Keriekitho 9
9
Ukepenuopfüe Noah Ze Dietseidiekhokelie
1Siro Ukepenuopfüe japie Noah mu puo nuonuoko tsü di uko üse, “Kruolie mu kralie di kijüu ketshu chülie. 2Khunuo pete, teira pete, siro kijü gou tuoyakezha pete mu khuoko rei pete n prei mu michie di lhoutuo. Hako pete rei pie n dzie nu shüwate ho. 3A gajo kheko se n ketsü tuoi, lhou ketuo kemele khe bu n ca chütuo. A mha pete pie n tsüwate. 4Derei no puo kerheiro sa di themuo puorei cülie lho, süusü, puo zieu. 5Themia kehoupuorei mia kerheiro pevowa ro siazha pie u tsütuo, mu khunuo kehoupuorei themia kerheiro liewa ro kesia se pejo zotuo.
6“Ukepenuopfüe puo thuo puo rhi nunu themia chükeshü la,
kehoupuorei mia dukhriwa ro mia bu puo dukhri latuo.
7No kruolie mu kralie, n bu kekrau chü di kijüu ketshu chü lhoutuo.”
8Ukepenuopfüe Noah mu puo nuonuoko ki pu sa di, 9“Harie, a tsie nieko mu nieko nuosenuoyieko ze dietseidiekho puo pie bazhie ho, 10tsiu u kerheiro kenyi khe perako, kiriko mu kijü nu nhachü pete nieko ze di rouu nunu parkelieko. 11A nieko ze a dietseidiekho-u chüliete, mhakipuorei dzü bu di la sier u chü chükepfü khe peka lalie lho, mu mhakipuorei dzü bu di la sier kijü peka salie lhote.” 12Mu Ukepenuopfüe sie, “A mu nieko siro kerheiro kenyi khe ze dietseidiekhokelie hau vorketuo phou pete la zasi puo chütuo. 13A a pfhesei pie kimhou gei shüzhie, süu se a mu kijüu donu kediekhokelie zasiu chütuo. 14Kehoukipuorei ae kimhou shüpie teiu zeshü mu pfhesei jaketa ngu ro, 15ae dzü bu di sier u chü chükepfü khe pete pekawa lhoü a mu nieko tsiu kerheiro kenyi khe donu kediekhokelieu rükralietuo. 16Pfheseiu kimhou nu ja par tse, a süu meho di a mu kijüu gei lhouketuo u chü chükepfü pete ze dietseidiekhokelieu rükralietuo.” 17Ukepenuopfüe Noah ki, “Hauha a mu kijüu nu u chü chükepfü pete donu dietseidiekhokelie zasiu zo.”
Noah mu Puo Nuonuoko
18Noah nuonuo rou nunu parkelieko liro Shem, Ham mu Jafet. Ham ro Kanan puou. 19Hako sekoe Noah nuonuo; mu hako geinu kijü nu themia pete lhou vor.
20Noah-e lieciemia puo, puoe khubelie cie kerietho-u. 21Noah khubezu huo krielie di mezeta, mu puo pfhenei se mo di pfheki nu zhü. 22Ham, Kanan-nuo puou, puo puo methuokezhü ngu tse, pra puo dzürienie ki pushü. 23Sitse Shem mu Jafet unie pfhe puo chüpie unie bouka gei shülie di tuo pesie pfheki nu le di unie puou kemethuo whewa, puo kemethuo ngu moketuo la unie zie kereilie. 24Noah mecie lalie di puo nuo nhicutho-u puo gei kedipuo chüshü shikecü silie tse,
25Puoe sie,
“Kanan bu rüsekepfüu chücie;
puoe puo dzürienie kituoko kituo chütuo.”
26Puoe pu sa di,
“Ukepenuopfü Jihova bu japie Shem ketsüu chücie;
mu Kanan bu puo kituo chücie:
27Ukepenuopfü bu Jafet chü pekrashücie,
puose puoyie bu Shem themiako ze lhou tuokelie chücie!
Mu Kanan bu Jafet kituo chücie.”
28Dzüdiu sie Noah-e cie krie se di hiepengou lhou salie, 29di puo kelhouzha cie krie thepfü di hiepengou ki siata.
The Bible Society of India
© 2023, Used by permission. All rights reserved. More