MATÌÙT 11
11
1It ap Yesùt ane wanhì lagaukwa mene inebe 12 nen amanogo inasuk atì'nogo warogo hisalùk he, apùnì inawì sili lopok wene hano wene a'nogo yakùlisìgìk, inasuk watìk, igìlùk he, o atom nenat lagaike.
Yesùt en Yohanet ima pegalinapì lagaike mene hesik yogoisasike wene
(Luk.7:18-35)
2At Yohanet ima pelaginapì lagaike mene a'nogo eki hele warek were'ma, apùnì nen he,
“Karìsùt tì'nogo hagarì'logo,” ìlùk ikenem asuk holhikesik he, at agoromì ane wanhì lagaukwa mene Yesùt oba hinok wanuagalùk laksa wagaike. 3Laksa wagaikomo wagaukwasik he,
“Ap aike wesigin ìlùk ìkì lagaukwa a'nogo re, harat a? Ì a, at he, hùnogoat mene aike serogo logogun a?” ìlùk gosukwama re, 4at Yosut en he, mel yogoisasike:
“Hit he, an yì'nogo tì'nogo hagatenem hineileken nììgìk, wene ikenem hinasuk holhìk, egep mene atì, at Yohanet sekek hogo yogosi lano o. 5Ineileken mùm mene hekenogo hano agìk, inawe wùt warek mene kwe lagìk, inoba henako hake inayùk mene were'ma hagarinapenem hano agìk, inesako togùm mene inasuk huak hogo holhìk, warek mene inelugurinapìk, it aike inagarok lek mene hano wene yakùlisìgìk, ikenem hineileken neegep a'nogo sekek hogo yogosi lano o. 6Yogorìk he, sa nen etaùken pìre arìk herakhanhì'lek logogin halok he, a'la hai hakìkì logogin o, ìlùk yogosi lano,” ìlùk laksasike.
7Atì'nogo isikomo, it Yohanet agoromì amanogo lagaukwama re, at Yesùt en apùnì apik amanogo Yohanet abok mel yogoisasike:
“Hit he, o leimo apùnì le'ma atoma nena mene hineileken hùogolùk laga lagasip nogo. Heiteken pareken sogoi en hun hogo lagìk-wagìk ikenem hùogolùk laga lagasip a? 8Ì a, at he, nena mene hùogolùk laga lagasip. Ap aike asu hano motok mene laberek were'ma hùogolùk laga lagasip a? Lakhani! Inasu hano mene laberagarek atì, kaintek inetagepogot mene inaua logolìk halogat laberagarek. 9Halok he, nena mene hùogolùk laga lagasip. Ì a, at he, ap Ala ane yogoisikerek mene aike were'ma hineileken hùogolùk laga lagasip a? Eberogoat, atìat o. An nen yogohisak. It ap Ala ane yogoisìkì lagaukwa mene aike welagaukwa meneat he, it atì mea negen. At Yohanet atì nek he, etagewerek esinat o. 10#Mal.3:1 At Ala nen mel isike:
Naput e. Hat hobuk kwe legeinkwe, hakwe ebela yakhagakì logouagalùk, ap aike ayoko hìlìk alebagìk lakhegein,
ìlùk isikomo helal waganogo hesukwa atì ebe re, at Yohanet hesigat isike. 11Halok he, an nane eberogoat yogohisak. Apùnì obogat inagosalaken taginabìk wagaukwa meneat he, inetage lek enek o. Meneat he, at Yohanet ima pelaginaperek mene atì nek he, etagewerek o. Atì'nogo meneat he, at Ala awe a'ma hisikere'ma atoma, at Yohanet etage lek negen meneat he, it apùnì aike inetage lek mene atì, inetagewerek negeat o. 12At Yohanet ima pelaginapì laga atì hùlì nen he, yogotak ya hùlì, it inoabùt weak asialoksek mene nen, ninopase Ala nen awe a'ma hisikerek a'nogo inabìt en mabenetsùogolùk inomamerogo walhìlì'lùgì. 13At Yohanet ebe oan wagì'lek werek kolek, wene Ala nen inasuk wasike wene a'nogo ba mel, Ala ane yogoisìkì lagaukwa mene a'nogo ba mel, hobuk haga'lasigin atì mene pak hogo yogoisìkì lagaukwa a'nogo 14hinetaùkenma tùkùm hogo wanhep halok he, ap Elia ebe wesigin, ìlùk abok isukwa a'nogo re, ebe Yohanet wagaike atìat o. 15Hinasuk holusak halok he, hanorogo holini o.
16Apùnì o yogotak werek ya ba re, nena mene ba lìrogo yogohisak. Yì mene ba lìrogo ik. It atì re, yekerùgì pasar oba oko wanhare'ma atoma hùrek logolìk, inagaiya'lak inom wene lakhìgìk-wakhìgìk ìkì logolìk:
17Nit etawì wathikùogolùk elùgùn wulapo meneat he, hit en hunike lagì'lek. Nen, le asuogolùk, le wùnì elùgùn wulapo meneat he, hit en le ebe agì'lek, ìlùk egarek a'nogo hagat hagarì'lùgì o. 18At Yohanet atì sùpùrùk mel, anggur eken amusu mel nìkì'lek herakhìlìk welaga atì hesik, it apùnì nen he,
At atì mokareke oabùt weak mene a'la kikesik werek o, ìlùk ìlì'lùgì. 19Mene re, an abat ta'lasi wagagi a'nogo re, sflpimik mel, anggur eken amusu mel nìlìk wagagisi'mo re, apùnì nen nabok ìkì logolìk,
Sùpùrùk mel, anggur eken amusu mel, apelalok weak nìlì'logo yì, ap pemerìntah hesik uang kìno ìlìk wanharek mene inom, weak hagarìk negarek mene inom, inom hùnethakìlìk niko yì hani! ìlùk ìlì'lùgì atì re, Ala etaùken kagauk hogo hagaterak atì nen he, hanoratenem ineileken hìlìk,
Higit, ìlùk hùthogoinat o,” ìlùk yogoisasike.
It apùnì inawì sili lopok wane eberogoat ìlùk hùthìgì'lek en yogoisasike wene
(Luk.10:13-15)
20Atì'nogo yogoisasikesik he, apùnì inawì sili lopok at en hagasusak lek mene elalinat hagatenem ineileken hìkì lagaukwa meneat he, ina'la hùthìgì'lek logolìk, yì weak tì weak hagatì lagaukwa mene hebisìgì'lek welagaukwa mene wenagisìkì logolìk he, mel yogoisasike:
21“Hit apùnì o Korasim mene mel, o Pesaìra mene mel, eige. Netawì lak e. Apùnì nen hagasusak lek mene an nen elalinat hit ninom logolìk hagatì lagì a'nogo, o Tìrùt Siron atoma hagatì logoilema re, it apùnì o atoma mene heang hìlìk hagatarek hak, inasu weak mene laberìgìk, wul hesi inùkùl oba yùgùlìgìk, ìkì logolìk he, weak hagatì lagaukwa mene atì hebisìlìk inoabùt hageat hebela'lep meneat he, hit he, atì'nogo hagasusak hinabìt atì nen weagathinabigin o! 22Meneat he, an nane eberogoat yogohisak. Hobuk o elùgùn oba Ala nen ùkùm hinoba hìgìk, kotìk, ìgìn atì sat he, it apùnì o Tìrùt Siron atoma ùkùm inoba hìlìk se negen inoasigin meneat he, hit enek he, motok ekin hogo negen hinoasigin o, ìlùk yogohisìgì. 23Nen, hit apùnì o Kaperenagùm mene yì hina'la nen he,
Ala nen pogot oba lìakhinìlìk esinethinegein, ìlùk hogorakìkì lagep a? Motok lek o. We, apùnì wa'la'lùk lagaikare'ma atoma motok pelakhikegein o. Apùnì nen hagasusak lek mene an nen elalinat hit ninom logolìk hagatì lagì a'nogo, o Sorom amma hagatì logoilema re, it atoma inebe lek agì'lek yogotak ya mobok hutigat logoilep o.
24Hobuk Ala nen ùkùm inoba hìgìk, kotìk ìgìn atì sat he, it apùnì o Sorom welagaukwa mene ùkùm inoba hìlìk se negen inoasìgìn meneat he, hit enek he, motok ekin hogo negen hinoasìgìn o, ìlùk yogohisìgì,” ìlùk yogoisasike.
“Hit set waloageip en noba we'ni o,” ìlùk yogoisasike wene
(Luk.10:21-22)
25-26Atì'nogo yogoisasikesik he, o atì sat he, at Yesùt en Ala ebe yogotì logolìk he,
“Ala nopase e! Pogot kweang esewerek harat o! Wene obogat atì re, it apùnì ina'la kagalek mene mel, yì wene tì wene inelu mene mel, inelu asinogo ìlùk hinakhìlìk he, it inoabùt yekerùgì ketago mene hake nek he, pak hogo yogoisegen atì ha'la walok akegetik enat yogoisegen atì nen hai wathapì lagì, nopase,” ìlùk yogosike. 27Atì'nogo yogosikesik, it apùnì amanogo mel yogoisasike:
“An nopase nen yì mene tì mene obogat esewerek logouagalùk wo'nesike. Nen, an Ala aput yì, apùnì obogat motok inokot meneat he, nopase Ala aligat enek elu welagarek. Atì hak he, an nopase Ala atì, apùnì obogat motok inokot meneat he, aput an naligat enek nelu welagìrek o. Nen, Ala aput an nenat na'la akìlìk en nopase ebe apùnì aike inelu asuagalùk pak hogo yogoisìgìrek mene hùgì atìat inelu agaikarek.
28“Hit hinoba ekin-pekin hogo seget apik hagatì lagep mene atì, an nen hinoba seget nokok hogo hikamo set waloageip en, noba we'ni o. 29-30An nasukwe kalek su a'le sakore'ma re, hano kalogo wokhikamo seweagat hogoin atì nen he, hinomolo ba wìlìk, an noabùt enago logolìk inawe a'ma negen welagìrek a'nogo tùkùm hogo yakùlìk nìkì logoino o. Atì'nogo nìkì logogun halok, hinetaùken hapuk igin o,” ìlùk yogoisasike.
