Mark 15
15
Jesus Apiqsruqtuġaa Pilate-gum
(Matthew 27.1-2, 11-14; Luke 23.1-5; John 18.28-38)
1Tavra uvlaatchaurami aŋaiyyuliqsiqpaich umialiŋnallu iḷisaurriḷḷu pitquranik iluqaġmiglu uqaqsitaaqtitchirit kasimaliqtuayaaŋarut sivunniuqłutiŋ. Iliŋisa qiḷiqsruivḷugu Jesus, aullautiŋagaat qaitchukługu Pilate-mun. 2Tavra Pilate apiġiŋagaa, Umialigivatin Jews? Tavra Jesus kiuŋagaa, Uqallausiġigiñ. 3Tavra aŋaiyyuliqsiqpaich pasiŋagaat iñugiaktuatigun sutigun. 4Tavra Pilate-gum apiġitqiŋagaa, Kiggutiksraitpich? Qanutun uvva iñugiaktigiruanik pasigaatin. 5Tavra Jesus kiuŋiḷgitchuqsuli. Tavra Pilate kamatchaktuq.
Jesus Tuquruqsraġuġaat
(Matthew 27.15-26; Luke 23.13-25; John 18.39—19.16)
6Tavra niqinaqilimaaġmata qulaurrusiqiviŋmik, Pilate annaktitkayukkaa atausiq tigutaaqtaq, kiñapayaaq pisuŋmarruŋ. 7Tavrani iñuk inŋaruq atilik Barabbas-mik tigutaaqtauqatauruaq iñuŋnun tuavaallaktitchiññiktuanun iñuaŋavlutiŋ. 8Tavra iñusalaich nipaalavlutiŋ qasiḷiaqsiŋagaat Pilate pitquvlugu piḷġusikaamisun ilimiŋnun. 9Tavra Pilate-gum apiġiŋagai, Tigutaaqtauŋaiqsitquvisiuŋ uvamnun umialgat Jews? 10Qanuq ilaa iḷisimalluataŋaruq aŋaiyyuliqsiqpaŋnun aitchuutigiŋatilaaŋanik killuġivlugu. 11Tavra aŋaiyyuliqsiqpaich aulayyaŋagaich iñuich, ilaanun tigutaaqtauŋaiqsitquvlugu Barabbas. 12Tavra Pilate-gum apiġitqiŋagai, Qanuquvisiuŋ aasii uvamnun ilivsi taikkaqsi Umialgannik Jews? 13Iliŋisa saqłautiŋagaat, kikiaktuutili. 14Tavra Pilate-gum uqallautiŋagai, Summan? Sumik pitquramik navgiŋava? Tavra saqłautivsaaqsiññaŋagaat atqunapiaġataq, Kikiaktuutili. 15Tavra Pilate-gum, iviġagumavlugich iñuich, tigutaaqtauŋaiqsinŋagaa Barabbas. Aasii aitchuutigiŋagaa Jesus ipiġaqtuqtitanikamiuŋ kikiaktuutitquvlugu aŋarrauramun.
Aŋuyaktit Kipagigaat Jesus
(Matthew 27.27-31; John 19.2-3)
16Tavra aŋuyaktit itqutiŋagaat Jesus Pilate-gum igluqpaŋanun, aasii katitquŋagaich iḷakut aŋuyaktit atautchimun. 17Tavra atipkaŋagaat annuġaanik suŋauraammaġiksuanik umialiktun, suli niaquġusiŋarut kakiḷḷaġnaqtuanik qisiqsiutinik, aasii iḷivḷugu niaquanun. 18Tavra iliŋisa kipagivlugu nanġarraqsiŋagaat uqaqłutiŋ, Sivisuruamik iñuuli Umialgat Jews. 19Suli anaullaŋagaat niaquagun qiruatchiamik, tivvuaqtuqługulu. Suli kipagivlugu sitquġvigiŋagaat purvigivlugulu. 20Tavra kipagianikamirruŋ, mattaqtinŋagaich suŋauraammaġiksuat annuġaat ilaaniñ, aasii annuġaaqługu ilaan annuġaaŋiñik, aasii aullautivlugu kikiaktuutiyaqtuqługu.
Jesus Kikiaktuurrauruq Aŋarrauramun
(Matthew 27.32-44; Luke 23.26-43; John 19.17-27)
21 #
Ro 16.13. Iglaullaġmiŋ aŋuyaktit paaŋagaat iñuk atiqaqtuaq Simon-mik, tikitchaqtuqtuaq iniqpaŋmun imaŋŋa nunamiñ. Tavra nunuriŋagaat iqsruquvlugu ilaanun Jesus aŋarrauraŋa. Taamna Simon Cyrene-miu, aapaŋak Alexander-vlu Rufus-lu. 22Tavra Jesus tikiutiŋagaat inimun Golgotha-mun, sivuniqaqtuamun Inaanik Niaquġruam. 23Tavra imiksriñŋagaat wine-mik avuuŋaruamik Myrrh-mik, aasii imiŋaitkaa. 24#Ps 22.18.Tavra kikiaktuutianikamirruŋ, autaaŋagaich annuġaaŋi, saaptautigivlugich nalliannik iñullaa piñiaqtilaaŋanik. 25Nainukłaaġman uvlaami kikiaktuutiŋagaat. 26Suli aglaich pasikkusiaŋi iḷiŋagaich niaquata qulaanun uqaluqaqtuat inna, “Umialgat Jews.” 27#Is 53.12.Suli tuvaaqasiqł̣ugu kikiaktuutiŋagaich malġuk tigligayuktik, atausiq taliqpiata tuŋaanun, suli igḷua saumiata tuŋaanun. 28[Tavra Bible uqaluat taŋŋiŋaruq, uqaluqaqtuaq, “Ilaa kisiuqatauŋaruq piḷuktualiqirinun.”]
29 #
Ps 22.7; 109.25;
Mk 14.58; Jn 2.19. Iñuich tamaunnaaqtuat Jesus niaqulavigiraġaŋagaat nivliativlugulu pisaaŋŋatinik, Yaqhii, suksraunġiiyumaaqtuatiin imña aŋaiyyuvikpaŋmik aasii nappatqigḷugu uvluni piŋasuni, 30annauttuiñ iliŋnik, atqaġiḷḷu aŋarrauramiñ. 31Tainnatuttauq aŋaiyyuliqsiqpaich iḷisaurriḷḷu pitquranik, kipagivlugu uqaŋarut ilimiŋnun, Annaurriŋagaluaqtuq allanik, ilimiñik annautilaitchuq. 32Tautuglakput Christ umialgat Israel, atqaġli aŋarrauramiñ akkupak ukpiġiliġumagikput. Suli malġuk kikiaktuurrauqatauruak Jesus-mun pisaaŋaŋammigaak.
Jesus Tuquruq
(Matthew 27.45-56; Luke 23.44-49; John 19.28-30)
33Tavra uvluq qitiqqaġman, taaqsiŋaruq iluqani nuna piŋasunugataqtillugu. 34#Ps 22.1.Tavra piŋasunuŋman Jesus nivliŋaruq nipatuvluni, Eloi, Eloi, lama sabachthani, sivuniqaqtuaq, God-iiŋ, God-iiŋ, summan suksraaqpiŋa? 35Tavra iḷaŋisa qikaqtuat saniġaani tusaakamirruŋ, uqallaŋarut, Ququulagaa Elijah. 36#Ps 69.21.Tavra iñuk aqpanŋaruq aasii immiqł̣ugu ivsaktaqtuaq wine-mik, iḷivḷugu qiruum nuvuanun, aitchuŋagaa imiquvlugu uqallautivlugich, Aannagu. Naipiqtuġlakput Elijah qaiñiaġmagaan atqaġiaġlugu. 37Tavra Jesus nivliŋaruq nipatuvluni, aasii aniġniġiqł̣uni. 38#Ex 26.31-33.Tavra talukiyaaŋa aŋaiyyuvikpaum aliŋaruq malġuułłuni qulimiñiñ ataanun. 39Tavra aŋuyaktit atanauraŋata, qikaqtuam akiani, tusaakamiuŋ tainna nivliqsuaq aniġniġiġmallu, uqallaŋaruq, Iḷumun una iñuk Iġñiġiniġaa God-im. 40#Lk 8.2, 3.Tavranivsauq aġnat qiñiŋarut uŋasiñiñ. Iḷagiŋagaich Salome, Mary-ḷu Magdalene, suli Mary aakaŋak James-lu kamanaiññiqsram Joses-lu. 41Taapkua aġnat maliġiŋakkaŋat Jesus Galilee-miinman pamaġivlugu. Allattauq iñugiaktuat aġnat tavraniinŋarut maliŋaruat Jerusalem-muŋman.
Jesus Iḷuvviuġaat
(Matthew 27.57-61; Luke 23.50-56; John 19.38-42)
42Tanuġaksiaqsimman Joseph Arimathea-ġmiu tikiñŋaruq. 43Ilaa isumakkusiaqaġluataqłuni iḷauruaq aŋaiyyuvikpaum uqaqsitaaqtitchiriŋiñun, niġiuktuaguruaq tikiññiksraŋanun God-im atanniqsimannigniksraŋanik iñuŋnun. Taamna uvluq Itqanaiyaġviuruaq sivuani Jew-guruat Savairviata. Tavra Joseph sivuuqqataiqł̣uni Pilate-muŋaruq, aasii apiqqusiġivlugu Jesus timaa. 44Pilate niġiiḷḷaqtauŋaruq tusaakamiuŋ Jesus tuquaniktilaaŋa. Tavra qaitquŋagaa aŋuyaktit atanauraŋat aasii apiġivlugu tuquaniŋmagaan Jesus. 45Tavra iḷitchuġianikamiuŋ aŋuyaktit atanauraŋanniñ, pitquŋagaa timaa Jesus Joseph-mun. 46Tavra Joseph tauqsiŋaruq qatiqtuamik ukił̣haaġiksuamik, aasii atqaqługu Jesus timaa, suli nimmaaqługu qatiqtuamik ukił̣haaġiksuamik iḷiŋagaa iḷuvviviŋmun nayuurramun uyaġakun. Tavra aksraŋagaa uyaġagruaq upkurriutivlugu iḷuvviviŋmun. 47Tavra Mary Magdalene Mary-ḷu aakaŋa Joses qiñiŋagaak sumun Jesus iḷuviqtilaaŋa.
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)