JOHAN 2
2
Kana Khuo a Kichênna
1Chun, a ni thum ni chun, Galili gama Kana khuo ah kichênna a um a, tak achun Isu nu le a um a. 2Isu leh a sinsakte le kichên na achun a chiel u a. 3Tichun, uain a hung tâksap phet un Isu nu’n a kawmah “Uain a kitasam tau hi,” a ti a.
4Isu’n a kawmah, “Numei, nang nei hilh ding banga um? Ka hun a tung nai puoi,” a ti a. 5Ziephet chun, Isu nu chun tuonvaite kawmah, “Na kawm u a a gen tâk chuh hih zel un,” a ti a. 6Chun, Judate kithiensak dân guolin, suong tuibel gup, buk sawmli mun nih ahim, mun thum ahim, dawl chiet tak achun a tung u a. 7Isu’n tuonvaite kawmah, “Tui belhaw achun tui hih dim un,” a ti a. Tichun, a ngâwnggeng gei in a sung dim chiet u a, 8Ziephet chun, a kawm u ah, “Tu’n thal unla, guolvak tuonvai lawiupa kawmah chieh pih un,” a ti a. Tichun, a chieh pih tau a. 9Guolvak tuonvai lawiupa chun tui uain hung suok chuh a tep a, a pawtna chin la a he puoh a, (tui khaite chun la a heu a), khutichun, zi nei ding pa chuh a sama, 10a kawmah, “Mitin in, a tûngin uain pha chuh a hawm masa sek u a, chun, tam deuh a dâwn nung u leh, a phalo zaw deuh chuh a hawm dawk sek ui, himahlele, nangin, tu tiengin uain pha chuh na kawih zing nalai a!” a ti a. 11Isu’n, zie a thilmak hih kipatna hi, Galili gam Kana khuo achun a hih a, a lopi zie a latsak a; tichun, a sinsakte’n a gingcha tau hi. 12Chun, zie nung chun Isu chuh, a nu tawh, a suohpihte tawh, a sinsakte tawh Kapernaum khuo ah a zu chieh u a, tak achun ni sawtlo cha a um u a.#Mat 4.13
Temple Sukthienna
(Mat 21.12-13; Mrk 11.15-17; Luk 19.45-46)
13Chun, Judate Chiehkân Kut a nai ta a, Isu Jerusalem khuo ah a va chieh a.#Pdn 12.1-27 14Tichun, Pathien Ho-In a bâwng bang, belam bang, vakhu bang, zuok haw leh, dangka theng haw, a na chu chuh a va mu a. 15Khutichun, khau huol in zêpna a siem a, belam leh bâwng, a bawnin Pathien Ho-In apat chun a nawhdawk a; dangka thengte dawhkân chuh a sawtpaih sak a, a dangka hawu a thehzak sak a; 16vakhu zuokte kawm a chun, “Zie thil haw hi tak apat hin chieh mang pih un, ka Pa In hi sumkawlveina In in siem kiu,” a ti a. 17(“Na In a ka phatchuomngaih na’n ei ne zo ina,” tih kizik chuh a sinsakte’n a heu a.)#Sam 69.9 18Khutichun, Juda, thuneitu te chun a kawmah, “Zie thil haw hihna ding hin thuneihna na nei hi tih ka het theihna ding un bang thilmak a na hih theih ding?” a tiu a. 19Isu’n a kawm u ah, “Zie In hi hihsieu inla, ni thum sungin tung ding kit ing ka,” ti’n a dâwng a.#Mat 26.61; 27.40; Mrk 14.58; 15.29 20Judate chun, “Zie In hi kum sawmli leh kum gup kisa ahi a, nangin ni thum sunga maw na tun din kit ding?” a tiu a.
21Himahlele, a sapum In thugen ahi. 22Zieziekchun, mithi lak apat a thawh kitin, zie thu chuh a na gen tai tih, a sinsakte’n a he kit tau a; tichun, Pathien lehkha thu leh Isu thugen chuh a gingcha tau hi.
Mihing Nungchang Isu’n a Hêi
23Chun, Chiehkân Kut mat laia Isu Jerusalem khuo a a um lai in, mi tamtakin, a thilmak hih a muh ziekun a gingcha tau a. 24Himahleh, Isu’n amau haw chuh a muong zo puoh a. 25A chanchinhawu chuh kuomah hilh a ngai puoi, amah ngêi in a lungthim u a um haw chuh a he ngâl a.
Okuqokiwe okwamanje:
JOHAN 2: GANGBSI
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.