Kapyegèle 6
6
Nànbēle kɔrɔsiin n nyɛ́nɛ n wòlo paa pìitunbèle dɛ̀ɛmɛ́
1Amɛɛ pìitamabèle nɛʔɛgi ni maa lè cányi bee ni, a Helenisibèle #6:1 Helenisibèle: Mɛ́ɛgi naa n too Zyefubèle bele na pe da cariga n kári tátɛɛyaa ni lè, pe si da ní sáà gbàn ni Heburusyɛ́ɛnri nyuu í, fwɔɔ Girɛkiiri, ní sèʔé i Zyefubèle sérikologo táanri poro na be nyɛ. i Heburubèle sànʔá níì jo pe o poro lɔgucebèle córo ni nii yáriri ni be lee lè canʔa o canʔa í. 2A pìitunbèle kɛɛ ní siin pìitama-nɛʔɛbèle bee kpóʔoro níì be pye: «Ki ga yɛlɛ wolo í Kolocɔlɔɔ syɛ́ɛnri joolo yaʔa si pye yarira lɛɛfɔɔlɔ í. 3Ni senyɛ̀nnɛ, gee bee na gi yɛlɛ ye nànbēle kɔrɔsiin nyɛ́nɛ ye wòlo yeyɛɛ níngi ni, be pye mɛ́ɛtaanya fɔ̀ɔlɔ, be fúnyi si nyìn Pìicǎnni na, pé wɔ́ɔ pye sícilibēle, wolo a bele bee télege fáliw bee na, 4wolo tiimaa si kòro bàā Kolocɔlɔɔ nyɛ́ɛri sáā wi syɛ́ɛnri joolo fáli kpéʔele.»
5A syɛ́ɛnri bee syɛ́ɛnmi myɛ dɛ́nɛ. A bi Etyɛni nyɛ́nɛ n wòlo, wi tágali maa kpɔ́ʔɔ, a wi fúngi wɔ́ɔ̀ nyìn Pìicǎnni na, bele pe da fàra wi na lè, pe i be mɛ́ɛyi yiri Filipi, ní Purokɔri, ní Nikanɔri, ní Timɔ, ní Parimɛnasi, ní Nikola ní, wi lè Antyɔsyi ye wów, wi maa pye syɛɛnfelegaa níì jée Zyefubèle sérikologo ni.#6:5 Zyefubèle sérikologo ni: Zyefubèle maa syɛɛnfeleyaa saʔa kàriga n lége poro sériw ni. Nikola maa pye bele bee wàa, koro kàdoʔo ma ní náa kɔ́ baa tága Zyezu na. 6A syɛ́ɛnmi sáà be yérige pìitunbèle yɛ́ʔɛ ma, a poro Kolocɔlɔɔ nyɛ́ɛri níì kɔ́yi taʔa be na.
7A Kolocɔlɔɔ syɛ́ɛnri i caragi ni syée yɛʔɛ̀ ma, pìitamabèle si wɔ́ɔ i nɛʔɛgi gbanʔama Zyerusalɛmi ni, a sáriga-wòlobèle pèle saʔa tága.
Etyɛni cǒli kéele
8Kolocɔlɔɔ kpɔ́ʔɔri ní wi fǎngi maa pye Etyɛni ma, a wi i kakpoloyi, ní fɛ̀ɛkpoloyo kpéʔele syɛ́ɛnbèle nínge ni. 9Zyefubèle sérikpaagaa maa pye yaà pe i gi yiri Wɔ́rɔbèle wóʔo,#6:9 Wɔ́rɔbèle: Mɔ ga lóʔo Wɔ́rɔbèle, Zyefubèle pèle pe da ni yiri nya. Níì cán booma ni Wɔrɔmi ye wóbèle maa be toolɛɛbèle cò n tórigo tátɛɛyaa ma, a be sáà pye pulobèlē, koro kàdoʔo ma ní náà be yaʔa peyɛɛ ma. Gee bee na pe da ni poro ní be yòdaʔayi myɛ yiri Wɔ́rɔbéle. a syɛ́ɛnbèle bee pèle yìri, ní Sirɛni tári wóbèle pèle, ní Alɛkisandirikaʔa wóbèle pèle ní, n fàra Silisii tári, ní Azii tári wóbèle pèle na. A pe myɛ yìri ni Etyɛni kábala. 10Kàjáa pe ga gbàn n joo n wi jáa í, níì cán wi maa ni nyuu ní sícilimɛ ní Pìicǎnni báriga ni. 11Lǎli bee ni a be nǎnbèle pèle láa sàra na be sa finɛ taʔa wi na si jo: «Wolo n gi lóʔo Etyɛni nyɔ́ɔgi na a wi i Mowizi ní Kolocɔlɔɔ mɛ́ɛgi kálagi.» 12A be syɛ́ɛnmi, ní wolɛɛbèle, ní làlwaw sɛ́bɛwelebéle sɔ́ɔn wi na, a be sáà too wi na n wi cò n kári Sanedirɛnw tɛ́ʔɛ ma. 13Pe maa wɔ́ɔ̀ kári ní jànvaaw séerafɔɔlɔ ní, a poro sáà jo: «Nǎnw naa o caa bi láʔa syɛɛnpeeri joolo na tɛɛcǎngi naa, ní Mowizi làlwaw kánma na í. 14Níì cán wolo n gi lóʔo wi nyɔ́ɔgi na a wi jo, Zyezuw bee wi lè Nazarɛti ye wów, wi a ba tɛɛcǎngi naa kálagi si kalɛɛgèle kàriga, gele Mowizi da kaan wolo ma lè.»
15Bele myɛ pe da tɛ́ɛn lè Sanedirɛnw tɛ́ʔɛ ni, a poro be nyapiigèle le wi ni ni wéle, a be wi yɛ́ɛgi nyaa a gi kàri mɔ a jo nyɛ̀ʔɛni tundunwaa wóʔo gii.
Kolocɔlɔɔ Syɛ́ɛnri © Bible Society of Côte d'Ivoire, 2008.