ܒܪܝܬܐ 7
7
ܢܘܿܚ ܘܒܲܝܬܹܗ ܒܸܥܒ݂ܵܪܵܐ ܠܩܹܒ݂ܘܼܬܵܐ
1ܘܐ݇ܡܝܼܪܹܗ ܡܵܪܝܵܐ ܠܢܘܿܚ، ”ܥܒ݂ܘܿܪ ܐܲܢ݇ܬ ܘܟܠܹܗ ܒܲܝܬܘܼܟ݂ ܠܩܹܒ݂ܘܼܬܵܐ، ܣܵܒܵܒ ܚܙܹܐ ܠܝܼ ܐܸܠܘܼܟ݂ ܕܙܲܕܝܼܩܵܐ ܝܘܸܬ ܩܵܕ݇ܡܝܼ ܒܐܵܗܵܐ ܕܵܘܪܵܐ. 2ܡ̣ܢ ܟܠ ܒܥܝܼܪܵܐ ܕܸܟ݂ܝܵܐ ܫܵܩܠܹܬ ܠܘܼܟ݂ ܫܲܒ݂ܥܵܐ ܫܲܒ݂ܥܵܐ، ܐܘܼܪܙܵܐ ܘܢܸܩܒ݂ܵܐ؛ ܘܡ̣ܢ ܒܥܝܼܪܵܐ ܠܵܐ ܕܸܟ݂ܝܵܐ ܫܵܩܠܹܬ ܬܪܹܝ ܬܪܹܝ، ܐܘܼܪܙܵܐ ܘܢܸܩܒ݂ܵܐ؛ 3ܘܐܘܼܦ ܡ̣ܢ ܟܠ ܦܵܪܲܚܬܵܐ ܕܫܡܲܝܵܐ ܫܲܒ݂ܥܵܐ ܫܲܒ݂ܥܵܐ، ܐܘܼܪܙܵܐ ܘܢܸܩܒ݂ܵܐ، ܕܦܵܐܹܫ ܓܸܢܣܲܝܗܝ ܢܛܝܼܪܵܐ ܚܵܝܵܐ ܥܲܠ ܦܵܬܵܐ ܕܟܠܵܗ̇ ܐܲܪܥܵܐ. 4ܣܵܒܵܒ ܡ̣ܢ ܒܵܬ݇ܪ ܫܲܒ݂ܥܵܐ ܝܵܘܡܵܢܹ̈ܐ ܒܸܬ ܡܲܪܥܹܝܢ ܡܸܛܪܵܐ ܥܲܠ ܐܲܪܥܵܐ، ܩܵܐ ܡܸܬܚܵܐ ܕܐܲܪܒܥܝܼ ܝܵܘܡܵܢܹ̈ܐ ܘܐܲܪܒܥܝܼ ܠܲܝܠܵܘܵܬܹ̈ܐ؛ ܒܸܬ ܓܵܪܕܹܢ ܠܟܠ ܡܸܢܕܝܼ ܚܵܝܵܐ ܕܥܒ݂ܝܼܕ ܠܝܼ ܡܥܲܠ ܦܵܬܵܐ ܕܐܲܪܥܵܐ.“ 5ܘܥܒ݂ܝܼܕ ܠܹܗ ܢܘܿܚ ܟܠ ܡܸܢܕܝܼ ܕܦܩܝܼܕ ܠܹܗ ܐܸܠܹܗ ܡܵܪܝܵܐ.
6ܢܘܿܚ ܒܲܪ ܐܸܫܸܬܡܵܐܐ ܫܸܢܹ̈ܐ ܝܗ݇ܘܵܐ ܟܲܕ ܛܵܘܦܵܢܵܐ ܕܡ̈ܝܼܵܐ ܗܘܹܐ ܠܹܗ ܥܲܠ ܐܲܪܥܵܐ. 7ܥܒ݂ܝܼܪܹܗ ܢܘܿܚ ܥܲܡ ܒܢܘܿܢܘܼ̈ܗܝ، ܒܲܟ݂ܬܹܗ، ܘܒܲܟ݂ܬܵܬܹ̈ܐ ܕܒܢܘܿܢܘܼ̈ܗܝ ܠܩܹܒ݂ܘܼܬܵܐ ܡ̣ܢ ܩܵܕ݇ܡ ܕܫܲܪܝܼ ܗ݇ܘܵܘ ܡ̈ܝܼܵܐ ܕܛܵܘܦܵܢܵܐ. 8ܡ̣ܢ ܒܥܝܼܪܵܐ ܕܸܟ݂ܝܵܐ ܘܡ̣ܢ ܒܥܝܼܪܵܐ ܠܵܐ ܕܸܟ݂ܝܵܐ، ܡ̣ܢ ܦܵܪܲܚܬܵܐ ܘܡ̣ܢ ܟܠ ܪܲܚܫܵܢܵܐ ܕܥܲܠ ܐܲܪܥܵܐ، 9ܬܪܹܝ ܬܪܹܝ، ܐܘܼܪ̈ܙܹܐ ܘܢܸܩܒܹ̈ܐ، ܥܒ݂ܝܼܪܗܘܿܢ ܥܲܡ ܢܘܿܚ ܠܩܹܒ݂ܘܼܬܵܐ، ܐܲܝܟ݂ ܕܦܩܝܼܕ ܠܹܗ ܐܲܠܵܗܵܐ ܠܢܘܿܚ. 10ܘܡ̣ܢ ܒܵܬ݇ܪ ܫܲܒ݂ܥܵܐ ܝܵܘܡܵܢܹ̈ܐ، ܗܘܹܐ ܠܹܗ ܡ̈ܝܼܵܐ ܕܛܵܘܦܵܢܵܐ ܥܲܠ ܐܲܪܥܵܐ.
11ܒܫܹܢ݇ܬܵܐ ܕܐܸܫܸܬܡܵܐܐ ܡ̣ܢ ܚܲܝܹ̈ܐ ܕܢܘܿܚ، ܒܝܲܪܚܵܐ ܕܬܪܹܝ ܒܝܵܘܡܵܐ ܕܫܒܲܥܣܲܪ ܒܝܼܹܗ، ܒܗ̇ܘ ܝܵܘܡܵܐ ܦܝܼܫ ܠܗܘܿܢ ܡܘܼܦܩܸܥܹܐ ܟܠܲܝܗܝ ܡܲܒܘܼܥܹ̈ܐ ܕܬܗܘܿܡܹ̈ܐ ܓܘܼܪܹ̈ܐ، ܘܟܵܘܵܬܹ̈ܐ ܕܫܡܲܝܵܐ ܦܝܼܫ ܠܗܘܿܢ ܦܬܝܼܚܹܐ. 12ܘܫܦܝܼܟ݂ ܠܵܗ̇ ܡܸܛܪܵܐ ܥܲܠ ܐܲܪܥܵܐ ܐܲܪܒܥܝܼ ܝܵܘܡܵܢܹ̈ܐ ܘܐܲܪܒܥܝܼ ܠܲܝܠܵܘܵܬܹ̈ܐ.
13ܗܲܪ ܒܗ̇ܘ ܝܵܘܡܵܐ ܥܒ݂ܝܼܪܹܗ ܢܘܿܚ ܠܩܹܒ݂ܘܼܬܵܐ، ܥܲܡ ܒܢܘܿܢܘܼ̈ܗܝ ܫܹܝܡ، ܚܵܡ، ܘܝܲܦ̮ܬ، ܘܒܲܟ݂ܬܹܗ، ܘܬܠܵܬ ܒܲܟ݂ܬܵܬܹ̈ܐ ܕܒܢܘܿܢܘܼ̈ܗܝ، 14ܐܵܢܝܼ، ܘܟܠ ܚܲܝܘܬܵܐ ܐܲܝܟ݂ ܓܸܢܣܘܼܗ̇، ܘܟܠ ܒܥܝܼܪܵܐ ܐܲܝܟ݂ ܓܸܢܣܹܗ، ܘܟܠ ܪܲܚܫܵܐ ܕܪܵܚܹܫ ܥܲܠ ܐܲܪܥܵܐ ܐܲܝܟ݂ ܓܸܢܣܹܗ، ܘܟܠ ܦܵܪܲܚܬܵܐ ܐܲܝܟ݂ ܓܸܢܣܘܼܗ̇، ܟܠ ܛܲܝܪܵܐ ܡܵܪܹܐ ܓܘܼܠܦܵܐ. 15ܥܒ݂ܝܼܪܗܘܿܢ ܥܲܡ ܢܘܿܚ ܠܩܹܒ݂ܘܼܬܵܐ، ܬܪܹܝ ܬܪܹܝ ܡ̣ܢ ܐܝܼܬܝܵܐ ܚܵܝܵܐ ܕܐܝܼܬ ܒܝܼܹܗ ܢܫܲܡܬܵܐ ܕܚܲܝܹ̈ܐ. 16ܘܐܵܢܝܼ ܕܥܒ݂ܝܼܪܗܘܿܢ، ܐܘܼܪܙܵܐ ܘܢܸܩܒ݂ܵܐ ܡ̣ܢ ܟܠ ܐܝܼܬܝܵܐ ܚܵܝܵܐ، ܥܒ݂ܝܼܪܗܘܿܢ ܕܵܐܟ݂ܝܼ ܕܩܲܡ ܦܵܩܹܕ ܠܹܗ ܐܲܠܵܗܵܐ. ܘܕܒ݂ܝܼܪܹܗ ܡܵܪܝܵܐ ܬܲܪܥܵܐ ܥܲܠܘܼܗܝ.
17ܘܗܘܹܐ ܠܹܗ ܛܵܘܦܵܢܵܐ ܥܲܠ ܐܲܪܥܵܐ ܐܲܪܒܥܝܼ ܝܵܘܡܵܢܹ̈ܐ، ܘܙܝܼܕ ܠܗܘܿܢ ܡ̈ܝܼܵܐ، ܘܡܘܼܪܸܡ ܠܗܘܿܢ ܠܩܹܒ݂ܘܼܬܵܐ ܘܦܝܼܫ ܠܵܗ̇ ܡܘܼܪܸܡܬܵܐ ܡ̣ܢ ܐܲܪܥܵܐ. 18ܚܘܼܠܸܢܗܘܿܢ ܡ̈ܝܼܵܐ، ܘܙܝܼܕ ܠܗܘܿܢ ܪܵܒܵܐ ܥܲܠ ܐܲܪܥܵܐ، ܘܚܕܝܼܪܵܗ̇ ܩܹܒ݂ܘܼܬܵܐ ܥܲܠ ܦܵܬܵܐ ܕܡ̈ܝܼܵܐ. 19ܘܚܘܼܠܸܢܗܘܿܢ ܡ̈ܝܼܵܐ ܪܵܒܵܐ ܪܵܒܵܐ ܥܲܠ ܐܲܪܥܵܐ، ܘܦܝܼܫ ܠܗܘܿܢ ܟܘܼܣܝܹܐ ܟܠܲܝܗܝ ܛܘܼܪ̈ܵܢܹܐ ܪ̈ܵܡܹܐ ܕܝܼܢܵܐ ܬܚܘܿܬ ܟܠܵܗ̇ ܫܡܲܝܵܐ؛ 20ܚܲܡܫܲܥܣܲܪ ܝܲܡܝܼܢܹ̈ܐ ܐ݇ܣܝܼܩ ܠܗܘܿܢ ܡ̈ܝܼܵܐ، ܘܦܝܼܫ ܠܗܘܿܢ ܟܘܼܣܝܹܐ ܟܠܲܝܗܝ ܛܘܼܪ̈ܵܢܹܐ. 21ܘܡܝܼܬ ܠܹܗ ܟܠ ܐܝܼܬܝܵܐ ܚܵܝܵܐ ܕܓ̰ܵܘܹܓ̰ ܥܲܠ ܐܲܪܥܵܐ، ܦܵܪܲܚܬܵܐ، ܘܒܥܝܼܪܵܐ، ܘܚܲܝܘܬܵܐ، ܘܟܠ ܪܲܚܫܵܐ ܪܵܚܫܵܢܵܐ ܥܲܠ ܐܲܪܥܵܐ، ܘܟܠ ܒܲܪܢܵܫܵܐ. 22ܟܠ ܡܸܢܕܝܼ ܕܥܲܠ ܒܸܪܙܵܐ، ܕܐܝܼܬ ܗ݇ܘܵܐ ܢܫܲܡܬܵܐ ܕܚܲܝܹ̈ܐ ܒܦܘܼܩܵܩܘܼ̈ܗܝ، ܡܝܼܬ ܠܹܗ. 23ܘܓܪܝܼܕ ܠܹܗ ܟܠ ܡܸܢܕܝܼ ܚܵܝܵܐ ܕܐܝܼܬ ܗ݇ܘܵܐ ܥܲܠ ܦܵܬܵܐ ܕܐܲܪܥܵܐ، ܡ̣ܢ ܒܲܪܢܵܫܵܐ، ܗܲܠ ܒܥܝܼܪܵܐ، ܘܗܲܠ ܪܲܚܫܵܐ، ܘܗܲܠ ܦܵܪܲܚܬܵܐ ܕܫܡܲܝܵܐ؛ ܦܝܼܫ ܠܗܘܿܢ ܓܪܝܼܕܹܐ ܡ̣ܢ ܐܲܪܥܵܐ. ܐܲܚܟ̰ܝܼ ܦܝܼܫ ܠܗܘܿܢ ܫܒ݂ܝܼܩܹܐ ܢܘܿܚ ܘܐܵܢܝܼ ܕܥܲܡܹܗ ܝܗ݇ܘܵܘ ܒܩܹܒ݂ܘܼܬܵܐ. 24ܘܚܘܼܠܸܢܗܘܿܢ ܡ̈ܝܼܵܐ ܥܲܠ ܐܲܪܥܵܐ ܐܸܡܵܐܐ ܘܚܲܡܫܝܼ ܝܵܘܡܵܢܹ̈ܐ.
Okuqokiwe okwamanje:
ܒܪܝܬܐ 7: ABTAB
Qhakambisa
Dlulisela
Qhathanisa
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Aramaic Bible Translation Assyrian Bible © 2025 Aramaic Bible Translation