Hawaareta 15
15
Yerusalaame Shiiquwa
1Issi issi asati Yihudape Anxooke bidi, “Muse wogaatho hinte qaxaretonna ixiko attanaw danda7eketa” gidi ammaneyisata tamaarso doomidosona.#Leewe 12:3. 2Hessi Phawuloosanne Barnabaasa entara daro palamanadanne kaccanaada oothis. Hessa gisho, Anxooken de7iya issi issi asati Phawuloosaranne Barnabaasara Yerusalaame bidi Hawaaretaranne cimatara gahetidi he oda billanaw qofay qashetis.
3Woosa keethay enta kiittin bidosona. Enti Sirofinqe Samaarera aadhishe Ayhude gidonnaysati Xoossako waanidi simmidaako odidosona. Hessi ammaneyisata ubbaa daro ufaysis. 4Enti Yerusalaame gakida wode woosa keethay, Hawaaretinne cimati enta mokidosona. Xoossay bantara oothidaba ubba odidosona. 5Shin Farsaaweta baggafe ammanida issi issi asati dendi eqidi, “Ayhude gidonashin ammanida asati qaxaretanawunne Muse higge naaganaw bessees” yaagidosona.
6Hawaaretinne cimati hessa zorettanaw shiiqidosona. 7Daro zoretidaape guye, Phexroosi dendi eqidi, “Ta ishato, Ayhude gidonnaysati Wongela qaala ta doonape si7idi ammanana mela kasetidi tana Xoossay hinte giddofe dooridaysa hinte ereeta.#Hawa 10:1-43. 8Asa wozana eriya Xoossay Geeshsha Ayyaana nuus immidaysada entawuka immidi tumayis.#Hawa 2:4; 10:44. 9Ammanon enta wozana geeshshida gisho nu giddoninne enta giddon dummatethi wothibeenna. 10Hessa gisho, nu aawatinne nuuni tookanaw danda7iboona qambara ammaneyisata morgen wothidi ha77i ayis hinte Xoossa paacetii? 11Godaa Yesuus Kiristoosa aadho keehatethan enti attidaysada nuka attidaysa ammanoos” yaagis.
12Asay si77i gidi, Barnabaasinne Phawuloosi Ayhude gidonna asaa giddon banta baggara Xoossay oothida malaatatanne oorathaba ubbaa odishin si7oosona.
13Enti haasaya ongidaape guye Yayqoobi, “Ishato, ta geysa si7ite. 14Xoossay Ayhude gidonnayisata giddofe ba ase dooranaw koyidi entana koyro waatidi qopidaako Simooni odis. 15Nabeta qaalay haysara issino. Geeshsha Maxaafan,
16“ ‘Haysafe guye, taani simmana,
kundida Dawita kawotetha denthana.#Amo 9:11-12.
Laaletida keethaaka zaara essana.
17Attida asa ubbay taako yaana,
taani xeegida Ayhude gidonna asa ubbay tana koyana.
18Benipe doomada hessi eretana mela oothida
Xoossay, taani yaagayis’ yaagees.
19“Hessa gisho, ta qofay Xoossako simmiya Ayhude gidonnayisata nuuni waaysonaako lo77o. 20Shin enti eeqas yarshetidi tunidaba moonna mela, laymatonna mela, bawuta moonna melanne suuthi uyonna mela entaw nuuni dabdaabe xaafanaw koshshees.#Kessa 34:15-17; Leewe 17:10-16; 18:6-23. 21Muse higgey benipe doomidi Sambaatan Sambaatan ayhude woosa keethatan nabbabetishe katama ubban sabbaketees” yaagis.
22Hessafe guye, hawaaretinne cimati woosa keetha asa ubbaara issife banta giddofe guutha asata dooridi Phawuloosaranne Barnabaasara Anxooke yeddanaw qofa qachidosona. Enti daro bonchetida nam7u asata Barsabaasa geetetiya Yihudanne Sillaase dooridosona. 23Haysada geetetidi xaafetida dabdaabe enta bolla yeddidosona: “Nuuni hawaaretinne cimati hinte ishati, Anxooken, Sooreninne Kilqen de7iya Ayhude gidonna ishatas nu sarothuwa kiittoos.
24“Nuuni kiittonna asati nu giddofe bidi, ‘Hinte qaxaretanawunne higgiya naaganaw bessees’ gidi, hintena waaysidaysanne yiloydaysa si7ida. 25Nuuni dosiya Barnabaasanne Phawuloosa dooretida asatara issife hinteko kiittanaw issi wozanan nu qofaa qachida. 26Enti nu Godaa Yesuus Kiristoosa gisho banta de7uwa aathidi immidosona. 27Hessa gisho, nuuni xaafidaysa enti banta doonan gujidi hintew odana mela Yihudanne Sillaase kiitida.
28“Ha koshsheysatape attishin, hara tooho hintena toossonna mela nunne Geeshsha Ayyaanay oda qachida. 29Eeqas yarshetidi tunidaba moopite, suuthu uyopite, bawuta moopite, laymatopite. Ha ubbaafe hinte huuphiya naagiko hinte lo77oba ootheeta. Hiza, saro de7ite” yaagidosona.
30Hessa gisho, kiitetidaysati moyzetidi Anxooke bidi ammaniya asaa shiishidi, dabdaabe immidosona. 31Enti he minthethiya dabdaabiya nabbabida wode ufaytidosona. 32Qassi Yihudinne Sillaasey banta huuphen nabe gidiya gisho ammaneyisata loythi zoridi minthethidosona. 33Enti Anxooken guutha gallas uttidaape guye ishati lo77ora moyzin bantana kiitidaysatako simmidosona. 34#15:34: Issi issi maxaafatan paydo 34 baawa. [Shin Sillaasey yan attanaw koyis].
35Qassi Phawuloosinne Barnabaasi hara daro asatara issife Godaa qaala tamaarsishenne wongelaa odishe Anxooken gam7idosona.
Phawuloosanne Barnabaasa Shaaketetha
36Guutha gallasape guye Phawuloosi Barnabaasako, “Nuuni Godaa qaala odida katama ubban ammaneysati waanidi de7iyako guye simmishe xomoosi be7oos” yaagis. 37Barnabaasi Marqoosa geetetiya Yohaanisa bantara efanaw koyis. 38Shin Phawuloosi Marqoosa bantara efanaw koybeenna. Gaasoyka, I Phinfilen shaaketidi entara oothanaw bibeenna.#Hawa 13:13. 39Enta giddon iita ooshshi keyin issoy issuwafe shaaketidosona. Barnabaasi Marqoosa ekidi markabera Qophiroosa bis. 40Shin Phawuloosi Sillaase dooris; ammaneysati Phawuloosa Xoossa aadho keehatethas hadara immidaape guye, I keyidi bis. 41Yaatidi, woosa keethata minthethishe Sooreranne Kilqiyara aadhis.
The Word for the World International and The Word for the World Ethiopia