Luqaasa 20
20
Yesuusa Maatay Oyshetetha
(Maato 21:23-27; Mar 11:27-33)
1Issi gallas Yesuusi xoossa keethan asaa tamaarsishininne Wongela markatishin, kahine halaqati, higge astamaaretinne deriya cimati issife iyako yidi, 2“Neeni haysata aybi maatan oothiyako nuus oda. Ha maata new immiday oonee?” yaagidi oychidosona.
3I entako, “Taka hintena issiba oychana, ane taw zaarite. 4Xammaqiya Yohaanisa xinqatey Xoossafeye asapee?” yaagis.
5Enti woli giddon yaagidi zoretidosona: “Xoossafe giiko yaatin, ayis ammanibeketii?” yaagana.
6“Asape giiko, asa ubbay Yohaanisi nabe gideysa ammaniya gisho nuna shuchan caddana.”
7Yaaniya gisho, “Awupeko nu eroko” yaagidi zaaridosona.
8Yesuusi zaaridi, “Hiza, taka ay maatan haysata oothiyako hintew odike” yaagis.
Goshshanchota Leemiso
(Maato 21:33-46; Mar 12:1-12)
9Hessafe guye, Yesuusi yaagidi ha leemisuwa asaas odis: “Issi asi woyne tokis. Goshshanchotas kera immidi daro wode gam7idi yaanaw hara biitta bis.#Isa 5:1. 10Woyne ayfiya maxiya wodey gakin woyne ayfiyape iyaw yeddana mela goshshanchotako ba aylliya kiittis. Shin goshshanchoti he aylliya oykidi wadhidi mela kushe yeddidosona. 11Kaallidika hara aylliya kiittis. Qassi goshshanchoti iya wadhidi, kawushidi mela kushe yeddidosona. 12Ha77ika zaaridi heedzantho aylliya kiittis. Goshshanchoti iyaka madunxisidi woyne gadiya giddofe gaxa kessidi yeggidosona.
13“Woyne gadiya goday, ‘Yaatin ta ay ootho? Ane qassi ta dosiya ta na7a yeddana; ooni eri enti iya bonchona aggokona’ yaagis.
14“Shin goshshanchoti uraa na7a be7ida wode, ‘Haysi iya laattanaysa, haa yiite iya wodhana, yaatiko laatay nuus gidana’ yaagidi zoretidosona. 15Woyne gadiya giddofe gaxa kessidi wodhidosona. Yaatin, woyne gadiya goday he asata waatanee? 16Yidi he goshshanchota dhaysana, woyne gadiya hara asatas immana. Asay hessa si7ida wode ‘Shinchalle hessa melaba gathofo’ yaagidosona.
17“Yesuusi enta caddi xeellidi,
“ ‘Yaatin, gimbe keexiya asati borida shuchay,
keethaas malanne minotethi immiya ubbaafe aadhiya shuchi gidis’
geetetidi xaafetidaysa birshethay aybee?#Maz 118:22. 18He shuchaa bolla kundiya ubbay qoxettana, shuchay iya bolla wodhiya ubbay liiqana” yaagis.
19Higge astamaaretinne kahine halaqati ha leemisoy odetiday enta bolla gideysa eridi he wode iya oykanaw koydosona, shin asaas babidosona.
Giiraba
(Maato 22:15-22; Mar 12:13-17)
20Hessa gisho, Yesuusa deriya haariya Roome kawa maatas aathidi immanaw koyidi iya doonape bala qaala naagoosona. Hessa polisanaw xillo daanidi cimmiya asata iyako kiittidosona. 21Kiitetidi bida asati, “Astamaariyaw, neeni odeysinne tamaarseysi like gideysa, qassi Xoossaa ogiya tumatethan tamaarseysanne oonaka shaakonnaysa nu eroos. 22Hanoshin, Roome kawas giira giiranaw bessi bessennee?” yaagidi iya oychidosona.
23Shin I enta wozanaa iitatetha erida gisho, 24“Ane tana issi santime bessite, Iya bolla de7iya misileynne sunthay oodebayee?” yaagis.
Enti zaaridi, “Roome Kawa Qeesareysa” yaagidosona.
25I zaaridi, “Yaatiko, Qeesareba Qeesares, Xoossaba Xoossaas immite” yaagis.
26Hessa gisho, I zaarida zaaruwan asaa sinthan bala demmanaw danda7ibookona. Iya zaaruwan malaaletidi si77i gidoosona.
Hayqope Dendoba
(Maato 22:23-33; Mar 12:18-27)
27Hayqope dendoy baawa giya Saduqaawetape issoti issoti Yesuusako yidi,#Hawa 23:8. 28“Astamaariyaw, issi asi macho ekidi na7a yelonna hayqiko, iya ishay he maccasiw ekidi nayta yelidi ba ishaas koche ashshana mela Musey xaafis.#Zaare 25:5. 29Heko laapun ishati de7oosona. Koyroysi macho ekidi na7a yelonna hayqis. 30Nam7anthoy iyo ekidi na7a yelonna hayqis. 31Heedzanthoyka hessatho hanis. Laapunati ubbay hessada hanidi iyo ekidosona, shin na7a yelonna hayqidosona. 32Wursethan maccasiya hayqasu. 33Hiza, laapun addey iyo ekida gisho hayqope dendiya wode iya oodde macho gidanee?” yaagidi oychidosona.
34Yesuusi zaaridi, “Asay ha wodiyan ekoosonanne geloosona. 35Shin hayqope dendidi yaana alamiyan daanaw besseysati ekokonanne gelokona. 36Enti kiitancho mela gidiya gisho sinthafe hayqokona. Hayqope dendida gisho enti Xoossaa nayta. 37Musey Godaa, ‘Abrahaame Godaa, Yisaaqa Godaa, Yayqooba Godaa’ gidi tushiya giddon xuugetiya tama taarikiya xaafidaysan hayqida asay dendeysa bessees.#Kessa 3:6. 38Ubbay iyaw de7on de7eyisata gidiya gisho I de7on de7eyisata Godaape attishin, hayqidaysata Godaa gidenna” yaagidi zaaris.
39Higge astamaaretape issoti issoti, “Astamaariyaw, lo77oba odadasa” yaagidosona. 40Hessafe guye, hara oysho oychanaw yayyidosona.
Kiristoosi Oodde Na7ee?
(Maato 22:41-46; Mar 12:35-37)
41Iyape kaallidi Yesuusi entako, “Asay Kiristoosa waatidi Dawita na7a yaagona? 42-43Ayis giiko, Dawiti ba huuphen ba maxaafan,
“ ‘Xoossay ta Godaako “Ta ne morketa
ne tohoy yedhiyaso oothana gakanaw
taape ushacha baggan utta” gis’ yaagis.#Maz 110:1.
44“Hiza, Dawiti Kiristoosa, ‘Godaa gidi xeegishe iyaw na7a waanidi gidii?’ ” yaagis.
45Derey ubbay si7ishin ba tamaaretako, 46“Adussa ma7o ma7idi yuushshe doseysatape, giyan boncho sarotho, ayhude woosa keethan boncho oyde, moketiya sonka boncho bessi koyiya higge astamaaretape naagetite. 47Enti am7eta keethaa kalloyoosona, xillo asi daanidi woosa adussosona. Hessati ubbaafe aadhiya iita pirda ekana” yaagis.
The Word for the World International and The Word for the World Ethiopia