ܒܪܝܬܐ 14
14
ܦܠܵܫܵܐ ܕܡܲܠܟܹ̈ܐ
1ܒܐܵܢܝܼ ܝܵܘܡܵܢܹ̈ܐ ܐܵܡܪܵܦܹܝܠ ܝܼܗ݇ܘܵܐ ܡܲܠܟܵܐ ܕܣܸܢܥܵܪ، ܐܵܪܝܼܘܼܟ݂ ܡܲܠܟܵܐ ܕܐܸܠܵܣܵܪ، ܟܲܕܵܪܠܲܥܡܲܪ ܡܲܠܟܵܐ ܕܥܝܼܠܵܡ، ܘܬܸܕܥܵܠ ܡܲܠܟܵܐ ܕܓܘܿܝܹܡ. 2ܐܲܢܹܐ ܡܲܠܟܹ̈ܐ ܥܒ݂ܝܼܕ ܠܗܘܿܢ ܦܠܵܫܵܐ ܥܲܡ ܒܵܪܵܥ ܡܲܠܟܵܐ ܕܣܕܘܿܡ، ܘܥܲܡ ܒܲܪܫܵܥ ܡܲܠܟܵܐ ܕܥܵܡܘܿܪܵܐ، ܘܫܸܢܐܵܒ݂ ܡܲܠܟܵܐ ܕܐܵܕܡܵܐ، ܘܫܡܵܐܒܸܪ ܡܲܠܟܵܐ ܕܨܒ݂ܘܿܐܝܼܡ ܘܡܲܠܟܵܐ ܕܒܵܠܵܥ، ܕܝܼܠܵܗ̇ ܨܘܿܥܵܪ. 3ܟܠܲܝܗܝ ܐܲܢܹܐ ܓ̰ܡܝܼܥ ܠܗܘܿܢ ܒܚܲܕ ܚܲܒܪܵܐ ܠܪܵܘܘܿܠܵܐ ܕܣܸܕܝܼܡ، ܕܝܼܠܹܗ ܝܵܡܵܐ ܕܡܸܠܚܵܐ#14:3 ܝܲܥܢܹܐ: ܝܵܡܵܐ ܡܝܼܬܬܵܐ . 4ܬܪܸܥܣܲܪ ܫܸܢܹ̈ܐ ܦܠܝܼܚ ܠܗܘܿܢ ܠܟܲܕܵܪܠܲܥܡܲܪ، ܐܝܼܢܵܐ ܒܫܹܢ݇ܬܵܐ ܕܬܠܵܬܲܥܣܲܪ ܥܒ݂ܝܼܕ ܠܗܘܿܢ ܡܵܪܘܿܕܘܼܬܵܐ.
5ܘܫܹܢ݇ܬܵܐ ܕܐܲܪܒܲܥܣܲܪ ܐ݇ܬܹܐ ܠܹܗ ܟܲܕܵܪܠܲܥܡܲܪ، ܘܡܲܠܟܹ̈ܐ ܕܥܲܡܹܗ، ܘܡܚܹܐ ܠܗܘܿܢ ܠܪܦܵܐܝܼܡ ܓܵܘ ܥܸܣܬܪܘܿܬ ܩܘܼܪܢܝܼܡ، ܘܠܙܘܼܙܝܼ̈ܡ ܓܵܘ ܗܵܡ، ܘܠܐܝܼܡܝܼ̈ܡ ܓܵܘ ܫܘܵܐ ܩܘܼܪܝܲܬܝܼܡ؛ 6ܘܠܚܘܿܪ̈ܵܝܹܐ ܓܵܘ ܛܘܼܪܲܝܗܝ، ܕܝܼܠܹܗ ܣܵܥܝܼܪ، ܗܲܠ ܐܹܝܠ ܦܵܪܵܢ، ܒܬܚܘܼܡܵܐ ܕܒܲܪܝܼܵܐ؛ 7ܘܕܝܼܪܗܘܿܢ ܘܐ݇ܬܹܐ ܠܗܘܿܢ ܠܥܹܝܢ ܡܸܫܦܲܛ، ܕܝܼܠܵܗ̇ ܩܕܸܫ، ܘܡܚܹܐ ܠܗܘܿܢ ܠܟܠܵܗ̇ ܕܸܫܬܵܐ ܕܥܡܵܠܩܵܝܹ̈ܐ، ܘܐܘܼܦ ܠܐܵܡܘܿܪ̈ܵܝܹܐ، ܕܝܼܗ݇ܘܵܘ ܝ݇ܬܝܼܒܹܐ ܓܵܘ ܚܵܨܸܨܘܿܢ ܬܵܡܵܪ.
8ܘܦܠܝܼܛ ܠܹܗ ܡܲܠܟܵܐ ܕܣܕܘܿܡ ܘܡܲܠܟܵܐ ܕܥܵܡܘܿܪܵܐ، ܘܡܲܠܟܵܐ ܕܐܵܕܡܵܐ، ܘܡܲܠܟܵܐ ܕܨܒ݂ܘܿܐܝܼܡ، ܘܡܲܠܟܵܐ ܕܒܵܠܵܥ، ܕܝܼܠܵܗ̇ ܨܘܿܥܵܪ، ܘܗܘܼܕܸܪܗܘܿܢ ܠܸܦܠܵܫܵܐ ܒܪܵܘܘܿܠܵܐ ܕܣܸܕܝܼܡ، 9ܥܲܡ ܟܲܕܵܪܠܲܥܡܲܪ ܡܲܠܟܵܐ ܕܥܝܼܠܵܡ، ܘܬܸܕܥܵܠ ܡܲܠܟܵܐ ܕܓܘܿܝܹܡ، ܘܐܵܡܪܵܦܹܝܠ ܡܲܠܟܵܐ ܕܣܸܢܥܵܪ، ܘܐܵܪܝܼܘܼܟ݂ ܡܲܠܟܵܐ ܕܐܸܠܵܣܵܪ، ܐܲܪܒܥܵܐ ܡܲܠܟܹ̈ܐ ܕܲܠܩܘܼܒ݂ܠ ܕܚܲܡܫܵܐ. 10ܘܪܵܘܘܿܠܵܐ ܕܣܸܕܝܼܡ ܡܸܠܝܵܐ ܝܗ݇ܘܵܐ ܓܘܼܒܹ̈ܐ ܕܩܝܼܪ؛ ܘܥܪܝܼܩ ܠܗܘܿܢ ܡܲܠܟܹ̈ܐ ܕܣܕܘܿܡ ܘܥܵܡܘܿܪܵܐ ܘܢܦܝܼܠ ܠܗܘܿܢ ܓܵܘܲܝܗܝ، ܘܦܵܝܫܵܢܹ̈ܐ ܥܪܝܼܩ ܠܗܘܿܢ ܠܛܘܼܪܵܐ. 11ܘܐܵܢܝܼ ܐܲܪܒܥܵܐ ܡܲܠܟܹ̈ܐ ܐ݇ܚܹܪ̈݇ܢܹܐ ܫܩܝܼܠ ܠܗܘܿܢ ܟܠܹܗ ܩܸܢܝܵܢܵܐ ܕܣܕܘܿܡ ܘܕܥܵܡܘܿܪܵܐ، ܘܟܠܵܗ̇ ܡܹܐܟ݂ܘܼܠܬܲܝܗܝ، ܘܐ݇ܙܝܼܠ ܠܗܘܿܢ. 12ܘܫܩܝܼܠ ܠܗܘܿܢ ܐܘܼܦ ܠܠܘܿܛ، ܒܪܘܿܢܵܐ ܕܐܲܚܘܿܢܵܐ ܕܐܲܒ݂ܪܵܡ ܕܝ݇ܬܝܼܒ݂ܵܐ ܝܗ݇ܘܵܐ ܒܣܕܘܿܡ، ܥܲܡ ܟܠܹܗ ܡܸܢܕܝܼܹܗ، ܘܐ݇ܙܝܼܠ ܠܗܘܿܢ.
ܐܲܒ݂ܪܵܡ ܦܲܪܘܼܩܹܐ ܠܠܘܿܛ
13ܘܐ݇ܬܹܐ ܠܹܗ ܚܲܕ ܕܥܪܝܼܩܵܐ ܝܗ݇ܘܵܐ ܘܡܘܼܕܸܥ ܠܹܗ ܠܐܲܒ݂ܪܵܡ ܥܸܒ݂ܪܵܝܵܐ، ܕܝܼܗ݇ܘܵܐ ܒܸܥܡܵܪܵܐ ܒܒܲܠܘܼܛܹ̈ܐ ܕܡܲܡܪܹܐ ܐܵܡܘܿܪܵܝܵܐ، ܐܲܚܘܿܢܵܐ ܕܐܸܫܟܘܿܠ، ܘܐܲܚܘܿܢܵܐ ܕܥܵܢܝܼܪ. ܐܲܢܹܐ ܒܢܲܝ̈ ܩܝܵܡܵܐ ܕܐܲܒ݂ܪܵܡ ܝܼܗ݇ܘܵܘ. 14ܟܲܕ ܫܡܝܼܥ ܠܹܗ ܐܲܒ݂ܪܵܡ ܕܦܝܼܫ ܠܹܗ ܠܘܼܒܠܵܐ ܐܲܣܝܼܪܵܐ ܒܪܘܿܢܵܐ ܕܐܲܚܘܿܢܘܼܗܝ، ܟ̰ܘܼܟܒܸܢܹܗ ܪܹ̈ܓܵܘܵܬܹܗ ܕܗܘܝܼܹܐ ܝܗ݇ܘܵܘ ܓܵܘ ܒܲܝܬܹܗ، ܬܠܵܬܡܵܐܐ ܘܬܡܵܢܸܥܣܲܪ ܓܵܢܵܬܹ̈ܐ، ܘܢܦܝܼܠ ܠܹܗ ܒܵܬ݇ܪܲܝܗܝ ܗܲܠ ܕܵܢ. 15ܦܘܼܠܸܥ ܠܹܗ ܪܹ̈ܓܵܘܵܬܹܗ ܠܸܨܦܵܚܵܐ ܥܲܠܲܝܗܝ ܒܠܲܝܠܹܐ، ܘܡܚܹܐ ܠܹܗ ܐܸܠܲܝܗܝ، ܘܢܦܝܼܠ ܠܹܗ ܒܵܬ݇ܪܲܝܗܝ ܗܲܠ ܚܘܼܒ݂ܵܐ، ܕܝܼܠܵܗ̇ ܠܣܸܡܵܠܵܐ ܕܕܲܪܡܣܘܿܩ. 16ܘܡܘܼܕܸܪܹܗ ܠܟܠ ܡܸܢܕܝܼ، ܐܘܼܦ ܠܠܘܿܛ ܒܪܘܿܢܵܐ ܕܐܲܚܘܿܢܘܼܗܝ، ܥܲܡ ܩܸܢܝܵܢܹܗ، ܘܒܲܟ݂ܬܵܬܹ̈ܐ ܘܐ݇ܢܵܫܹ̈ܐ ܐ݇ܚܹܪ̈݇ܢܹܐ.
ܡܲܠܟܝܼܙܕܸܩ ܒܲܪܘܼܟܹܐ ܠܐܲܒ݂ܪܵܡ
17ܡ̣ܢ ܒܵܬ݇ܪ ܕܕܝܼܪܹܗ ܐܲܒ݂ܪܵܡ ܡ̣ܢ ܡܚܵܝܬܵܐ ܕܟܲܕܵܪܠܲܥܡܲܪ ܘܡܲܠܟܹ̈ܐ ܕܥܲܡܹܗ، ܦܠܝܼܛ ܠܹܗ ܡܲܠܟܵܐ ܕܣܕܘܿܡ ܠܐܘܼܪܚܹܗ ܒܪܵܘܘܿܠܵܐ ܕܫܒ݂ܵܐ، ܕܝܼܠܹܗ ܪܵܘܘܿܠܵܐ ܕܡܲܠܟܵܐ. 18ܘܡܲܠܟܝܼܙܕܸܩ ܡܲܠܟܵܐ ܕܫܵܠܝܼܡ ܦܘܼܠܸܛ ܠܹܗ ܠܲܚܡܵܐ ܘܚܲܡܪܵܐ؛ ܘܗ̇ܘ ܟܵܗܢܵܐ ܝܗ݇ܘܵܐ ܠܐܲܠܵܗܵܐ ܥܸܠܵܝܵܐ. 19ܒܘܼܪܸܟ݂ ܠܹܗ ܘܐ݇ܡܝܼܪܹܗ،
”ܒܪܝܼܟ݂ܵܐ ܝܠܹܗ ܐܲܒ݂ܪܵܡ ܠܐܲܠܵܗܵܐ ܥܸܠܵܝܵܐ، ܡܵܪܵܐ ܕܫܡܲܝܵܐ ܘܕܐܲܪܥܵܐ؛
20ܘܒܪܝܼܟ݂ܵܐ ܝܠܹܗ ܐܲܠܵܗܵܐ ܥܸܠܵܝܵܐ، ܕܣܘܼܦܹܐ ܠܹܗ ܕܸܫܡܸܢܘܼ̈ܟ݂ ܒܐܝܼܕܘܼܟ݂.“
ܘܝܘܼܗ݇ܒܸܠ ܠܹܗ ܐܸܠܹܗ ܐܲܒ݂ܪܵܡ ܡܲܥܣܵܪܹ̈ܐ ܡ̣ܢ ܟܠ ܡܸܢܕܝܼ.
21ܘܐ݇ܡܝܼܪܹܗ ܡܲܠܟܵܐ ܕܣܕܘܿܡ ܠܐܲܒ݂ܪܵܡ، ”ܗܲܒ݂݇ܠ ܐܸܠܝܼ ܐ݇ܢܵܫܹ̈ܐ، ܘܫܩܘܿܠ ܐܸܠܘܼܟ݂ ܩܸܢܝܵܢܹ̈ܐ.“ 22ܘܐ݇ܡܝܼܪܹܗ ܐܲܒ݂ܪܵܡ ܠܡܲܠܟܵܐ ܕܣܕܘܿܡ، ”ܡܘܼܪܡܵܐ ܝܘܸܢ ܐܝܼܕܝܼ ܠܡܵܪܝܵܐ ܐܲܠܵܗܵܐ ܥܸܠܵܝܵܐ، ܡܵܪܵܐ ܕܫܡܲܝܵܐ ܘܕܐܲܪܥܵܐ، 23ܕܠܹܐ ܫܵܩܠܹܢ ܚܲܕ ܓܕܵܠܵܐ ܝܲܢ ܚܕܵܐ ܬܲܣܡܵܐ ܕܨܵܘܸܠܬܵܐ، ܝܲܢ ܚܲܕ ܡܸܢܕܝܼ ܕܝܼܠܹܗ ܕܝܼܘܼܟ݂، ܕܠܵܐ ܐܵܡܪܹܬ، ’ܐܵܢܵܐ ܥܒ݂ܝܼܕ ܠܝܼ ܥܲܬܝܼܪܵܐ ܠܐܲܒ݂ܪܵܡ.‘ 24ܐܵܢܵܐ ܠܹܐ ܫܵܩܠܹܢ ܗܸܟ̃ ܡܸܢܕܝܼ، ܫܒ݂ܘܿܩ ܡ̣ܢ ܗ̇ܘ ܕܐ݇ܟ݂ܝܼܠ ܠܗܘܿܢ ܥܠܲܝܡܹ̈ܐ، ܘܣܵܗܡܵܐ ܕܐ݇ܢܵܫܹ̈ܐ ܕܐ݇ܙܝܼܠ ܠܗܘܿܢ ܥܲܡܝܼ: ܥܵܢܝܼܪ، ܘܐܸܫܟܘܿܠ، ܘܡܲܡܪܹܐ؛ ܐܵܢܝܼ ܫܒ݂ܘܿܩ ܫܵܩܠܝܼ ܣܵܗܡܲܝܗܝ.“
Okuqokiwe okwamanje:
ܒܪܝܬܐ 14: ABTAB
Qhakambisa
Dlulisela
Qhathanisa
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Aramaic Bible Translation Assyrian Bible © 2025 Aramaic Bible Translation