KORINTUS 1 2
2
Habar soaḷ kinopatoian i Kristus kon kayu pinoyotaḻempang
1Utatku mita! Wakutu in akuoi namangoi kon i monimu nopotaau in tomayá mita i Allah inta diápa kinotaauan in bayongan intau kon dunia naa,#2:1: tomayá mita i Allah inta diápa kinotaauan in bayongan intau kon dunia naa: tongonumai in naska dungkuḷmai: kosakusian soaḷ ki Allah. diábí in akuoi nopomaké in kapandoian tontaní andeka noguman kon inta diá totuu. 2Sin iyakinku bidon kon bonu in kotaki-takinpa monimu, akuoi in diábí nosingog kon yagi-yagi, koḻikudbí in nopotaau in habar soaḷ ki Kristus; inta minatoi kon kayu pinoyotaḻempang. 3#Rsl. 18:9 Kon dodai in kotaki-takinpa monimu, moḻemé bo mouyot totok in akuoi. 4Bo habar inta pinoyaputku kon i monimu tua in deemanbí tongá pinotaauku takin tosingogon inta mokosanang kon gina pinodudui in kabijaksanaan in intau, táe noidoyonbí kon koyakinan kon Rohobí i Allah in nongawasa. 5Tua inaidan sinbá pirisaya monimu kon i Kristus in diá tongá podoyon kon kapandoian intau, táe podoyonbí kon kawasa i Allah.
Kabijaksanaan i Allah
6Umpaka, natua yo umuranbí doman oumanon in soaḷ kabijaksanaan i Allah kon sigad in intau mita inta totu-totuudon nopirisaya. Táe deemanbí kabijaksanaan in dunia, andeka kabijaksanaan pongawasa mita masa in tanaa, inta kawasanea in moinggamábí. 7Kabijaksanaan inta poyaputku naa in nongkon i Allahbí. Kabijaksanaan tatua in diápa kinotaauan in bayongan intau kon dunia naa, táe munadon sinadia i Allah wakutu in diápa inaidan-Nea in dunia, sinbá mosanang in kita. 8Diábí tobatúmai in pongawasa in dunia naa in nokotaau kon soaḷ kabijaksanaan tatua. Sin aka kinotaauandon monia, yo tantú diábí pinopopakú monia kon kayu pinoyotaḻempang in ki Tuhan inta momulia tua. 9#Yes. 64:4 Tongá soaḷ tatua ain bidon noipais kon Buk Motusi,
“Onu inta diá kon dodai in onda inontong andeka dinongog in intau,
bo diá doman dodai onda in kinoraian intau,
tuatabí in sinadia i Allah
kon bayongan intau inta motoindudui kon i-Nia.”
10Táe#2:10: Táe: tongonumai in naska dungkuḷmai: Manangka. komintan bidon pinotaau i Allah kon i naton pinotonsigad kon Roho-Nea. Bo Roho tatua doman in moindoi kon bayongan in yagi-yagi nodapot in tomayá mita i Allah inta nongoibuni. 11Sin inta nonotaau kon bonu in gina intau tatua in tongábí rohonea tontaní. Natua doman soaḷ ki Allah. Inta nonotaau kon bonu in gina i Allah tua in tongábí doman Roho i Allah tontaní! 12Kita in diábí inogoian roho inta nongkon dunia naa, táe Rohobí inta nongkon i Allah, sinbá kotaauan naton in bayongan inta pinonotabi i Allah kon i naton.
13Tuamai, aka kami bo moginsilang kon kaadaan i Allah kon intau mita inta ain kinawasa in Roho i Allah,#2:13: kon intau mita inta ain kinawasa in Roho i Allah: ande pinongin tosingogon mita inta pinopogonú in Roho i Allah. yo kami in diábí mosingog podudui in kabijaksanaan in intau, táe pinoduduibí kon onu inta ain sinundú in Roho i Allah. 14Intau inta diá kinawasa in Roho i Allah, doíbí mopirisaya kon onu inta ain inaidan in Roho i Allah tatua. Diábí komangaḻean monia intua komintan, koḻikudbí in aka mopirisaya in mosia kon i Allah. 15Intau inta mopirisaya kon i Allah in motaaubí monilai kon yagi-yagi, táe diábí in tobatúmai intau motaau monilai kon inia tontaní. 16#Yes. 40:13 Sin kon bonu in Buk Motusi pinaisdon nanaa,
“Ki inebí in mokotaau kon raian i Tuhan?
Bo ki inebí in motaau mononggina kon i-Nia?”
Táe pikiran i Kristus in oyúonbí kon inami!
Alkitab Singog In Mongondow Masa In Tanaa © Indonesian Bible Society, 2016.