Luke 16
16
Tangada hai hegau heiangi
1Iesu ne hai ange hogi gi ana dangada agoago, “E dahi daane lava e dahi ono dangada hai hegau e diiloo ange ana mee, gai ia gu langona bolo dono dangada hai hegau e hai moumou ana mee. 2Gai taane lava laa ga hagahi dono dangada hai hegau ga ssili ange, ‘Ni aha aagu gu langona nei bolo koe gu hai? Hagaagona mai be ni aha aau gu hai i mee aau e tilo ange ai ogu goloa alodahi, go hiidinga gu dee go koe e diiloo ange agu mee.’
3Gai tangada hai hegau laa ne maanadu i ono lodo, ‘Dogu dangada aamua ga kave gee nei dagu hegau. Au e dee maua i de geli, gai au e dogaa i de dangidangi i de bale! Aagai ni aha ai naa aagu e hai? 4Deenei dagu mee e hai gi abodonu mai ai dangada gi de au i olaadeu hale i de masavaa e deai ai sagu hegau.’
5Aagai ia ga hagahi dangada alodahi e muli ange laa gi dono dangada aamua, ga ssili ange gi tangada i mua, ‘E hia oou e muli ange ai gi dogu dangada aamua?’
6Ia ne hai ange, ‘E lau hagabaaunga#16.6 100 hagabaaunga agu made se 800 gaalene. lolo olive.’
Ia ne hai ange gi de ia, ‘Hagamoolau noho gi lalo mage siia ange e madalima hagabaaunga.’
7Ia ne ssili ange hogi gi dahi dangada gee, ‘E hia oou e muli ai?’
Ia ne hai ange, ‘E lau hagabaaunga#16.7 100 hagabaaunga agu made se 8,000 gaalene. grain.’
Tangada hai hegau laa ne hai ange gi de ia, ‘Gaavee dau beebaa mage siia ange e madavalu.’
8Aagai tangada aamua laa ne tuhi dono dangada hai hegau baubau laa i ana hegau heiangi ne hai; go hiidinga dangada o henua i lalo e heiangi ange i dama a de maalama i de hai hegau i magavaa olaadeu dangada. 9Au e hai adu gi goodou, hagahai hegau ina de lava o henua i lalo gi hanu oodou soa. Gai de masavaa naa huu e odi ai mee nei, gai gilaadeu ga abodonu adu gi de goe i de mouli e humai nei.
10Be goai e kana ange i de mee damaa mee gai ia e kana ange naa hogi i de mee laumalie; gai be goai e dee hai hegau i de muna abodonu i de mee damaa mee, gai ia e dee hai hegau naa hogi i de muna abodonu ange gi de mee laumalie. 11Noo goodou e dee maua i de hai hegau i de mee abodonu i de lava o henua i lalo, gai goai ai naa e gaavadu gi goodou de lava abodonu? 12Noo goodou e dee kana ange gi mee a dahi dangada gee, gai goai ai naa e gaavadu hanu mee moodou?
13E deai se dangada e maua i de hai hegau ange gi e dogolua dangada aamua; go hiidinga ia e kino naa i dahi gai e aloha i de ia ange laa, aabe ia e hagapigi ange naa gi e dahi gai ga hagangadi mee de ia ange laa. Goodou e dee maua donu i de hai hegau ange gi de Maadua ma sseene.” #Mat 6.24
Hanu agoago a Iesu
(Mat 11.12-13; 5.31-32; Mark 10.11-12)
14Gai denga Pharisee, e nnoo ange laa gi sseene lagolago, ne langona e gilaadeu muna nei, gai gilaadeu ga doo mee i Iesu. 15Gai ia ga hai ange gi gilaadeu, “Goodou e tala hagadanuaa goodou i madamada o dangada, aagai de Maadua e iloo dagodo o oodou lodo. Gai mee e hagadubu i daho dangada ni mee hakino gee i daho de Maadua.
16De hainga ma denga pelaabisi ne agoago ga dae mai ai gi de masavaa o John taane Babudaisi; gai muli mai ne daamada de agoago de longo danuaa o de nohoanga hodooligi o de Maadua, gai dangada alodahi gu hagammahi e ulu ai. 17Aagai e hai ngaohie ange de llilo o de langi ma henua i lalo i de hagadeai dahi doonginga daudahi i de hainga.#Mat 5.18
18Tangada e maavae ange gi dono bodu ga hai bodu ange gi dahi hahine gee gu dagodo haisala donu, gai be goai e hai bodu ange gi de hine gu maavae laa gu dagodo haisala donu.#1 Co 7.10-11
Taane lava ma Lazarus
19“E dahi daane lava, e gahu i malo purple ma linen danuaa aama de hai daonga i laangi alodahi. 20Gai gaogao de haitoga o dono hale e dagodo ai dahi daane hagaau aloha, dono ingoo go Lazarus, gai dono angaanga e kadi i denga mangeo. 21Gai ia e tali e gai amuamu mee e doe i teebele o tangada lava laa, gai denga gaaduu e loomai ma e samusamu ono mangeo.
22Gai de masavaa huu o taane hagaau aloha laa ne magau ai, gai de gau de langi ga gaavage ia gi de gaogao o Abraham. Taane lava laa ne magau hogi ga danu, 23aagai ia ne galo age i lo te ahi, i de masavaa oona e hagammae ai, gai ia gu gidee Abraham i de mommee mmao ma Lazarus i dono gaogao. 24Gai taane lava laa ga hai ange gi de ia, ‘Tamana go Abraham, lodo aloha mai gi de au, ma gi haia Lazarus gi humai gi hagasulu ina ange dono madannia gi lodo vai gi hagamaluulu ina ai dogu alelo. Au gu kona mmao dogu duasala i lo te ahi nei!’
25Aagai Abraham ga hai ange gi de ia, ‘Dagu dama, koe gi manadua doo masavaa nogo mouli ai gai koe ne kave au mee danuaa, aagai Lazarus ne kave mee baubau, aagai iainei gu hagaaneane ono lodo gai koe gu duasala. 26Gai e dee deenaa donu huu, gai e dahi hogi geelonga laumalie gu dugu i odaadeu magavaa, gi dee maua ai e dangada e llodo laa e loadu i kinei gi oodou daha i de loadu, aabe go dangada i kinaa i de loomai gi omaadeu daha i kinei.’
27Gai taane lava laa ne hai ange gi de ia, ‘Dogu damana, au e dangidangi adu koe gi haia Lazarus gi hano gi de hale o dogu damana, 28gi daho ogu daina daane dogolima, gi daalaa ange ai gi gilaadeu dagodo o de mommee nei, gi dee loomai ai gilaadeu gi de mommee hagammae nei.’
29Aagai Abraham ne hai ange gi de ia, ‘Muna a Moses ma denga pelaabisi e daakodo i olaadeu daha; gilaadeu gi hagalaangona alaadeu muna.’
30Gai taane laa ne hai ange, ‘Tamana go Abraham, e deai! Noo dahi dangada e mouli age ga hano gi olaadeu daha, gai gilaadeu e daahuli naa donu olaadeu lodo.’
31Abraham ga hai ange gi de ia, ‘Noo gilaadeu e dee hagallongo muna a Moses ma denga pelaabisi, aagai gilaadeu e dee hagallongo naa hogi muna a dahi dangada gu mouli age laa mai i de magau.’ ”
© 2022, Wycliffe Bible Translators, Inc. All rights reserved.