ܒܪܝܬܐ 17
17
ܐܲܒ݂ܪܵܡ ܦܝܵܫܵܐ ܩܸܪܝܵܐ ܐܲܒ݂ܪܵܗܵܡ
1ܐܝܼܡܲܢ ܕܗܘܹܐ ܠܹܗ ܐܲܒ݂ܪܵܡ ܬܸܫܥܝܼ ܘܬܫܲܥ ܫܸܢܹ̈ܐ، ܦܝܼܫ ܠܹܗ ܚܸܙܝܵܐ ܡܵܪܝܵܐ ܠܐܲܒ݂ܪܵܡ، ܘܐ݇ܡܝܼܪܹܗ ܐܸܠܹܗ، ”ܐܵܢܵܐ ܝܘܸܢ ܐܲܠܵܗܵܐ ܚܲܝܠܬܵܢܵܐ، ܚܕܘܿܪ ܩܵܕ݇ܡܝܼ ܘܗܘܝܼ ܬܲܡܝܼܡܵܐ. 2ܘܒܸܬ ܡܲܬܒܸܢ ܘܲܥܕܝܼ ܒܹܝܠܝܼ ܘܒܹܝܠܘܼܟ݂، ܘܒܸܬ ܡܲܙܝܸܕܸܢܘܼܟ݂ ܒܡܸܠܝܘܼܬܵܐ.“ 3ܢܦܝܼܠ ܠܹܗ ܐܲܒ݂ܪܵܡ ܥܲܠ ܦܵܬܹܗ ܘܐ݇ܡܝܼܪܹܗ ܐܸܠܹܗ ܐܲܠܵܗܵܐ، 4”ܗܵܐ ܐܵܗܵܐ ܝܠܹܗ ܘܲܥܕܝܼ ܥܲܡܘܼܟ݂، ܕܒܸܬ ܗܵܘܹܝܬ ܒܵܒܵܐ ܠܪܵܒܵܐ ܐܸܡܘܵܬܹ̈ܐ. 5ܘܫܸܡܘܼܟ݂ ܐ݇ܚܹܪ݇ܢܵܐ ܠܹܐ ܦܵܐܹܫ ܩܸܪܝܵܐ ܐܲܒ݂ܪܵܡ؛#17:5 ܥܸܒ݂ܪܵܐܝܼܬ ܒܡܲܥܢܵܝܵܐ: ܒܵܒܵܐ ܪܵܡܵܐ؛ ܒܵܒܵܐ ܥܸܠܵܝܵܐ ܐܸܠܵܐ ܒܸܬ ܗܵܘܹܐ ܫܸܡܘܼܟ݂ ܐܲܒ݂ܪܵܗܵܡ،#17:5 ܥܸܒ݂ܪܵܐܝܼܬ ܒܡܲܥܢܵܝܵܐ: ܒܵܒܵܐ ܕܪܵܒܵܐ ܥܲܡܡܹ̈ܐ ܣܵܒܵܒ ܒܸܬ ܥܵܒ݂ܕܹܢܘܼܟ݂ ܒܵܒܵܐ ܕܪܵܒܵܐ ܐܸܡܘܵܬܹ̈ܐ. 6ܒܸܬ ܡܲܦܪܸܝܢܘܼܟ݂ ܪܵܒܵܐ ܪܵܒܵܐ، ܘܒܸܬ ܡܲܩܸܡܸܢ ܐܸܡܘܵܬܹ̈ܐ ܡܸܢܘܼܟ݂، ܘܡܲܠܟܹ̈ܐ ܡܸܢܘܼܟ݂ ܒܸܬ ܦܵܠܛܝܼ. 7ܘܒܸܬ ܡܲܬܒܸܢ ܘܲܥܕܝܼ ܒܹܝܠܝܼ ܘܒܹܝܠܘܼܟ݂ ܘܒܹܝܠ ܙܲܪܥܘܼܟ݂ ܡ̣ܢ ܒܵܬ݇ܪ ܡܸܢܘܼܟ݂ ܠܕܵܘܪܲܝܗܝ، ܘܲܥܕܵܐ ܠܥܵܠܲܡ ܠܸܗܘܵܝܵܐ ܐܸܠܘܼܟ݂ ܐܲܠܵܗܵܐ ܘܠܙܲܪܥܘܼܟ݂ ܡ̣ܢ ܒܵܬ݇ܪ ܡܸܢܘܼܟ݂. 8ܘܒܸܬ ܝܵܗ݇ܒܹܢ ܐܸܠܘܼܟ݂ ܘܠܙܲܪܥܘܼܟ݂ ܡ̣ܢ ܒܵܬ݇ܪ ܡܸܢܘܼܟ݂ ܐܲܪܥܵܐ ܕܡܵܫܵܚܲܛܘܼܬܘܼܟ݂، ܟܠܵܗ̇ ܐܲܪܥܵܐ ܕܟܢܲܥܢ، ܝܵܪܬܘܼܬܵܐ ܠܥܵܠܲܡ، ܘܒܸܬ ܗܵܘܹܝܢ ܐܸܠܲܝܗܝ ܐܲܠܵܗܵܐ.“
ܘܲܥܕܵܐ ܕܓܙܘܼܪܬܵܐ
9ܘܐ݇ܡܝܼܪܹܗ ܐܲܠܵܗܵܐ ܠܐܲܒ݂ܪܵܗܵܡ، ”ܢܵܛܪܹܬ ܠܘܲܥܕܝܼ، ܐܲܢ݇ܬ ܘܙܲܪܥܘܼܟ݂ ܕܡ̣ܢ ܒܵܬ݇ܪ ܡܸܢܘܼܟ݂ ܠܕܵܘܪ̈ܲܝܗܝ. 10ܐܵܗܵܐ ܝܠܹܗ ܘܲܥܕܝܼ ܕܢܵܛܪܝܼܬܘܿܢ ܒܹܝܠܝܼ ܘܒܹܝܠܵܘܟ݂ܘܿܢ، ܘܒܹܝܠ ܙܲܪܥܘܼܟ݂ ܕܡ̣ܢ ܒܵܬ݇ܪ ܡܸܢܘܼܟ݂: ܕܦܵܐܹܫ ܓܙܝܼܪܵܐ ܟܠ ܐܘܼܪܙܵܐ ܓܵܘܵܘܟ݂ܘܿܢ. 11ܓܵܙܪܝܼܬܘܿܢ ܒܸܣܪܵܐ ܕܥܘܼܪܠܘܼܬܵܘܟ݂ܘܿܢ، ܘܒܸܬ ܗܵܘܹܐ ܢܝܼܫܲܢܩܵܐ ܕܘܲܥܕܵܐ ܒܹܝܠܝܼ ܘܒܹܝܠܵܘܟ݂ܘܿܢ. 12ܟܠ ܐܘܼܪܙܵܐ ܕܝܼܠܹܗ ܒܲܪ ܬܡܵܢܝܵܐ ܝܵܘܡܵܢܹ̈ܐ ܓܵܘܵܘܟ݂ܘܿܢ ܦܵܐܹܫ ܓܙܝܼܪܵܐ؛ ܡ̣ܢ ܕܵܘܪܵܐ ܠܕܵܘܪܵܐ، ܐܸܢ ܒܸܪܝܵܐ ܝܠܹܗ ܓܵܘ ܒܲܝܬܘܼܟ݂، ܝܲܢ ܙܒ݂ܝܼܢܵܐ ܝܠܹܗ ܒܙܘܼܙܵܐ ܡ̣ܢ ܢܘܼܟ݂ܪܵܝܵܐ، ܕܠܹܐ ܝܠܹܗ ܡ̣ܢ ܙܲܪܥܘܼܟ݂. 13ܦܵܐܹܫ ܓܙܝܼܪܵܐ ܗ̇ܘ ܕܝ݇ܠܝܼܕܵܐ ܝܠܹܗ ܓܵܘ ܒܲܝܬܘܼܟ݂ ܘܗ̇ܘ ܕܦܝܼܫܵܐ ܝܠܹܗ ܙܒ݂ܝܼܢܵܐ ܒܙܘܼܙܵܐ. ܘܗܲܕܟ݂ܵܐ ܒܸܬ ܗܵܘܹܐ ܘܲܥܕܝܼ ܒܒܸܣܪܵܘܟ݂ܘܿܢ، ܘܲܥܕܵܐ ܠܥܵܠܲܡ. 14ܟܠ ܐܘܼܪܙܵܐ ܕܠܹܐ ܝܠܹܗ ܓܙܝܼܪܵܐ ܒܒܸܣܪܵܐ ܕܥܘܼܪܠܘܼܬܹܗ، ܒܸܬ ܦܵܐܹܫ ܩܛܝܼܥܵܐ ܡ̣ܢ ܛܵܝܸܦܹܗ ܣܵܒܵܒ ܫܡܝܼܛ ܠܹܗ ܘܲܥܕܝܼ.“
ܐܲܠܵܗܵܐ ܫܲܚܠܘܼܦܹܐ ܫܸܡܵܐ ܕܣܲܪܲܝ
15ܘܐ݇ܡܝܼܪܹܗ ܐܲܠܵܗܵܐ ܠܐܲܒ݂ܪܵܗܵܡ، ”ܣܲܪܲܝ ܒܲܟ݂ܬܘܼܟ݂، ܐ݇ܚܹܪ݇ܢܵܐ ܠܵܐ ܩܵܪܹܝܬ ܠܹܗ ܫܸܡܘܼܗ̇ ܣܲܪܲܝ، ܐܝܼܢܵܐ ܣܲܪܵܐ#17:15 ܐܘܼܦ ܣܲܪܲܝ ܐܘܼܦ ܣܲܪܵܐ ܥܸܒ݂ܪܵܐܝܼܬ ܒܡܲܥܢܵܝܵܐ: ܒܪܵܬ݇ ܡܲܠܟܵܐ ܗܵܘܹܐ ܫܸܡܘܼܗ̇. 16ܒܸܬ ܒܲܪܟܸܢܵܗ̇، ܘܒܸܬ ܝܵܗ݇ܒܹܢܘܼܟ݂ ܒܪܘܿܢܵܐ ܡܸܢܘܼܗ̇؛ ܒܸܬ ܒܲܪܟܸܢܵܗ̇، ܘܒܸܬ ܗܵܘܝܵܐ ܝܸܡܵܐ ܠܐܸܡܘܵܬܹ̈ܐ، ܘܡܲܠܟܹ̈ܐ ܕܥܲܡܡܹ̈ܐ ܡܸܢܘܼܗ̇ ܒܸܬ ܦܵܠܛܝܼ.“ 17ܘܢܦܝܼܠ ܠܹܗ ܐܲܒ݂ܪܵܗܵܡ ܥܲܠ ܦܵܬܹܗ ܘܓܚܝܼܟ ܠܹܗ، ܘܐ݇ܡܝܼܪܹܗ ܒܠܸܒܹܗ، ”ܒܸܬ ܗܵܘܹܐ ܒܪܘܿܢܵܐ ܠܐ݇ܢܵܫܵܐ ܕܝܼܠܹܗ ܒܲܪ ܐܸܡܵܐܐ ܫܸܢܹ̈ܐ؟ ܘܣܲܪܵܐ ܕܝܼܠܵܗ̇ ܒܲܪ݇ܬ ܬܸܫܥܝܼ ܫܸܢܹ̈ܐ ܒܸܬ ܗܲܨܠܵܐ؟“ 18ܘܐ݇ܡܝܼܪܹܗ ܐܲܒ݂ܪܵܗܵܡ ܠܐܲܠܵܗܵܐ، ”ܛܘܼܒ݂ܵܐ ܕܐܝܼܫܡܲܥܹܝܠ ܚܵܝܹܐ ܩܵܕ݇ܡܘܼܟ݂.“ 19ܐ݇ܡܝܼܪܹܗ ܐܲܠܵܗܵܐ، ”ܠܵܐ، ܐܝܼܢܵܐ ܣܲܪܵܐ ܒܲܟ݂ܬܘܼܟ݂ ܒܸܬ ܗܲܨܠܵܐ ܠܘܼܟ݂ ܒܪܘܿܢܵܐ، ܘܒܸܬ ܩܵܪܹܝܬ ܫܸܡܹܗ ܐܝܼܣܚܵܩ.#17:19 ܥܸܒ݂ܪܵܐܝܼܬ ܒܡܲܥܢܵܝܵܐ: ܗ̇ܘ ܕܟܹܐ ܓܵܚܹܟ ܒܸܬ ܫܲܬܐܸܣܸܢ ܘܲܥܕܝܼ ܥܲܡܹܗ، ܘܲܥܕܝܼ ܕܠܥܵܠܲܡ، ܘܠܙܲܪܥܹܗ ܕܡ̣ܢ ܒܵܬ݇ܪ ܡܸܢܹܗ. 20ܘܒܘܼܬ ܐܝܼܫܡܲܥܹܝܠ، ܩܲܡ ܫܵܡܥܹܢܘܼܟ݂؛ ܗܵܐ ܒܸܬ ܒܲܪܟܸܢܹܗ، ܘܒܸܬ ܡܲܦܪܸܝܢܹܗ ܘܒܸܬ ܡܲܙܝܸܕܸܢܹܗ ܪܵܒܵܐ ܪܵܒܵܐ؛ ܒܸܬ ܗܵܘܹܐ ܒܵܒܵܐ ܠܬܪܸܥܣܲܪ ܪܵܘܪ̈ܒ݂ܵܢܹܐ، ܘܒܸܬ ܥܵܒ݂ܕܹܢܹܗ ܐܘܼܡܬܵܐ ܓܘܼܪܬܵܐ. 21ܐܝܼܢܵܐ ܘܲܥܕܝܼ ܒܸܬ ܗܵܘܹܐ ܥܲܡ ܐܝܼܣܚܵܩ، ܗ̇ܘ ܕܒܸܬ ܗܲܨܠܵܐ ܠܹܗ ܐܸܠܘܼܟ݂ ܣܲܪܵܐ، ܒܐܵܗܵܐ ܥܕܵܢܵܐ ܒܫܹܢ݇ܬܵܐ ܕܒܹܐܬܵܝܵܐ ܝܠܵܗ̇.“
ܓܙܘܼܪܬܵܐ ܕܐܲܒ݂ܪܵܗܵܡ ܘܕܟܠܹܗ ܒܲܝܬܹܗ
22ܟܲܕ ܦܪܝܼܩ ܠܹܗ ܡ̣ܢ ܗܲܡܙܘܼܡܹܐ ܥܲܡܹܗ، ܐ݇ܣܝܼܩ ܠܹܗ ܐܲܠܵܗܵܐ ܡ̣ܢ ܠܟܸܣ ܐܲܒ݂ܪܵܗܵܡ. 23ܘܗܲܪ ܒܗ̇ܘ ܝܵܘܡܵܐ ܫܩܝܼܠ ܠܹܗ ܐܲܒ݂ܪܵܗܵܡ ܠܐܝܼܫܡܲܥܹܝܠ ܒܪܘܿܢܹܗ ܘܠܟܠܲܝܗܝ ܐܵܢܝܼ ܕܝ݇ܠܝܼܕܹܐ ܝܗ݇ܘܵܘ ܓܵܘ ܒܲܝܬܹܗ ܝܲܢ ܙܒ݂ܝܼܢܹܐ ܒܙܘܼܙܘܼ̈ܗܝ، ܟܠ ܐܘܼܪܙܵܐ ܕܓܵܘ ܐ݇ܢܵܫܹ̈ܐ ܕܒܲܝܬܹܗ، ܘܓܙܝܼܪܹܗ ܠܒܸܣܪܵܐ ܕܥܘܼܪܠܘܼܬܲܝܗܝ، ܕܵܐܟ݂ܝܼ ܕܗܘܼܡܙܸܡ ܠܹܗ ܥܲܡܹܗ ܐܲܠܵܗܵܐ. 24ܘܐܲܒ݂ܪܵܗܵܡ ܒܲܪ ܬܸܫܥܝܼ ܘܬܫܲܥ ܫܸܢܹ̈ܐ ܝܗ݇ܘܵܐ ܐܝܼܡܲܢ ܕܦܝܼܫ ܠܹܗ ܓܙܝܼܪܵܐ ܒܒܸܣܪܵܐ ܕܥܘܼܪܠܘܼܬܹܗ. 25ܘܐܝܼܫܡܲܥܹܝܠ ܒܪܘܿܢܹܗ ܒܲܪ ܬܪܸܥܣܲܪ ܫܸܢܹ̈ܐ ܝܗ݇ܘܵܐ ܐܝܼܡܲܢ ܕܦܝܼܫ ܠܹܗ ܓܙܝܼܪܵܐ ܒܒܸܣܪܵܐ ܕܥܘܼܪܠܘܼܬܹܗ. 26ܗܲܪ ܒܗ̇ܘ ܝܵܘܡܵܐ ܦܝܼܫ ܠܗܘܿܢ ܓܙܝܼܪܹܐ ܐܲܒ݂ܪܵܗܵܡ ܘܐܝܼܫܡܲܥܹܝܠ ܒܪܘܿܢܹܗ؛ 27ܘܟܠܲܝܗܝ ܐ݇ܢܵܫܹ̈ܐ ܕܒܲܝܬܹܗ، ܐܵܢܝܼ ܕܦܝܼܫܹܐ ܝܗ݇ܘܵܘ ܝ݇ܠܝܼܕܹܐ ܓܵܘ ܒܲܝܬܹܗ، ܘܐܵܢܝܼ ܕܙܒ݂ܝܼܢܹܐ ܝܗ݇ܘܵܘ ܒܙܘܼܙܵܐ ܡ̣ܢ ܢܘܼܟ݂ܪ̈ܵܝܹܐ، ܦܝܼܫ ܠܗܘܿܢ ܓܙܝܼܪܹܐ ܥܲܡܹܗ.
Okuqokiwe okwamanje:
ܒܪܝܬܐ 17: ABTAB
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Aramaic Bible Translation Assyrian Bible © 2025 Aramaic Bible Translation