Maruku 3
3
Ai giama iheluku o Yesusu wihitogumu o Hiaini ma wangeoka
Matiusu 12:9-14; Lukasa 6:6-11
1-2De ma moiuku abe o Hiaini ma wangeoka de o Yesusu wowohamoli o dodotoko ma tauika de naga womatengo genangoka ai giama ma hononga iheluku. De nagali o nyawa utu genangoka o Yesusu iwigoana de yolingiri ma titi la ato nako wodiai ko itiaiua ka idadi iwihohowono. Ho yamuruono naga duru iwilega-lega o Yesusika done ai giama ihelu-heluku wihitogumu, ato nako wihitogumu o Hiaini ma wangeoka gea wahowonoka. 3De o Yesusu wihuloko ai giama ihelu-helukika gea wato, “Nomaokoino mia hidogoronaka naa.”
4De o Yesusu wotemo o nyawa utuika genangoka wato, “Nako nanga pareta haniiki, o kia ka idadi hodiai o Hiaini ma wangeoka? Ka idadi hodiai irorahai ekola koaho hodiai itotorou? De o nyawa ka idadi haduhunu manga wowangoka ekola hatoma? O kiahi imakiniiki de nanga pareta?” Masara ona yomarii-riidoka dika.
5De o Yesusu womalega arihononga de wongamo angamoi ai dohata o howonika. De ai hininga duru ihuha ma titi manga pea kohadogowini ho hiadono wakokidamaanoka. De witemo ai giama ihelu-helukika wato, “Nagorakiye ani giama.” De wagorakiye ai giama de idadi imakadaene abe hoka ai giama ma honongali ho itogumoka. 6De o Farisi ma nyawa genangoka ka de gea idadi de yohupuoka de yoiki o Herodese ai dodoomuika, de ahao ma doomu hinooto gea ona yomahikagaro la ato o Yesusu iwitoma.
O nyawa duru ko manga ngoe o Yesusu wahitogumu manga popanyakeino
7-8De o Yesusu de iwinii-niiki ona yosobo yanoaika ma ngi gea de yoikoli o akere ma ngootikali. De naga o Galilea ma nyawa duru ko manga ngoe yoboaino de iwiniiki Unangika hiadono yomakutuono yomakiniiki. De naga o nyawa utuoli ko manga ngoe yoboaino o Yesusino. Abe o Yorodani ma akere doka ma honongaino yoboa Unangino de o Yudea ma tonakino yoboa de nagali o Yerusaleeme ma kotaino yoboaino. De nagaoo abe o Idumea ma tonakino yoboaino de hiadono ona yogogere o Tirusu de o Sidono ma kota ma datekoka, onangoo mata-mata yokokiboaino. Ona gea mata-mata yokokiboaino o Yesusino angamoi yoihenoka o Yesusu ai ade-ade ma ngoe abe o heheranga wodiaioka. 9Masara angamoi ona duru ko manga ngoe ho yomahidutukino o Yesusino, ho gea hiadono wahuloko iwinii-niikika wato, “O ngotiri nihihidiai la kalioli ihihideefotino.” 10De igoungu ona ko manga ngoe abe de manga popanyakeoka yomahiefoto o Yesusika la ato iwiso Unangika angamoi ihiorikoka naga o nyawa ko manga ngoe wahitogumokau manga popanyakeino. 11De nako yakokitokata iwimake o Yesusika de yomamotu-motumuku ai himangoka de yomapoaka ato, “Ngona naa Ma Jou o Ngofaka.” 12Masara o Yesusu duru wataere onangika wato, “Ko idadiua ngini niade-ade o nyawaika ma titi Ngohi.”
O Yesusu wahoko o nauru yangimoi de yahinooto la ka ihikaika iwinii-niiki
Matiusu 10:1-4; Lukasa 6:12-16
13De ma oraha gea o Yesusu wodoa daku o lokuiye. De gea wodoaiye de ko womatengoua, angamoi Una wahokino manga ngoe abe womaputuhoka wato ona gea iwiniiki dakuiye. Ho ona yomahiadoniyeoka de genangoka yomatoomuino o doomu moi. 14De ahao iwinii-niikino gea wairiki yangimoi de yahinooto la ona gea ka ihikaika iwidodiawo de iwiniiki Unangika. De ona gea abe wahidingoto o nyawaika la yotobadotoko Ma Jou ai Demo-demoino, ho iwihiromanga onangika wato ai hidingoto ma nyawa. 15De wahidoaka onangika o kuaha la ka idadi onangoo o tokata ma dorou ihititoko. 16De hokonaa ona yangimoi de yahinooto gea manga romanga. Abe naga o Simono abe una gea o Yesusu wihiromangoli o Peturusu. 17sDe naga o Yakobusu de ai dodoto o Yohanese, yahinooto gea to Sebedeusu ai ngofa-ngofaka, onangoli wahiromangoli o Boanegese. Abe ma romanga gea ma titi o Kuruuhu ma ngofaka. 18De utuoli naga to ona manga romanga o Andareasa, o Filipusu, o Batolomeusu, o Matiusu, o Tomasa, de o Yakobusu to Alefeusu ai ngofaka, o Tadeusu, de o Simono abe una gea o Seloto ma dodoomuino ma nyawa. 19De womatengoli o Yudasa Isikarioto, una gea abe ahao wihidoaka o Yesusu o nyawaika abe iwihidee la iwitoma. Hokogea ona yangimoi de yahinooto manga roma-romanga abe o Yesusu wairiki la yodadi ai hidingoto ma nyawa.
O Yesusu de o Ibilihi ma haeke
Matiusu 12:22-30; Lukasa 11:14-15
20Ho o lokuoka de auku youtiuku de yolio yowohamika ma tau ma goronaika. Masara imaketero hoka ma dihirali naga o nyawa ko manga ngoe iwiniiki de genangoka yomatoomuino o tau ma goronaka. Ho o Yesusu de iwinii-niiki ato yolomo ma ko idadiua angamoi o nyawa yowoeholi. 21De ma oraha gea o ngi moiokali naga o nyawa utu iwihiade-ade ma titi o Yesusu abe ona ato, “Una gea iwitogohanga!” Ho ka de o Yesusu ngoi meme de ai gogianongoru yoihene manga hiade-ade gea de yosobo yoboaino la ato iwile o Yesusu.
22De o tau ma goronaka gea abe o Yesusu naga genangoka de naga ona yotobadoto-dotoko o Musa ai Paretaino yoboa o Yerusaleemino de onangoo iwihiade-ade o Yesusu ato, “Una gea iwibare-barenoka o tokata ma hidimono. Ho gea ma titi hiadono Una wakunu wohititoko o tokata ma dorou, angamoi o tokata ma hidimono iwihidoaka to ena ma kuaha Unangika! Abe ma hidimono gea ihiromanga o Beelsebulu.”
23Ho o Yesusu wahokino ona abe yotobadoto-dotoko o Musa ai Paretaino de waleha onangika wato, “Ho mode o Ibilihi yahititoko to ena ma hirete ma dodiawo o nyawaino? 24Hokonaa moi tohiketero. Abe nako o koano womatengo de to una ai kokawaaha yomahikokoona yomaketeparangi, gea ahao yomahikabarihika dika. 25De moioli ka idadi tohiketero. Nako o tau moi de yomaketeliliara de ka ihikaika yomakokalawana, gea onangoo yahikapusakoka. 26Ho gea imaketero hoka o Ibilihi de ma kokawaaha, nako imahikokoenangoo imakokalawana hiadono ma kuaha imakeregu, gea mata-mata iborikalaka de ma kuaha duru ko iwaka.”
27“Masara naa moioli tohiketero de naa ena tanu tomahiketero Ngohi, tato, ‘Nako o tau ma dutu womatengo ko ai buturungu, o nyawa moioo de ko yamoroinua ai tau ma goronaika yowohamika de ai kiahonanga iwiora. Ma nako ma tau ma dutu iwipaki-pakitokahi, gea ahao ai kiahonanga ka idadi iwiora. De imaketero hokogea abe Ngohi naa tapaki-pakitoka o Ibilihi ma haeke, abe ma titi nako Ngohi de ena ma ka Ngohiohi ahi kuaha duru ikurutiye.’” Hokogea o Yesusu ai hiketero.
28De ahao wahingahu onangika wato, “Naa moi duru tagou-goungu tinihingahu, abe o nyawa manga howono mata-mata, ngaro de manga demo iwingelo Ma Jou o Babaika, ma manga howono mata-mata Ma Jou ka idadi wakokiofi. 29Masara onagona dika iwingelo Ma Jou o Womahika, de gea ahao Ma Jou ko waofiua to ona manga howono gea, abe manga howono ko ihihangua ka hiado-adonika.”
30Ho gea mata-mata o Yesusu wahitiari onangika angamoi naga o nyawa iwihiade-ade ato, “Una gea iwikitokata angamoi naga o womaha ma dorou Unangoka.”
O Yesusu ngoi meme de ai doo-dodoto
Matiusu 12:46-50; Lukasa 8:19-21
31Ho ipaha de ahao o Yesusu ngoi meme de ai doo-dodoto yoboaino. Ona doka o tau ma poretoka dika de iwibehehongo la ato Una wohupuohi de watutumohi ngoi meme de ai doo-dodoto gea. 32Ho naa o tau ma goronaka naga manga ngoe yogogere iwihigilolitino, de ona ato, “Abeika, naga ngoni meme de ani doo-dodoto yoboaka doka ma poretoka de ona inibehehongo.”
33Masara o Yesusu wopaluhu wato, “Abeika naa moi ngini nimafikirohi. Ngohi meme o ngo kia? De ahi doo-dodoto onagona honanga?”
34Wotemo hokogea de ahao womalega arihonongaika, onangika abe naga yogogere iwihigilolitino, de wato, “Ngini naa tinihiromanga abe to Ngohi ngohi meme de ngini naa to Ngohi ahi doo-dodoto. 35Angamoi o nauru onaguna dika abe ka ihikaika waniiki Ma Jou ai mau, una gea to Ngohi ahi dodoto. De o ngo kia dika abe Ma Jou ai mau ka ihikaika maniiki, muna gea to Ngohi ngohi firanga de to Ngohi ngohi meme.” Hokogea o Yesusu ai hitararono ma demo onangika.
Gereja Firman Allah, Yayasan Misi Masyarakat di Pedalaman
Maruku 3
3
Ai giama iheluku o Yesusu wihitogumu o Hiaini ma wangeoka
Matiusu 12:9-14; Lukasa 6:6-11
1-2De ma moiuku abe o Hiaini ma wangeoka de o Yesusu wowohamoli o dodotoko ma tauika de naga womatengo genangoka ai giama ma hononga iheluku. De nagali o nyawa utu genangoka o Yesusu iwigoana de yolingiri ma titi la ato nako wodiai ko itiaiua ka idadi iwihohowono. Ho yamuruono naga duru iwilega-lega o Yesusika done ai giama ihelu-heluku wihitogumu, ato nako wihitogumu o Hiaini ma wangeoka gea wahowonoka. 3De o Yesusu wihuloko ai giama ihelu-helukika gea wato, “Nomaokoino mia hidogoronaka naa.”
4De o Yesusu wotemo o nyawa utuika genangoka wato, “Nako nanga pareta haniiki, o kia ka idadi hodiai o Hiaini ma wangeoka? Ka idadi hodiai irorahai ekola koaho hodiai itotorou? De o nyawa ka idadi haduhunu manga wowangoka ekola hatoma? O kiahi imakiniiki de nanga pareta?” Masara ona yomarii-riidoka dika.
5De o Yesusu womalega arihononga de wongamo angamoi ai dohata o howonika. De ai hininga duru ihuha ma titi manga pea kohadogowini ho hiadono wakokidamaanoka. De witemo ai giama ihelu-helukika wato, “Nagorakiye ani giama.” De wagorakiye ai giama de idadi imakadaene abe hoka ai giama ma honongali ho itogumoka. 6De o Farisi ma nyawa genangoka ka de gea idadi de yohupuoka de yoiki o Herodese ai dodoomuika, de ahao ma doomu hinooto gea ona yomahikagaro la ato o Yesusu iwitoma.
O nyawa duru ko manga ngoe o Yesusu wahitogumu manga popanyakeino
7-8De o Yesusu de iwinii-niiki ona yosobo yanoaika ma ngi gea de yoikoli o akere ma ngootikali. De naga o Galilea ma nyawa duru ko manga ngoe yoboaino de iwiniiki Unangika hiadono yomakutuono yomakiniiki. De naga o nyawa utuoli ko manga ngoe yoboaino o Yesusino. Abe o Yorodani ma akere doka ma honongaino yoboa Unangino de o Yudea ma tonakino yoboa de nagali o Yerusaleeme ma kotaino yoboaino. De nagaoo abe o Idumea ma tonakino yoboaino de hiadono ona yogogere o Tirusu de o Sidono ma kota ma datekoka, onangoo mata-mata yokokiboaino. Ona gea mata-mata yokokiboaino o Yesusino angamoi yoihenoka o Yesusu ai ade-ade ma ngoe abe o heheranga wodiaioka. 9Masara angamoi ona duru ko manga ngoe ho yomahidutukino o Yesusino, ho gea hiadono wahuloko iwinii-niikika wato, “O ngotiri nihihidiai la kalioli ihihideefotino.” 10De igoungu ona ko manga ngoe abe de manga popanyakeoka yomahiefoto o Yesusika la ato iwiso Unangika angamoi ihiorikoka naga o nyawa ko manga ngoe wahitogumokau manga popanyakeino. 11De nako yakokitokata iwimake o Yesusika de yomamotu-motumuku ai himangoka de yomapoaka ato, “Ngona naa Ma Jou o Ngofaka.” 12Masara o Yesusu duru wataere onangika wato, “Ko idadiua ngini niade-ade o nyawaika ma titi Ngohi.”
O Yesusu wahoko o nauru yangimoi de yahinooto la ka ihikaika iwinii-niiki
Matiusu 10:1-4; Lukasa 6:12-16
13De ma oraha gea o Yesusu wodoa daku o lokuiye. De gea wodoaiye de ko womatengoua, angamoi Una wahokino manga ngoe abe womaputuhoka wato ona gea iwiniiki dakuiye. Ho ona yomahiadoniyeoka de genangoka yomatoomuino o doomu moi. 14De ahao iwinii-niikino gea wairiki yangimoi de yahinooto la ona gea ka ihikaika iwidodiawo de iwiniiki Unangika. De ona gea abe wahidingoto o nyawaika la yotobadotoko Ma Jou ai Demo-demoino, ho iwihiromanga onangika wato ai hidingoto ma nyawa. 15De wahidoaka onangika o kuaha la ka idadi onangoo o tokata ma dorou ihititoko. 16De hokonaa ona yangimoi de yahinooto gea manga romanga. Abe naga o Simono abe una gea o Yesusu wihiromangoli o Peturusu. 17sDe naga o Yakobusu de ai dodoto o Yohanese, yahinooto gea to Sebedeusu ai ngofa-ngofaka, onangoli wahiromangoli o Boanegese. Abe ma romanga gea ma titi o Kuruuhu ma ngofaka. 18De utuoli naga to ona manga romanga o Andareasa, o Filipusu, o Batolomeusu, o Matiusu, o Tomasa, de o Yakobusu to Alefeusu ai ngofaka, o Tadeusu, de o Simono abe una gea o Seloto ma dodoomuino ma nyawa. 19De womatengoli o Yudasa Isikarioto, una gea abe ahao wihidoaka o Yesusu o nyawaika abe iwihidee la iwitoma. Hokogea ona yangimoi de yahinooto manga roma-romanga abe o Yesusu wairiki la yodadi ai hidingoto ma nyawa.
O Yesusu de o Ibilihi ma haeke
Matiusu 12:22-30; Lukasa 11:14-15
20Ho o lokuoka de auku youtiuku de yolio yowohamika ma tau ma goronaika. Masara imaketero hoka ma dihirali naga o nyawa ko manga ngoe iwiniiki de genangoka yomatoomuino o tau ma goronaka. Ho o Yesusu de iwinii-niiki ato yolomo ma ko idadiua angamoi o nyawa yowoeholi. 21De ma oraha gea o ngi moiokali naga o nyawa utu iwihiade-ade ma titi o Yesusu abe ona ato, “Una gea iwitogohanga!” Ho ka de o Yesusu ngoi meme de ai gogianongoru yoihene manga hiade-ade gea de yosobo yoboaino la ato iwile o Yesusu.
22De o tau ma goronaka gea abe o Yesusu naga genangoka de naga ona yotobadoto-dotoko o Musa ai Paretaino yoboa o Yerusaleemino de onangoo iwihiade-ade o Yesusu ato, “Una gea iwibare-barenoka o tokata ma hidimono. Ho gea ma titi hiadono Una wakunu wohititoko o tokata ma dorou, angamoi o tokata ma hidimono iwihidoaka to ena ma kuaha Unangika! Abe ma hidimono gea ihiromanga o Beelsebulu.”
23Ho o Yesusu wahokino ona abe yotobadoto-dotoko o Musa ai Paretaino de waleha onangika wato, “Ho mode o Ibilihi yahititoko to ena ma hirete ma dodiawo o nyawaino? 24Hokonaa moi tohiketero. Abe nako o koano womatengo de to una ai kokawaaha yomahikokoona yomaketeparangi, gea ahao yomahikabarihika dika. 25De moioli ka idadi tohiketero. Nako o tau moi de yomaketeliliara de ka ihikaika yomakokalawana, gea onangoo yahikapusakoka. 26Ho gea imaketero hoka o Ibilihi de ma kokawaaha, nako imahikokoenangoo imakokalawana hiadono ma kuaha imakeregu, gea mata-mata iborikalaka de ma kuaha duru ko iwaka.”
27“Masara naa moioli tohiketero de naa ena tanu tomahiketero Ngohi, tato, ‘Nako o tau ma dutu womatengo ko ai buturungu, o nyawa moioo de ko yamoroinua ai tau ma goronaika yowohamika de ai kiahonanga iwiora. Ma nako ma tau ma dutu iwipaki-pakitokahi, gea ahao ai kiahonanga ka idadi iwiora. De imaketero hokogea abe Ngohi naa tapaki-pakitoka o Ibilihi ma haeke, abe ma titi nako Ngohi de ena ma ka Ngohiohi ahi kuaha duru ikurutiye.’” Hokogea o Yesusu ai hiketero.
28De ahao wahingahu onangika wato, “Naa moi duru tagou-goungu tinihingahu, abe o nyawa manga howono mata-mata, ngaro de manga demo iwingelo Ma Jou o Babaika, ma manga howono mata-mata Ma Jou ka idadi wakokiofi. 29Masara onagona dika iwingelo Ma Jou o Womahika, de gea ahao Ma Jou ko waofiua to ona manga howono gea, abe manga howono ko ihihangua ka hiado-adonika.”
30Ho gea mata-mata o Yesusu wahitiari onangika angamoi naga o nyawa iwihiade-ade ato, “Una gea iwikitokata angamoi naga o womaha ma dorou Unangoka.”
O Yesusu ngoi meme de ai doo-dodoto
Matiusu 12:46-50; Lukasa 8:19-21
31Ho ipaha de ahao o Yesusu ngoi meme de ai doo-dodoto yoboaino. Ona doka o tau ma poretoka dika de iwibehehongo la ato Una wohupuohi de watutumohi ngoi meme de ai doo-dodoto gea. 32Ho naa o tau ma goronaka naga manga ngoe yogogere iwihigilolitino, de ona ato, “Abeika, naga ngoni meme de ani doo-dodoto yoboaka doka ma poretoka de ona inibehehongo.”
33Masara o Yesusu wopaluhu wato, “Abeika naa moi ngini nimafikirohi. Ngohi meme o ngo kia? De ahi doo-dodoto onagona honanga?”
34Wotemo hokogea de ahao womalega arihonongaika, onangika abe naga yogogere iwihigilolitino, de wato, “Ngini naa tinihiromanga abe to Ngohi ngohi meme de ngini naa to Ngohi ahi doo-dodoto. 35Angamoi o nauru onaguna dika abe ka ihikaika waniiki Ma Jou ai mau, una gea to Ngohi ahi dodoto. De o ngo kia dika abe Ma Jou ai mau ka ihikaika maniiki, muna gea to Ngohi ngohi firanga de to Ngohi ngohi meme.” Hokogea o Yesusu ai hitararono ma demo onangika.
Gereja Firman Allah, Yayasan Misi Masyarakat di Pedalaman