Mark 14
14
Sivunniuġun Tuqutchukługu Jesus
(Matthew 26.1-5; Luke 22.1-2; John 11.45-53)
1 #
Ex 12.1-27. Tavra malġuk uvluk pianikpaŋnik tikitchumaaŋaruq Niqinaqivia Itqautim qulaurrusiqinikun iñuich niġimmata puvlaksautaitchuamik punniġmik. Tavralivsauq tainnaiḷimman aŋaiyyuliqsiqpaiḷḷu iḷisaurriḷḷu pitquranik piviksraqsiuŋarut qanuġlugu nalunautchiḷutiŋ tigutaaġukługu Jesus tuqulluguasii. 2Tavra uqaŋarut avanmun, Piraksraġiŋitkikput taamna niqinaqipkaġlugich, iñuich makivsaallautiviaġaatigut.
Jesus Tivraġiksaqtauruq Bethany-mi
(Matthew 26.6-13; John 12.1-8)
3 #
Lk 7.37, 38. Jesus-li Bethany-mi, igluani Simon kiḷḷiġruaqtuqtuam, aquppipkaqtillugu niġivḷutiŋ qaiŋaruq aġnaq piqaqłuni uyaġagmik misuġuqtuunmik tivraġiksaunmik akisupiaġataqtuamik atiqaqtuamik Nard. Tavra siqummaŋagaa puuŋa, aasii kuvivḷugu Jesus niaquanun. 4Tavra tavraniinŋarut iñuich iḷaŋich piavsaktuat uqaqłutiŋ, Summan una asiñuksiññaqpa tivraġiksaun? 5Tuniyumiñaġaluaqtuaq qaaŋiġḷugu 300 taala, aasii aitchuutigiyumiñaġlugich iḷiappauruanun. Tavra aġnaq pisaaŋaŋagaat suammativlugu. 6Tavra Jesus uqallaŋaruq, Iḷaksianagu. Summan isumaalluksaaqpisiuŋ? Savaŋaruq savaalluatamik uvamnun. 7#Dt 15.11.Qanuq itqatigigisi iḷiappauruat ilivsiññi ataramik, aasii qakuguliqaa pisukkuvsi anniqsuġumiñaġisi. Aglaan uvaŋa nayuqtigiŋitkivsiŋa ataramik. 8Aġnaq piŋaruq piyumiñakkamiñik. Ilaan tivraġiksaŋagaa timiga itqanaiyaqługu iḷuvġuniksraŋanun piviksram sivuani. 9Iḷumun uqallautigivsi, Sumipayaaq manna tusaayugaaġiksuaq alġaqsruutaukpan nunapayaani, aġnam savaaġiŋaraa quliaqtuaguniaqtuq itqaummatauluni ilaanun.
Judas Aŋiqtuq Aitchuutigisukługu Jesus
(Matthew 26.14-16; Luke 22.3-6)
10Tavra Judas Iscariot, iḷaŋat qulit malġuk, aullaŋaruq aŋaiyyuliqsiqpaŋnun, aitchuutigisukługu Jesus iliŋiññun. 11Tavra tusaakamirruŋ, quyaŋarut, suli unniqsuqłiiŋagaat aitchuġukługu manigñik. Tavra Judas ivaqłiaŋaruq piviksramik qanuġlugu aitchuutigisukługu.
Jesus-lu Iḷitchitquraniḷu Niġirut Itqautim Qulaurrusiqiviŋmun Niqinaqiviani
(Matthew 26.17-25; Luke 22.7-14, 21-23; John 13.21-30)
12Sivullianni uvluŋisa Niqinaqivium Puvlaksautaitchuamik punniġmik imnaiyaaq tuqutaugayuktuq itqanaiyautauvlugu qulaurrusiqiviŋmi Niqinaqiniksramun. Taavrumani uvlumi iḷitchitqurat apiġiŋagaat Jesus, Sumi itqanaiyaquvisigut qulaurrusiqiviŋmi nullautchiġviksraġnik? 13Tavra tiliŋagik malġuk iḷitchitquramiñiñ, uqallautivlugik, Aullaġitchik iniqpaŋmun, aasii paaġniaġaatik iñuum saagaqtuam qattamun imiġmik. Malikkumagiktik, 14aasii sumupayaaq isiqpan, uqallautiyumagiktik iñua iglum, Iḷisaurri uqallaktuaq, Sumiitpa tuyuġmiaqaġvik, niġiviksraqput iḷitchitquratkalu qulaurrusiqunmik? 15Tavra iḷisautiniaġaatik inituruamik qiḷaguamik upaluŋaitchuamik. Tavrani itqanaiyautiyumagiptigut. 16Tavra ilaan iḷitchitqurak aullaŋaruk, aasii tikił̣ł̣utik iniqpaŋmun, paqinŋagaich supayaat uqausiatun Jesus ilimiŋnun. Suli itqanaiyaŋaruk qulaurrusiqiniksramun.
17Tavra unnuksraaġman Jesus tikiñŋaruq piqatigivlugich qulit malġuk. 18#Ps 41.9.Tavra niġiḷḷaġmiŋ niġġiviŋñi, Jesus uqallaŋaruq, Iḷumun uqallautigivsi, Iḷavsi niġiqatigikkaġma aitchuutiginiaġaaŋa. 19Tavra isumaalirraqsiŋarut, aasii apiqsruqtuaqsivḷugu ilaanun atausiullaavlutiŋ, Uvaŋauva? Allat suli uqaqłutiŋ, Sivuniġiviŋa uvaŋa? 20Tavra Jesus kiuŋagai, Iḷagigiksi qulit malġuk, misuksiqatauruaq punniġmik uvamnun puggutauramun. 21Iġñiŋa Iñuum tuquniaqtuq taŋŋiġḷugich aglausimaruat inmigun Bible-ni. Aglaan isumaaġutiqpaqaġli taamna iñuk aitchuutiginniktuaq Iġñiŋanik Iñuum. Iłuałhaaŋanayaqtuq taamna iñuk iñuuŋaitkumi.
Atanġum Nullautchiġvia
(Matthew 26.26-30; Luke 22.14-20; 1 Corinthians 11.23-25)
22Tavra niġiñiallaġmiŋ Jesus tiguŋagaa punnik, aasii aŋaiyyuvluni quyyatigivlugu, suli avikługu aitchuutigivlugu iḷitchitquramiñun, uqallakłuni, Tigulugu niġġisiuŋ tavra timiga. 23Suli ilaan tiguŋagaa qallugauraq, aasii quyaanikami God-mun, ilaan aitchuutigiŋagaa ilaiññun. Aasii iluqaġmiŋ imiġvigiŋagaat. 24#Ex 24.8; Jr 31.31-34.Suli Jesus uqallautiŋagai, Tavra auga maqipkaqtauyumaaqtuaq iñugiaktuanun. Taavrumuuna God-im nalupqinaiġñiaġaa sivunniuġutini iñuŋnun. 25Iḷumun uqallautigivsi, Imitqigñiaŋitchuŋa siiġñaŋan ivsaŋaniñ napaaqtuayaam, tikiḷġataqtillugu taamna uvluq imiġniksraġa nutaulugu God-im atanniqsimaviani. 26Tavra atuanikamiŋ aŋaiyyunmik, aullaŋarut iġġianun Olives.
Jesus Uqautigigaa Piŋaiñŋaan Peter-m Piiḷaaġniksraŋa
(Matthew 26.31-35; Luke 22.31-34; John 13.36-38)
27 #
Zec 13.7. Tavra Jesus uqallautiŋagai, Iluqasi qimagniaġivsiŋa suksraaġluŋa uumani unnuami. Aglausimaruq Bible-ni God uqallagnivḷugu inna, “Uvaŋa tuqunniaġiga imnaiḷiqiri aasii imnaich siamillutiŋ.” 28#Mt 28.16.Aasii aŋianikkuma, aullaġniaqtuŋa sivuvsiññi Galilee-mun. 29Tavra Peter uqallaŋaruq ilaanun, Iluqaġmiŋ qimakkaluaqpatin uvaŋa qimakkumiñaitkikpiñ suksraaġlutin. 30Tavra Jesus uqallautiŋagaa, Iḷumun uqallautigikpiñ, Anaqapak uvva piiḷaaġianiŋniaġiŋma piŋasuiqsuaġlutin naluniḷuŋa, tiŋmiaq malġuiqsuaġluni nipanŋaiñŋaan. 31Tavra Peter uqallaŋaruq qapiŋaivsaaqłuni, Tuquqatigiraksraġigupkiñunnii, piiḷaaġiyumiñaitkikpiñ sumikunnii. Tainnatuttauq iluqaġmiŋ iḷitchitqurat uqallaŋarut.
Jesus Aŋaiyyuruq Gethsemane-mi
(Matthew 26.36-46; Luke 22.39-46)
32Tavra tikiñŋarut inimun atiqaqtuamun Gethsemane-mik, aasii Jesus uqallaŋaruq iḷitchitquramiñun, Aquvittitchi uvuŋa, aŋaiyyuyaqtuqtilluŋa. 33Tavra piqasiutiŋagai ilimiñun Peter-lu James-lu John-lu, Suli atqunaq iłuiḷḷiurraqsiŋaruq, ipiqtusuliqpakłuniḷu, 34aasii uqallautiŋagai, Isumaaliqpaił̣ł̣uŋa tuquaqsiruatununnii iḷiruŋa. Tavraniittitchi aasii quviqtaiḷiḷusi. 35Tavra ilaa taikuŋaqtaallaŋaruq, aasii isumaaqpaił̣ł̣uni ulġuŋaruq nunamun aasii aŋaiyyuvluni, Piñaġumiñaqpan, nagliksaaġuŋitkaluaqłuni. 36Tavra ilaa uqallaŋaruq, Aapaaŋ, supayaat piḷḷagitin. Piiġuŋ nagliksaaġutiqpak uvamniñ. Aglaattauq uvaŋa pisuutiŋił̣aapkun, aglaan ilivich pisuutipkun.
37Jesus utiŋaruq piŋasunun iḷitchitquramiñun, aasii tautukługich siñiktuat. Peter uqallautiŋagaa, Simon, siñikpich? Quviqtaiḷiyumiñaiñŋavich atautchimiunnii ikarraġmi? 38Quviqtaiḷisitchi aŋaiyyusitchiḷu, iḷaanni payarirauviaqtusi ikł̣igutchaktinniaġunmun. Iḷumun ilitqusisi piyummatiqaġaluaqtut, timisi sayaitchut.
39Tavra Jesus aullatqiŋaruq, aasii aŋaiyyuvluni taapkuniŋasuli uqaluŋnik. 40Tavra utiqami, ilaan tautuŋagai siñiktuat suli qanuq pillitchiŋarut. Suli iḷisimaŋaitchut kiggutiksramiŋnik ilaanun.
41Tavra qaiŋaruq piŋayuaŋni, aasii uqallautivlugich, Siñikpisisuli unaŋuiqsiqł̣usiḷu? Siñikpaaniktusi. Uvva aitchuutauniksraŋa Iġñiŋan Iñuum tikitchuq aŋalataġiyumiñaqsivḷugu piḷuktuanun iñuŋnun. 42Makittitchi. Aullaqta. Tautuksiuŋ uvva. Aitchuutiginniktuaq uvamnik tikitchuq.
Tigurauruq Jesus
(Matthew 26.47-56; Luke 22.47-53; John 18.3-12)
43Tavra tavrauvvaa uqaġniaqtillugusuli, qairuq Judas, iḷaŋat qulit malġuk. Piqatigiŋagai iñusalaich savikpaliraqtuat anauttaksraligaaqtuallu, tiliraŋich aŋaiyyuliqsiqpaich iḷisaurriḷḷu pitquranik umialiŋnallu. 44Tavra taavruma aitchuutiginniktuam ilaanik nalunaiñŋutaksriñŋagai, uqaqłuni, Kiñaliqaa kunikkaġa taamna ilaaguruq. Tigugisigiksi aasii aullatilugu qaunagilugu.
45Tavra Judas tikipqauraqami, tavrauvvaa ullaŋagaa Jesus aasii uqallakłuni, Iḷisaurrii. Suli kuniŋagaa. 46Tavra tiguniqłaŋagaat. 47Tavra iḷaŋata qikaqtuat tamaani amuŋagaa savikpak, aasii anauvlugu kivgaŋa aŋaiyyuliqsiqpaich qaukłiata aasii siutaiqł̣ugu. 48Tavra Jesus uqallautiŋagai, Qaivisi tigligayuktimun pimmatun, savikpaqaqłusi anaullautiniglu tiguyaqtuqłuŋa? 49#Lk 19.47; 21.37.Uvaŋa uvlutuaġman piqatigigivsi aŋaiyyuvikpaŋmi iḷisaurrivḷuŋa, aasii tigulaitkivsiŋa. Aglaan Bible uqaluat nalauttuksrauruq. 50Tavra iluqaġmiŋ iḷitchitqurat qimagruiññaqługu pigruŋarut.
51Tavra nukatpiam Jesus maliŋagaa ukił̣haaġiksuamik uligaaqtuqłuni annuġaiññami. Tavra tiguŋagaluaġmigaat, 52aglaan ilaan qimaŋagaa uligaani, aasii pigruqłuni iliŋiññiñ annuġaiḷaq.
Jesus Apiqsruqtuġaat Uqaqsitaaġviŋmi
(Matthew 26.57-68; Luke 22.54-55, 63-71; John 18.13-14, 19-24)
53Tavra aullautiŋagaat Jesus aŋaiyyuliqsiqpaich qaukłiata igluanun, suli piqatigivlugu kasimaŋarut iluqaġmiŋ aŋaiyyuliqsiqpaiḷḷu umialiŋnallu iḷisaurriḷḷu pitquranik. 54Tavra Peter-m maliŋagaa Jesus aquagun uŋasikł̣ugu aasii isiqłuni siḷallianun igluata aŋaiyyuliqsiqpaich qaukłiata. Tavruŋa aquvinŋaruq piqatigivlugich munaqsrich pasiaqłuni igniġmi. 55Tavra aŋaiyyuliqsiqpaich iluqaġmiglu uqaqsitaaqtitchirit pasikkutiksraqsiuŋagaat Jesus tuqutchumiñaqsisukługu. Aglaan paqitchiḷaiñŋarut. 56Iñugiaktuat iñuich sagluuŋarut iḷisimaniruat ilaagun pasikkutiksranik. Suli uqaluŋich atilaiñŋarut.
57Tavra iñuich iḷaŋich makinŋarut, aasii saglunik uqaqłutiŋ ilaagun. 58#Jn 2.19.Tusaaŋagikput uqallaŋman, Suksraunġiġñiaġiga una aŋaiyyuvikpak savaaŋat iñuich, aasii uvlut piŋasut sippiġaluaġnagich savagniaqtuŋa allamik aŋaiyyuvikpaŋmik iñuich savaaġiŋisaŋannik. 59Naaggaptauqsuli uqaluŋich atiŋaitchut.
60Tavra aŋaiyyuliqsiqpaich qaukłiat makinŋaruq qitqannun, aasii apiġivlugu Jesus, Kiggutiksraitpich ukua iñuich uqaluŋiññun ilipkun? 61Tavra Jesus nivliŋaitchuq, suli kiuŋaitkaa sumik. Aŋaiyyuliqsiqpaich qaukłiata apiġitqiŋagaa, Ilivich Christ-guvich, Iġñiŋa Nanġaqtauruam? 62#Dn 7.13.Jesus uqallaŋaruq, Tavrauruŋa. Aasii ilivsi tautugniaġiksi Iġñiŋa Iñuum aquppiruaq taliqpiata tuŋaani Sapiġñaqtuam, suli qairuaq nuvuyaŋigun qiḷaum. 63Tavra aŋaiyyuliqsiqpaich qaukłiata aliktuŋagai annuġaani suli uqaqłuni, Iñuvsaanik pasiññiktuksranik ilaanik piqaqtuksrauŋaiqsugut. 64#Lv 24.16.Tusaaganikkiksi God-itun iḷiuqtuaq inmiñik. Qanuq sivunniqpisiuŋ? Tavra iluqaġmiŋ sivunniŋagaat tuqutauruksraġuqługu.
65Tavra iñuich iḷaŋisa tivvuaqturraqsiŋagaat Jesus, suli matuvlugu kiiñaŋa qakiqtaqługu uqaqłutiŋ, Nalautchaġiñ kimun qakiqtilaaġnik. Suli qaunaksrit tiguvlugu pattaŋagaat.
Peter-m Piiḷaaġigaa Jesus
(Matthew 26.69-75; Luke 22.56-62; John 18.15-18, 25-27)
66Tavra Peter siḷalliġmiitillugusuli, iḷaŋat Aŋaiyyuliqsiqpaich qaukłiata niviaqsiaq kivgaŋa tavruunnaaŋaruq. 67Aasii tautukamiuŋ Peter pasiaqtuaq, takunnaŋagaa aasii uqallautivlugu, Ilivitchauq piqatigimmikkan Jesus Nazareth-miu. 68Tavra Peter piiḷaaŋaruq, Nalugiga. Kaŋiqsiŋitchuŋaunnii sumik uqaqtilaaġnik. Tavra aniŋaruq aniiġviŋmun, aasii tiŋmiaq nipanŋaruq. 69Tavra niviaqsiam kivgam taututqiŋagaa, aasii uqautiaqsivḷugich tamaani qikaqtuat, Unauvva iḷaŋat. 70Tavra Peter piiḷaatqiŋaruq. Suli akkuliurallaŋman, tamatkua qikaqtuat saniġaani uqallatqiŋarut Peter-mun, Iḷumun iḷagigaatin, qanuq Galilee-ġmiugummiutin. 71Tavra Peter suammakłuni uqallaŋaruq, God-im tatavsaġliŋa uqaŋitkuma iḷumun ittuamik. Nalugiga kiutilaaŋa iñuk uqautigikkaqsi. 72Tavra tiŋmiam nipannini aippiŋagaa. Aasii Peter-m itqaŋagaa uqalua Jesus inmiñun inna, Tiŋmiaq nipatkaluaqtinnagu malġugni, ilivich piiḷaaġiniaġiŋma piŋasuni. Tavra taamna itqaqamiuŋ, ilaa qiaġutiŋaruq.
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)