Maruku 2
2
Wolugu-lugu iwiao o Yesusika
Matiusu 9:1-8; Lukasa 5:17-26
1Ho o wange muruono naga ipahaikaka de o Yesusu wolioli o Kapenaumu ma kapongika, de o nyawa yoihene abe o Yesusu woboaka ho naga ma tauoka. 2De ma abari gea yoihenino ho naga manga ngoe yoboa yomatoomuino ma tauoka gea ho hiadono yodokemoka o tau ma goronaka de ko iwaka ma ngi, de hiadono yodeefotoka o tau ma ngorana ka hiadono ma poretoko. De o Yesusu wadotoko o nyawa manga ngoeika gea Ma Jou ai Demo-demoino. 3De naga womatengo wolugu-lugu abe iwiao o Yesusika ho naga ai dodiawo yaruata yomaketeligoraka la o Yesusika iwiao. 4Iwiaoino masara ko idadiua iwihiadono o Yesusika angamoi o nyawa genangoka yowoeholi. Ho iwihidoa daku o tau ma poretiye. De ahao o tau ma katu agoraka o Yesusu ai lokuiye, de wolugu-lugu gea iwihidowora ka ma moi de ai nanao, ho iwihiguti daea o Yesusu ai himanguku. 5Ho ka de o Yesusu wamake manga ngongaku gea de witemo wolugu-luguika wato, “Ahi ngofaka, ani howono Ma Jouika naa Ngohi takokiofioka.”
6De naga o tau ma goronaka gea yogogeruku yamuruono naga abe yotobadoto-dotoko o Musa ai Paretaino, de doka manga hiningaka o Yesusu iwihidemo ato, 7“Ei, una naa ai demo duru itorou! Abe una ka o nyawa dika ho ufa womahitouna, angamoi gea to Ma Jou dika ai karajaanga la o nyawa manga howono waofi. Ho nako una naa wotemo hokogea de una wingelo Ma Jouika.”
8Ma ka de hokogea yotemo ngaro manga hiningaka dika de o Yesusu duru wohiorikoka hokokia itagi manga hiningaka. Ho wotemo onangika wato, “Adodoa ho ka doka dika nia hiningaka de nitemo-temo hokogea? Marai niato to Ngohi ahi kuaha ko iwa? 9Masara Ngohi naa naga de ahi kuahaka ho hiadono ngaro totemo wolugu-luguika tato, ‘Ani howono taofioka,’ eko ngaro totemo tato ‘Nomomiki de ani nanao nagoraka de nomaloiki,’ ma ka idadi mata-mata. 10Ho naa tomahitaana abe Ngohi naa o Nyawa ma Ngofaka abe o Horogaka de tauku toboa masara o nyawaino tomaboa. Abe Ngohi naa de ahi kuahaka ma gou-goungu o duniaka la hiadono ka idadi taofi o nyawa manga howono Ma Jouika. De gea itaana nako tihuloko la womomiki de una ka idadi womaloiki.” Ho gea o Yesusu wotemo onangika ibooto de ahao wolugu-luguikali wotemoli wato, 11“Ho naa ngonaika tonihuloko la ngona nomomikoka, de ani nanao nagoraka de ka idadi nolio ani tauika.” 12De una wolugu-lugu ka dau de womahiburahiye, de ai nanao wagoraka de wohupu manga himangoka de waika. De o nyawa manga ngoe genangoka duru yokokiheranga hiadono Ma Jou iwihigiriiri. De yomakoketemo ato, “Ko ma moiuahi ma datoro abe hokonaa ngone hamake!”
O Lewi unangoo winiiki o Yesusu
Matiusu 9:9-13; Lukasa 5:27-32
13De ma moioli o Yesusu woikoli o Galilea ma akere ma ngooto ma datekika, de naga o nyawa ko manga ngoe yokokiboaino Unangino. Ho yomatoomuino Unangoka de onangikali wadotoko. 14De wadotoko ibooto de o Yesusu wogila-gila de wimake o nyawa womatengo ai romanga o Lewi, abe una to Alefeusu ai ngofaka, de to una ai karajaanga wotobagaho-gahoko o pajaka ma tiwi. Ho gea o Yesusu wimake wogogeruku o pajaka yogaho-gahoko ma tauoka. De o Yesusu wiahoko unangika wato, “Naino la ka ihikaika nohiniiki Ngohi.” Ka de hokogea wotemo de o Lewi womaoko de winiiki o Yesusika.
15De ahao o Yesusu de iwinii-niiki naga o Lewi ai tauoka yomakutuono yolomo ai tau ma goronaka gea. De naga utu manga ngoe iwiniiki o Yesusu abe manga datoro itotorou. Ho ma oraha gea naga abe o pajaka yogaho-gahoko de nagali utu abe yodiaioka itorou Ma Jouika, ona mata-mata gea yolomo hoimoi genangoka o Lewi ai tauoka. 16De nagali genangoka o Farisi manga doomuino ma nyawa de ona abe yotobadoto-dotoko o Musa ai Paretaino ho ka de ona gea iwimake o Yesusu wolomo de ona o pajaka yogaho-gahoko de abe yodiaioka itorou, de yaleha o Yesusu iwinii-niikika ato, “Adodoa ho nia baluhu gea yomakutuono yolomo de ona abe o pajaka yogaho-gahoko de o nyawa utuoli abe onangoo yodiaioka itorou Ma Jouika?”
17Ho manga demo gea woihene de o Yesusu Una ma hirete wapaluhu onangika wato, “Nako o nyawa yomalega de yafikiri ato ko yopopanyakeua, ona gea ko yomahibauua ona yohou-hourika. Masara o nyawa abe yomahioriki naga de manga panyakeoka ona gea yosanangi yoperelu o duduhunu yohou-hourino. Ho Ngohi naa toboa ko ma titiua tahoko ona gea abe yomaetongo manga wowango ato yototiaioka. Masara ona abe yomahioriki nagahi de manga howonokahi Ma Jouika, ona gea tahoko la yoporetika manga howono gea.”
O Yesusika iwileha ma titi yopuaha
Matiusu 9:14-17; Lukasa 5:33-39
18De ma moiuku ona abe iwinii-niiki o Yohanese Wotobaohi-ohiki ona gea naga yopuaha, de onangoo yanii-niiki o Farisi ma nyawa yopuaha. De ahao naga o nyawa yoboa o Yesusino de iwileha Unangika ato, “Ona gea abe o Yohanese iwinii-niiki ona yopuaha, de nagali ona yanii-niiki o Farisi ma nyawa ma onangoo yopuaha. Ho adodoa ho to Ngona ani nyawa de ko yopuahaua?”
19De o Yesusu ma oraha wapaluhu onangika de womahiketero abe ma titi Una ma hirete de ona iwinii-niiki. Ho gea wapaluhu ona yoleha-lehaika wato, “Hokokia to ngone nanga biaha? Abe nako o gogilaka ma rame-rameoka de una woila-ilaka nagahi, sarakia, ma oraha gea mode ai dutu-dutu de ai dodiawo ka idadi ona gea yopuaha? Koua. Nako una gea abe woila-ilaka nagahi, ko idadiua yopuaha. 20Masara ahao naga ma oraha abe ai dodiawoino iwiaoka woila-ilaka gea, de gea ma oraha ahao yopuaha ai dodiawo angamoi manga hininga ihuha ho ko yolomuahi o inomo. De gea ma titi hiadono Ngohi tato ma oraha ko adonuahi abe ona ihinii-niiki kiani yopuaha de manga hininga ma huha.”
O hirahi ma dodotoko de Ma Jou ai Demo-demo ma dodotoko ko idadiua de hohikasapuru
21De ahao ma moioli wohiketero o Yesusu la wahitararono ma titi o kia hiadono ona iwinii-niiki ko yopuahauahi. Abe Una wotemo wato, “Nako naga nanga baju ma dekanino biaha hapake-pake de ikakihoka ho hato hatapa, nako ma dadapa gea ka ma hungiohi, gea ko idadiua de hohiduguriti. Nako gea ahao ma dadapa ma hungi ikororomo de atauru ma dabino ho ma baju gea ma moioli ikakihi, masara ma kakihi ma hungi gea utuohi ilamoko.”
22De ma moioli o Yesusu wohiketero abe ma titi ka moi de hoka kangano, wato, “Nako naga o angguru ma teongo ka ma hungiohi, ko idadiua hoguhe o popojeuku nako ma popoje#2:22 Ma oraha gea ona yodiai manga akere ma ngi eko manga teongo ma ngi o aewani ma kaiino. ma dekanoka, done ahao ma teongo ihaga de ma popoje ipotoka, de gea ahao ma teongo ikopoaka de ma popojeoo irusakoka. Ho nako ma teongo ma hungi, kiani hoguhe o popoje ma hungiuku.” Hokogea o Yesusu ai hiketero abe genangino de wahitararono ma titi o kia naga hiadono to Una ai dodiawo ko yopuahauahi ma oraha gea.
O Hiaini ma wange
Matiusu 12:1-8; Lukasa 6:1-5
23De o Hiaini ma wange moioka de o Yesusu de iwinii-niiki yotagi-tagi de o nyawa manga pine ma redika yoboa, de iwinii-niiki ona homoi-homoi yomakokigutuku ma pine ma gosela. 24De o Farisi ma nyawa iwitaere o Yesusika ato, “Abeika ona gea! Adodoa ho o Hiaini ma wangeoka de atilakuru to ngone nanga pareta? Angamoi o Hiaini ma wangeoka de ko idadiua hokarajaanga!”
25-26De o Yesusu wapaluhu onangika wato, “Mode ngini ko nibasauahi o Dautu ai ade-ade Ma Jou ai Bukuoka? Abe ma dihira ma oraha o Dautu gea de naga womatengo o Abiatara abe wodadi to ona manga hidemo wokokurutiye Ma Jouiye. Ho ma oraha gea de o Dautu duru iwihafini de ai dodiawo onangoo yahafini ho Ma Jou ai Tau ma goronaika wowohamika o Dautu de wolomo o roti abe Ma Jouika iwidingakoka. Abe tanu ona manga hidemo ma nyawa dika ka idadi yaolomo ma roti gea, o nyawa utu duru ko idadiua yaolomo. Masara o Dautu una waolomo de wahikodokuoo ai dodiawoika la onangoo yaolomo. De gea o Dautu ko wahowonua Ma Jou ai himangoka, ngaro ma roti gea iwidingakoka Ma Jouika. Mode ngini gea ko nibasauahi ma ade-ade gea? Ho nako o Dautu wodiai hokogea de ko wahowonua, hongoli Ngohi naa ahi datorino de ko tahowonua Ma Jouika!”#2:25-26 1 Samuele 21:1-6
27De ahao o Yesusu wodogo wahitararono wato, “Ma dodihiraino de Ma Jou wohikatingaka o wange moi la o minggu moi ma moi naga o Hiaini ma wange. De hokogea wodiai la o nyawa yamake ma owa genangino. Masara ko mangaleua ma titi watulaada o nyawa la onangino de yahiutumu o Hiaini ma wangeika. 28De naa moioli ma titi tinihingahu, abe Ngohi naa o Nyawa ma Ngofaka abe o Horogaka de tauku toboa, ho Ngohioo o Hiaini ma wange ma hibaluhu. Ho Ngohi dika naga de ahi kuahaka la tomaputuhu ma hiaturu o kia itiai haniiki o Hiaini ma wangeoka.”
Gereja Firman Allah, Yayasan Misi Masyarakat di Pedalaman
Maruku 2
2
Wolugu-lugu iwiao o Yesusika
Matiusu 9:1-8; Lukasa 5:17-26
1Ho o wange muruono naga ipahaikaka de o Yesusu wolioli o Kapenaumu ma kapongika, de o nyawa yoihene abe o Yesusu woboaka ho naga ma tauoka. 2De ma abari gea yoihenino ho naga manga ngoe yoboa yomatoomuino ma tauoka gea ho hiadono yodokemoka o tau ma goronaka de ko iwaka ma ngi, de hiadono yodeefotoka o tau ma ngorana ka hiadono ma poretoko. De o Yesusu wadotoko o nyawa manga ngoeika gea Ma Jou ai Demo-demoino. 3De naga womatengo wolugu-lugu abe iwiao o Yesusika ho naga ai dodiawo yaruata yomaketeligoraka la o Yesusika iwiao. 4Iwiaoino masara ko idadiua iwihiadono o Yesusika angamoi o nyawa genangoka yowoeholi. Ho iwihidoa daku o tau ma poretiye. De ahao o tau ma katu agoraka o Yesusu ai lokuiye, de wolugu-lugu gea iwihidowora ka ma moi de ai nanao, ho iwihiguti daea o Yesusu ai himanguku. 5Ho ka de o Yesusu wamake manga ngongaku gea de witemo wolugu-luguika wato, “Ahi ngofaka, ani howono Ma Jouika naa Ngohi takokiofioka.”
6De naga o tau ma goronaka gea yogogeruku yamuruono naga abe yotobadoto-dotoko o Musa ai Paretaino, de doka manga hiningaka o Yesusu iwihidemo ato, 7“Ei, una naa ai demo duru itorou! Abe una ka o nyawa dika ho ufa womahitouna, angamoi gea to Ma Jou dika ai karajaanga la o nyawa manga howono waofi. Ho nako una naa wotemo hokogea de una wingelo Ma Jouika.”
8Ma ka de hokogea yotemo ngaro manga hiningaka dika de o Yesusu duru wohiorikoka hokokia itagi manga hiningaka. Ho wotemo onangika wato, “Adodoa ho ka doka dika nia hiningaka de nitemo-temo hokogea? Marai niato to Ngohi ahi kuaha ko iwa? 9Masara Ngohi naa naga de ahi kuahaka ho hiadono ngaro totemo wolugu-luguika tato, ‘Ani howono taofioka,’ eko ngaro totemo tato ‘Nomomiki de ani nanao nagoraka de nomaloiki,’ ma ka idadi mata-mata. 10Ho naa tomahitaana abe Ngohi naa o Nyawa ma Ngofaka abe o Horogaka de tauku toboa masara o nyawaino tomaboa. Abe Ngohi naa de ahi kuahaka ma gou-goungu o duniaka la hiadono ka idadi taofi o nyawa manga howono Ma Jouika. De gea itaana nako tihuloko la womomiki de una ka idadi womaloiki.” Ho gea o Yesusu wotemo onangika ibooto de ahao wolugu-luguikali wotemoli wato, 11“Ho naa ngonaika tonihuloko la ngona nomomikoka, de ani nanao nagoraka de ka idadi nolio ani tauika.” 12De una wolugu-lugu ka dau de womahiburahiye, de ai nanao wagoraka de wohupu manga himangoka de waika. De o nyawa manga ngoe genangoka duru yokokiheranga hiadono Ma Jou iwihigiriiri. De yomakoketemo ato, “Ko ma moiuahi ma datoro abe hokonaa ngone hamake!”
O Lewi unangoo winiiki o Yesusu
Matiusu 9:9-13; Lukasa 5:27-32
13De ma moioli o Yesusu woikoli o Galilea ma akere ma ngooto ma datekika, de naga o nyawa ko manga ngoe yokokiboaino Unangino. Ho yomatoomuino Unangoka de onangikali wadotoko. 14De wadotoko ibooto de o Yesusu wogila-gila de wimake o nyawa womatengo ai romanga o Lewi, abe una to Alefeusu ai ngofaka, de to una ai karajaanga wotobagaho-gahoko o pajaka ma tiwi. Ho gea o Yesusu wimake wogogeruku o pajaka yogaho-gahoko ma tauoka. De o Yesusu wiahoko unangika wato, “Naino la ka ihikaika nohiniiki Ngohi.” Ka de hokogea wotemo de o Lewi womaoko de winiiki o Yesusika.
15De ahao o Yesusu de iwinii-niiki naga o Lewi ai tauoka yomakutuono yolomo ai tau ma goronaka gea. De naga utu manga ngoe iwiniiki o Yesusu abe manga datoro itotorou. Ho ma oraha gea naga abe o pajaka yogaho-gahoko de nagali utu abe yodiaioka itorou Ma Jouika, ona mata-mata gea yolomo hoimoi genangoka o Lewi ai tauoka. 16De nagali genangoka o Farisi manga doomuino ma nyawa de ona abe yotobadoto-dotoko o Musa ai Paretaino ho ka de ona gea iwimake o Yesusu wolomo de ona o pajaka yogaho-gahoko de abe yodiaioka itorou, de yaleha o Yesusu iwinii-niikika ato, “Adodoa ho nia baluhu gea yomakutuono yolomo de ona abe o pajaka yogaho-gahoko de o nyawa utuoli abe onangoo yodiaioka itorou Ma Jouika?”
17Ho manga demo gea woihene de o Yesusu Una ma hirete wapaluhu onangika wato, “Nako o nyawa yomalega de yafikiri ato ko yopopanyakeua, ona gea ko yomahibauua ona yohou-hourika. Masara o nyawa abe yomahioriki naga de manga panyakeoka ona gea yosanangi yoperelu o duduhunu yohou-hourino. Ho Ngohi naa toboa ko ma titiua tahoko ona gea abe yomaetongo manga wowango ato yototiaioka. Masara ona abe yomahioriki nagahi de manga howonokahi Ma Jouika, ona gea tahoko la yoporetika manga howono gea.”
O Yesusika iwileha ma titi yopuaha
Matiusu 9:14-17; Lukasa 5:33-39
18De ma moiuku ona abe iwinii-niiki o Yohanese Wotobaohi-ohiki ona gea naga yopuaha, de onangoo yanii-niiki o Farisi ma nyawa yopuaha. De ahao naga o nyawa yoboa o Yesusino de iwileha Unangika ato, “Ona gea abe o Yohanese iwinii-niiki ona yopuaha, de nagali ona yanii-niiki o Farisi ma nyawa ma onangoo yopuaha. Ho adodoa ho to Ngona ani nyawa de ko yopuahaua?”
19De o Yesusu ma oraha wapaluhu onangika de womahiketero abe ma titi Una ma hirete de ona iwinii-niiki. Ho gea wapaluhu ona yoleha-lehaika wato, “Hokokia to ngone nanga biaha? Abe nako o gogilaka ma rame-rameoka de una woila-ilaka nagahi, sarakia, ma oraha gea mode ai dutu-dutu de ai dodiawo ka idadi ona gea yopuaha? Koua. Nako una gea abe woila-ilaka nagahi, ko idadiua yopuaha. 20Masara ahao naga ma oraha abe ai dodiawoino iwiaoka woila-ilaka gea, de gea ma oraha ahao yopuaha ai dodiawo angamoi manga hininga ihuha ho ko yolomuahi o inomo. De gea ma titi hiadono Ngohi tato ma oraha ko adonuahi abe ona ihinii-niiki kiani yopuaha de manga hininga ma huha.”
O hirahi ma dodotoko de Ma Jou ai Demo-demo ma dodotoko ko idadiua de hohikasapuru
21De ahao ma moioli wohiketero o Yesusu la wahitararono ma titi o kia hiadono ona iwinii-niiki ko yopuahauahi. Abe Una wotemo wato, “Nako naga nanga baju ma dekanino biaha hapake-pake de ikakihoka ho hato hatapa, nako ma dadapa gea ka ma hungiohi, gea ko idadiua de hohiduguriti. Nako gea ahao ma dadapa ma hungi ikororomo de atauru ma dabino ho ma baju gea ma moioli ikakihi, masara ma kakihi ma hungi gea utuohi ilamoko.”
22De ma moioli o Yesusu wohiketero abe ma titi ka moi de hoka kangano, wato, “Nako naga o angguru ma teongo ka ma hungiohi, ko idadiua hoguhe o popojeuku nako ma popoje#2:22 Ma oraha gea ona yodiai manga akere ma ngi eko manga teongo ma ngi o aewani ma kaiino. ma dekanoka, done ahao ma teongo ihaga de ma popoje ipotoka, de gea ahao ma teongo ikopoaka de ma popojeoo irusakoka. Ho nako ma teongo ma hungi, kiani hoguhe o popoje ma hungiuku.” Hokogea o Yesusu ai hiketero abe genangino de wahitararono ma titi o kia naga hiadono to Una ai dodiawo ko yopuahauahi ma oraha gea.
O Hiaini ma wange
Matiusu 12:1-8; Lukasa 6:1-5
23De o Hiaini ma wange moioka de o Yesusu de iwinii-niiki yotagi-tagi de o nyawa manga pine ma redika yoboa, de iwinii-niiki ona homoi-homoi yomakokigutuku ma pine ma gosela. 24De o Farisi ma nyawa iwitaere o Yesusika ato, “Abeika ona gea! Adodoa ho o Hiaini ma wangeoka de atilakuru to ngone nanga pareta? Angamoi o Hiaini ma wangeoka de ko idadiua hokarajaanga!”
25-26De o Yesusu wapaluhu onangika wato, “Mode ngini ko nibasauahi o Dautu ai ade-ade Ma Jou ai Bukuoka? Abe ma dihira ma oraha o Dautu gea de naga womatengo o Abiatara abe wodadi to ona manga hidemo wokokurutiye Ma Jouiye. Ho ma oraha gea de o Dautu duru iwihafini de ai dodiawo onangoo yahafini ho Ma Jou ai Tau ma goronaika wowohamika o Dautu de wolomo o roti abe Ma Jouika iwidingakoka. Abe tanu ona manga hidemo ma nyawa dika ka idadi yaolomo ma roti gea, o nyawa utu duru ko idadiua yaolomo. Masara o Dautu una waolomo de wahikodokuoo ai dodiawoika la onangoo yaolomo. De gea o Dautu ko wahowonua Ma Jou ai himangoka, ngaro ma roti gea iwidingakoka Ma Jouika. Mode ngini gea ko nibasauahi ma ade-ade gea? Ho nako o Dautu wodiai hokogea de ko wahowonua, hongoli Ngohi naa ahi datorino de ko tahowonua Ma Jouika!”#2:25-26 1 Samuele 21:1-6
27De ahao o Yesusu wodogo wahitararono wato, “Ma dodihiraino de Ma Jou wohikatingaka o wange moi la o minggu moi ma moi naga o Hiaini ma wange. De hokogea wodiai la o nyawa yamake ma owa genangino. Masara ko mangaleua ma titi watulaada o nyawa la onangino de yahiutumu o Hiaini ma wangeika. 28De naa moioli ma titi tinihingahu, abe Ngohi naa o Nyawa ma Ngofaka abe o Horogaka de tauku toboa, ho Ngohioo o Hiaini ma wange ma hibaluhu. Ho Ngohi dika naga de ahi kuahaka la tomaputuhu ma hiaturu o kia itiai haniiki o Hiaini ma wangeoka.”
Gereja Firman Allah, Yayasan Misi Masyarakat di Pedalaman