Matiyu 3
3
Yohanna thlǝ chǝt baptisma tahsanchi mbandǝ kaɗi
1Ə wanmǝnchǝˈini Yohanna thlǝ chit baptisma pǝɗakan, nakan ɓassa ǝ hur chanjeyi Yahudiya. 2Nakan ndat wa, “Tǝramha, kǝthlǝm kutǝrakti hulafǝrta ǝ ɓi nduk ha.” 3Thleya nech kǝ ǝnɗi ndiktǝ thlǝ shenuˈtǝ tǝ yahti Farta Ishaya, kǝ inan. Ndakan wa,
“Yowun nefa ˈya fat hur chanjeya, mǝthlan ndat wa,
‘Tahsaman mbandi Chindǝ kaɗi, kǝthlǝm ɓati Waˈi nef kaha.
Panaman ha kǝn ndelengnga kǝthlǝm kǝ wiˈ ǝ ɗaran.’”
4Kapaɗi paa Yohanna tahǝschǝ fee tǝ weshi ngelupa, paɗ ndǝɓtiyan yi fiya kǝndǝn. Ɗǝsǝmndǝ yan chalata tǝ ˈyam ɗeya yi chanjeya. 5Nat nafchi Urshelima, tǝ fee nat ǝ Yahudiya, tǝ nat nafchiɗi mǝrǝɓchǝɗi nech kufi Urdun, nakandǝ ɓat kǝmɗiyan. 6Nakan ndǝ mbuˈ ɓǝɓifechˈyanda, chankan baptisma tanda ǝ kufi Urdun.
7Tǝkǝɗu kǝ nak Yohanna tertǝ nafchi Farisiyawecha, tǝ Sadukiyawecha ɓata kǝthlǝm kǝ chandech fee baptisma. Chat ndang kan tanda wa, “Kun wan pandechiɗiya. Wun ndowunchǝ wa kǝ rakawun sǝɓtǝ hwiri Farta har nech ɓata? 8Cham ichiɗi nech pǝn ndǝ wa malawun chǝt ɓǝɓifata. 9Mǝ kaɗowun wa nowun mbahǝn ndandǝ indiyowun wa, ‘Ibrahim nech kǝ chin ǝn, kǝthlǝm ndaˈan, sǝɓtǝ hwiri Farta nen mbǝn nggaˈan fa wa.’ Nggǝt ndowun nda, Farta alkǝtyansi kǝ mbeɗantǝ ɗakwanchiɗi haya kǝ chokndǝ kǝ wancha kǝmɗi Ibrahim. 10Nakanya, tapi nɗǝf fee mi wurta chathl ɗǝfcha kǝ fǝlan. Nat ɗǝf tǝɗi nggǝtwakchǝ wanchǝ ndiˈchan, naa fee chathlaa ndǝ kaɗi kǝ mǝk fee kǝ wata.”
11Nggǝt chowun chi baptisma tǝ ema, kǝthlǝm pǝnndǝ wa malawun chǝt ɓǝɓifata. Paɗ thla nech ɓat kǝrsǝna mbǝrichi ha tǝ maanda, thla chika pahǝmchiyan chaˈwisi kǝ kǝsi har wa. Mǝthlan nech chowun baptisma tǝ Shemeta thla chǝɗchǝɗ, tǝ wat paɗ. 12Tapi tǝrtǝ ǝna pǝr hwermiyan chip kǝ hera. Nan tangsandǝ wan hwermiyan kaɗi kǝ kohanchi kǝ thlǝr kǝ ɓǝndǝw ˈyan. Kwichinan paɗ, nan nja ndǝ kaɗi tǝ waɗi thlǝ lifwakcha.
Chan Yohanna baptisma Yesu
(Mar 1:9-11; Luk 3:21-22)
13Kǝrsǝ fartiˈini, ɓak Yesu thlaˈtǝ hahi Galili, ɗǝkan kǝ kufi Urdun kǝmɗi Yohanna, kǝthlǝm kǝ chantǝ baptisma. 14Yohanna yah kan si kǝ ˈyatanchi. Ndang kan wa, “Kǝmchansi chi nech chi baptisma, mǝ chich natu ɓat kǝmɗinchi kǝ chuchi baptisma?”
15Nggǝran kǝ Yesu sǝ wa, “Malan kǝ chok kǝɗu nakanya, kǝthlǝm tǝkǝɗu natmǝn ndiiɗandǝ kakǝti Fartǝ ha.” Kǝn Yohanna nggǝmandǝ si.
16Kǝ tǝɓang kǝ Yohanna chan Yesu baptisma, chek Yesu kesh hur ˈyaman. Chat kǝɗuyu, in kǝ hulafǝrtǝ ha, nak Yesu Shemeti Farta ɓat kaha kǝ ndǝn wa kunggurha, kopkan kafˈyan. 17Chat sǝkkǝ fee ɓǝrata ǝ hulafǝrta tǝ ndat wa, “Thleya nech kǝ Waˈinchi thla thlǝ mbǝndifaɗan fa, thlǝ sǝkti mbǝnan fǝ kaan.”
©2025 Luke Initiative for Scripture Translation