Yoane 12
12
Yesu anapakaliwa marasi
(Mat 26.6-13; Mk 14.3-9)
1Siku sita mbele ya Pasaka, Yesu alifika Betania, kwao Lazaro, yule mutu Yesu aliyemufufua. 2Kule wakamutayarishia chakula cha magaribi. Marta aliwashugulikia, na Lazaro alikuwa mumoja wa wale waliokula pamoja na Yesu. 3Halafu Maria akatwaa nusu ya litre ya marasi ya bei kali, yaliyotengenezwa na maua ya nardo safi. Akaipakaa kwa miguu ya Yesu na kuipanguza na nywele zake. Nyumba yote ikajaa harufu ya marasi. 4Lakini Yuda Iskariota, mumoja wa wanafunzi wa Yesu, yule atakayemutoa, akasema: 5“Kwa sababu gani marasi hii ya bei kali haikuuzishwa kwa bei ya vikoroti mia tatu vya feza na kuwagawanyia wamasikini mali ile?” 6(Hakusema maneno haya kwa sababu aliwasikilia wamasikini huruma, lakini kwa sababu alikuwa mwizi. Ni yeye aliyekuwa akichunga mufuko wa feza, naye alikuwa akijitwalia mali toka ndani yake.)
7Lakini Yesu akasema: “Umwache kimya, kwa maana alikuwa ameweka marasi hii kwa ajili ya siku ya maziko yangu. 8Mutakuwa na wamasikini pamoja nanyi siku zote, lakini hamutakuwa nami siku zote.”
Shauri la kumwua Lazaro
9Kundi kubwa la Wayuda wakapata habari kwamba Yesu yuko Betania. Kwa hiyo wakaenda kule, si kwa sababu ya Yesu tu, lakini vilevile kwa kumwona Lazaro aliyefufuliwa naye. 10Basi wakubwa wa makuhani wakakata shauri la kumwua Lazaro vilevile, 11kwa maana kwa ajili yake Wayuda wengi walijitenga nao na kumwamini Yesu.
Yesu anaingia Yerusalema
(Mat 21.1-11; Mk 11.1-11; Lk 19.28-40)
12Kesho yake lile kundi kubwa la watu waliofika kwa sikukuu ya Pasaka wakasikia kwamba Yesu alikuwa katika njia kuja Yerusalema. 13Basi wakatwaa matawi ya ngazi na kwenda kumupokea, wakilalamika kwa sauti kubwa, wakisema: “Mungu asifiwe! Abarikiwe huyu anayekuja kwa jina la Bwana! Abarikiwe mufalme wa Waisraeli!”
14Yesu akapata mwana-punda na kupanda juu yake, kama vile inavyosemwa katika Maandiko haya Matakatifu:
15“Musiogope ninyi wakaaji wa Sayuni!
Angalia, mufalme wenu anakuja,
akipanda juu ya mwana-punda.”
16Wanafunzi wake hawakuelewa maneno haya kwanza, lakini wakati Yesu alipokwisha kutukuzwa, wakakumbuka kwamba maneno haya yameandikwa juu yake na ni vile walivyomutendea.
17Wale watu wote waliokuwa pamoja na Yesu wakati alipomwita Lazaro toka ndani ya kaburi na kumufufua walishuhudia mambo yaliyofanyika. 18Kwa sababu hii watu wengi walikwenda kumupokea, kwa maana walikuwa wamesikia kwamba ameonyesha kitambulisho hicho. 19Basi Wafarisayo wakasemezana hivi: “Hamwoni kwamba hatuwezi kufanya kitu? Angalia, dunia nzima inamufuata!”
Wagriki wanamutafuta Yesu
20Kulikuwa Wagriki wamoja kati ya wale watu waliofika Yerusalema kuabudu wakati wa sikukuu. 21Basi wakamwendea Filipo wa kijiji cha Betesaida ya Galilaya na kumwambia: “Bwana, tunataka kuonana na Yesu.”
22Filipo akaenda kumwambia Andrea, na kisha wote wawili wakaenda kumwelezea Yesu. 23Yesu akawajibu: “Saa ya kutukuzwa kwa Mwana wa Mutu imetimia. 24Kweli, kweli, ninawaambia: punje ya ngano inabaki peke yake tu, isipokuwa kama yenye kufa na kuzikwa ndani ya udongo. Lakini kama ikiwa yenye kufa, inatoa matunda mengi. 25Anayependelea maisha yake atayapoteza, lakini asiyeyashugulikia katika dunia hii, atayachunga hata atakapopata uzima wa milele. 26Kama mutu akitaka kunitumikia, anapaswa kunifuata, na hivi mutumishi wangu atakuwa popote nitakapokuwa. Mutu akinitumikia, Baba yangu atamupa heshima.
Yesu anatangaza kufa kwake
27“Sasa roho yangu inafazaika. Nami sijui niseme nini. Nimwombe Baba, aniokoe toka mambo yale yatakayofika saa hii? Hapana, kwa sababu nimefika kwa ajili ya yale yatakayofanyika saa hii. 28Baba, utukuze jina lako!”
Halafu sauti ikasikilika toka mbinguni ikisema: “Nimelitukuza, nami nitalitukuza tena.”
29Kundi la watu waliosimama pale na waliosikia sauti ile wakasema: “Ile ilikuwa ngurumo ya radi!” Wengine wakasema: “Ni malaika aliyekuwa akisema naye!”
30Lakini Yesu akawaambia: “Sauti hii haikusikilika kwa ajili yangu, lakini kwa ajili yenu. 31Sasa ni wakati wa dunia hii kuhukumiwa; sasa mutawala wa dunia hii atashindwa. 32Lakini mimi, nitakaponyanyuliwa toka katika dunia, nitawavuta watu wote kuja kwangu.” 33(Alisema hivi kwa kuonyesha ni kifo gani atakachokufa.)
34Na lile kundi la watu wakamujibu: “Sisi tumesikia katika maandiko ya Sheria kwamba Kristo ataishi milele. Basi namna gani unaweza kusema kama Mwana wa Mutu anapaswa kunyanyuliwa juu? Na huyu Mwana wa Mutu ni nani?”
35Yesu akawaambia: “Mwangaza ungali kati yenu kwa muda kidogo. Mutembee wakati mungali na mwangaza, kusudi giza lisiwafunike, kwa sababu anayetembea katika giza hajui pahali anapokwenda. 36Basi muaminie mwangaza ule wakati mungali nao, kusudi mukuwe watu wa mwangaza.”
Kutokuamini kwa Wayuda
Yesu alipokwisha kusema maneno hayo, akajiendea na kujificha mbali na lile kundi. 37Ingawa vitambulisho vyote alivyoonyesha mbele yao, hawakumwamini, 38kusudi maneno haya yaliyosemwa na nabii Isaya yatimie:
“Bwana, ni nani aliyeamini habari tuliyopasha?
Nani aliyefunuliwa matendo ya uwezo ya Bwana?”
39Hawangeweza vilevile kuamini, kufuatana na maneno haya Mungu aliyomwambia Isaya tena:
40“Mungu amepofusha macho yao,
kusudi yasipate kuona.
Ameifanya mioyo yao kuwa migumu,
wala wasipate kunigeukia
nami ningewaponyesha.”
41Isaya alisema maneno haya kwa sababu aliona kwa mbali utukufu wa Yesu, naye alisema habari zake.
42Hata hivi wengi kati ya wakubwa wa Wayuda wakamwamini Yesu. Lakini kwa sababu ya Wafarisayo, hawakushuhudia kwamba wameamini. Waliogopa kwamba watatengwa wasiingie katika nyumba ya kuabudia. 43Wao walipenda kusifiwa na watu kuliko kupata sifa inayotoka kwa Mungu.
Hukumu ya kutokushika maneno ya Yesu
44Halafu Yesu akasema hivi kwa sauti: “Anayeniamini haniamini mimi tu, lakini anamwamini vilevile yule aliyenituma. 45Anayeniona amemwona vilevile yule aliyenituma. 46Mimi nimekuja katika dunia kama mwangaza, kusudi mutu yeyote anayeniamini asikae katika giza. 47Mutu akisikia maneno yangu pasipo kuyashika, si mimi nitakayemuhukumu. Kwa maana sikukuja kuhukumu dunia, lakini nilikuja kuiokoa. 48Yule anayenikataa na asiyekubali maneno yangu atahukumiwa kufuatana nayo. Ni lile neno nililosema ndilo litakalomuhukumu siku ya mwisho. 49Kwa maana sikusema kwa mamlaka yangu mwenyewe, lakini Baba aliyenituma ndiye aliyeniagiza maneno nitakayosema na kuyafundisha. 50Nami ninajua kama amri yake inaleta uzima wa milele. Ni kwa hiyo maneno ninayosema, ninayasema tu kama vile Baba alivyoniagiza.”
Bible in Swahili Congo © Bible Society of the Democratic Republic of Congo (DRC), 2002.