ወንጌል ዘማቴዎስ 20
20
ምዕራፍ 20
በእንተ ምሳሌ ዐቀብተ ወይን
1 #
21፥33፤ ኢሳ. 5፥1-7። እስመ ትመስል መንግሥተ ሰማያት ብእሴ በዓለ ቤት ዘወፅአ በነግህ ይትዐሰብ ገባእተ ለዐጸደ ወይኑ። 2ወተካሀሎሙ ዐስቦሙ በበ ዲናር ለዕለት ወፈነዎሙ ውስተ ዐጸደ ወይኑ ይትቀነዩ። 3ወወፂኦ ጊዜ ሠለስቱ ሰዓት ርእየ ካልኣነ እንዘ ይቀውሙ ውስተ ምሥያጥ ፅሩዓነ። 4ወሎሙኒ ይቤሎሙ ሑሩ አንትሙኒ ውስተ ዐጸደ ወይንየ ተቀነዩ ወዘረትዐኒ እሁበክሙ ወእሙንቱሂ ሖሩ። 5ወካዕበ ወፂኦ ጊዜ ስሱ ወተስዑ ሰዓት ገብረ ከማሁ ክመ። 6ወጊዜ ዐሥሩ ወአሐዱ ሰዓት ወፂኦ ረከበ ካልኣነ እንዘ ይቀውሙ ወይቤሎሙ ምንትኑ ዘአቀመክሙ ዝየ ኵሎ ዕለተ ፅሩዓኒክሙ። 7ወይቤልዎ እስመ አልቦ ዘተዐሰበነ ወይቤሎሙ ሑሩ አንትሙኒ ውስተ ዐጸደ ወይንየ ወተቀነዩ ወዘረትዐኒ እሁበክሙ። 8ወመስዮ ይቤሎ በዓለ ዐጸደ ወይን ለመጋቢሁ ጸውዖሙ ለገባእት ወሀቦሙ ዐስቦሙ ወአኀዝ ቅድመ እምደኀርት እስከ ቀደምት። 9ወመጽኡ እለ ዐሥሩ ወአሐዱ ሰዓት ወነሥኡ በበ ዲናር። 10ወመጽኡ ቀደምት ወመሰሎሙ ዘያፈደፍዱ ነሢአ እምእሉ ወነሥኡ በበ ዲናር እሙንቱሂ። 11#ሉቃ. 15፥29። ወነሢኦሙ አንጐርጐሩ ላዕሌሁ ለበዓለ ቤት። 12#ዘፍ. 31፥40። እንዘ ይብሉ ለእሉ ደኀርት ዘአሐተ ሰዓተ ተቀንዩ አስተዓረይኮሙ ምስሌነ ለእለ ጾርነ ክበዳ ወላህባ ለዕለት። 13ወአውሥአ ወይቤሎ ለአሐዱ እምኔሆሙ ኢዐመፅኩከ ዐርክየ አኮኑ በዲናር ተካሀልኩከ። 14ንሣእ ዘይረክበከ ወሑር ወፈቀድኩ አነ ለዝንቱ ደኃራዊ አሀቦ ከማከ። 15#ሮሜ 9፥17-21። ወሚመ ኢይከውነኒሁ እግበር ዘፈቀድኩ በንዋይየ አው ዐይንከኑ ሐማሚ ውእቱ እስመ አነ ኄር አነ። 16#19፥30፤ 22፥14። ከማሁኬ ይከውኑ ደኀርት ቀደምተ ወቀደምትኒ ደኀርተ እስመ ብዙኃን ጽዉዓን ወኅዳጣን ኅሩያን።
ዘከመ ነገሮሙ በእንተ ሕማሙ ወሞቱ
17 #
ማር. 10፥32-34፤ ሉቃ. 18፥31-33። ወእንዘ የዐርግ እግዚእ ኢየሱስ ኢየሩሳሌም ነሥኦሙ ለዐሠርቱ ወክልኤቱ አርዳኢሁ እንተ ባሕቲቶሙ ወአግኀሦሙ እምፍኖት ወይቤሎሙ። 18#16፥21። ናሁ ነዐርግ ኢየሩሳሌም ወይእኅዝዎ ለወልደ ዕጓለ እመሕያው ወያገብእዎ ኀበ ሊቃነ ካህናት ወጸሐፍት ወይኴንንዎ በሞት። 19ወይሜጥውዎ ለሕዝብ ወይሣለቁ ላዕሌሁ ወይቀሥፍዎ ወይሰቅልዎ ወበሣልስት ዕለት ይትነሣእ።
በእንተ ደቂቀ ዘብዴዎስ
20 #
ማር. 10፥35-46። ወእምዝ መጽአት ኀቤሁ እሞሙ ለደቂቀ ዘብዴዎስ ምስለ ደቂቃ ወሰገደት ሎቱ እንዘ ትስእል እምኀቤሁ። 21ወይቤላ ምንተ ትፈቅዲ እግበር ለኪ ወትቤሎ ረሲ ሊተ ከመ ይንበሩ እሉ ደቂቅየ ክልኤሆሙ አሐዱ በየማንከ ወአሐዱ በጸጋምከ በመንግሥትከ። 22#26፥39፤ ሉቃ. 12፥50፤ ዮሐ. 18፥11። ወአውሥአ እግዚእ ኢየሱስ ወይቤ ኢተአምሩ ዘትስእሉ ትክሉኑ ሰትየ ጽዋዕ ዘአነ እሰቲ ወጥምቀትየኒ ዘአነ እጠመቅ ትጠመቁኑ ወይቤልዎ እወ ንክል። 23#ሮሜ 6፥3። ወይቤሎሙ ጽዋዕየሰ ትሰትዩ ወጥምቀትየኒ ትጠመቁ ወነቢረሰ በየማንየ ወበጸጋምየ አኮ አነ ዘእሁብ ዘእንበለ ለእለ አስተዳለወ ሎሙ አቡየ ዘበሰማያት። 24ወሰሚዖሙ ዐሠርቱ አንጐርጐሩ ላዕለ ክልኤቱ አኀው። 25#ሉቃ. 22፥24-27። ወጸውዖሙ እግዚእ ኢየሱስ ወይቤሎሙ ኢተአምሩኑ ከመ መኳንንቲሆሙ ለአሕዛብ ይኴንንዎሙ ወዐበይቶሙ ይሤለጡ ላዕሌሆሙ። 26ወለክሙሰ አኮ ከማሁ ወባሕቱ ዘይፈቅድ እምኔክሙ ይኩን ዐቢየ ይኩንክሙ ገብረ። 27ወዘሂ ይፈቅድ እምኔክሙ ይኩን ሊቀ ይኩንክሙ ላእከ። 28#ዮሐ. 13፥4-10፤ ፊልጵ. 2፥7፤ 1ጢሞ. 2፥6። እስመ ኢመጽአ ወልደ ዕጓለ እመሕያው ከመ ይትለአክዎ ዘእንበለ ዳእሙ ከመ ይትለአክ ወየሀብ ነፍሶ ቤዛ ብዙኃን።
በእንተ ክልኤቱ ዕዉራን
29 #
ማር. 10፥46-52፤ ሉቃ. 18፥35-43። ወወፂኦ እምኢያሪሆ ተለውዎ ሰብእ ብዙኃን። 30ወናሁ ክልኤቱ ዕዉራን ይነብሩ ጥቃ ፍኖት ወሰሚዖሙ ከመ እግዚእ ኢየሱስ የኀልፍ ጸርሑ እንዘ ይብሉ ተሣሀለነ እግዚኦ ወልደ ዳዊት። 31ወሰብእሰ ይጌሥጽዎሙ ከመ ያርምሙ ወአፈድፈዱ ጸሪሐ እንዘ ይብሉ ተሣሀለነ እግዚኦ ወልደ ዳዊት። 32ወቆመ እግዚእ ኢየሱስ ወጸውዖሙ ወይቤሎሙ ምንተ ትፈቅዱ እግበር ለክሙ። 33ወይቤልዎ እግዚኦ ከመ ይትከሠታ አዕይንቲነ። 34ወአምሐርዎ ለእግዚእ ኢየሱስ ወገሠሦሙ አዕይንቲሆሙ ወበጊዜሃ ነጸሩ ወተለውዎ።
