Maruku 6
6
O Nasarete ma nyawa iwioluku o Yesusu
Matiusu 13:53-58; Lukasa 4:16-30
1Ipaha de onangoka de wosobo o Yesusu de wolio ai kapongo o Nasaretika, de ona abe iwitobaniiki onangoo yomakiniiki de de Una. 2De ipaha ai kapongoka de ahao o Hiaini ma wange adonoka ho Una wodotoko o Yahudi ma nyawa manga dodotoko ma tauoka. O nyawa ko manga ngoe iwitoihene de hiadono yokokiheranga de yomakokeleha ato, “O kiaino gea mata-mata wamake? Una naa duru wotobahioriki! De o kiaino ai hiakunu hiadono wodiai o heheranga? 3Una naa ka ma bas dika, o ngo Maria ami ngofaka, abe manga riaka o Yakobusu de o Yosese de o Yudasa de o Simono. De ngoi fira-firanga naga yogogere nanga kapongoka naa de de ngone. Ho una naa ka o nyawa biaha dika!” Hokogea manga demo. De iwihininga kuranga Unangika de hiadono iwioluku.
4De mangale ma titi manga demo gea ho o Yesusu wahingahu onangika wato, “Nako Ma Jou ai uru ma dodofanga womatengo, o nyawa o kia-kiaka dika ma naga manga horomati unangika. Masara nako to una ai nyawa abe yomahikapongo moi de de una, gea ona dika abe ko iwa manga horomati unangika. De ngaro ai dutuoo eko abe ai tauoka, ma onangoo ko iwa manga horomati Ma Jou ai uru ma dodofangika gea. Ho Ngohi duru ko toherangua abe ngini ahi kapongoka naa de ko iwa nia horomati Ngohino.” Hokogea o Yesusu ai dodaere ma demo onangika. 5Ho ai kapongoka gea ko iwa manga horomati Unangika ho ko wodiaiua o heheranga, bowahu naga o nyawa yamuruono naga dika yopopanyakeuku waso de ai giama de wahitogumu. Tanu ai hininga la ko manga ngoe wahitogumu, masara Unangika ko iwingakua ho ko idadiuali. 6De duru woheranga abe to Una ai kapongoka gea de manga ngoe ko iwa manga ngongaku.
O Yesusu wahidingoto ona iwitobanii-niiki la yahingahu-ngahu
Matiusu 10:5-15; Lukasa 9:1-6
Ho ipaha de o Yesusu woiki wokapakiti o kapo-kapongika la wodotoko homoi-homoioka. 7De ma moiuku Una wahokino ona yangimoi de yahinooto iwitobanii-niiki. Wahokino la wahidingoto ona gea la yahohinooto yoiki. De wahidoaka ai kuaha onangika la ka idadi akokititoko o tokata ma dorou o nyawaino.
8De wahibehehongo onangika wato, “Naa tinihidingoto la niloiki o nyawaika. De nia dodagi naa ufa nia kiahonanga nimagao, bowahu nia tutukunu dika. Ma nako o bilaono de nia beta-beta de nia tiwi, gea ngaro ufa dika de niao. 9Ka idadi nimasandaaliye, ma abe nia baju, ufa nia doduruuru nimagao, ho abe naga nia kokiroehoka, ka gea dika nimagao.” 10De wohibehehongohi wato, “Abe nia dodagioka de nako o kapongo moioka inidafongo de naga iniahoko o tau moiika la nimanoa onangoka, ufa nimaturuuruoli o tau moiikali, ma onangoka dika nimanoa ka hiadono nihupu ma kapongino gea. 11Masara nako idadi abe o kapongo moi ko inidafongua de ko inihigihenua, gea nihupu dika ma kapongino gea, de kiani nia lou niafureereoka la ma tonaka ma kuhuhunu gea ireroka. Abe gea idadioka o hohowono ma dodunguu onangika angamoi ko inidafongua, la genangino de ka idadi ihioriki abe ahao yamake manga hohowono.” Hokogea o Yesusu ai behehongo iwinii-niikika.
12Wohibehehongo ibooto de yosobo yoiki yahingahu-ngahu o nyawaika ato, “Ngini kiani nitoba nia howo-howonino.” 13De manga dodagi ma goronaka gea ma ngoe ihititoko o tokata ma dorou o nyawaino, de o nyawa manga ngoe abe yopopanyakeuku, ona gea yahituagi de o saitunu ma minya de yahitogumu manga popanyakeino.
O Yohanese Wotobaohi-ohiki iwitoma
Matiusu 14:1-12; Lukasa 9:7-9
14De ma oraha gea naga womatengo ai romanga o Herodese Antipasa, abe una wahikoano o Yahudi ma nyawa o Galilea ma tonakoka. De una gea abe nengokadauino de witoma o Yohanese Wotobaohi-ohiki. Ho naa o Herodese Antipasa gea wigihene ma titi o Yesusu angamoi o nyawa mata-mataika yomaketeade-ade abe o Yesusu ai datoro hokokia wodiaioka hiadono ma abari adonoka manga hidimonika gea. Ho o nyawa yomaketeliliara ma titi o Yesusu abe tanu Una gea onaguna. Abe o nyawa utu yotemo ato, “Una gea bote o Yohanese Wotobaohi-ohiki, una gea womomikoka ai honengino de wowangoli! De gea ma titi hiadono naga ai kuaha hiadono o heheranga wapoa wodiai.”
15Masara utu yafiki-fikiri ma titi o Yesusu de ona yotemo ato, “Bote Una gea o Elia abe Ma Jou ai uru ma dodofanga ma dodihiraino!”
De utuoli naga yotemo ato, “Koua, ma Una gea Ma Jou ai uru ma dodofanga womatengoli abe Ma Jou wihidingoto ngoneino naa, abe hoka ma dodihiraka naga ai uru ma dodofanga manga ngoe.”
16Masara ma oraha o Herodese woihene ma titi o Yesusu de wotemo wato, “Koua. Una gea o Yohanese abe titomaka ho naa womomikoka!”
17Wotemo hokogea angamoi ma dihira una ma hirete abe wahuloko la o Yohanese iwitaoko, iwipakiti de iwibuika. Ho hokonaa ma ade-ade abe hokokia o Yohanese iwitoma. Ma dihira o Herodese womagora to una ma hirete ai riaka ngoi fekata de woilaka munangika, de muna gea ami romanga o ngo Herodiasa. Masara o Herodese ai riaka, abe ai romanga o Filipusu, una naga ka wowangohi. Ho tanu ma oraha o Herodese wahuloko la iwitaoko o Yohanese, gea to munaino dika ami mau waniiki. 18Abe ma dihira o Yohanese witaere o Herodesika wato, “Ngona natilakuroka nanga pareta angamoi nomagora ani riaka ma dutu ngoi fekata ngaro una ka wowangohi.” 19O Yohanese ai demo gea o ngo Herodiasa moihene ho midohata o Yohanesika de hiadono ami hininga migogonuku ho naga ami hidee la mitoma unangika. Masara muna ko madadiua mitoma 20angamoi ami rokata o Herodese wigoana o Yohanese. Wigoana hokogea angamoi wato, “Una gea o totiai ma nyawa, abe hatoli ko iwa ai howono,” ho wimodongo o Yohanesika. De o Herodese duru woigo wotoihene ma titi o Yohanese ai demo-demo, abe ngaro doka ai hiningaka de duru ipusingi ma oraha woihene ai demo-demo gea masara ka idadiohi ma moi ma moi wotoihene.
21Masara ika-ika de naga ami oraha o ngo Herodiasa abe ami hidee ma ngekomo mamakeoka. Abe ma wange gea o Herodese Antipasa ai tauoka o ngolo-ngolomo naga angamoi ihirame-rame abe ai ngumuru o taongo gea ka wadaenohi. De o nyawa abe yokokurutiye o Galilea ma tonakoka ona manga ngoe yaniiki ai rame-rameoka gea. Abe ona yokokurutiye, naga utu abe yahipareta manga kokawaahaika, de naga utu o tentara ma nyawa manga hohidimono. 22De ahao o ngo Herodiasa ngomi ora moboa de moselo-selo manga hima-himangoka de duru mahisanangi o Herodese de ai dodiawo genangoka.
De o Herodese wotemo munangika wato, “O kia dika nomagahoko ngohino, gea de ahao ka idadi tonihidoaka.” 23De gea hiadono duru wohibehehongohi munangika wato, “O kia dika nomagahoko ngohino ma ka idadi tonihidoaka, abe ngaro ahi tonaka taregu hinooto de ma regu moi gea tonihidoaka, de ahi kiahonangoo mata-mata taregu hinooto la ma hononga tonihidoaka, masara gea mata-mata ahao tonihidoaka ngonaika.”
24De wohibehehongo ibooto de ahao muna mohupu de moleha ngomi memeika mato, “Meme, ho naa o kia tomagahoko?”
De muna mopaluhu mato, “Koua. Abe kiani nogahoko gea o Yohanese Wotobaohi-ohiki, una gea nogahoko to una ai pea.”
25De gea momataiti molio o Herodesika de mogahoko mato, “Ngohi togahoko ma oraha naa dika de tamakeoka abe o Yohanese Wotobaohi-ohiki gea, to una ai pea o dodaioka.”
26De ami demo gea woihene o Herodese Antipasa de ai hininga duru ihuha, masara angamoi ai behehongo gea abe wotemoka ai dodiawo manga hima-himangoka, ho ko idadiua de womieluku munangika. 27De gea womataiti wihuloko o tentara womatengo wato, “To una ai pea nale de naoino ngohino.” De o tentara gea wosobo de woiki o bui ma tauika de o Yohanese ai tomarino watobiki. 28Watobiki ibooto de o dodaiuku wonoauku de wao o ngofekaika de womihidoaka. De muna gea momihidoakoli ngomi memeika. 29De ipaha abe o Yohanese iwinii-niiki ona yoihene abe iwitomaka de ona yoboaino de ai honenge yale, de yalungunoka ai honenge gea. De hokogea ma ade-ade abe o Yohanese iwitoma.
O nyawa yosana o Yesusu wahiolomo
Matiusu 14:13-21; Lukasa 9:10-17; Yohanese 6:1-14
30De ipaha de o Yesusu ai hidingoto ma nyawa abe naa ma duruino wahidingotoka yahohinooto, ona gea yokokilioino de yomatoomuino o Yesusoka. Yomatoomuino de yoade-ade Unangika mata-mata abe hokokia manga dodagi ma goronaka yodiai de yodotoko. 31Masara naga o nyawa manga ngoe abe ma ngioka gea yohupu yowohama hiadono o Yesusu de yangimoi de yahinooto gea ko iwa manga oraha la ka idadi yolomo. Ho wotemo onangika wato, “Abeika ngone hosobo ma homoaika la genangoka ka ngone dika de ka idadi ma hohutulu homahiaini.”
32Ho ona yosobo yongotiri yomahihora doka o akere ma ngooto ma honongaika abe genangoka ko iwa o nyawa. 33Masara o nyawa manga ngoe yamake ona gea ma oraha yosobo de yahioriki ato, “Gea o Yesusu de ona abe iwinii-niiki!” Gea ho ona yomapopaata yahiduru yotowongi, de o kapongo mata-mataino yoboa yanii-niiki. De ona yototowongi, ona yohira yomahiadonika, ho o Yesusu de iwinii-niiki ka onangoli yoturu yomahiadono. 34De yomahiadonikaka de wofarene ma ngigoriye o Yesusu de manga ngoe-ngoe gea wamake. Wamake de duru wadora ona gea de wato, “Hiokoo. Abeika ona naa yomaketero hoka o domba abe ko iwa ma gogoana.” Hokogea ai hininga ho womulaenge wadotoko onangika abe ai dodotoko ma titi ma ngoeika.
35De ipahaino abe o bobimaowaka de iwinii-niiki yoboa o Yesusino de iwitemo yato, “Naa adonoka o bobimaowaka de ma ngi nenangoka ka ma homoa dika abe ko iwa o tau, 36ho o nyawa gea nahuloko la yoiki o kapo-kapongika abe naga imahitigi-tigino la ka idadi yomaija manga inomo.”
37Masara o Yesusu wapaluhu wato, “Koua, koaho ngini ma hirete manga inomo niahidoaka.”
De onangoli yopaluhu yato, “Done sarakia ma tiwi hokogea ma amoko de hohiija to ona manga roti la hahikawedono? Nako gea kiani haumo o tiwi o haaka o ratuhu hinooto abe gea imakadaene o nyawa manga hewa yokarajaanga o wange o ratuhu hinooto ma dekana!”
38Gea ho o Yesusu waleha onangika wato, “Ti ngini nia roti muruono ga naga? Abeika niolega.”
De yolegaika de iwipaluhu yato, “O roti motoa naga de o nawoko o ngai hinooto.”
39Yopaluhu hokogea de ahao o Yesusu wahuloko wato, “O nyawa mata-mata ngini niahiaturu la ona ka idadi yomatatoro la naga o doomu muruono naga de hokogea yogogeruku dau ma ruruubu ma rorahaiuku.” 40Hokogea o nyawa yomatatoro yogogeruku de naga o doomu ma ngoe, abe o doomu utu homoi-homoiika naga o nyawa yaratuhu moi de nagali o doomu utuoli gea yamo-moritoa. 41De ona mata-mata yogogeroka de ahao ma roti motoa de ma nawoko hinooto gea waleino o Yesusu de womamatagaiye o Horogaiye de wohitarimakase Ma Jouika. Wohitarimakase ibooto de ahao ma roti watobiki de wahidoaka iwinii-niikika, de ahao onangoli yahikodoku o nyawa mata-mataika. De ma nawokoo wahikodoku o nyawa mata-mataika. 42De ona mata-mata yolomo hiadono yakokipunuhoka. 43Yolomo ibooto de ahao o roti ma hou de o nawoko ma hou yagorakiye iwinii-niiki gea, de naga o tupa ngimoi de hinooto aomangiye de manga inomo ma hou. 44De abe yolo-olomo o roti gea, ona abe o baluhu o nau-nauru dika genangoka, naga yasana motoa. De gea o ngo-ngofeka de o ngofa-ngofaka ko haetonguahi. De hokogea o Yesusu ai ade-ade abe wahiolomo o nyawa ko manga ngoe.
O Yesusu wotagi-tagi o akere ma ngooto ma lokuino
Matiusu 14:22-33; Yohanese 6:16-21
45Ka de gea ipaha de o Yesusu waribuutu iwitobanii-niikika la ona yofarene o ngotiroko de ona yohira yosobo la ato yomahihora doka o Besaida ma kapongika. Ho ona yosoboka de Una wahuloko manga ngoe-ngoeika wato, “Ahi gogianongoru, marai naa ka idadi ngini nikokilio nia kokitauika.” 46De ona ato, “Iya, marai ngomi milio.” Gea ipaha de ahao woiki o lokuiye wodoa la wato womaniatohi.
47Ho ihumuririhuku de ona iwinii-niiki naga yongotiri o akere ma ngooto ma goronakahi, masara o Yesusu womatengo dika nagahi ma dudungokahi. 48De Una womalega onangika de wamake abe ona gea duru yokangela yomahioru angamoi ka yomahidomo de o rato ma hidaloko.
Ho ipaha de ahao ngade-ngade de itebini masara ka ifofufutuohi de Una woboa onangika, de wotagi-tagi o ngooto ma lokuino. De abe ma oraha Una womahitigi onangika, 49ona iwimake wotagi-tagi o ngooto ma lokuino de yato bote o tokata, ho duru yopoa-poaka, 50angamoi ona mata-mata iwimake de duru iwimodongo.
Masara ka de yopoaka gea de wotemo onangika wato, “Ngohi naa, ho nimatotomoroini dika de ngaro ufa de nihimodongo.” 51Wotemo ibooto de wofarene o ngotiriye. De gea ka de wofarenoka de ma hidaloko iriidoka. Gea ho duru yoherangaholi, 52angamoi ngaro ma dihira de ona iwimake ma oraha o nyawa yosana wahiolomo de ma roti masara ona ka ikurangohi yataoko abe ma titi to Una ai kuaha. De gea ko yataokuahi mangale ma titi to ona manga pea itogowini.
53Ho yomahihora de yomahiadono ma ngigorika abe o Genesarete ma kapongoka, de manga ngotiri ihilikoika ma dudungoka. 54De yokokiutioka de manga ngotiri yodogunoaika de o nyawa genangoka iwimake o Yesusu de iwihioriki. 55Iwihioriki ho ona yomapopaata manga tonaka mata-mataika la o nyawa yopopanyake ka ma moi de manga nanao yahidotao Unangika. Ho o wange-wangeiye o kia-kiaka dika iwigihene abe o Yesusu naga genangoka, ka genangika yangotaka ona yopopanyakeuku la ka idadi iwimake. 56Ho o kiaika dika waika, ngaro o kapo-kapongika eko o kota-kotaika, eko ma ngi o kia-kiaka dika abe biaha o nyawa genangoka yomatoomuino, masara genangoka o nyawa yakokelengauku yopopanyake. De gea duru yogaho-gahoko Unangika la ato iti ka idadi ai baju ma barenika yomahisoika. De gea onagona dika ai bajuika yomahisoika, ona gea manga popanyake ikokitogumoka.
Gereja Firman Allah, Yayasan Misi Masyarakat di Pedalaman