo nalagaikomo, it-it mel isukwa:
“Egi! Ebekwe wage logolìk he, wene Ala ane helal waganek mene pìlìngìrogo yogonisiko kolek he, ninetaùken agaken arìk nina'la kagauk ike a'nogo lek?” ìlùk isukwa. 33Atì'nogo isukwasik he, welagì'legat, it a'nogo eperagat siak hogo mela'lùk inapotkwe o Yerusalem lagaukwa. Lagaukwa re, at Yesùt agoromì inebe 11 amanogo mel, inerùgì inagaiya'lak he'nakìt mel, inom atogothìlìk mel ikenem isa lagaukwa:
34“Yesùt Simon elokoma melagama eileken hike atì, Ala nen eberogoat eluguthikomo werek,” ìlùk wene pìlìngìtenem lagaukwa. 35Lagaukwasik, it inebe pìre aremnogo nen ebekalem waga logolìk Yesùt inom hagasukwa mene mel, sùpùrùk kùrogo sùpùrisikenem ebe hùthasukwa mene a'nogo mel, motok pìlìngìrogo yogoisasukwa.
At Yesùt ebe agoromì obogat en ineileken hasukwa wene
(Mat.28:16-20; Mrk.16:14-18; Yoh.20:19-23; Lak.1:6-8)
36Wena a'nogo oan pìlìngìrogo ikenem, at Yesùt ebe ka nen heat ina'la melagaikesik he,
“Nagoromì. Hinagùt a'ma,” ìlùk hai warinapenem, 37it amanogo ina'maken apik lagaikesik he, mokat salek inayùk apik agaukwa. 38Inayùk apik agaukwama re, at Yesùt en it agoromì mel yogoisasike:
“Hit he, nenahalok hinayùk arìk eberogoat akìgì'lek hinetaùken pìre welagep. 39An nebeat o. Neki nesok yoma hineileken hìthani! An he, neino mel, noak mel, werek atì hak, it mokat atì atì'nogo motok lek. Halok he, hineki ha'nììgìk, hineileken nììgìk, ìkì logolìk,
Yesùt ebeat, ìlùk hina'la akani o,” ìlùk, 40atì'nogo yogoisìkì logolìk, at eki esok amanogo ìnùgisasike. 41Atì'nogo ìnùgisikenem, it amanogo nen,
“Egi!” ìlùk hogoratì logolìk, ina'la hai en he, eberogoat ìlùk oan hùthìgì'lek were'ma, at en it amanogo yogoisìkì logolìk,
“Hit sùpùrùk aike yoma hegepma a? Lek a,” ìlùk yogoisasikomo, 42it en he, ikan werago kùrìk mene aike wogosukwama re, 43at en wanhikesik he, it amanogo ineilhanemat nasike.
44Nìlìk he, it amanogo mel yogoisasike:
“An hit ninom logolìk yogohisìkì logolìk he,
An haga'nabugun mene helal Musa nen wanhìk, ap Ala ane yogoisìkì lagaukwa mene amanogo nen wanhìk, it aike nen buku Masimùt oba wanhìk, waganogo hesukwa atì higit hogo, an arat haga'nabugun, ìlùk yogohisìkì lagì a'nogo ebe arat haga'laga yì o,” ìlùk, 45Ala ane helal waganek hùthoagalùk, it amanogo wene inetaùken healogo yogoisasikomo hùthasukwa. 46Atì'nogo inetaùken healogo yogoisìkì logolìk,
“Ala nen Karìsùt ayoko hìlìk lakhei wesigin isike mene helal mel ìlùk waganek werek:
Yì aik tì aik hìlìk hìlìk wa'larìk en, eki pìre warek logopik he, aike yì nen he, wa'la'lùk lagaikare'ma nen eluk asigin o, ìlùk helal waganek werek. 47Nen, aike mel ìlùk helal waganek weregat:
Hit apùnì weak hagatì lagep mene atì, heraksìlìk hinoabùt hebelhep halok he, Ala nen sagalogo legetsegein o, ìlùk, at etage palogo wene ìkì logolìk he, ero o Yerusalem hùlì nen yogoisìlìk, pìkìt hùlì o yì awì tì awì apùnì inùkùl etage lopok motok yogoisìlìk laga logoino, ìlùk Ala ane helal waganek weregat o. 48Wene helal waganek werek atì hak, ebe haga'laga mene hit hineileken hegep mene nenat, it apùnì yogoisìlìk laga logoino. 49Nen, an nopase nen hit wokhisegein, ìlùk abok yogohisasike a'nogo, yogo. An nenat hinoba pelakhika wesigin o. Mene re, Ala omame pogot oba nen hinoba oan louk i wagì'lek werek kolek ya re, hinebe o kota yomaat logoino o,” ìlùk wene warisasike.
Ala nen Yesùt pogot oba wolok lagasike wene
(Mrk.16:19-20; Lak.1:9-11)
50At Yesùt en wene atì'nogo warisasikesik, it agoromì amanogo o kota hùkoma nen wogisek wùlìpikesik he, o Petania atoma lagaike. Lagaikesik, eki lìakhìlìk he, apùnì nen it aike mokareke wog'isagarek atì hak,
“Ala nen sethisek logolìk hanothinapì logouak o,” ìlùk hai warinapike. 51Atì'nogo hai warinapo kolek aremnogoat he, it atem werek kolek, Ala nen, at ebe hapok hogo wolok pogot oba lagasike. 52Atì'nogo lagaikenem he, it agoromì amanogo ineitep awì yagasogo hogora'lùk he, ina'la hai apik hakìlìk, o Yerusalem inapotkwe wagaukwa. 53Wagaukwasik, o Ala awì wùrì'mo nek logolìk he, Ala hogorato motok welagaukwa.
LUKAT 24
24
Yesùt ebe eluk agaike wene
(Mat.28:1-10; Mrk.16:1-8; Yoh.20:1-10)
1Ineki sabìt oba Ala hesik welegat welagaukwasik, hùenkwe hari Minggu ba hùp siak hogoat it hìmì amanogo nen amusu tegelogo hesukwa mene amanogo wolok he, omoula warek hesukwa ba a'nogo wagaukwa. 2Wagaukwasik ineileken hìthasukwa re, omoula warek helep mene te'mek hogo yagarogo hesukwa a'nogo lìpìlogo lakhesukwama kwe hùrìk were'ma ineileken hasukwa. 3Hasukwasik, inebe omoulama ki lagaukwa re, at ninoe Etagepogot Yesùt warek ebe le'ma ineileken hasukwa. 4Warek ebe le'ma hasukwasik he,
“Yì ki'nogo haga'lagama,” ìlùk inoake palarìk wenesùgì ebetenem, ap inebe pìre inasu apipin apik mene laberogo, it hìmì ineilhanem aremnogo ka nen heat inera'lu melasi wagaukwa. 5Wagaukwama re, it hìmì amanogo inayùk en inot somarek were'ma re, it ap pìre aremnogo nen hìmi amanogo mel yogoisasukwa:
“Hit he, at eluk welagarek mene a'nogo apùnì warek mene welagaikare'ma nahalok heratì lagep. 6At ebe yoma lek o. Ala nen arat eluguthikomo. 7At alep hit hinom o Kalilea logolìk, mel yogohisasike mene a'nogo hina'la ebe'ni. At en he,
An abat ta'lasi wagagi a'nogo noasuagalùk nebe ap weak mene ineki ba hanumo, e ba menhanìlìk noasumo, neki pìre warek logopik he, neki aike nen neluk asigin o, ìlùk yogohisasike a'nogo hina'la ebe'ni o,” ìlùk yogoisasukwama, 8it hìmì amanogo hobuk wene Yesùt en yogoisasike mene a'nogo ina'la ebesukwa. 9Ina'la ebethùlùk, omoulama atoma nen inapotkwe ouma lagaukwasik he, it ap inebe 11 en amanogo mel, it inagaiya'lak he'nakìt amanogo mel, pìlìngìrogo yogoisasukwa. 10It hìmì amanogo inebe re, Maria awì Maktala mene a'nogo mel, Yohana mel, Maria Yakobùt agosa mel, hìmì he'nakìt amanogo inomat inebe obogat en pìlìngìrogo Yesùt agoromì laksagalùk inayoko hesike mene amanogo yogoisa lagaukwa. 11Atì'nogo yogoisa lagaukwa meneat he, it amanogo eberogoat ìlùk ina'la ebetì'lek. We, inapeliak ìlì'lùgì, ìlùk akasukwa meneat he, 12at Peterùt a'nogo nek he, siak hogo mel arìk, humusek omoula warek hesukwa ba a'nogo eileken ha wagaike. Wagaikesik ot soma ìlìk eileken kelakhasika mene re, we su kut mene a'nogo nek nokolek were'ma hasike. Atì'nogo were'ma eileken hìlìk he,
“Yì kì'nogo haga'laga. Nayùk e,” ìlùk alabut hìrìk ouma lagaike.
Ap inebe pìre Yesùt inom o Emaùt waga logolìk ebe ineileken hasukwa wene
(Mrk.16:12-13)
13O atì likeat he, Yesùt agoromì ane wanhì lagaukwa mene amanogo inebe pìre kota Yerusalem en o etage Emaùt atoma, we, 3 jam hake wagaikarek oba wesuogolùk wagaukwa. 14Waga logolìk he, yì mene tì mene obogat haga'lagaike mene amanogo abok pìlìngirìk wagaukwa. 15Wene abok pìlìngìrìk waga logolìk he, at aike nen, at aike yogotìk, at aike nen, at aike yogotìk, ìlìk waganem he, at Yesùt inagap hakha wagaikesik inomat wagaukwa. 16Inom wagaukwa meneat he, it ap aremnogo nen enagat hùthanogo ìlùk ineil apùnak salagaikomo re, ebe enagat hùthìgì'lek. 17Waganem he, at Yesùt en, it aremnogo mel yogoisasike:
“Hit heperagat ebekwe laga logolìk, wene nena wene ìlìk laga lagep,” ìlùk yogoisasikomo inelokoken sùmùrùmù arìk he, melagaukwa. 18Melarìk he, it aremnogo, at aike etage Keleopat en he, mel yogosike:
“Wene age yìat haga'laga atì, it ap pok o Yerusalem wìrìk elama hesik werek mene he'nakìt obogat inelu meneat he, hat yì nek he, hokot welagenma hìgì,” ìlùk yogosikomo, 19at Yesùt en he:
“Wene atì nìkì'nogo haga'laga mene egen,” ìlùk yogosikomo, it aremnogo nen he, mel yogosukwa:
“Ap etage Yesùt, awì o Nasaret mene atì, ebe Ala ane yogoisikerek meneat logolìk he, Ala eilhanem, nit apùnì obogat nineilhanem, wene yogoisìgìk, yì mene tì mene hagatìk, omamerogo ìkì laga meneat he, 20it ap Ala esewerek mene inogogì kaintek mel, nit ninogogì kaintek mel, inom en ùkùm oba hìlìk e ba menhìlìk wasuagalùgat ineki ba hagama wata o. 21Nit apùnì Isirael mene, at en telninabigin ìlùk nina'la akìkì lago meneat he, eigo! Atì'nogo arat haga'lagasi'mo nen, nineki pìre nogo ogo yì o. 22Nen, it hìmì nit mene aike nen nina'maken lasi lagaikaat o. It atì hùp siak hogoat warek omoulama haga ba wagaika mene re, 23warek ebe le'ma haga o. Ebe lek en ineileken halùk lagaikasik he, wene yogonisìkì logolìk,
Malaikat pogot oba mene nen he,
Lek o. At ebe eluk agama, ìlùk yogonisagama wago, ìlùk, atì'nogo egama nina'maken laga o. 24Nen, nit ninagaiya'lak he'nakìt omoulama warek haga ba atì ha wagaika mene re, ebe le'ma nen he,
Hìmì yogonisa lagaika a'nogo eberogoat hìgì, ìlùk, Yesùt ebe ineileken hìgì'lek lagaikaat o,” ìlùk Yesùt yogosukwa. 25Atì'nogo yogosukwama, at Yesùt en he,
“Eige! Hinebe kepù a? Ap Ala ane yogoisìkì lagaukwa mene amanogo nen wene obogat yogoisìkì lagaukwa a'nogo eberogoat ìlùk hit hepok hùthahùk welagep yì rì! 26At Karìsùt Ala nen ayoko hesike a'nogo, yì aik tì aik hìgì'le'ma hogorasusak nogo? Lek o. Hikenem en hogorasusak o. Hit en egep atì hagasusak higit hogoat hagata o,” ìlùk yogoisasike. 27Atì'nogo yogoisasikesik he, at okawerek hesik Musa nen helal wanhike amanogo hùlì nen pìkìt he, it ap Ala ane yogoisìkì lagaukwa mene nen helal wanhukwa amanogo, obogat tùkùm hogo pìlìngìrogo yogoisasike.
28Atì'nogo yogoisasikesik, o Emailt wesuogolùk wagaukwa a'nogo arat asi wagaukwasik he, at Yesùt kwe pìkìrat wesigìlùk negen hagasike. 29Atì'nogo hagasikomo re, it ap aremnogo nen he, mel yogosukwa:
“A! O hi igìlùk, mo arat kobok ike yoma re, ninom yoma nogo uok o,” ìlùk, hakhesukwama re, inom nogo uogolùk ouma kisukwa. 30Kisukwasik inom sùpùrùk nùogolùk he, hù'lagaikesik sùpùrùk horoti mene ekim wanhikesik he, Ala hai warogo kùrogo it aremnogo sùpùrisasike. 31Atì'nogo hagatenem, it aremnogo haga ineil apùnak salagaike mene hukalarìk he, enagat hùthasukwa. Enagat hùthasukwa meneat he, at ebe it ina'la nen ka laga heat nalagaike. 32Atì'nogo nalagaikomo, it-it mel isukwa:
“Egi! Ebekwe wage logolìk he, wene Ala ane helal waganek mene pìlìngìrogo yogonisiko kolek he, ninetaùken agaken arìk nina'la kagauk ike a'nogo lek?” ìlùk isukwa. 33Atì'nogo isukwasik he, welagì'legat, it a'nogo eperagat siak hogo mela'lùk inapotkwe o Yerusalem lagaukwa. Lagaukwa re, at Yesùt agoromì inebe 11 amanogo mel, inerùgì inagaiya'lak he'nakìt mel, inom atogothìlìk mel ikenem isa lagaukwa:
34“Yesùt Simon elokoma melagama eileken hike atì, Ala nen eberogoat eluguthikomo werek,” ìlùk wene pìlìngìtenem lagaukwa. 35Lagaukwasik, it inebe pìre aremnogo nen ebekalem waga logolìk Yesùt inom hagasukwa mene mel, sùpùrùk kùrogo sùpùrisikenem ebe hùthasukwa mene a'nogo mel, motok pìlìngìrogo yogoisasukwa.
At Yesùt ebe agoromì obogat en ineileken hasukwa wene
(Mat.28:16-20; Mrk.16:14-18; Yoh.20:19-23; Lak.1:6-8)
36Wena a'nogo oan pìlìngìrogo ikenem, at Yesùt ebe ka nen heat ina'la melagaikesik he,
“Nagoromì. Hinagùt a'ma,” ìlùk hai warinapenem, 37it amanogo ina'maken apik lagaikesik he, mokat salek inayùk apik agaukwa. 38Inayùk apik agaukwama re, at Yesùt en it agoromì mel yogoisasike:
“Hit he, nenahalok hinayùk arìk eberogoat akìgì'lek hinetaùken pìre welagep. 39An nebeat o. Neki nesok yoma hineileken hìthani! An he, neino mel, noak mel, werek atì hak, it mokat atì atì'nogo motok lek. Halok he, hineki ha'nììgìk, hineileken nììgìk, ìkì logolìk,
Yesùt ebeat, ìlùk hina'la akani o,” ìlùk, 40atì'nogo yogoisìkì logolìk, at eki esok amanogo ìnùgisasike. 41Atì'nogo ìnùgisikenem, it amanogo nen,
“Egi!” ìlùk hogoratì logolìk, ina'la hai en he, eberogoat ìlùk oan hùthìgì'lek were'ma, at en it amanogo yogoisìkì logolìk,
“Hit sùpùrùk aike yoma hegepma a? Lek a,” ìlùk yogoisasikomo, 42it en he, ikan werago kùrìk mene aike wogosukwama re, 43at en wanhikesik he, it amanogo ineilhanemat nasike.
44Nìlìk he, it amanogo mel yogoisasike:
“An hit ninom logolìk yogohisìkì logolìk he,
An haga'nabugun mene helal Musa nen wanhìk, ap Ala ane yogoisìkì lagaukwa mene amanogo nen wanhìk, it aike nen buku Masimùt oba wanhìk, waganogo hesukwa atì higit hogo, an arat haga'nabugun, ìlùk yogohisìkì lagì a'nogo ebe arat haga'laga yì o,” ìlùk, 45Ala ane helal waganek hùthoagalùk, it amanogo wene inetaùken healogo yogoisasikomo hùthasukwa. 46Atì'nogo inetaùken healogo yogoisìkì logolìk,
“Ala nen Karìsùt ayoko hìlìk lakhei wesigin isike mene helal mel ìlùk waganek werek:
Yì aik tì aik hìlìk hìlìk wa'larìk en, eki pìre warek logopik he, aike yì nen he, wa'la'lùk lagaikare'ma nen eluk asigin o, ìlùk helal waganek werek. 47Nen, aike mel ìlùk helal waganek weregat:
Hit apùnì weak hagatì lagep mene atì, heraksìlìk hinoabùt hebelhep halok he, Ala nen sagalogo legetsegein o, ìlùk, at etage palogo wene ìkì logolìk he, ero o Yerusalem hùlì nen yogoisìlìk, pìkìt hùlì o yì awì tì awì apùnì inùkùl etage lopok motok yogoisìlìk laga logoino, ìlùk Ala ane helal waganek weregat o. 48Wene helal waganek werek atì hak, ebe haga'laga mene hit hineileken hegep mene nenat, it apùnì yogoisìlìk laga logoino. 49Nen, an nopase nen hit wokhisegein, ìlùk abok yogohisasike a'nogo, yogo. An nenat hinoba pelakhika wesigin o. Mene re, Ala omame pogot oba nen hinoba oan louk i wagì'lek werek kolek ya re, hinebe o kota yomaat logoino o,” ìlùk wene warisasike.
Ala nen Yesùt pogot oba wolok lagasike wene
(Mrk.16:19-20; Lak.1:9-11)
50At Yesùt en wene atì'nogo warisasikesik, it agoromì amanogo o kota hùkoma nen wogisek wùlìpikesik he, o Petania atoma lagaike. Lagaikesik, eki lìakhìlìk he, apùnì nen it aike mokareke wog'isagarek atì hak,
“Ala nen sethisek logolìk hanothinapì logouak o,” ìlùk hai warinapike. 51Atì'nogo hai warinapo kolek aremnogoat he, it atem werek kolek, Ala nen, at ebe hapok hogo wolok pogot oba lagasike. 52Atì'nogo lagaikenem he, it agoromì amanogo ineitep awì yagasogo hogora'lùk he, ina'la hai apik hakìlìk, o Yerusalem inapotkwe wagaukwa. 53Wagaukwasik, o Ala awì wùrì'mo nek logolìk he, Ala hogorato motok welagaukwa.
