Luki 22
22
Zyefubèle yɛɛ̀kinibéle n joo n bɛ̀ɛ Zyezu kpóoli kéele na
(Mat 26:1-5,14-16; Mar 14:1-2,10-11; Zyan 11:45-53)
1Levé fun búruw séri canʔa maa nùuni, wee be yiri lè Sɔ̀lɔ-mí-yaʔali séri. 2A sáriga-wòlobèle kàfɔɔlɔ ní làlwaw sɛ́bɛwelebéle i kanmaa caa bi Zyezu kpóo. Pe si maa ni fɛ̀ɛgí syɛ́ɛnbèle na.
Zyudasi i caa bi Zyezu le sáriga-wòlobèle kàfɔɔlɔ kɔ́yɔ ni
(Mat 26:14-16; Mar 14:10-11)
3A Sutanaw jée Zyudasi fúngi ni, wee be yiri lè Isikariyɔti, woro wee wi da pye lè kɛɛ ní siinw ni. 4A wee bee kári sáriga-wòlobèle kàfɔɔlɔ ní gáridibèle kùndigibéle ma n sáà joo n bɛ̀ɛ ní be ní àmɛɛ woro a Zyezu le bi sɛ́ɛ lè be kɔ́yi ni. 5A gi be dɛ́nɛ, a be bɛ̀ɛ gi na níì jo poro a wáli kaan wi ma. 6A wi fɔ̀lɔ gi na, ní i làrijànna caa bi wi le be kɔ́yi ni jàngó syɛ́ɛnmi a kɔ́ gi cán í.
Zyezu n be pye a be Sɔ̀lɔ-mí-yaʔali séri lìile sɔʔɔ
(Mat 26:17-25; Mar 14:12-21; Zyan 13:21-30)
7A levé fun búruw séri canʔa ga baa nan, cángee ni be yɛlɛ bi sériw bàpile kpóo lè, 8a Zyezu Pyɛri ní Zyan tun níì jo: «Yaa syée ye sa wolo Sɔ̀lɔ-mí-yaʔali séri lìile sɔʔɔ wo sa lìi.» 9A be wi yari: «Sán mɔ caa wolo í sa li sɔʔɔ?» 10A wi be pye: «Ye wéle, yele ga sáà jée kěgi ni, yele a nànwaa fàrá nyaa ní lɔ̀ʔɔ kasànna ní. Ye taʔa wi na, wi ga sáà jée kpáagee ni lè, ye jée nɛɛ bee, 11yé kpáagi fɔ́lɔ pye: ‹Tamafɔw n jo wolo í ba mɔ pye, kpáagee ni woro a ba Sɔ̀lɔ-mí-yaʔali séri lìile lìi ní woro pìitamabèle ní lè, sán gi nyɛ?› 12Wi a kpaataʔaga tɛ̀ɛn yele na wogbɔʔɔ ní, pe n yáriri tɛ́ʔɛ yaà n kwɔ́ɔ gi ni, nɛɛ bee yele a lìíli sámaga.» 13A be kári n wɔ́ɔ sáà gi nyaa àmɛɛ wi da gi joo lè poro ma, a be Sɔ̀lɔ-mí-yaʔali séri lìile sɔʔɔ yaà.
Lìizanni kéele
(Mat 26:26-30; Mar 14:22-26; 1Kor 11:23-25)
14Lǎli ni làriliili nan lè, a Zyezu tɛ́ɛn lìíli taana ní pìitunbèle ní 15níì be pye: «Ki láagi maa tɔ̀nɔ n pye mii na gbanʔama bi Sɔ̀lɔ-mí-yaʔala sériw naa lìile lìi ní yele ní sáni mii í wɔʔɔ kùu lè, 16níì cán mii a gi joo yele ma, mii a ní lìíli naa lìi nyáana í bi taa li kɔ́rɔw í ba foro Kolocɔlɔɔ fǎngi ni.»
17A wi yagbaagi láa níì bariga kaan Kolocɔlɔɔ ma níì jo: «Ye gee naa syɔɔ ye gbaa yé yeyɛɛ gaan. 18Níì cán mii a gi joo yele ma, nlaʔa níjanʔa na mii a ní ɛrɛzɛn tírire yasanra lɔ́ʔɔ gbaa nyáana í bi taa Kolocɔlɔɔ fǎngi í ba nan.»
19A wi búruw láa níì bariga kaan Kolocɔlɔɔ ma níì wi kabagi n lɛɛ be na níì jo: «Wee naa wi nyɛ mii céri, [dee mii a kaan lè yele kéeli na. Yaa gee naa kpéʔele koro ga pye yele í da sɔ̀ngí da taagi mii na.»
20Kánmi bee wonijanma na, lǎli ni be lìi n kwɔ́ɔ lè, a wi yagbaagi láa níì jo: «Yagbaagi naa gi nyɛ joogaanvɔnni, lee li taa lè mii sìsyaanw báriga ni, wee wi a wo lè yele kéeli na.] 21Kàjáa wee wi a mii le lè mii nigoobèle kɔ́yɔ ni, ye wéle, wee bee wɔ́ɔ i kɔ́gi nii ní mii ní súri yalege ni. 22Syɔɔn-pya tɔ̀nɔ́ i syée àmɛɛ Kolocɔlɔɔ da gi kɔ̀rirɔ n tímana kánmee na lè. Kàjáa nǎnwee wi a wi le be kɔ́yi ni lè, wɔʔɔli a pye wee bee na.»
23A be fala n séli ni peyɛɛ yíbe bi gi cán wee wi a zǐn gee bee kpéʔele poro níngi ni lè.
Wìí wi kpɔ́ʔɔ pe myɛ na?
24 #
Mat 18:1; Mar 9:34; Luk 9:46 A kàkabalaga níì jée pìitamabèle nínge ni a be jo: «Wìí wi déè yɛlɛ paa córo wolo ni syɛɛnkpɔɔw?» 25#Mat 20:25-27; Mar 10:42-44 A Zyezu be pye: «Syɛɛnfeleyi fànʔafɔɔlɔ i yi kàragí fànʔa na, bele be yi kàragí lè, pe n gi yaʔa yaa poro yiri kacànbyebèlē. 26#Mat 23:11; Mar 9:35 Kàjáa yele si na ki a tɔ̀nɔ́ pye ànbée yele ma í. Fwɔɔ wee wi nyɛ lè yele ni syɛɛnkpɔɔw ki n yɛlɛ wi wiyɛɛ bye mɔ a jo wobili, wee wi nyɛ lè yele yɛ́ɛgi na, woro si pye mɔ a jo yele nìgwɔɔ. 27#Zyan 13:12-15 Wìí wi nyɛ syɛɛnkpɔɔw, wee wi tɛ́ɛn ni líi lè láà ba fwɔɔ wee wi lìíli lée n ba ni kaangi lè? Wee wi tɛ́ɛn ni líi lè, woro ban ì? Kàjáa mii si i nyɛ yele níngi ni àmɛɛ falipyeo nyɛ lè, wee wi yaliiri lée n ba ni kaangi lè lìifɔbèle ma. 28Bele be pye ní mii ní mii kagbanyi ni lè, poro be nyɛ yele. 29Mii si a tɔ̀nɔ́ fǎngi le yele kɔ́yi ni àmɛɛ mii Tóow gi le mii kɔ́yi ni lè. 30#Mat 19:28 Koro ga pye yele í da líi sáā gbo mii tàbaliw na mii fǎngi ni. Yele a tɛ́ɛn fàngorigēle na bi pye Isirayɛli syɛɛnfeleyi kɛɛ ní siin kútiijoobéle.»
Zyezu n jo Pyɛri a woro cée
(Mat 26:31-35; Mar 14:27-31; Zyan 13:36-38)
31A Kàfɔw jo: «Siimɔn, Siimɔn, Sutanaw n yele nyɛ́ɛri n taa Kolocɔlɔɔ ma ní i sɔ̀ngí bi yele fɛɛ àmɛɛ pe gáā yaliire fee lè. 32Kàjáa mii si n Kolocɔlɔɔ nyɛ́ɛri mɔ kéeli na, koro ga pye mɔ tágali a kɔ́ kwɔ́ɔ í, mɔ ga kɔ́ baa kàri, mi nìrimɛ le mɔ senyɛnbèle ni.» 33A Pyɛri wi pye: «Kàfɔw, mii n sámaga n kwɔ́ɔ n yére mɔ na, àlí mɔ ga ni syée kàsow ma yoo, kùúw ma yoo, mii i syée ní mɔ ní.» 34A Zyezu wi yari: «Pyɛri, mii a gi joo mɔ ma, sáni gòpɔ́w í nyɛni lè níjanʔa, mɔ a mii cée bi taa tɔlɔyɔ taanri, si jo mɔ ga mii cán í.»
Wálile-yáriyi, ní kpàbibèle, ní ŋɔséebèle kéele
35 #
Mat 10:9-10; Mar 6:8-9; Luk 9:3; 10:4 A Zyezu be pye: «Lǎlee ni mii da yele tun lè níì jo yele a kɔ́ wálile-yariya, ní kpàbibēle, ní taʔalaya láa lè í, a yarigaa da kólogo lé yele ma?» A be jo: «Eʔe.» 36A wi níì be pye: «Kàjáa tɔ́ɔliw ni wálile-yariga ga pye wee ma lè, wi gi láa, kpàbi ga wɔ́ɔ̀ pye yaà, wi wi láa, wàa ga pye ŋɔsée o nyɛ wi ma í, ki n yɛlɛ wi wi búrogi pára wi wàa syɔɔ. 37#Eza 53:12 Níì cán mii a gi joo yele ma, syɛ́ɛnree ti da sɛ́bɛ lè n jo: ‹Pe n wi córo kapeebyebèle nínge ni,› ŋàʔanaga gii fwɔɔ dee bee si foro mii na. Gee pe da sɛ́bɛ mii kéeli na lè, ki làrivoroli li nan n kwɔ́ɔ.» 38A be wi yari: «Kàfɔw, ŋɔséebéle siin i naa bele.» A wi jo: «Gee bee n yɛlɛ.»
Zyezu i nyɛ́ɛri Olivye tíiri nyanbelege na
(Mat 26:36-46; Mar 14:32-42)
39A wi yiri n kári Olivye tíiri nyanbelege ma, àmɛɛ wi tàli ni gi kpéʔele lè. A pìitamabèle wɔ́ɔ̀ taʔa wi na. 40Lǎli ni wi sáà nan tɛ́ɛgi bee na lè, a wi be pye: «Yaa nyɛ́ɛri koro ga pye yarigaa a kɔ́ yele kárima bi lége kapeele ni í.» 41A wi léeli be na àmɛɛ kàdɛnɛgɛ wáama léeliganma nyɛ lè, ní sáà kpùmɔnɔ ni nyɛ́ɛri 42níì jo: «Abaa, mɔ ga fɔ̀lɔ, mi yagbaagi naa léeli mii na. Kàjáa ki ga yɛlɛ mii nyɛ́nɛ kéeli í kpéʔele í, fwɔɔ mɔ nyɛ́nɛ kéeli.» 43[A nyɛ̀ʔɛni tundunwaa pan wi ma n baa fànʔa le wi ni. 44Amɛɛ wi wɔʔɔ ni caanri fúngi ni lè, a wi ní i nyɛ́ɛri ní lòmaana ní n sɔ̀lɔ, a kakpegi wi wo fwɔɔ n baa pye mɔ a jo sìsyaan wii, ni sɔlɔ ni ŋuu tári na.]
45Lǎli ni wi kwɔ́ɔ lè nyɛ́ɛrigi na, a wi yìri n lúru n pan pìitamabèle ma n baa be nyaa pe i ŋúnɔ funbɛɛnri báriga ni. 46A wi be pye: «Nyàʔá na yele ŋúnɔ? Ye yìri yaa nyɛ́ɛri koro ga pye yarigaa a kɔ́ yele kárima bi lége kapeele ni í.»
Zyezu cǒli kéele
(Mat 26:47-56; Mar 14:43-50; Zyan 18:3-11)
47Lǎli ni Zyezu pye syɛ́ɛnri bee joolo na lè, a syɛ́ɛnmi kàri n nan wi na, wee pe da ni yiri lè Zyudasi wi pye lè kɛɛ ní siinw ni, woro wi da kíni pe yɛ́ɛgi na. A wi nùuni Zyezu na bi wi syɔɔnri. 48A Zyezu si wi pye: «Zyudasi, a mɔ a Syɔɔn-pya le lé wi nigoobèle kɔ́yɔ ni ní syɔɔnrilɔ ní?»
49A Zyezu pínɛnyɛnbèle ga gi nyaa gee ki a kpéʔele lè, a be jo: «Kàfɔw, wolo í be kpúmɔn lé ní ŋɔséebèle ní?» 50A poro wàa fala n sáriga-wòlobèle kàfɔgbɔɔɔ falipyeo kpúmɔn n kàliige líiwagi ceri n láʔa wi na. 51A Zyezu si be pye: «Ye tíi, ye gi yaʔa gee bee na,» níì fala n tánga líiwagi na a gi pɔʔɔ. 52Koro kàdoʔo ma sáriga-wòlobèle kàfɔɔlɔ, ní kpɔ̀ʔɔrɔli kpaʔa gáridibéle kundigibéle n fàra wolɛɛbèle na be pan ba Zyezu cò lè, a wi bele bee pye: «A yele pan lé ní ŋɔséebéle, ní kàgbeegēle ní mii kurugo àmɛɛ mɔ lóʔo lè kàyuuo mii nyɛ? 53#Luk 19:47; 21:37 Lǎli ni mii da pye lè yele níngi ni kpɔ̀ʔɔrɔli kpaʔa ni canʔa o canʔa, yele ga taa si mii cò í. Kàjáa yele lǎli si li tɔ́ɔ̄ nyɛ lee naa ní yébilimi fànʔa làla.»
Pyɛri n Zyezu cée
(Mat 26:57-58,69-75; Mar 14:53-54,66-72; Zyan 18:12-18,25-27)
54Lǎli bee ni a be wi cò n kári ní wi ní n sáà jée sáriga-wòlobèle kàfɔgbɔɔɔ kpaʔa ni. Pyɛri si maa taʔa be na léelige ni syée be kurugo. 55Pe maa naà le kàcooli fúngo ni níì tɛ́ɛn gi taana ni waari. A Pyɛri wɔ́ɔ sáà tɛ́ɛn ní be ní. 56A falipye-pìcaawaa ga wi nyaa wodɛ́ɛɔn ní náagi taana, a wi yɛ́ɛgi le wi ni ni wéle, ní kɔ́ɔ̀ jo: «Nǎnw naa maa wɔ́ɔ̀ pye ní wi ní.» 57A Pyɛri gi kábala níì jo: «Cɔlɔɔ mɔ, mii ga wi cán í.» 58A cɛɛri ga pye, a syɔɔnwaa nikwɔɔ wi nyaa, a woro wi pye: «Dé bele bee wàa mɔ nyɛ.» A Pyɛri níì jo: «Nàɔn mɔ, poro wàa ban wi nyɛ mii í.» 59A lɛ́ɛri nibin félege ga sɔ̀lɔ, a wàa nikwɔɔ níì gi joo n gbàn níì jo: «Kányɛʔɛ na nǎnw naa maa pye ní wi ní, níì cán wi tɔ̀nɔ́ i nyɛ Galile tári wówaa.» 60A Pyɛri níì jo: «Nàɔn mɔ, dee mɔ nyuu lè, mii ga di cán í.»
N wi yaʔa syɛ́ɛnri bee joolo na, a gòpɔ́w fala n nyɛni. 61A Kàfɔw kàri n Pyɛri wéle. A Pyɛri fala n Kàfɔw syɛ́ɛnrɛ sɔ̀ngi n taa àmɛɛ wi da gi joo woro ma lè níì jo: «Sáni gòpɔ́w í nyɛni lè níjanʔa, mɔ a mii cée tɔlɔyɔ taanri.» 62A wi yiri kàfugi na n sa ni nyaan gbanʔama.
Pe n Zyezu tɛʔɛlɛ níì wi kpúmɔn
(Mat 26:59-68; Mar 14:55-65; Zyan 18:19-24)
63Bele kɔ́yɔ ni Zyezu da pye lè, a be i peyɛɛ nyɛ́nɛ wi na, ní i wi kpúmɔn, 64níì wi yɛ́ɛgi pwɔɔ n tɔ́n, ní i wi yíbe níì jo: «Wìí wi mɔ kpúmɔn? Mi wi tɛ̀ɛn wolo na.» 65A be syɛɛnraa nikwɔɔ joo n taʔa wi na saʔa, ní i wi teeri.
Pe n Zyezu yérige kútiijoobèle yɛ́ʔɛ ma
(Mat 26:59-66; Mar 14:55-64; Zyan 18:19-24)
66Lǎli ni nyǐngi tali lè, a Zyefubèle wólɛɛbéle, ní sáriga-wòlobèle kàfɔɔlɔ, ní làlwaw sɛ́bɛwelebéle peyɛɛ gbóʔoro, níì wi kɔ́ri n yérige pe Sanedirɛnw nínge ni. 67A be jo: «Kapye mɔ wi nyɛ Kirisi, mi gi joo wolo ma.»
A wi be pye: «Mii ga gi joo yele ma, yele a tága gi na í. 68Mii si ga wɔ́ɔ̀ yele yíbe, yele a syɛɛnlurugori kaan mii ma í. 69Kàjáa nlaʔa tɔ́ɔliw naa na Syɔɔn-pya a pye wodɛ́ɛɔn ní Séew Myɛ Fɔ́lɔ Kolocɔlɔɔ kàliige ma.» 70A pe myɛ jo: «A gee bee jo lé mɔ wi nyɛ Kolocɔlɔɔ Jáaw?» A wi be yari: «Amɛɛ yele gi joo lè, ànbée gi nyɛ, mii wii.» 71A be jo: «Nyàʔá séerafeleo si wolo ní i caa wi na? Wolo tiimaa n wi nyɔ́ɔgi syɛ́ɛnrɛ lóʔo.»
Kolocɔlɔɔ Syɛ́ɛnri © Bible Society of Côte d'Ivoire, 2008.