LUKE 22
22
Isu a a Umna Matsak
(Mat 26.1-5, 14-16; Mrk 14.1-2, 10-11; Joh 11.45-53)
1Chun, chângthâk chawl sawhloh Kut, Chiehkân Kut a tih u chuh a nai ta a.#Pdn 12.1-27 2Tichun, Thiempuliente leh Danthuzikte chun mipite a lauh ziekun, Isu chuh a gûka thah theihna ding lampi a hawl tau a.
3Tichun, sawm le nih te laka tel Juda, Iskariot a tihpau sung achun Setan a lut a. 4Khutichun, Juda chuh a va pawt dawka, thiempu liente leh, Ho-In veng lawiupate kawma chun Isu a matsak theih ding dân chuh a va gen ta a. 5Chun, amau chuh a kipâk mah mah u a, a kawmah dangka piek a tiem tau a. 6Khutichun, Juda chun lem a sa a, tichun, mipite het loh a, Isu a matsak theihna ding hun lemchâng a hawl ta a.
Chiehkân Kut Ankuong
(Mat 26.17-25; Mrk 14.12-21; Joh 13.21-30)
7Chun, chângthâk chawl sawhloh Kut, Chiehkân Kut belamno thahna ding ni chuh a hungtung ta a. 8Tichun, Isu’n Peter leh Johan chuh, “Chiehkân Kut an I nek dingun va guonggalh un,” ti’n a sawl a. 9Chun, amau chun a kawmah, “Khawitak ah va guonggalh leng un na nuom hi?” a tiu a. 10Amah chun a kawm u ah, “Ngaitiem u, khawpi na lut lut u leh, mi khat bela tui pu’n hun kituohpih intin; a lutna ina chun zui lut un, 11tichun, a In neipa kawma chun, ‘Sinsakpa’n, ka sinsakte tawh Chiehkân kut an ka nekna dinguh, malzin indan chuh khawitaka? a hun tii,’ va tiu. 12Tichun, amah chun, indan chungnung lientak, matchâk umsa, hun na etsak ina, taka chun guonggalh un,” a ti a. 13Khutichun, a chieh tau a, a kawm u a a gen guol tak chun a va mu tau a; zie chun Chiehkân kut an chuh a guonggalh tau a.
Lalpa Nitâk Ankuong
(Mat 26.26-30; Mrk 14.22-26; 1 Kor 11.23-25)
14Chun, a nek a hung phat phetin, Isu chuh a sinsakte tawh dawhkan a chun, an ne ding chun a chu ta a. 15A kawm u ah, “Ka thil thuok masang in, zie Chiehkân kut ankuong hi hun nekpih ka nuom mah mah hi! 16Ka hilh na hiu hi, Pathien gama a tak a hih masang sieh, ziehi ne kit ta puo’ng ka,” a ti a. 17Tichun, Isu’n khawn chuh a la a kipahthu a gen a, “Ziehi lau inla, kihawm un. 18Ka hilh na hiu hi, tu a kipat Pathien gam a hungtun masang sieh, grep gah tui hi dâwn kit talo ding ka hi,” a ti a. 19Chun, chângthâk a la a, kipah thu a gen zawhin a phelsuoh a, a kawm u ah a pie a, “Ziehi ka sapum, na sik u a piek ding chuh ahi, nei hetzingnau in zie hi hih sek un,” a ti a. 20Chun, khutibang mah in, nitâk an nek zawhin khawn chuh a la a, “Ziehi ka thisana thugawlh thak, na sik u a pawt ding melchikna chuh ahi.#Jer 31.31-34 21Himahlele, entiem u! ei matsak ding pa chuh dawhkan a ei ûmpih pa ngêi hi ahi.#Sam 41.9 22Mihiem Chapa hi, a a guot guol ngei un chieh ding ahi: himahlele, a matsak ding pa chung chuh a gik hi!” a ti a. 23Tichun, amau haw chuh, “I laku hin zie tawbang thilhih ding chuh, a kuo pên hi I hi ta ding u?” ti’n a kidawngtuoh tau a.
Kuo a Lopipen Die?
24Chun, alak u ah kuo a lopipen die tih thu ah, kinielna a hung pawt ta a. 25Isu’n a kawm u ah, “Jentel lengte chun a mipiteu chungah thu a nei ten sek ui; tichun, a chung u a lalte chuh ‘Mipite guolpa’ a ti sek ui. 26Himahlele, nang haw vang chuh khutibang chuh hi ding nei puou ui; na lak u a lopipen chuh a naupangpen guolin um hen la, a lalpen chuh a tawiviel pên in um hen. 27An kuong a chu pa leh, an nek ding siem vielpa chuh kuo a lopi zaw? An ne dinga chu pa chu hilo ahim? Himahlele, kei vang, na laku ah tawiviel pên pa bangin ka um zawi. 28Thepa ka um sung cheng, nang haw hi ei umpihte na hiu a; 29tichun, ka gama ka dawhkan a an na nek u a, na dawn theihna dingun, ka pa’n gam ei guotsak guolin, gam ka hun guotsak na hiu hi. 30Chuleh, Israel nam sawm leh nam nih te vaihawm sak in lalchutphah ah hung chu’n lau.
Peter Kilepsan Ding Thu
(Mat 26.31-35; Mrk 14.27-31; Joh 13.36-38)
31“Simon, Simon! ngaitie, nang haw chengcheng hi Setan in buh ngelh guola a hun ngelh theihna dingin, nanguh lawi hi ahun ngên a puo. 32Himahleh Simon, na taksanna a beih lohna dingin ka hun paucham sak zing hi. Khutichun, kei lama na hung kihei kit phat leh, na suohpihte suhat in,” a ti a. 33Peter chun a dâwng a, “Lalpa, na kawma chun, suongkul leh thihna ale chieh dingin kiguo zosa ka hi a puo!” a ti a. 34Chun, amah chun, “Peter, ka hun hilh na hi, na hetsasa a thumvei nei kizuksan masang sieh tuzan in âk khuong puo’n a” a ti a.
35Chun, Isu’n a sinsakte kawm achun, “Dangkadipte, sakhaute leh kengtawbek keng lo a ka hun sawl dawk lai khan, thil himhim na tasam ngei um?” ti’n a dawng a. Amau chun, “Tasam lo,” a tiu a. 36Isu’n a kawm u ah, “Tu’n chuh, kuole, dangkadip ahim, sakhau ahim nei chun keng hen la; kuole, chemzâm neilo chun, a puonâk zuok hen la, chaw hen. 37Ka hilh na hiu hi, Amah chuh mi gilote lak ah a simtel tau hi ti a, Pathien lehkha thu a ka chungchâng thu zik kha ka chunga hungtung ding ahi; ka chungchâng thu kizikte kha hungtung kim ding a hi tai,” a ti a.#Isa 53.12 38Chun, sinsakte chun a kawmah, “Lalpa, entie taka hin chemzâm nih a um hi,” a tiu a. Amah chun, “Zie chuh a hun set hi,” a ti a.
Isu olive Tanga a Pauchamna
(Mat 26.36-46; Mrk 14.32-42)
39Chun, a pawtdawk a, a hih ngeina guolin. olive tâng achun a chieh a; sinsakte’n le a zui u a. 40Chun, a mun chuh a va tun phetin, a kawm u ah, “Thepna a na lut lohna dingun paucham un,” a ti a. 41Tichun, suong a seh phakna ding vela hin a va chieh chuom a, zie chun, khupdin in a paucham a, 42“Hepa, lem na sak leh zie khawn hi ka kawm apat la chawn ah; himahlele, kei thu hilo in, nangmah thu thu hi zaw hen,” a ti a. 43Chun, vânsâwlchâk khat, van apat in a hung kilak a, amah a hung suhalh a. 44Chun, lungthim gim taluo chun, phachuomngai zaw diek in a paucham a; a khawsa-ul chuh thisan tang lientak guolin tuola chun a va tha a. 45Tichun, a pauchamna apat chun a tho dawk a, a sinsakte kawm lama chun a chieh kit a, a lungkham ziek u a ipmu chuh a va mu ta a. 46Tichun, a kawm u ah, “Bangati a ipmu na hiu hi? Tho unla, thepna a na lut lohna dingun paucham un,” a ti a.
Isu Mata a Umna
(Mat 26.47-56; Mrk 14.43-50; Joh 18.3-11)
47Chun, zie thu a gen lai tak chun, mipi a hung u a, sinsak sawm le nih te laka tel Juda a tih u chuh a hung makai a. Isu chuh châwp guo’n a va zuon a. 48Ziephet chun, Isu’n a kawmah, “Juda, Mihiem Chapa hi, chawpa matsak ding na him?” a ti a. 49Chun, a kienga umte chun, thil hung um ding chuh a muh phet un, “Lalpa chemzâm in ka do ding um?” a tiu a. 50Tichun, a lak u a khat chun, thiempu lienpen suok chuh a sat a, a bil changlam a satthâk sak ta a. 51Isu’n a kawmah, “Zie bêk hi ei vak hih sak tiem u,” a ti a. Tichun, a bil chuh a tham a, a hihdam ta a. 52Chun, Isu’n amah man dinga hung, thiempu liente leh, Pathien Ho-In veng lawiupate leh, upahaw kawma chun, “Chemzâm haw, khetbuk haw chawi in, gucha suommang man ding guola hung na hiu maw? 53Pathien Ho-In ah, ni chengin na kawm u ah ka um a, nei mat guo ngâl puou a, Himahleh, tuhi na tawih phat uh ahi, thim thilhih theihna’n vai a hawm ahi,” a ti a.
Peter in Isu a Kizuksanna
(Mat 26.57-58, 69-75; Mrk 14.53-54, 66-72; Joh 18.12-18, 25-27)
54Tichun, Isu chuh a man u a, thiempu lienpen In lam achun a puimang tau a; Peter in gamla taka kihal in a zui a. 55In umna huong sunga chun mei a tik u a, tichun, mei panga chu haw lak achun Peter le a va chu a. 56Chun, mei panga a chut lai chuh, suok nungak khatin a mu a, changtak in a en a, “Zie pa hile Isu kawmah a um khai,” a ti a. 57Himahleh, Peter chun a niel a, “Numei, amah chuh het le ka he kha puoi,” a ti a. 58Chun, chawmkhat hal in mi dangin a hung mu kit a, “Nang hile a laku a tel na hi hi,” a ti a. Himahleh, Peter chun, “Mihiem, ka tel puoi,” ti’n a dâwng a. 59Chun, dâkkâl khat vel hal in, mi dang khatin a hung mu kit a, “Zie pa hile a kawm u a um kha a hi mah mah hi, Galili gama um khah ahi,” a hung ti a. 60Himahleh, Peter in a dâwng a, “Mihiem, kuo chanchin gen na hih ka he puoi!” a ti a. Tichun, zie chuh a gen lai takin, thakhat in âk a hung khuong ta a. 61Lalpa chuh a kihei a, Peter chuh changtak in a en a, ziephet chun, Peter chun, “Lalpa’n tu zan hin, âk khuon ma’n nangin thum vei, ei kizuksan inla,” ti a a kawma a gen chuh a hun hedawk kit ta a. 62Chun, a pawtdawk a, hah kah in a kap ta a.
Isu Chiemnuih Bawlna’n a Mang ui
(Mat 26.67-68; Mrk 14.65)
63Chun, Isu venga pang te chun tawtbawlna’n a mang u a, a zêp u a. 64Tichun, a mit a tuom sak u a, a mai a beng u a, “Gen lawk tie le! kuo a hun beng?” ti’n a dawng zel u a. 65Chun, thu dang tamtak in le amah a sawisau a, a gai u a.
Isu Vaihawmte Masanga a Dinna
(Mat 26.59-66; Mrk 14.55-64; Joh 18.19-24)
66Chun, khuo a vak phetin upahaw, Thiempulien haw leh Danthuzikte chuh a kikhawm u a, Isu chuh vaihawmna masanga chun a pui tau a. 67“Krista chuh na him? Kei uh nei hilh ah,” a tiu a. Amah chun a kawm u ah, “Hun hilh leng le gingcha puo’n lau, 68Chun, ken thu hun dawng lengle, ei dâwng thei diek puo’n na tin uh, ei chiehdawk sak diek puo’n lau. 69Himahlele, tu a kipat hin chuh, Mihiem Chapa hi, Pathien Bangakai hihtheipa changlam ah chu ta’n a,” a ti a.
70Ziephet chun, a bawnu chun, “Nang hi Pathien Chapa chuh na hi a ahim?” a tiu a. Amah chun a kawm u ah, “Na hi nei tih bang tak u chun ka hi,” a ti a.
71Chun, amau chun, “Hetpihtu dang banga I ngaih beh naklai dinguh? Eimau haw ngêi in, amah kamsuok I za tau hi la,” a kitiu a.
Okuqokiwe okwamanje:
LUKE 22: GANGBSI
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.