Luk 12
12
Zisɔs ana vɛnʉl vɛ oyeghe nɔnʉn acɛ nɛ awa-ɛsɛma
1Kɛ ɔkambɛlɛ wʉ ɛyɛŋgɛ iyɛ ɛnʉlʉ iyɛboona ɛ̂zwaŋɛ ocici, kaka ihee ɛnyandana valindi, Zisɔs ahee ɛtɔwana bem-bem kɛ nɛ vɛnʉl vɛ oyeghe nɔnʉn. Akaŋɛ ala, “Wand nini ayʉlʉ ayunu kɛ ɛfiaavɛ yɛ vɛ Falasi otee; avɛ nɛ aziŋgili ayɛ ocuu vɛnʉl. 2Ɔmanɛmanɛ kɛɛ ɔnʉl ayel, nɛ kɛɛ ásaŋ kpem-kpem kɛ oyili, akɛ ga. Ofilikpamɛ ɔ́va nako kan agbaŋgaŋ. 3Ɔmanɛmanɛ kɛɛ nɛtɔw kɛ oyindena, váŋgwa kɛ ɔyʉ. Ɔmanɛ kɛɛ nɛtɔw kɛ avɛlavasɛ kɛ omom, vákoŋu kɛ agbaŋgaŋ, nɛ vɛnʉl ɔ́ŋgwa omwem.
4“Vaciam vambɛvɛ vɛ ɛsɛma, mɛvɔl anu mɛla, x-naciaa vɛnʉl vɛ váyɛva ɛyʉlʉ iyunu, nɛ ɔmɔ áma-yel ɔmanɛ nɛ ɛyɛma iyunu ga. 5Kpa mávɔl anu ɔnʉl wʉ nácia. Cia Ofilikpamɛ wʉ ɔlɛ nɛ ɔtavɛ wʉ ɔta anu kɛ ogusu wʉ opile ga, masɛ vɛnʉl ɔyɛva ye anu. Asɔ, mɛvɔl anu mɛla, cia nini ɔnʉ! 6Vɛnʉl ɔsiaā mɛyʉlʉmʉ mɛtaŋɛn kɛ vasɛl ɔfaalɛ ga? Ofilikpamɛ ogife masɛ kamɔɔ ga. 7Ofilikpamɛ ocil onyu ɔmɔnɛmɔ wʉ alɛ anu kɛ ito. Ɛyʉlʉ x-aciaa anu ga. Nɛ̂bo kɛ asi ayɛ Ofilikpamɛ nɛ̂fo mɛyʉlʉmʉ cɛŋ.
8“Mɛvɔl anu mɛla, ɔnʉl ɔmɔnɛmɔ wʉ atɔw keneŋ kɛ isi kɛɛ vɛnʉl ala, ɔn âwa ɛsɛma kan namɛ, nɛ ɛmɛ Wanɛ wʉ Ɔnʉlʉ kpaa, mɛ́gɔl keneŋ kɛ isi kɛɛ vɔzɛnda-gbalgbal vɛ Ofilikpamɛ mɛla, ɔnʉl wɔɔ awʉ kɛlɛ ɔwamɛ. 9Kpa ɔnʉl wʉ atɛna kɛ isi kɛɛ vɛnʉl ala ɔn âcil mɛ ga, nɛ ɛmɛ kpaa mátɛna ɔn kɛ isi kɛɛ vɔzɛnda-gbalgbal vɛ Ofilikpamɛ. 10Ɔnʉl ɔmɔnɛmɔ wʉ atɔw ɛcɔcɔɔ kɛ ito kɛɛ Wanɛ wʉ Ɔnʉlʉ, vágife ɔn, kpa ɔmɔnɛmɔ wʉ atɔw ɛcɔcɔɔ kɛ ito kɛɛ Mʉndʉ wʉ Ofilikpamɛ, ɔmɔ ágife ɔn ga. 11Ikil yɛ ɔva nɛ anu kɛ isi kɛɛ vakʉ vɛ kɛ ɛca ɛmɔ iyɛ vɛ Zu, nɛ kɛ isi kɛɛ vɛmɛfʉwa, nɛ vakʉ vedivi vɛ ɔlɛ nɛ ɛyana, x-nawaa ɛkʉ ndalɛsɛ náyel saŋ nɛ́paŋ ɔmɛnɛ owunu ga. x-Nawaa ɛkʉ kɛ ɔmanɛ kɛɛ nákaŋɛ ga, 12kici yɛ kɛ ɔkalaka ɔnawɔɔ, nɛ Mʉndʉ wʉ Ofilikpamɛ ávɔl anu ɔmanɛ kɛɛ nákaŋɛ.”
Ɛkan yɛ ɔnʉl wʉ ɛŋgɔlʉ wʉ alɛ kɛ ɛzɔw
13Ɔnʉl ɔmɔ kɛ ɛyɛŋgɛ iyɛ ɛnʉlʉ akaŋɛ kɛ nɛ Zisɔs ala, “Ɔkʉ, vɔlʉ wanɛŋgwan wamɛ, nɛ ákie ɔwaŋgɛ, nɛ ána mɛ ɔwamɛ okie.”
14Kpa Zisɔs akaŋɛ nɔnʉn ala, “Ɔciam, ɔnda âna mɛ ɛyana ala mɛ̃tune we nɛ wanɛŋgwan wuwu kɛ itu ɛnalɛ iyɔɔ?” 15Saŋ Zisɔs akaŋɛ navo ala, “Lɛ nini cuwee, wand nini ɛmɛnɛ iyunu kɛ ɛsalɛ yɛtavana yɛ ɛnalɛ cɛŋ. Ɛyɛma iyɛ ɔnʉlʉ ayɛ kɛlɛ kɛ vɛnalɛvɛ cɛŋ yɛ alɛ nayo ga.”
16Aza isi ɛtɛfana vo ɛkan yee, “Ɔmɔ ɔnʉl âlɛ nɛ ɛŋgɔl cɛŋ. Alɛ kpaa nɛ ɔfɛnda, ɔgbaa vɛnalɛvɛ cɛŋ. 17Saŋ afii ɔmɛnɛ ɔna ala, ‘Ini ɛnɛ máyel aŋgiee? Mawʉ nɛ oci wʉ mávɛl vɛnalɛvɛ yɛ másɛnda kɛ ɔfɛnda ɔwamɛ ga.’
18“Saŋ akaŋɛ ala, ‘Kɛlɛ ase ɛnɛ máyel. Másend ɛva ɛyamɛ, nɛ mɛ́ma iyɛ ibo ifo, iyɛ máwa vɛnalɛvɛ yɛ másɛnda kɛ ɔfɛnda ɔwamɛ nɛ vɛnalɛvɛ yambɛvɛ yedivi vimem kini. 19Saŋ nɛ mɛ́kaŋɛ nɛ ɔmɛnɛ ɔwamɛ mɛla, “Wawʉ nɛ vɛnalɛvɛ yɛsɛvanavɛ cɛŋ yɛ wʉvɛl. Vɛ́kɛma we anyʉmʉ isim. Ɔmanɛ áma-za we ɛyʉl ga. Ya, ŋwa, nɛ wʉ́ya ɛyɛma.”’
20“Kpa Ofilikpamɛ ɔkaŋɛ nɔnʉn ala, ‘Owe, ɛzɔw yɛ ɔnʉlʉ! Mágbaal ɛyɛma iyuwu ɛnya nɛ ife! Saŋ nɛ mɛ́yen ɔnʉl wʉ aya we icene wʉ ɛnalɛ yɛ wʉyel pɛma ɔmɛnɛ owuwu iyee.’
21“Kɛlɛ ase ɛnɛ kálɛ kɛ nɛ ɔmɔnɛmɔ wʉ ambɛla vɛl ɔwaŋgɛ kɛ ɔmɛnɛ ɔna, kpa aka-lɛ nɛ ɔwaŋgɛ kɛ ɛfanɛ iyɛ Ofilikpamɛ ga.”
x-Nazaa ɔmɛnɛ owunu ɛyʉl kɛ ɔmanɛ ga
22Saŋ Zisɔs akaŋɛ nɛ vɛnʉl vɛ oyeghe nɔnʉn ala, “Asɔ ɛnɛ mɛkaŋɛ nɛ anu mɛla, x-nazaa ɔmɛnɛ owunu ɛyʉl kɛ ɔyɛ wʉ náya nɛ akʉndʉ ayɛ náwa kɛ ayʉlʉ ga. 23Ɛyɛma iyunu îfo ɔyɛ, ɛyʉlʉ iyunu kpaa îfo akʉndʉ. 24Tɛŋɛ nini vɛkwakwa ndalɛ ɛkɛv: ɔlɔɔ̄ ɔyɛ ga, ɔsɛndā kpaa ga, avɛ masɛ nɛ atimbe ayɛ ɔpɛma ɔyɛ ga, kpa Ofilikpamɛ olendē vo. Ɛnɛ na-na-na anu vɛ nɛbo kɛ asi ayɛ Ofilikpamɛ cɛŋ nɛfo ɛ̈nʉnʉ? 25Ɔnda wunu ábɛ nɛ ápe masɛ ɔkalaka ɔmɔɔ kɛ ɛyɛma ɛna, ikil yɛ asaŋa kɛ ɛzaana ɛyʉl? 26Sɛ kalɛ ndalɛ nábɛ nɛ́yel ɔmanɛ kacɔɔ kiyee ga, ini kazaa anu ɛyʉl kɛ yedivi yɔɔ?
27“Yene nini ɛkʉs yɛ inele kɛ owemi. Iyelē ɔtʉmʉ ga. Iyelē akʉndʉ ga. Kpa mɛvɔl anu mɛla, masɛ mɛfʉwa Solomun nɛ akʉndʉ ana ayasɛvana amemi kpaa, âwa man okuu wʉ asɛva ndalɛ ɛkʉs yee ga. 28Anu vɛ nɛlɛ nɛ awa-ɛsɛma cɔɔ, ikil yɛ Ofilikpamɛ ɔwanda ɛkʉs yɛ ɛlɛ kɛ owemi ɛnya, nɛ ɔkʉlʉ vɛnʉl ɔ́ta kɛ ogus, nɛtes anu ala Ofilikpamɛ ɔ́wa anu akʉndʉ ga? 29x-Naliye ɔmanɛ kɛɛ náya nɛ kɛɛ náŋwa ga. x-Nazaa ɛyʉl kayo ga, 30kici yɛ vatanda vɛ ocil Ofilikpamɛ ga ɛnɛ ɔzɛnda itu ɛnalɛ iyɔɔ. Masɛ Ɛziavɛ wunu âcil ala nɛ̂lii yo. 31Lii Ɔtʉlʉ ɔnavɛ, nɛ ɔ́na we kpaa vɛnalɛvɛ yee vimem.
32“Anu vɛnʉl vambɛvɛ, ɛyʉlʉ x-aciaa anu ga, kici yɛ kâsɛva Ɛziavɛ wunu wʉ ade anu nɛ́lɛ ɔlʉŋgʉ nɔnʉn kɛ Ɔtʉlʉ ɔnavɛ. 33Sia nini ɔwaŋgɛ owunu omwem, nɛ nɛ́na ɛŋgɔl kɛ nɛ vɛnʉl vɛ ɔka-lɛ nɛ ɔmanɛ ga. Yeli nini iyunu inzuwu iyɛ ɛŋgɔl, iyɛ ɛ́ka-kavɛlɛ ga, ndalɛsɛ ɔwaŋgɛ owunu ɔ́lɛ kɛ ɔtalɛ-atʉlʉ kɛsɛ vayivi ɔmɔ ábi kini ga, nɛ kɛsɛ ɛvasɛ ɛ́cɔ ga. 34Fɛsɛ ɔwaŋgɛ wunu ɔlɛ, fini kpaa ɛnɛ ɛsɛma iyunu ɛ́lɛ.
Vɛnʉl vɛ ɔtʉmʉ vɛ ɔlɛ ɛsɛla
35“Wa nini akʉndʉ ayɛ ɔtʉmʉ, yeli nini nɛ ɛtʉlʉka iyunu nɛ ɛ̃lɛ ɛmaŋgana, 36ndalɛ vɛnʉl vɛ ɔtʉmʉ vɛ ɔkʉla ɔkʉ vo, wʉ áyel nɛ ákiil va kɛ ituŋunu iyɛ ɛyɔsʉ. Ikil yɛ âva saŋ ayɛsa ɔfɛla, nɛ óvuu ɔn ɛpʉmb. 37Vicowenavɛ vɛ́lɛ kɛ nɛ vɛnʉl vɛ ɔtʉmʉ vɛ ɔkʉ ovo akol vo ɛsɛla ikil yɛ ava. Mɛvɔlā anu kacɛb mɛla, áwʉʉsʉ ɔmɛnɛ ɔna, nɛ ákaŋɛ vo nɛ ɔ́caal ɛyaŋ, nɛ ána vo ɔyɛ. 38Vicowenavɛ vɛ́lɛ kɛ nɛ vɛnʉl vɛ ɔtʉmʉ vɛ ɔkʉ ákol vo ɛsɛla, masɛ ava kɛ atɛŋatɛŋɛ wʉ nɛ ife akasɛ ikowu yɛ isi. 39Kpa cil nini anu ala, kãlɛ wʉ oweni wʉ itimbe ãcili ɔkambɛlɛ wʉ oyinʉl áva, nɛ âwand itimbe ɛna, nɛ âna ɛyana ala õhembi ɔn itimbe ga. 40Asɔ anu kpaa, wʉʉsʉ nini keŋ-keŋ, kici yɛ Wanɛ wʉ Ɔnʉlʉ áva kɛ ɔkalaka wʉ nɛlɛ icuu.”
41Saŋ Pita akaŋɛ nɔnʉn ala, “Ɔkʉ, wʉtɛfā ɛkan yee kɛlɛ kan nɛ asu cas, aka kɛlɛ nɛ vɛnʉl omwem?”
42Ɛnɛ Ɔkʉ agɔl nɔnʉn ala, “Ɔkʉnʉl ɔmɔ alɛ-lɛ nɛ ɔnʉl wʉ ɔtʉmʉ wʉ alɛ nɛ ayʉmʉ nɛ akɔla vɛnalɛvɛ sɛva-sɛva. Awa ɔn kɛ ɔtʉmʉ wʉ awanda vɛnʉl omwem vɛ kɛ itimbe ɛna, nɛ wʉ ána vo ɔyɛ ovo kɛ ɔkalaka wʉgel-gel. 43Vicowenavɛ vɛ́lɛ kɛ nɛ ɔnʉl wʉ ɔtʉmʉ wɔɔ, ikil yɛ ɔkʉ ɔna âkol ɔn sɛ ayele ɔtʉmʉ ɔkambɛlɛ wʉ akul. 44Mɛvɔl anu kacɛb mɛla, nɛ ɔkʉnʉl wɔɔ áyel ɔn itoghu kɛɛ ɛ́wanda vɛnalɛvɛ vimem yɛ alɛ nayo. 45Kpa ikil yɛ ɔnʉl wʉ ɔtʉmʉ wɔɔ akaŋɛ kɛ ɛsɛma ɛna ala, ‘Ɔkʉ âsivi ɛvaana ɛda,’ ahee ɛnyɛmbɛlana vɛnʉl vɛ ɔtʉmʉ vakevi nɛ vanʉmbʉsʉ, ɛyaana ɔyɛ nɛ ɛŋwaana mɛsɔlʉmʉ nɛ ágba ɛzɔw, 46saŋ nɛ ɔkʉnʉl wɔɔ ákiil va kɛ ife yɛ aka-kʉla ɔn nɛ ɔkalaka wʉ aka-cil ga. Saŋ nɛ ɔkʉnʉl ɔna ányɛmbɛlɛ ɔn nɛ azaŋgɛ, nɛ ákol avavɛ ɛyʉlʉ imem, nɛ áwa ɔn kɛ oci wʉ aŋgwa ɛcian ndalɛ vɛnʉl vɛ ocil Ofilikpamɛ ga. 47Ɔnʉl wʉ ɔtʉmʉ wʉ acil ɔmanɛ kɛɛ ɔkʉ ɔna aliye, kpa awa ɛyʉlʉ wʉ áyel ga, ványɛmbɛlɛ ɔn ase sɛva-sɛva. 48Kpa ɔnʉl wʉ ɔtʉmʉ wʉ aka-cil ga, saŋ ayele vɛnalɛvɛ yɛ vána ɔn ɛcian, nɛ ɔ́nɛsa ɔn nɛ azaŋgɛ cɔɔ. Kɛ nɛ ɔmɔnɛmɔ wʉ ɔna ɔn cɛŋ, asɔ kpaa nɛ ólii cɛŋ kɛ nɔnʉn. Ɔn wʉ ɔna ala akɔla ɛnalɛvɛ cɛŋ, nɛ ófii ɔn cɛŋ.
Ɔtɛlɛ wʉ Zisɔs óyel nɛ vɛnʉl ɔ́kafɛ nɛ valindi
49“Mɛ̂va kɛlɛ nɛ ogusu kan ɔtalɛ. Kalɛ kɛ ɛsɛma ɛyamɛ, aŋgiee nɛ ɔmaŋgā ye. 50Kpa mawʉ nɛ otu wʉ baptizim ɔmɔ wʉ ɛcian yɛboona kɛ isi kaŋgɛghɛ, asɔ ɛyʉlʉ ikwo mɛ kaka mákol oyeŋenavɛ kɛlɛ wʉ ɛyaŋgɛghɛ kwɔɔ kɛ́va-wo. 51Nɛtes anu ala mɛ̂va kɛlɛ nɛ makun kan ɔtalɛ? Cioow! Mɛ̂va kɛlɛ ɛkafana vɛnʉl kɛ nɛ valindi. 52Hee aŋgiee za kɛ isi, ikil yɛ vɛnʉl ɔlɛ ɔtaŋɛn kɛ itimbe ɛmɔɔ, nɛ mɛkafɛ ágba vo nɛ valindi. Vataalɛ vágɔl vafaalɛ ga, nɛ vafaalɛ ɔ́gɔl vataalɛ ga. 53Asɔ, mɛkafɛ ágba kɛ atɛŋatɛŋɛ vo: ɛziavɛ ágɔl wanɛ ɔna wʉ ɔnʉmbʉsʉ ga, wanɛ wʉ ɔnʉmbʉsʉ ágɔl ɛziavɛ ɔna ga. Ɛŋgwan ágɔl wanɛ ɔna wʉ okeyi ga, wanɛ wʉ okeyi ágɔl ɛŋgwan ɔna ga. Ɛŋgwan wʉ ɔnʉm ágɔl okeyi wʉ wanɛ ɔna ga, okeyi wʉ wanɛ ágɔl ɛŋgwan wʉ ɔnʉm ɔna ga.”
54Saŋ Zisɔs afiil kɛ nɛ imbule yɛ ɛnʉlʉ yɔɔ, akaŋɛ navo ala, “Ikil yɛ nɛyen akuu ahee iyindena kɛ iziŋgil wʉ ɛyaŋgɛ ɛgba, nɛ nɛ́kaŋɛ cuu anu ala, ‘Ɔvɛla ɔ́va,’ nɛ óbe-na. 55Ɔkambɛlɛ wʉ ofofu ofuwe kɛ ɔkpʉ wʉ asen-asen, nɛ nɛ́kaŋɛ anu ala, ‘Ɔswaanavɛ válɛ ɛnya,’ nɛ óbe-lɛ. 56Anu vɛ nɛcuu vɛnʉl! Nɛcil akɛvɛ ayayavɛlana ayɛ nɛyen asime kɛ ago nɛ kan ɛyaŋ. Kpa kâyel naa nɛbɛ nɛcile vɛnalɛvɛ yɛ viyele kan ɛyaŋgɛ kasɛghɛ kɛɛ aŋgiee ga?
57“Kâyel naa ɛnɛ nɛka-bɛ nɛtune kɛ ɔmɛnɛ owunu ɛŋga ɔmanɛ kɛɛ alɛ gel-gel ga? 58Ndalɛsɛ nɛza nɛ ɔnʉl wʉ awa we isu kɛ ɔwa ala wʉ̂yel ɛcɔcɔɔ nɔnʉn, nɔŋgʉ gbaŋ nɛ wʉ́kule ɔmanɛ kwɔɔ nɔnʉn wʉ nɛlɛ tɔ kɛ ɔwa. Ga nɛ átimbe na we kɛ avo ayɛ ɔnʉl wʉ atune apa, nɛ ána we kɛ avo ayɛ vɛnʉl vɛ ɔzɛma vɛnʉl, nɛ ɔ́wa we kɛ ɛya. 59Mɛkaŋɛ we mɛla, nɛ ɔmɔ átɛfa we ga kaka wʉ́kɔl masɛ ɔkʉbʉ ɔmɔɔ wʉ asaŋ.”
©️2024 Luke Initiative for Scripture Translation