Maruku 5
5
Iwikokitokata o arukoka o Yesusu widuhunu
Matiusu 8:28-34; Lukasa 8:26-39
1Ho ipahaino de o Yesusu de ona iwinii-niiki yomahiadonoka o akere ma ngooto ma honongaika abe o Gerasa ma nyawa yogogere genangoka de youti genangiha. 2-5De genangoka naga womatengo iwikokitokata wogogere o arukoka abe o nyawa manga honenge ihingoha-ngohama genangika. De ko moiua ka idadi iwipakiti unangika la iwitumungu. Angamoi duru ma ngoeokau ai lou de ai giamoo ka ma moi ihidapakiti de o rante. Masara ka watoa-toaka ma rante, ngaro ai louoka eko ai giamoka, ma ka watoa-toakuku, ko moiua de iwingakunu iwitumungu. De o wange-wange de o futu-futuiye womapoa-poaka o loku-lokuoka de o lungu-lungunoka abe naga ma arukoka gea. De ai badanga womahikokuraihi de o hakaru.
6Ho o Yesusu ka de woutiha de una iwikitokata gea wimake o Yesusika. De hatoli ai gurutikahi ho womapopaata la wibuhuku, de wiadono de watilabukuku hiadono womamotumuku o Yesusu ai himangoka. 7-8De o Yesusu wohira wotemo, wato, “Ngona o tokata ma dorou abe nomanoa unangoka naa, nohupuoka!” Gea de iwikokitokata duru kohaamokiye womapoaka o Yesusika wato, “Yesusu to Ma Jou Wokokurutiye ai Ngofaka, Ngona naa ka nohidodoa ngohino? Ho ngohi togahoko la ufa nohihikangela de gea kiani nohihibehehongo ngohino abe nomahikoboto moi de napake Ma Jou ai romanga!”
9De ahao o Yesusu woleha enangika, wato, “Ani romanga onaguna?” De ma tokata ipaluhu o Yesusika ato, “Ngomi naa mia romanga o Legiono, angamoi ngomi naa duru ko mia ngoe.”#5:9 Nako o Yunani manga demo, o Legiono gea ma titi o tentara ma nyawa o doomu moi abe duru yosana. 10De o tokata gea duru imagaho-gahoko o Yesusika ato, “Ufa nomihitingaka o Gerasa ma tonakino naa, angamoi ko mioigoua mihupu ma homoaika.”
11De naga genangoka o ode duru idoduduono kohangoe abe mata-mata ngade-ngade o dutu o sana hinooto ma ngoe. De ma ode gea o loku ma bakaino naga itimiono genangoka. 12De o toka-tokata gea igahokoli o Yesusika ato, “Nomihidingoto o odeika gea la ngomi mimahipooteke genangikali” 13Ho o Yesusu wato, “Nako gea nihupuoka!” Ho ikokihupuoka o nyawaino gea de ikokiloiki de yokokibarene o odeikali. Masara ka de o toka-tokata gea yokokibarenoka o odeikali de o ode gea imapopaata o bakoruku de imakokingumo o akere ma ngootuku hiadono akokilutuoka.
14De ona abe o ode ma gogoana, ona gea yokokiloaroka la gea idadioka ka idadi yoade-ade manga kapongoka de ma nyawa mata-mataika abe hatoli yotigi-tigino ma tonakoka gea. Ho naga manga ngoe abe ka de yoihene manga ade-ade gea de yoiki ma ngiika la ato onangoo yamake gea abe idadioka. 15Ho yoboaino o Yesusino de genangoka iwimake una abe ma dihiraino duru iwikitokata. Masara ma oraha naa de una gea ai hininga itiaioka ho hiadono wogogeruku womariidoka genangoka de womabajuoka. De ona iwimake gea de duru yoheranga ho hiadono yohawana. 16Ho ona abe kangano amake gea abe idadioka iwikokitokatika de ma odeika, ona gea duru yoade-ade onangika abe ahao yokokiboaino. 17De ahao o nyawa genangoka yomulaenge duru yogaho-gahoko o Yesusika ato, “Migahoko la mia tonakoka naa ngona nohupuoka!”
18De manga demo wohimoteke o Yesusu ho wato wosobo. Masara ka de wofarene ma ngotiroko de una abe ma dihira iwikokitokata duru womagahoko o Yesusika wato, “Ngohi ka idadi toniniiki?” 19Masara o Yesusu wihibehehongo unangika wato “Ngona nomagoo-gogere dika ani tonakoka naa. Ngohi ahi mau la nolio dika ani tauika de nahingahu-ngahu ani gogianongoruika abe hokokia nanga Baluhu idodutu wonidora ngonaika de abe hokokia woniduhunoka. Gea nahingahu-ngahu onangika.” 20Ho ka de o Yesusu wotemoka hokogea de una woikoka de womulaengoka wahingahu-ngahu onangika abe yogogere ai tonakoka. De ma tonaka gea ihiromanga o Kapongo Ngimoioka. Ho ona abe yogogere o Kapongo Ngimoioka gea yokokiihene mata-mata abe o Yesusu widuhunoka de duru yokokiheranga ma titi ai ade-ade gea.
O Yairusu ngoi ora mohonenge de momatengoli mokangela
Matiusu 9:18-26; Lukasa 8:40-56
21De ipaha de o Yesusu womahihorali doka o akere ma ngooto ma honongaika. Womahihoraika de woutiuku doka o akere ma ngooto ma ngigoroka de genangoka naga o nyawa ko manga ngoe yoboa de iwihigororomino. 22De genangoka naga womatengo o Yahudi ma nyawa manga dodotoko ma tau ma hibaluhu abe to una ai romanga o Yairusu. De o Yairusu gea woboa o Yesusino de ka de womahiadono de womamotumuku o Yesusu ai louoka. 23De womamotumuku de duru womagahoko Unangika wato, “Marai to ngohi ngohi ora, ka moetekohi ma muna ngade-ngade de mohonenge. Ho ngohi togahoko Ngona nohiniiki ahi tauino de nomiso de ani giama la motogumu ami kangelaino la ka idadi muna mowangohi.” 24Ho o Yairusu wotemo hokogea de o Yesusu ka winiiki unangika.
Winiiki unangika masara o nyawa ko manga ngoe iwiniiki o Yesusu, de ona duru yomahiefotika Unangika. 25-26De ahao manga dodagi ma goronaka de naga momatengo o ngofeka de duru mokangela ma titi ami mede. Muna gea ami taongo ngimoi de hinootoino mokangela, de muna gea ma ngoe momahibau ona yohou-hourika hiadono ami tiwi ko iwaka. De ngaro hokogea ma ngoe momahibau, masara ona gea ko akunua imiduhunu de tanu ami kangela gea ka idogo. 27De muna gea migihene ma titi o Yesusu abe wahitogumu manga ngoe manga popanyakeino. Ho muna moboa o nyawa manga ngoeino de o Yesusu ai bajuiha maso, 28angamoi momatemo mato, “Ngaro ka ai baju dika taso, ma ka idadi totogumu ahi kangelaino.” 29Ho ka de ai baju maso de motogumoka ami kangelaino gea, abe ami awunu ko itagiokaua. De duru ma oraha gea ami badangoka mamao hoka ami kangela ko iwaka.
30Masara gea ka de ai baju maso de o Yesusu wamaoka de wohiorikoka abe naga ai kuaha itagioka ai badangoka de aika o nyawaika, de womadogilioro o nyawa manga hidogoronaka de woleha wato, “Onagona ahi baju yaso?”
31De ona iwinii-niiki o Yesusu ai demo apaluhu ato, “Abeika ona yomahiefotika Ngonaika manga ngoe, de gea noleha Ngona nato, ‘Onagona ihiso Ngohino?’”
32De o Yesusu womalega arihonongaika la duru wohioriki onagona iwiso. 33De o ngofeka gea moboa Unangika angamoi mamao gea idadioka munangika. De moboaino de duru mohawana hiadono mofafara. Moboa Unangino de momamotumuku ai himangoka de Unangika momangaku mato, “Ahi Baluhu, marai ngohi naa ani bajuika taso angamoi toigo ahi kangelaino totogumu.” 34De momangaku ibooto de wotemo munangika wato, “Ngohi ora, inihitogumoka ma titi ani ngongakuino. Ho naa ani hininga isanangioka de ka idadi nolio, angamoi ani kangela gea ko iwaka.”
35O Yesusu ka yomakoketemohi de ma ngofeka gea de naga womatengo o Yairusu ai tauino woboa de witemo o Yairusika ato, “Marai ngoni ora mohonengoka, ho ibootoka nanga guru gea niruwae.”
36De gea o Yesusu woihene, masara ko wopusingua ma titi manga demo gea, de ka witemo o Yairusika wato, “Ngaro ufa nohawana, ma kiani nohingakuohi Ngohino.”
37Witemo ipaha de wogila-gila o Yairusu ai tauika, masara ona yowoe-woe ko wahigunoaua iwiniiki. Abe iwiniiki gea naga yaruange dika, abe o Peturusu, de o Yakobusu, de o Yohanese o Yakobusu ai dodoto gea, ona yaruange dika iwiniiki. 38De yogila-gila de yomahiadono o Yairusu ai tauika, de genangoka naga o nyawa manga ngoe de woihene manga gigoro abe o hagaaga de o garino. De gea manga gari kohaamokiye. 39De o tau ma goronaika wowohama o Yesusu de watemo onangika wato, “Ma titi o kia hiadono naa ma gigoro de adodoa ho ngini ka niari-ari? Muna gea ko mohonengua, masara ka imikiookoka dika.” 40Wotemo hokogea de ona duru iwigie-giete o Yesusika ma titi iwihohedu.
De Una wahihupuoka ona gea, de ahao mohone-honenge gea ami baba de ngomi meme de ona ai dodiawo yaruange gea wao la yowohamika ma kamarika. Abe ona yowohamika abe genangoka naga muna mohone-honengoka. 41Yowohamika de o Yesusu womiso ami giamika de wotemo munangika de to Una ai demo wato, “Talita kum!” abe naga de ma titi hokonaa, “Ngofeka, ngona naa nomomikoka!” 42Ka de womihuloko de ma ngofeka gea momomikoka de ka idadi momadagi aika aino. Abe ma oraha gea ami ngumuru o taongo ngimoi de hinooto. De ona gea o kamaroka duru yoheranga. 43De o Yesusu duru wahibehehongo onangika wato, “Nena idadioka ufa niade-ade o nyawaika.” De ahao wotemoli wato, “Naa ka idadi nimihiolomo ngoni ora.”
Gereja Firman Allah, Yayasan Misi Masyarakat di Pedalaman