Gênesis 30
30
1Waneya texinixka Raquel tma michiwpiraxyawakanu Jacó-yma thahxatlo tomole. Hiyáhoni wla ttshinru Jacó:
— Piwuhenewatanno yáholu nupnanu.
2Waneya Jacó hahkalo Raquel waneya wla htshinatka:
— Hoyakallahe pikahwakno hita hatatjewa hitakni himaletyi pma michiwaxyawakanu?
3Waneya wla ttshinatka:
— Haté hehe twukni ntowrero Bila. Walatshi pumumkanu hiyáhoni hitasko tmatuwhenexini, numukata wuhenewletanu hit-koxa wala hiwakaya.
4Hiyáhoni teneklu ttowrero Bila tshinkaluro hhanunroxyawakapa. Waneya Jacó himumkatkalo.
5Waneya tmichiwatatka Bila. Mturu jeji tmatkajyatkalu Jacó.
6Waneya Raquel wla tshinatka:
— Hoyakalu hetahchinikanyehitatkano, nanjire hjematka, mturu jeji renekno. Hiyáhoni Dã thiwakatlu.
7Waneya Bila tshinkaluro Raquel towrero michiwatatnaka waneya mturu jeji tmatkakatka hepi rixinri towhene.
8Waneya wla ttshinatka Raquel:
— Tsru yahtaletlu neta nomole suxoyma nyahtaletkatka. Seyni nallitanatkalo. Hiyáhoni Naftali tutakhiwakatlu.
9Seyni texinixka Lia tutuka twuhenewlexyawaka, ttowrero Zilpa twapa, teneklu Jacó hhanunroxyawakaplo.
10Waneya Zilpa tshinkaluro, Lia towrero mturu jeji tmatkajyalu Jacó.
11Waneya Lia wla tshina:
— Hixolunepatkani. Hiyáhoni thiwakatlu Gade.
12Waneya Zilpa tshinkaluro matuwhenetatnaka jejni hepi rixinri whene.
13Waneya Lia wla tshina:
— Poyikowatatshrono! Potukalno ntshinko suxoneya. Hiyáhoni Aser tutakhiwakatlu.
14Waneya trigo-ji hamikolu klu papkotkani, Rúben campo yatka waneya hejnuji mandrágoras rukchika. Runro, Lia nwaka ranikatkalu. Waneya Raquel wla tshinatkalo Lia:
— Mandrágoras psoji piwhene hwapleru penekanno.
15Seyni tuhitlo, wla ttshinro:
— Pixahlahe nhanuru pkoniywakno pikahwakanru noturu hwapleru mandrágoras koxa paluka konretno?
Seyni Raquel wla tshinatkalo:
— Pixa himumkanru Jacó xye yetshno pituru hwapleru mandrágoras penejinipno.
16Waneya kayi rixinixka Jacó campo ruchpajiniklunutka Lia wane ya tyoptoxyawakaplu waneya wla ttshinru:
— Pujhalu pumumjiywakno klu tshinanu nanjitatkayi noturu mandrágoras hwapleru wenru tshinanu. Hiyáhoni wale yetshno rimumkatkalo.
17Waneya Hoyakalu yijnaktokanutlo Lia hiyáhoni tmichiwatatnaka, mturu jeji cinco rixinri tmatkajyatkalu Jacó.
18Waneya Lia wla tshina:
— Hoyakalu wenutatkano klu tshinanu ntowrero nenekatkalu nhanuru rimwiywakaplo. Thiwakatlu Issacar.
19Waneya tmichiwatatnaka Lia waneya mturu jeji seis rixinri tmatkajyatkalu Jacó.
20Waneya Lia wla tshina:
— Henekachalu kihleru renekno Hoyakalu. Halikakni xawakni nhanuru hitaymalutukotnakni hetkopa klu tshinanu seis whenene jejine nmatkajyalu. Hiyáhoni tutakhiwakatlu Zebulom.
21Waneya wane pnutetka suxo tmatkakatka. Thiwakatlo Diná.
22Waneya Hoyakalu hichinikatkalo Raquel. Hoyakalu yijnakotatkalo tanjihohnere hiyáhoni mturu mapa ruhleta.
23Tmichiwatatka mturu jeji tmatkakatka. Waneya wla ttshina:
— Numtuknukananu hkonyano Hoyakalu.
24Tutakhiwakatlu José. Waneya wla ttshinatnaka:
— Tsru Hixikatshriwa Hoyakalu pajrikawhenetanno satutshi jeji penekanno.
Jacó Pohirewnale Pirana
25Waneya José tali matletatka Raquel, Jacó wla tshinru Labão:
— Pitshitanutkano nuchpajyawaka ntshijne nyanutka.
26Pitshixinno nhanunrone nkamrurewyehitanune hiyrun-koxa nowhenene pitshixinno. Pitshitanno nyiywakapa klu tshinanu pimatlu kamrurtshi nkamhiyatkayi.
27Seyni Labão wla tshinru:
— Hitshi, nanjityi kihleru paluka hixlexinipno hi pyanutka klu tshinanu netlu hanu rixa hepixletno Tsru Hixikatshriwa Hoyakalu pixa tshinanu.
28Hiyahokni punkakanno hi psokta paluka pkamrurepa wenru tshinanu klu tshinanu wale nenekanyi.
29Waneya Jacó wla tshinru:
— Pimata hanu nixa kamrurewleta pixa tshinanu hanu nix-hislahlepratyi.
30Klu tshinanu nmapokkanuklunuwa hi hixo pra pixapa seyni xawakni pixolewapratatka hiyrun-koxa Tsru Hixikatshriwa Hoyakalu hepixatkayi napokyehixyawakyi tshinanu. Hiyáhoni hikluhe hitanuko nukchikanutka nopji hajene hepixatshripa?
31Waneya Labão wla tshinru:
— Haté hehe klunerhe nenekanyi?
Waneya Jacó wla tshinru:
— Hike penekanno halikaka xye tsonu ntshinanyi piprane nohlutanutnaka, nuslahapratanyi hiyrunukotnaka.
32Wla nixanu. Xye hohne piprane yehi nyapamtanu carneiro-ne yehi, ptowru pratshine kayonalo tseyo pkolhalo ksajiro nkotspalatanu. Hiyrun-koxa ptowru cabra kayonalo tseyo pkolhalo nkotspalatanu. Walekakpakni nwenuxikolupa.
33Hinamtatshri hohnepa rimathetko nuhlenu pixa hetanuya ptowru katako nkamrure wenru hikolukle pejnutjetokanuta. Hiyáhoni pratshine ho cabra kayonalu hmixkanu ho carneiro ksajiro hmixkanu hanuruktako hit-yehi hikchijikoklunupa tshowhururni.
34Waneya Labão wla tshinru:
— Hikamturu ptshinyawaka pixka rixyawaka.
35Waneya wale hohneko Labão hwapatkana bode-ne kayonalune hiyrun-koxa rawapatkana cabra-ne kayonalone, ptowruka klatlune kahnete rutaklu. Hiyrun-koxa ptowru carneiro ksajiro rawapa waneya hiwhenene hislahjexyawaka rutakatkana.
36Waneya map-hohne yanru pchini hkotspalkajyanru Jacó-nu hiprane tshinanuya. Waneya Jacó hohlujetatkana Labão prane wane hitukatshine.
37Waneya Jacó hahajekaka herotu estoraque muna, amêndoa muna hiyrun-koxa plátano-je rawapa. Waneya wale-je hchichpita kayona tshrathakaka rixa chichpiretlu.
38Waneya hahmunajekaka chichyaluru pratshine hirjexyawaka rutaka. Hiyáhoni pratshine hapojini ruryawakapna honha ratskokajiniklunupna hahajestsiya hmichiwaxinpatkana pratshine.
39Waneya pratshine michiwatatka hahajestsiya. Waneya hmatkakluna pratshine kayonalune, ptowru hix-yonatatshri kahapotsyonhalu, kyotmohleru, kayonalu.
40Waneya Jacó kanipretatkana carneiro whenene waneya Labão prane hyopukhakakna pratshine kayonalune nwaka hiyrun-koxa pratshine ksajirune nwaka hyopukhakakatkana. Seyni waleko hiprane kahnete rutaka, hi Labão praneyma rutakna.
41Waneya hiklukta pratshine pomtalune potu michiwapirata Jacó hahajekaka rutaka wanna yhale sreta hirawaka yehi hmichiwaxyawakapna pratshine hahajeyehiya.
42Seyni pratshine mpomtanestsi hi rutaklu hahajekaka. Hiyáhoni pratshine mmixkone Labão pranepatka seyni Jacó prane hixkolunpatka.
43Jacó pohirewnapotutatka. Hixo pratshine rimwatka, towretshrone hixolune rimwatka, towrertshine hixolune rimwatka, camelo-ne hixolune rimwatka, jumento-ne hixolune rimwatka.
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil