John 2
2
Taonga hagahai bodu i Cana
1Dua e lua laangi gai ne hai dahi daonga hagahai bodu i Cana o Galilee, gai tinana o Iesu i kilaa hogi. 2Gai Iesu ma ana dangada agoago ne saalaa hogi i taonga hagahai bodu laa. 3Gai ga odi huu uvaini i taonga, gai tinana o Iesu ga hai ange gi de ia, “Gu odi alaadeu uvaini.”
4Iesu ne hai ange gi de ia, “De hine, gu aha gu tala mai ai naa goe mee naa gi de au? Tigi dae dogu masavaa.”
5Gai dono dinana ne hai ange gi de gau hai hegau, “Goodou haia gi bei mee alodahi aana e tala adu gi goodou.”
6Gai e ono ssaa hhao vai e tuu i kilaa; ni ssaa e hhao ai vai e hagagilimalali ai, bei dagodo tahulinga a de gau Ssuu. Dahi manu laa se madalua aabe se matolu gaalene e hhao ai.
7Iesu ne hai ange gi de gau hai hegau, “Haoa gi hoohonu denga ssaa naa i vai.” Gai gilaadeu ga hhao gu hoohonu denga ssaa laa.
8Gai Iesu ga hai ange gi gilaadeu, “Asua hanu gaavee gi tagi o taonga.”
Gai de gau hai hegau ne asu hanu ga kave gi tagi o taonga. 9De masavaa a tagi o taonga ne mamia ange ai vai gu sui laa ma gu ni uvaini, gai ia tee iloo be go hee ne loomai ai uvaini laa, gai de gau hai hegau ne asua mai vai laa e iloo. Gai ia ga hagahi taane ne hagahai bodu laa, 10ga hai ange gi de ia, “Dangada alodahi e gaavange uvaini danuaa hugadoo gi dangada i mua, gai de masavaa naa huu o dangada gu ssenga ai, gai gilaadeu ga dugu mai uvaini dai dee danuaa laa. Aagai koe ne dugu uvaini danuaa hugadoo gi de hagaodi!”
11Gai mee a Iesu ne hai laa i Cana i Galilee, go tahi hagailonga aana ne hai e hagaago mai ai dono mahamaha. Gai ana dangada agoago gu hagadonusia e gilaadeu ia.
12Dua mee laa gai Iesu ne hano gi Capernaum madali dono dinana, ma ono daina daane, aama ana dangada agoago. Gai gilaadeu ne nnoho i kilaa i hanu laangi.#Mat 4.13
De hagagilimalali o de temple
(Mat 21.12-13; Mark 11.15-17; Luke 19.45-46)
13Gai ga baa mai huu Taonga Hagasili a de gau Ssuu, gai Iesu ga hanage gi Jerusalem.#Exo 12.1-27 14Gai ia gu gidee dangada e hagao denga kaau, ma ssiibi, aama manu kono i lo te buibui o de temple, gai hanu e nnoho i denga deebele ma e seenisi ai sseene. 15Gai ia ga bini dahi daula ga alualu ai dangada alodahi, gi hulo gee mai i lo te buibui o de temple, madali alaadeu ssiibi, ma kaau. Gai ia ne hagassii saele sseene hadu a dangada e seenisi ai denga sseene, ma de hagahuuhuli gi lalo alaadeu deebele. 16Gai ia ga hai ange gi gilaadeu e hagao ina denga manu kono, “Goodou gaavee gee mee nei i kinei! Goodou aude haia de hale o dogu Damana gi se mommee hagao mee!”
17Gai ana dangada agoago gu manadua e gilaadeu muna gu sisi laa, e hai ange, “Au gu kona mmao dogu lodo gaiaa, i hiidinga o doo hale.” #Psa 69.9
18Gai de gau Ssuu ga ssili ange gi de ia, “Se hagailonga bee hee aau e hai e hagadonu ai, bolo e dahi oo sauaa e hai ai mee nei?”
19Iesu ne hai ange gi gilaadeu, “Oohaa de temple nei, gai au ga hagaduu age ange i e dolu laangi.” #Mat 26.61; 27.40; Mark 14.58; 15.29
20De gau Ssuu ne hai ange, “Ne madahaa ma ono ngadau ne hagaduu ai de temple nei, gai koe e maua i de hagaduu age ange i e dolu donu huu laangi?” 21Aagai gilaadeu tee tonu ange, bolo de temple oona e basa ai laa, go dono angaanga. 22Deelaa ai, dua huu dono mouli age, gai ana dangada agoago gu manadua e gilaadeu muna a Iesu ne tala laa, gai gilaadeu gu hagadonusia muna o de Beebaa Dabu aama muna a Iesu gu tala.
Iesu e iloo dagodo lodo o dangada
23De masavaa oona e noho ai i Taonga Hagasili i Jerusalem, gai ne soa dangada ne hagadonusia dono ingoo, i delaadeu gidee denga hagailonga aana ne hai. 24Gai Iesu tee hagadonusia gilaadeu, go hiidinga ia e iloo lodo o dangada alodahi. 25Gai e dee se dangada donu ne daalaa ange gi de ia dagodo o dangada, go hiidinga ia e lava donu i dana iloo dagodo lodo o tangada.
© 2022, Wycliffe Bible Translators, Inc. All rights reserved.