Luke 1
1
Dibandu di mughande wusonunu Tofile
1Mundumbe Tofile, batu bapwele bamamaange urende mambu amamalabene va ghari étu. 2Bamarende nane dimatutsingululu na bambedji abamalabe na misu, vane dibandu, na abamaveghu mufune ulonze musamu Nzambi. 3Nyimalabe yi diwelimine mewami, mu rombe burange mu motsu amamavyoghe ubongile va dibandu, mu wusonighile dyoni, mundumbe Tofile. 4Nyighurendili mambu méni, mumbari wukedjabe yi malongi ame wumadile mangenze.
Yanze amayétsingule duburu du San-Batise
5Mu temu adji Yirode amabilaange kaghe dji Sudé, wukube muvaghulitsi paghu amanengulungu Sakari. Amabe mu dibuli di bavaghulitsi ba paghu di Abya. Mughatsi andi Lisabete, amabe mu kule dji Arone. 6Sakari na mughatsi andi, bamabangaange basungeme va ghusu Nzambi na bamaghobisaange mighaghe myotsu na marume motsu ma Fumu. 7Tumbe basamabe na baane mumbari Lisabete amabe yingume, na djobotsu babedji mbebake binunu.
8Mwa yilumbu Sakari amasalilaange Nzambi, mumba temu dyandi dibuli di bavaghulitsi ba paghu mbé djimatole. 9Mu nzalusulu bavaghulitsi ba paghu, Sakari akesolu mu ukote o ghari yibuku ayi syeme yi Fumu mu yenyenze bime bi mbunge djiboti. 10O dulombili, yinombu yi batu yikesambilaange mu temu adji Sakari amawendile muyébinyenze. 11Vane-vane, yanze yi Fumu yikesundughe na yikelabene na Sakari wune ghari ndaghu, diteli o mabaale ma yivaghululu yi paghu. 12Ave amayilabile, akeregheme na akebe na ghome djineni. 13Tumbe yanze yikemutsingule rye: «Sakari uyabe na ghome, mumbari Nzambi amawulu dusambu dwawu. Mughatsi awu Lisabete owuburile mwane dibaale, na wumulughe San. 14Mwane éni obe nzangu o murime awu na bapwele wandi bobase na nzangu mu duburu dwandi. 15Mumbari obe musatsi wuneni wu Fumu. Djandi, aghonwaange malamu amelanzi. Ne akeburu, obasu na Yinyuni Yisyeme. 16Oghabuse mirime mipwele mi bise Yisrayele ombu Fumu Nzambi owu. 17Orughe nane yilumbi yi Nzambi abasu na Yinyuni na mangolu ma Eli mubiyitsi Nzambi. Oghabuse dinonge va ghari baane na batadji bowu na obeghe bango dilenze o dighobe di batu abasungeme. Otsonzighe mukute awube uwelimine mu uduke Fumu.» 18Tumbe Sakari akewivule yanze rye: «Tsyeni nyujabile yiri dyoni dingenze? Mumbari menu na mughatsi ami tuke binunu.» 19Yanze yike muwaghule rye: «Menu, la Ghabiryele, nyidji va ghusu Nzambi na nyimusalili, atsinzindighe muyighuvosile na mudjabise musamu wuboti. 20Kaboghu wube dibabe, kwange na temu adji mambu méni molabinine, mumba wughasinge mambu ame nziwutsingule, amodughusu mu temu adjimasikughu.»
21Vane yanze amavosilaange nandi, abamabe o dulombili bamavivaange Sakari, bakekambulu mu yitsingu yandi o ghari ndaghu Nzambi. 22Na epali, asamabwé runguse wuvosile batu, na djowu baketase bwena Sakari amadile dulasu o ghari ndaghu éni. Akebavosilaange yike na milembu mumbari mbé ake dibabe.
23Sakari na emani bilumbu byandi bi usalile Nzambi, akeghabughe o ndaghu andi. 24Mu temu adji madukaange, mughatsi andi Lisabete akabe na dimi na akesweme o ndaghu andi mu miweli miranu. Akevosaange rye: 25«Labanu yese ayi Fumu amalase mu menu, amaghusule yisoni yami va ghusu batu botsu.»
Yanze yitsinguli duburu du Djesu
26Mu muweli awu musyamunu awiduki miweli miranu mi dimi di Lisabete, Nzambi akesindighe yanze Ghabiryele o musyengi Nasarete mu yinange yi Ngalile. 27Wune, wumabe tsyémi dji mughetu omabe yibande yi dibaale dimanengulungu Sosefe, awu amabe mu yifumbe yi Davide. Na tsyémi éni, dine dyandi Mari. 28Yanze yikerasune Mari o ghari ndaghu andi na yikemusimbe rye: «Mbolwa Mari! Fumu adji nawu amawubase na myule.» 29Mari amaregheme na akekambulu mu munongu mbolu adji yanze amamuveghe, na vane-vane, akekéwivulaange divindughulu di mbolu éni. 30Yanze yikemutsingule rye: «Wuyalabe ghome Mari, wumadile yese yi Nzambi. 31Na mapape, wube na dimi na wubure mwane dibaale awulughe Djesu. 32Djandi obe muneni na onengulu Mwane Nzambi-Pungu. Fumu Nzambi omubyatse kaghe nane Davide kule andi abilaange. 33Na djandi obyamaange mutubu na mutubu mu mukute Sakobe, na bukaghe bwandi bughobe tena disukusulu.» 34Mari akewivule yanze rye: «Dyoni tsyéni dyurungulile ubile, menu awu nyikivu tsyémi?» 35Yanze yike muwaghule rye: «Yinyuni Yisyeme yurughe mu ndedju na mangolu ma Nzambi-Pungu mowughumbe. Ladibandu mwane awubure wube wusyeme, onengulu Mwane Nzambi. 36Lisabete yiburu yawu ne nane ake yinunu, djawandi ekelisi ubure mwane andi dibaale. Djandi awu bamanengilaange yingume ake na dimi di miweli misyamunu. 37Mumbari vagha dyambu divure ombu Nzambi.» 38Mu dyoni, Mari akevose rye: «Nyidji musatsi Fumu, kaboghu motsu madughusu nane wutsivosile.» Na yanze yikemusile.
Mari elinguli Lisabete yiburu yandi
39Mu bilumbu abimadukaange, Mari amareleme nowende mbangu-mbangu o mikongu o musyengi yinange yi Sudé. 40Anokote o ndaghu Sakari, akesimbe Lisabete. 41Lisabete anowulu mbolu Mari, mwane andi akekunge o ghari modji andi. Vane-vane, Lisabete akebase na Yinyuni Yisyeme. 42Na akebwaghe mughamu wuneni novose rye: «Mari, Nzambi amawupuyile myule wuvyoghulile baghetu botsu na mwane wandi amadile myule o modji awu!» 43Mu dyoni, Lisabete akewivule rye: «Tembusu menu yi nyivu, mulabene na ngudji Fumu ami? 44Labati, ave nyiwululu mbolu awu, mwane nosangughe na nzangu o modji ami. 45Mari, myule ombu ndedju awutsisinge mambu amanziwulu mumbari Fumu omadughusu nane amavosile.»
Dwimbu du Mari
46Mari akevose rye:
«Nyuyitsaange Fumu, mu monyu ami wotsu,
47na nyibase na nzangu mu Nzambi, Mughobutsi ami.
48Nyudivaghanga, mumbari amatsune tembusu menu musatsi andi.
Kaboghu, wubandile na muni, kule na kule bondengilaange mughetu myule,
49mumbari Nzambi Mangolu amapayile mambu amaneni.
Dine dyandi disyeme,
50na yingebe yandi yubangage kule na kule
mu djowu abemudumi.
51Amalase mambu maneni na mangolu mandi,
amapanze bango dunangu,
52amarambuse bakaghe mu bitsighe byowu,
na amabyatse abakesunze.
53Amabase maboti ombu bango nzale,
na akeghabuse bisine myowu na myowu.
54Amawamuse Yisrayele, musalitsi andi,
asamalibene ulase yingebe yandi,
55nane amavangenine na bakule bétu,
ombu Aberaame na bateghule bandi mutubu na mutubu.»
56Mari akevyose miweli miryeru ombu Lisabete, mbana akeghabughe o dimbu dyandi.
Duburu du San-Batise
57Temu ubure djinotole, Lisabete akebure mwane dibaale. 58Biburu na bambatsi ba dimbu na bédjabi bwena Fumu amalase yingebe yandi ombu Lisabete, bakeyésaghe va mosi nandi. 59Yisambwali yi bilumbu yinovyoghe, ayi munane, bamarughe mu yirebe mwane na bamaronde wumunengile Sakari nane tadji andi. 60Tumbe ngudji andi akevose rye: «Nesi, onengulu San.» 61Batu béni bakemuwaghule rye: «Mu biburu byawu, vagha mutu amanengulungu mu dine dyéni dine.» 62Na bamaghebule tadji andi mu muwivule tsyeni onengilile mwane andi. 63Sakari akevonde yasi yi dusimbi na akerende rye: «San la dine dyandi.» Na botsu bamakambulu. 64Vane-vane, mbembu andi djikepandughe, akebande wuvose na akedodise Nzambi. 65Ghome djimabase mu botsu abamabe mu mighule. Mu mikongu myotsu mi Sudé, bakevosaange bilombi bi mambu méni. 66Botsu abamadiwulu, bakedikelulaange: «Munongu mwane yi obe?» Dingenze, Fumu amabe nandi.
Dwimbu du Sakari
67Sakari, tadji mwane éni, anobe abasu na Yinyuni Yisyeme, akebighe rye:
68«Duyitsu ombu Fumu Nzambi dji Yisrayele.
Djandi, amayilingule noghobule mukute andi.
69Amatutindile Mughobutsi mangolu
va ghari bateghule ba Davide, musalitsi andi,
70nane amavosile va kale mu babiyitsi bandi basyeme.
71Mutudjeyise ombu bavinitsi, notukawule va makake ma bambeni bétu.
72Anane amalasile yingebe yandi ombu baghulu bétu,
akerangimine yivighu yandi yisyeme.
73Anane Nzambi amaghanine kaka ombu Aberaame tadji étu,
74mu tugharusu wumusalile na mangolu,
payi tumaghobughe va makake ma bavinitsi bétu.
75Tukebangaange tuwelimine na tusyeme va ghusu andi,
bilumbu byotsu bi monyu étu.
76Na ndedju mwane kali, unengulungu “Mubiyitsi wu Nzambi-Pungu”,
mumbari, uyenewendaange va ghusu Fumu mu tsonzighe manzile mandi,
77wujabise mukute andi dughobutsu dwandi na dutandu du mabi mandi.
78Yine, Nzambi mu yingebe na durondu dwandi, osunduse mu djetu, yidjalale yandi ayivu nane dimengi di nyangu adiruyili o djulu.
79Oyimonitse botsu abetsani otsi piseme na mu yidumbitsi yi dufu, mu tusungighe mu nzile duvotsu.»
80Mwane éni amaneghaange nowarange mu Yinyuni. Amatsanaange mu bakumu, kwange na yilumbu ayi amapalile va ghari mughungi wu Yisrayele.
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES