Luke 21
21
1Totˑgeesˑgwă̱h' oˑnă̱h, neħ' naaˑgo̱'gă̱sˑo̱h noˑno̱nt'gaˑno̱o̱ˑniħs' no̱o̱'gweh, neħˑhuh' hwaˑo'no̱ħˑsă̱h'do̱ˑo̱nˑdyeħ', nă̱'no̱nˑdaˑwis' heh wasˑde'isˑdo̱h noˑwĭs'daħ oˑno̱h'saˑdo'gă̱hˑdiħ'gĕh.
2Da neħ' kuh gye shaˑgo'gă̱sˑo̱h, ne' waħˑa'goˑdă̱ă̱sˑteħt' goˑno̱h'gwaˑyes'haħˑo̱h, neħˑhuh' hwaħˑa'goˑdiħ', haħˑdeˑgaˑgwĕn'nĭsˑhă'ă̱h.
3Neħ ne'aaˑwă̱ă̱h' Doˑgă̱s' gaˑi'waˑgwĕnˑniˑyòħ' oħˑgwă̱'o̱s Neħ' nă̱ˑgă̱ă̱ waħˑa'goˑdă̱ă̱sˑteħt' goˑno̱h'gwaˑyes'haħˑo̱h, sii''gwaa heˑniˑyo̱o̱' hwaħˑo̱ħ'să̱nt naeh' heˑniˑyo̱o̱' hwaˑă̱'no̱ħˑsă̱nt ne'aˑdiˑgweˑgo̱h.
4Neħ să̱ħ'ă̱h ne gaˑgweeˑgo̱h' naeh nă̱ˑgă̱ă̱' hoˑdi'gaħˑdeeˑnyo̱ħ, he'o̱ˑweh' dwaˑdăăˑgwʋs' neħˑhuh' hwaˑă̱'no̱ħˑsă̱nt' ho̱ˑwe'oˑeeˑgih Na'wĕnˑniˑyòħ; neħ gwaa naeh he'no̱ħˑo̱ˑgoˑdă̱ă̱sˑteħt', gaˑgweeˑgo̱h' naeh neħˑhuh' hwaħˑaˑgooˑdiħ he'niˑyaˑgoˑyă̱ħ' ne yaˑgo̱h'hehˑgo̱h.
5Neħ dih gyee waa'disˑnyeh'dʋk noˑno̱h'saˑdo'gă̱hˑdiħ, gaˑno̱h'saˑyă̱sˑdahˑgo̱h heˑniˑgaħˑsgwaˑiˑyòħs' oˑdye'ăħˑdo̱h, kuh ne waˑdaˑwiˑo̱ħ, haˑwă̱ă̱,
6Neħ' nă̱ˑgă̱ă̱' heˑniˑyòˑdyeˑă'no̱ħ, ne'waħ deˑswa'gaaˑneeħ, daaˑweħ' ne dwă̱ˑnĭs'hăˑdeeˑnyo̱ħ, neħ noˑnă̱h' hă̱ˑgaˑeeħ, tă̱ħˑă̱h' deħˑjoħ'sgwăătˑah taħˑdo̱ˑsaˑgyaˑdyaħˑsăħk nă̱ˑgă̱'a̱a̱k deħˑdwaħ'să̱hˑdo̱h.
7Oˑnă̱h' ho̱ˑwa̱n'do̱s'o̱h, hoˑnă̱ă̱, Saˑdi'o̱ˑnyaˑnih, neħ dih, ne wă̱nˑdo̱h neˑgă̱ħ' neħˑhuh' nă̱ˑyaˑwă̱ă̱h'? A naħˑot' kuh ă̱ˑyoˑyă̱nˑdeh'dahˑgo̱ˑo̱o̱k' noˑnă̱h' hă̱ˑga'eeħ neħˑhuh' nă̱ˑya'wă̱hˑsyo̱ˑnyo̱o̱ħ nă̱ˑgăă̱' no̱ħˑoˑiˑoħ'dă̱ħˑsho̱o̱ħ'?
8Neħ ne'aaˑwă̱ă̱, Swaˑdah'niˑgo̱ˑă̱ˑă̱ħk' să̱ˑno̱h' dă̱ˑyech'hiħˑniˑgo̱ˑă̱ħ'să̱h; neħ să̱ħ'ă̱h ne' gotˑgaħ'deħ naˑgeh'să̱ˑno̱ˑgo̱o̱ ă̱nˑdyă̱ă̱hˑdʋk, ă̱ˑno̱ˑdo̱'neħ, iiħ' neˑgă̱ħ' ne Christ; neħ kuh ne' dòsˑgă̱'o̱h daˑyòt'hisˑdo̱n'dyeħ; neħ' dih gai'o̱ˑnih' să̱ˑno̱h' neħ, ă̱ˑye'chisˑheeh.
9Neħ dih, noˑnă̱h' ă̱ˑswa'iˑwa'o̱kˑhaak neħˑhuh gyee dyaˑgoˑdiˑyòò' deˑyo'dyòhˑgwaˑesˑyo̱h kuh, să̱ˑno̱h' ă̱ˑswah'dyo̱ħk; neħ să̱ħ'ă̱h nă̱ˑgă̱ă̱' no̱ħˑoˑiˑoħ'dă̱ħˑsho̱ħ' ă̱ˑdwa̱ˑdyeeˑă̱nt' neħˑhuh' nă̱'yaaˑwă̱h; neħ gwaa' nă̱ˑwa̱n'doħkˑdak' tă̱ħˑă̱h' naeh, ta'yoˑgo̱nˑdaˑdyeh'.
10Oˑnă̱h' haˑgo̱ˑyă̱ˑo̱h'seeh, Dă̱ntˑhaˑdiiˑdaħt' shoˑno̱'ă̱nˑjaat, dă̱ˑno̱nˑdoˑgă̱nt' noˑyaħ' hoˑno̱'ă̱nˑjeeˑno̱o̱ħ; go'wăhˑgo'wasˑho̱ħ' kuh heˑnitˑhă̱ˑnă̱ˑno̱h'do̱ˑo̱ħ' dă̱ˑwa̱nˑdoˑgă̱h'daˑno̱o̱ħ;
11Neħ kuh nă̱ˑdwa̱n'deħˑhaasˑdo̱o̱ħ', ă̱ˑya'ă̱nˑjo̱nˑdaħˑda'no̱o̱ħ, ne' tiˑgaˑwĕnˑniˑyòħ sho̱ he'o̱ˑweh; ă̱ˑyaˑgoˑdo̱s'weħˑda'no̱o̱s kuh; oˑno̱h'soˑdăăt'giħ' kuh, ă̱ˑga'no̱hˑsoˑdaiħ; deˑyòˑdă̱ˑno̱'yaˑnih'do̱h, neħ kuh noˑi'waˑnăă'gwah'doħs ă̱ˑwa̱nˑdoˑdah'so̱ˑgòħ ă̱ˑdweehˑdʋk' heˑgă̱ˑo̱'yaˑdeħ.
12Neħ gwaa' ne gaaˑoħ' no̱ħˑwa̱nˑdih nee'gaˑgweeˑgo̱h nă̱ˑgă̱ă̱', neħ nă̱ˑyech'hiˑyă̱'nisˑoh'daˑă̱ħ, dă̱ˑyech'hiˑya'do̱hˑho̱ˑgaˑnyat' kuh; neħˑhuh' kuh hă̱ˑyech'hiˑyaatˑgaħ', hă̱ˑno̱nt'gă̱ˑnĭs'atˑhaħ, neħ kuh ho̱ˑwa̱n'dihˑho'do̱hˑgwaa'no̱h; neħˑhuh' he'aaˑdiiˑgat' ne go'wăhˑgo'wasˑho̱ħ ă̱ˑyech'hiħˑdyo̱o̱ħ; kuh haaˑdi'yaħˑdaaˑdeħ ne tă̱ˑnă̱'no̱hˑdo̱'o̱ħ; neħ ă̱ˑdyò'iˑwaħ'gă̱ˑa̱a̱k' naˑgeh'să̱ˑno̱ħ.
13Da neħ' niis ă̱ˑswa'desˑdă̱ħ ne gaˑi'waˑgwa'ihˑso̱s' ă̱ˑwa̱nˑdo̱ħ.
14Neh dih dyoˑi'waħˑgă̱ˑa̱a̱k, swaˑă̱ħˑhet ne swă̱ˑnyah'sahˑgĕh, neħ na'gă̱ˑa̱a̱k' neħ o̱nˑdaˑyoˑdyeˑă̱h'do̱ˑo̱k ne do̱nˑdeˑswa'yaħˑdoˑwehˑdah'so̱ˑo̱k ne' naħˑot ă̱ˑswiħ, heh dă̱nˑdi'swasˑnyeħt.
15Neħ să̱ħˑă̱h' naeh niiħ ă̱ˑgyo̱ħ' nă̱ˑswah'saˑga'ă̱nˑdah'go̱ˑo̱o̱k, kuh ne' gaħˑni'go̱hˑdas'hăħ, neħ dih ne', gaˑgweeˑgo̱h nechˑhiħ'niˑgo̱ˑă̱sˑwaˑă̱s tă̱ħˑă̱h ta'aˑdiˑgweeˑnih' na'ă̱ˑno̱nˑdă̱nˑdooˑnyaħt daa'di'wa'geˑhaħ' kuh.
16Neħ' gwaħˑhuh' nă̱ˑyech'hiˑyaħ'datˑgaħ, deˑjaaˑo̱h' no̱o̱ˑsa'deħˑdo̱ħ, kuh ne deˑswa'dă̱ă̱ˑno̱nˑdeeħ, kuh ne swaˑdă̱ˑno̱kˑsho̱ħ, kuh ne swaˑdă̱'oħˑsho̱ħ; da neħ' kuh gyee, nă̱ˑgă̱ă̱' heˑniˑswaaˑdiih, ă̱ˑyech'hiˑnyòħ neħ' ă̱ntˑhă̱ˑnă̱ˑno̱h'do̱o̱ħ.
17Neħ kuh ne gaˑgweeˑgo̱h' no̱ˑgweh' ă̱ˑye'chisˑswaˑă̱h neħ ă̱ˑdyò'iˑwaħˑheħt naˑgeh'să̱ˑno̱ħ.
18Neħ gwaa' naeħ ne tă̱ħ'ă̱h deħˑjo'no̱hˑgeħ'ătˑah noˑgeħ'oot ne swaˑno̱ħ'ă̱ă̱ħ'gĕh taˑga'iˑwahˑdo̱h.
19Neħ heˑnă̱nˑdiˑswă̱ħˑniˑgo̱ˑis'do̱ˑo̱k' swaˑaˑwaħk' ne swatˑhwaˑisˑhăħˑsho̱ħ.
20Neħ dih noˑnă̱h' dă̱ˑswaˑgaaˑnăħk' ne Jeˑruˑsaˑlem, hoˑdis'gă̱ħˑă̱'gehˑdah' deˑoˑdiˑno̱n'dahˑhă̱h, swaħˑni'go̱ˑă̱ˑyă̱nˑdaħˑseek oˑnă̱h' dòsˑgă̱'o̱h niˑgaaˑdeħ' nă̱ˑgă̱'a̱k deħˑje'na̱ˑgeˑnyo̱ħ.
21Oˑnă̱h ne' neħ, ne Juˑdea ă̱ˑye'no̱ˑgeek, neħˑhuh' yo̱nˑdeħ'gwat heˑdyoˑno̱n'daˑdeeˑnyo̱ħ; neħ kuh naaħˑdeˑwaħˑsă̱ă̱ˑno̱h' ă̱ˑdyaˑgoˑdo̱ħ'o̱ˑo̱o̱k, heˑgaˑno̱nˑdaˑyă̱ħ yeˑyaaˑgă̱ħt' ne' neħ; să̱ˑno̱h' kuh nasˑdee'gwaa, haˑdi'yă̱ntˑho̱ħˑge'oˑno̱ħˑgĕh, ă̱ˑyeˑno̱ˑgeek neħˑhuh' ă̱ˑdyeeˑyo̱h.
22Neħ să̱ħ'ă̱h nă̱ˑgă̱ă̱' wă̱ˑnĭs'hăˑdeeˑnyo̱ħ gaˑno̱ħ'kwă̱sˑhăħ' ga'aaħ, neħ ne yò'iˑwaˑgweeˑgo̱h, heˑniˑyo̱o̱ ne' gaˑyaaˑdo̱ħ' aˑga'iˑwaˑyeeˑih, neħˑhuh' nă̱ˑyaˑwă̱h.
23Neħ gwaa' ne gaˑnooˑo̱ħ' heˑwaˑdi'yaħˑdaaˑdeħ, ne deˑwaˑdiˑyaħ'daˑneet, neħ kuh heˑwaˑdi'yaħˑdaaˑdeħ' nă̱ˑwă̱ˑno̱nˑdă̱'no̱ħˑgeˑăħˑtaak ne' neħ dwă̱ˑnĭs'hăˑdeˑnyo̱ħ; neħ să̱ħˑă̱h ne gaˑnooˑo̱ħ' oħˑniˑgo̱'etˑgă̱nt heˑnă̱ˑyaaˑwă̱h' nă̱ˑgă̱ă̱ heˑyoˑă̱nˑjaˑdeħ, gaˑno̱ħ'kwă̱sˑhăħ' kuh ă̱ˑoˑdiˑyaħ'doˑwă̱ħt nă̱ˑgă̱ă̱' no̱o̱'gweh'.
24Da neħ' naeh ă̱ˑoˑdiˑyaħ'dyeˑnă̱nt' heˑo̱ˑwee'gwaa oˑya'gahˑhiˑyet naħ'shaˑaħ, kuh haˑdiˑno̱ˑgeˑnyo̱ħ' gaˑgwe'go̱h noħˑtoˑno̱ˑă̱'joħˑdă̱ħ'sho̱ħ neħˑhuh' hă̱ˑo̱ˑwa̱nˑdi'no̱s'sgwă̱ˑo̱ˑso̱o̱ħ; neħ' naeh ne deˑoˑno̱nˑdah'so̱nˑdaiˑgo̱h dă̱ˑnă̱ă̱s'gă̱ħˑsyo̱k ne Jeˑruˑsaˑlem, heˑniˑyòòˑweħ' hă̱ˑoˑdi'waˑeˑwă̱ħ ne deˑoˑno̱nˑdah'so̱nˑdaiˑgo̱h he'niˑoˑdiˑno̱o̱kˑdòt ă̱ˑgai'waˑyeˑih.
25Neħ kuh naaħ'dă̱ˑwa̱nˑdyă̱ˑo̱ˑnyo̱o̱ħ heˑgăăh'gwaaħ' nă̱nˑdeekˑhaaħ, kuh neh, so̱'eˑkaaħ găăh'gwaaħ, kuh heˑgaˑjih'so̱ħˑdă̱ˑo̱ˑnyo̱ħ; oˑnă̱h neh, yo̱ˑă̱nˑjaħˑgĕh', dă̱ˑno̱nˑdo̱h'ho̱ˑgaaˑiħ' naeh nooħ'toˑno̱'ă̱nˑjoħˑdă̱ħ'sho̱ħ', ă̱ˑgă̱'a̱a̱k sho̱ deħˑsha'diˑyă̱nˑdeˑih' heˑno̱'o̱ˑdiˑyeeħ; neħ heˑgaˑnyo'daˑeˑnyo̱ħ kuh noˑdoħ'daħˑsho̱ħ dă̱nˑjot'gaˑaak, sho̱.
26Neħ nă̱ˑnă̱n'nyahˑsaˑge'eħ sho̱ no̱ˑgweh', heˑnă̱ˑyò'no̱hˑdyo̱ħˑseek; neħ kuh ne' dyòtˑgo̱nt' ă̱ˑa̱n'diħˑni'go̱ˑă̱ˑă̱ħk' ne no̱ħˑo'iˑoħ'dă̱ħˑsho̱ħ' nă̱ˑgaˑyo̱ħ ne yo̱ˑă̱n'jaħˑgĕh; neħ să̱ħ'ă̱h ne gă̱ˑo̱'yaħˑgĕh tgaħˑhas'desˑhăˑgeˑo̱ħ ă̱ˑya'o̱nˑdaħ'daaˑno̱o̱ħ.
27Oˑnă̱h' neħˑhuh' niˑyòòˑweħ' ă̱ˑo̱ˑwa̱ˑgă̱ħ' No̱ˑwa̱'wa̱k no̱ˑgweh' ohˑjiħ'găˑgo̱o̱ˑsho̱ħ' ă̱ntˑheħ, gaħˑhas'desˑhăħ ă̱ntˑhoˑdyeˑăħ'dahˑgo̱n'dyeħ, kuh neh, si''gwaa heˑno̱ħˑdeˑga'ă̱hˑsă̱ˑo̱ħ.
28Neħˑhuh dih niˑyòòˑweh' noˑnă̱h ă̱ˑyòˑi'waˑye'iħˑo̱ˑo̱nˑdyeħ' nă̱ˑgă̱ă̱' no̱ħˑo'iˑoħ'dă̱ħˑsho̱ħ, oˑnă̱h' heħtˑgă̱h' swat'gat'hòħ, neħ kuh neh swahˑno̱ħ'ă̱ˑgeesˑgòħ; neħ să̱ħˑă̱h neh oˑnă̱h' dosˑgă̱ˑo̱h ă̱nˑdyòt'hisˑdo̱n'dyeħ nă̱ˑjiˑswaˑyaħ'daˑgwat.
29Neħ naˑgo̱s'nyeħˑseeh, desˑgaˑyă̱ˑo̱nˑdăăhˑgo̱h; Jatˑgaˑtòh' ne fig no̱ħˑgă̱ˑo̱nˑdo̱ħ'dă̱ħ, gaˑgweeˑgo̱h' kuh ne' găˑiˑdo̱ħ;
30Neħ' noˑnă̱h' daˑwa'desˑgweħˑyoˑdyaak, eˑswaˑgă̱ħ' gă̱ă̱s, swaˑyă̱nˑdeeˑih kuh, ne swaˑyaħ'diˑaaˑdyeħ heh, oˑnă̱h deˑyò'gă̱hˑho̱n'dyo̱ˑo̱nˑdyeħ.
31Neħˑhuh dih nă̱ˑyaˑwă̱h' nă̱ă̱ħ' iis, noˑnă̱h ă̱ˑswaaˑgă̱ħ nă̱ˑgă̱ă̱' no̱ħˑo'iˑoħ'dă̱ħˑsho̱ħ ă̱ˑga'iˑwaˑyeeˑih, swaħˑni'go̱ˑă̱ˑyă̱nˑdaħˑseek, oˑnă̱h ne'huh dosˑgă̱'o̱h gaaˑdeħ' ne tă̱ˑno̱h'do̱ˑo̱ħ' shăˑgwĕnˑniˑyòħ' Na'wĕnˑniˑyòħ.
32Doˑgă̱s' oħˑgwă̱'o̱s, Neħ ne tă̱ħ'ă̱h taa''gaˑat' nă̱ˑgă̱ă̱' gaˑwaˑjiˑyăăˑdeħ, heˑniˑyòòˑweh' gaˑgweeˑgo̱h' hă̱ˑga'iˑwaˑyeeˑih.
33Neħ heˑgă̱ˑo̱ˑyaˑdeħ, kuh heˑyo̱ˑă̱nˑjaˑdeħ' ă̱ˑga'at naeh; neħ gwaa' ne gwă̱ˑno̱ħ' tă̱ħˑă̱h' naeh taa''gaˑat.
34Da neħ' dih ne swaˑdah'niˑgo̱ˑă̱ˑă̱ħk' ne swaˑyaħ'diˑaaˑdyeħ, dyă̱ˑgwah sho̱ ne'huh, ă̱ˑswă̱n'nyahˑsaasˑdă̱h kuh ne daˑyoˑdeħ'săˑis aeˑswaˑdah'dahˑda'niˑaak kuh ne goˑno̱ˑă̱h'do̱sˑhăħ kuh ne daaˑgasˑnyeek noˑdi'waˑdeeˑnyo̱ħ' ne'kuh yaˑgoh'hehˑgo̱h, neħˑhuh' naeh ă̱ˑgă̱'a̱a̱k deħˑdi'swaħˑni'go̱ˑă̱ă̱ħ ă̱ˑswa'yaħˑdooˑwă̱ħt' ne' wă̱ˑnĭs'hăˑdeħ,
35Neħˑhuh să̱ħ'ă̱h nă̱ˑyòħ'dă̱ˑa̱nˑdyeħ', ne' gaħˑă̱'oot iˑgă̱ă̱ gaˑgweeˑgo̱h' ă̱ˑyaˑgoˑyaħ'doˑwă̱ħt' nă̱ˑyeˑno̱ˑgeek' ne tiˑyo̱'ă̱nˑjaˑgweˑgo̱h.
36Neħ' dih ga'iˑo̱ˑni'aak, deˑswat'gahˑgwa'ihˑso̱'o̱k heh ă̱ˑswat'gaaˑo̱k; dyòtˑgo̱nt' kuh swaˑdă̱ˑno̱ˑyă̱nˑdaħk, neħ hò'gwaa dih aˑyechˑhi'daˑă̱ħ neħˑhuh' iˑgă̱ă̱ haħ'deˑgaˑyeˑiħ' heˑniˑswa'yaħˑdaˑnoˑo̱ħ na'gaˑgweeˑniħ' iˑgă̱ă̱' o̱o̱ˑseˑswaħ'nyaˑgă̱ħs, nă̱ˑgă̱ă̱' no̱ħˑo'iˑoħ'dă̱ħˑsho̱ħ' niˑya'wă̱hˑseħ, neħˑhuh' kuh do̱'seˑswaaˑdaħt, he'aˑgat No̱ˑwa̱'wa̱k no̱o̱'gweh.
37Da neħ' nă̱nˑdeh' neħˑhuh' haˑdi'o̱ˑnya'niˑak hoˑno̱h'saˑdo'gă̱hˑdiħ; neħ noˑnă̱h' waħˑoħ'găăh hoˑya'gă̱ħˑo̱h, neħˑhuh' hwah'so̱nˑdiˑyaħk' heˑdyoˑno̱nˑdaˑdeħ', neħ neh, Olˑives go̱ˑwa̱'yasˑtaħ', ho'no̱nˑdaˑdeħ.
38Neħ neh seˑdeh'jiˑah gaˑgweeˑgo̱h' no̱ˑgweh' neħˑhuh' hoˑwa̱'yaħˑdo'wă̱ħˑo̱h hoˑno̱h'saˑdo'gahˑdiħ, neħ' no̱ˑwa̱n'diˑwat'ho̱nˑda'niˑneħ.
Gospels published by the American Bible Society in 1872, Psalms in 1892.