Matiyu 4
4
Sɔtaannan é Ɛnza nɔswaannan
Maki 1.12-13; Luka 4.1-13
1Kwɔ́ o la, Ní Sɛnnɛnyanin ŋóo kɛ tó Ɛnza ŋé táa dhyɛ́ o lɔ, kó óo kó é kɛ ke Sɔtaannan o tɛ́ɛ táa a lɔ́swaan. 2Ɛnza ŋé tee bínaannin ni sú bínaannin kɛ́ sún nɔn mínngɛ, kɔ́ɔn é a myaan. 3Sɔtaannan mín ŋé lɔ́swaannikɛbhaa o le, oo í mángbaa Ɛnza nan kɛ fɔ a yɛ kó: «Ní íi Ala Dhyénjɛ le, a fɔ káwaguun míin nú yɛ kó ii i yɛ́ɛman kɛ kɛ́ búlu lé í yɛ́.» 4Ɛnza ŋé a yawi kó: «A sɛwɛnin ɲé Ala yɛ kitabu o lɔ kó: Mɔɔn tɛ́ bhálola lɔ́minfe ngbɛ́ɛgbɛɛ la; wáa saanin súusuu é bhɔ́la Ala káa lɔ, oo mɔɔndhye ŋó bhálola.»
5Oo kɛ́ mínngɛ sɔtaannan é táa nín Ɛnza né fɔ Yeluzalɛmu, só sɛ́nnɛnyanin ŋó la, kɛ alalɔ Ala bhatobhomba ó kúnnɔn 6tó kɛ fɔ a yɛ kó: «Ni íi Ala Dhyénjɛ le, í gbán kɛ i yíi lúuman, kɛ mansɔɔ a sɛwɛnin ɲé Ala yɛ́ Kitabu o lɔ kó:
Ala yáa cé dí a yɛ malɛɛka ólu mán i kósɔn,
tó íi í tá í bhóo ó lɔ́,
ké i se ŋó kɛ́nan gbasi káwaguun nɔ la.
Kɛ́nan gbasi káwa lɔ́la.»
7Ɛnza ŋé a yawi kó: «A sɛwɛnin ɲé íkwɔ kó: Í kɛ́nan Mantii o, í yɛ́ Ala o lɔ́swaan.»
8Sɔtaannan é táa ni ale tii yámba lɔ́ ka íkwɔ, tó kɛ dínɲan mansaya o ywáa olu ní olu cɛ́ɲanlaa ólu bɛ́ yáa a lá, 9tó kɛ fɔ a yɛ kó: «Ɲáan míin bɛ́ di í mán ní ile kwɛ́nnin ngɛ i kúnmɛɛn nɔ́kɛɛ né kɔ́ɔ kɛ́ né bháto.» 10Ɛnza ŋé fɔ a yɛ kó: Í mánbhɔ nán, Sɔtaannan! Kɛ mansɔɔ a sɛwɛnin ɲé Ala yɛ́ Kitabu o lɔ kó i manyii i yɛ́ Mantii o i yɛ́ Ala ó le yɛ́, kɛ́ ale kéengboto lé bháto. 11O fɔ́nin ngwɔ, Sɔtaannan oo a mankɛnin ndo. Malɛɛka ólu o lé kɛ́ nán lé Ɛnza nzaala kɛ lɔ́min dí a man.
Ɛnza ŋé í kwɔ́sɛɛla Galile
Maki 1.14-15; Luka 4.14-15
12Ɛnza ŋé myɛ́n mínngɛ kó i wɛɛ Yaya bhyáa kasola, aa táa Galile lánga ŋo lɔ. 13A man í lá ngɛ́ Nazalɛti, aa táa í síi Galile bhá ó tɔ́ɔfɛ Kapɛnamu só ó la, o só óo mala mínnɔn, fɔ́ é kála o mala ó mán kó Zabulɔn ní Nɛfutali. 14Oo kɛ́ lé, ke kó óo kó é kɛ ke céla Ezayi é kóman mín nvɔ, o a í lafa. A fɔnin ndɛ́ɛ a kwɔ tá ne kó:
15 Álee Zabulɔn ní Nɛfutali mála mɔɔn olu,
óni álee mɔɔn mínnuu kɔɔji o tɔ́ɔfɛ,
óni mínnuu Zuludɛn bhá ó kwɔ́man;
álee síya mínnu Galile mala ó lɔ áa í tóo mánlɔ!
16 Mɔɔn mínnu tɛ́ɛ dínɲanlɔtɛɛla diwi lɔ,
olu wɛ́ɛ kɛ́ɛnɲanba o yé.
Diwi lɔdiwiyaninmba ó tɛ́ɛ yamaan mín mɔɔn lú ka,
kɛ́ɛnɲan o wɛ́ɛ bhɔ́ olu yɛ.
17Kɛ ta o wáati o mán, Ɛnza ndɛ́ɛ lakawanin kɛ́la kó: «Áa a yóo ólu yɛ́ɛman, kɛ mansɔɔ Ala yɛ́ Mansaya ó lángɛɛnman wáati o wɛ́ɛ bhyáa sé le!»
Ɛnza ŋé a yɛ kaamɔɔndhye njónan ólu kíila
Maki 1.16-20; Luka 5.1-11
18Ɛnza ŋé tó táamanla Galile bhála o la kɛ bhádhyenjɛman nvyáa yé: Simɔn mín ndɔ́ɔ íkwɔ kó Piyɛli, óni a lɔɔcɛ Andele. I tɛɛ yɔ fíi bhá ó lɔ kɛ yɔ́ɔ myáan. 19Ɛnza ŋe fɔ i yɛ kó: «Áa nan í bhyáa né kwɔ́, ɲáan a kɛ́ mɔɔn ɲíinmaa le ké áa i lanan ne mán.» 20O ywáaninngee ŋo lɔ ii í kwɔ́ kɛ́ i yɛ yɔ ólu lá téeman kɛ i bhyáa a kwɔ.
21Aa táa ɲɛ́nnzhaafɛ, aa bhádhyemannjɛ fyáa gbɛ́ɛ yé yénɔn: Zebede dhyénjɛ Zaki ní o lɔ́ɔcɛ Yaya. I tɛɛ i yɛ yɔ ólu lɔ́bhyɛnan Kúun ŋó kɔ́ɔnnɔn ni i facɛ Zebede le. Ɛnza ŋé i kíi; 22Ii í kwɔ́ kɛ́ i facɛ lá téeman, óni Kúun ŋó la, tó kɛ bhyáa Ɛnza ngwɔ.
Ɛnza ŋé lakawanin kɛla óni kɛ lákɛɛnyalikɛ
23Ɛnza ndɛ́ɛ Galile mála ó ywáa ó bɛ́ lɔyaalala kɛ táa mɔɔn olu kála né í yɛ́ sɛ́ɛbho ŋólu la, óni kɛ táa Ala yɛ sanmankanmɛɛ ó láse lé Ala yɛ́ Mansaya ó tá fa nvɛ́, o kwɔ, a tɛɛ yangalo bɛ́suu lákɛɛnyala. 24A tɔ́ɔ é lá Sili yamaan o ywáa bɛ́ ka. Yangalo bɛ́suu tɛ́ɛ mɔɔn mínnu la, ii táa o mɔɔn ó bɛ́ lé a saala: Lámansayoo ndɛ́ɛ mɔɔn mínnu fɛ́ óni benzhaayatɔ ólu ní mɔɔn mínnu sé ndɛ́wɛɛ fáa i man, Ɛnza ŋé i lákɛɛnya. 25Yaman gbɔ́gbɔ é bhyáa a fonan, kɛ ta Galile mán kɛ sii Dekapɔli la, óni Yeluzalɛmu ní Zude ní Zuludɛn bhá ó kwɔ́man.
© (Active), Wycliffe Bible Translators, Inc. All rights reserved.