ܡܠܐܟ݂ܝ 2
2
ܡܵܪܝܵܐ ܒܸܢܓ̰ܵܘܵܐ ܒܟܵܗܢܹ̈ܐ
1”ܘܐܵܕܝܼܵܐ ܐܵܗܵܐ ܦܘܼܩܕܵܢܵܐ ܥܲܠܵܘܟ݂ܘܿܢ ܝܼܠܹܗ، ܝܵܐ ܟܵܗܢܹ̈ܐ. 2ܐܸܢ ܠܵܐ ܫܵܡܥܝܼܬܘܿܢ، ܘܐܸܢ ܠܵܐ ܡܲܣܸܡܝܼܬܘܿܢ ܒܵܠܵܐ، ܠܝܼܵܗ݇ܒ݂ܵܐ ܐܝܼܩܵܪܵܐ ܠܫܸܡܝܼ،“ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ، ”ܒܸܬ ܫܲܕܪܸܢ ܥܲܠܵܘܟ݂ܘܿܢ ܠܵܘܛܬܵܐ، ܘܒܸܬ ܠܵܝܛܹܢ ܒܘܼܪ̈ܟܵܬܵܘܟ݂ܘܿܢ، ܘܐܘܼܦ ܠܝܼܛܲܝ ܠܝܼ، ܣܵܒܵܒ ܠܹܐ ܝܬܘܿܢ ܡܲܣܘܼܡܹܐ ܒܵܠܵܐ. 3ܗܵܐ ܐܵܢܵܐ ܒܸܩܛܵܥܵܐ ܝܘܸܢ ܣܵܒܵܒ ܕܝܼܵܘܟ݂ܘܿܢ ܠܒܲܪܙܲܪܥܵܐ، ܘܒܸܬ ܒܲܪܒܸܙܸܢ ܦܸܪܬܵܐ ܕܕܸܒ݂ܚܹ̈ܐ ܕܥܹܐܕܵܘ̈ܟ݂ܘܿܢ ܥܲܠ ܦܵܬܵܘܟ݂ܘܿܢ، ܘܒܸܬ ܦܵܝܫܝܼܬܘܿܢ ܫܩܝܼܠܹܐ ܥܲܡܘܼܗ̇. 4ܘܒܸܬ ܝܵܕܥܝܼܬܘܿܢ ܕܫܘܼܕܸܪܝܼ ܐܸܠܵܘܟ݂ܘܿܢ ܐܵܗܵܐ ܦܘܼܩܕܵܢܵܐ ܕܥܲܪܩܸܠ ܘܲܥܕܝܼ ܥܲܡ ܠܹܘܝܼ،“ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ. 5”ܘܲܥܕܝܼ ܗܘܹܐ ܠܹܗ ܥܲܡܹܗ، ܘܲܥܕܵܐ ܕܚܲܝܹ̈ܐ ܘܕܫܠܵܡܵܐ، ܘܝܘܼܗܒܲܝ ܠܝܼ ܐܸܠܹܗ ܠܙܕܘܼܥܬܵܐ، ܘܙܕܝܼܥ ܠܹܗ ܡܸܢܝܼ، ܘܡ̣ܢ ܩܵܕ݇ܡ ܫܸܡܝܼ ܫܥܝܼܫ ܠܹܗ ܗ̇ܘ. 6ܢܵܡܘܿܣܵܐ ܕܫܲܪܝܼܪܘܼܬܵܐ ܗܘܹܐ ܠܹܗ ܒܦܘܼܡܹܗ، ܘܥܵܘܠܵܐ ܠܵܐ ܡܫ݇ܟ̰ܝܼܚ ܠܹܗ ܒܣܸܦܘܵܬܹ̈ܗ، ܒܫܠܵܡܵܐ ܘܒܬܪܘܼܨܘܼܬܵܐ ܚܕܝܼܪܹܗ ܥܲܡܝܼ، ܘܪܵܒܵܐ ܡܘܼܕܸܪܹܗ ܡ̣ܢ ܥܵܘܠܵܐ. 7ܣܵܒܵܒ ܣܸܦܘܵܬܹ̈ܐ ܕܟܵܗܢܵܐ ܟܹܐ ܢܵܛܪܝܼ ܝ݇ܕܲܥܬܵܐ، ܘܢܵܡܘܿܣܵܐ ܟܹܐ ܒܲܩܪܝܼ ܡ̣ܢ ܦܘܼܡܹܗ، ܣܵܒܵܒ ܐܝܼܙܓܲܕܵܐ ܕܡܵܪܝܵܐ ܚܲܝܠܬܵܢܵܐ ܝܠܹܗ ܗ̇ܘ. 8ܐܝܼܢܵܐ ܐܲܚܬܘܿܢ ܩܠܝܼܒ ܠܵܘܟ݂ܘܿܢ ܡ̣ܢ ܐܘܼܪܚܵܐ، ܘܥܒ݂ܝܼܕ ܠܵܘܟ݂ܘܿܢ ܕܬܲܪܩܸܠܝܼ ܪܵܒܵܐ ܒܢܵܡܘܿܣܵܐ، ܡܘܼܚܪܸܒ݂ ܠܵܘܟ݂ܘܿܢ ܩܵܘܠܵܐ ܕܠܹܘܝܼ،“ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ. 9”ܘܐܘܼܦ ܐܵܢܵܐ ܩܲܡ ܥܵܒ݂ܕܹܢܵܘܟ݂ܘܿܢ ܡܘܼܣܠܝܼܹ̈ܐ ܘܟܘܼܦܹ̈ܐ ܩܵܕ݇ܡ ܟܠܹܗ ܛܵܝܸܦܵܐ ܟܡܵܐ ܕܠܹܐ ܝܬܘܿܢ ܒܸܢܛܵܪܵܐ ܐܘܼܪ̈ܚܵܬܝܼ، ܘܒܸܚܙܵܝܵܐ ܝܬܘܿܢ ܦܵܬܵܐ ܒܢܵܡܘܿܣܵܐ.“
ܥܒ݂ܵܕܬܵܐ ܕܚܵܝܝܼܢܘܼܬܵܐ
10ܗܵܐ ܠܹܐ ܝܠܹܗ ܚܲܕ ܒܵܒܵܐ ܠܟܠܲܢ؟ ܗܵܐ ܠܵܐ ܚܲܕ ܐܲܠܵܗܵܐ ܩܲܡ ܒܵܪܹܐ ܠܲܢ؟ ܩܵܡܘܿܕܝܼ ܒܸܥܒ݂ܵܕܵܐ ܝܘܲܚ ܚܵܝܝܼܢܘܼܬܵܐ ܟܠ ܚܲܕ ܥܲܠ ܐܲܚܘܿܢܘܼܗܝ، ܠܸܫܚܵܡܵܐ ܘܲܥܕܵܐ ܕܒܵܒܵܘܵܬܲܢ̈؟ 11ܥܒ݂ܝܼܕ ܠܹܗ ܚܵܝܝܼܢܘܼܬܵܐ ܝܼܗܘܼܕܵܐ، ܘܛܲܡܐܘܼܬܵܐ ܦܝܼܫ ܠܵܗ̇ ܥܒ݂ܝܼܕܬܵܐ ܒܝܼܣܪܵܝܹܠ ܘܒܐܘܿܪܸܫܠܸܡ، ܣܵܒܵܒ ܫܚܝܼܡ ܠܹܗ ܝܼܗܘܼܕܵܐ ܠܩܘܼܕܫܵܐ ܕܡܵܪܝܵܐ ܕܡܘܼܚܸܒ ܠܹܗ، ܟܲܕ ܓܒ݂ܝܼܪܹܗ ܒܪܵܬܵܐ ܕܐܲܠܵܗܵܐ ܢܘܼܟ݂ܪܵܝܵܐ. 12ܒܸܬ ܩܵܛܹܥ ܡܵܪܝܵܐ ܠܐ݇ܢܵܫܵܐ ܕܥܵܒܹܕ ܐܵܗܵܐ، ܪܥܝܼܫܵܐ ܘܓ̰ܲܘܸܒܵܢܵܐ، ܡ̣ܢ ܡܲܫܟܢܹ̈ܐ ܕܝܲܥܩܘܿܒ݂، ܘܠܡܲܩܪܸܒ݂ܵܢܵܐ ܕܩܘܼܪܒܵܢܵܐ ܠܡܵܪܝܵܐ ܚܲܝܠܬܵܢܵܐ.
13ܘܐܵܗܵܐ ܡܸܢܕܝܼ ܐ݇ܚܹܪ݇ܢܵܐ ܕܟܹܐ ܥܵܒ݂ܕܝܼܬܘܿܢ: ܟܹܐ ܟܲܣܹܝܬܘܿܢ ܒܕܸܡܥܬܵܐ ܠܡܲܕܒܚܵܐ ܕܡܵܪܝܵܐ، ܘܒܸܟ݂ܝܵܐ ܘܫܲܦܠܲܦܬܵܐ، ܣܵܒܵܒ ܠܹܐ ܝܘܸܢ ܡܸܢܕܪܸܫ ܒܸܚܝܵܪܵܐ ܠܩܘܼܪܒܵܢܵܘܟ݂ܘܿܢ، ܠܩܲܒܘܼܠܹܐ ܐܸܠܹܗ ܒܪܸܙܵܝܵܐ ܡ̣ܢ ܐܝܼܕܵܘܟ݂ܘܿܢ. 14ܘܐ݇ܡܝܼܪܵܘܟ݂ܘܿܢ، ”ܣܵܒܵܒ ܡܘܿܕܝܼ؟“ ܣܵܒܵܒ ܡܵܪܝܵܐ ܝܘܼܗ݇ܒܸܠ ܠܹܗ ܣܵܗܕܘܼܬܵܐ ܒܹܝܠܘܼܟ݂ ܘܒܹܝܠ ܒܲܟ݂ܬܵܐ ܕܥܠܲܝܡܘܼܬܘܼܟ݂، ܕܐܲܢ݇ܬ ܥܒ݂ܝܼܕ ܠܘܼܟ݂ ܚܵܝܝܼܢܘܼܬܵܐ ܥܲܠܘܼܗ̇، ܘܗ̇ܝ ܚܲܒܲܪܬܘܼܟ݂ ܝܼܠܵܗ̇ ܘܒܲܟ݂ܬܵܐ ܕܩܵܘܠܘܼܟ݂. 15ܘܠܵܐ ܥܒ݂ܝܼܕ ܠܹܗ ܐܸܠܲܝܗܝ ܐܲܠܵܗܵܐ ܚܲܕ، ܘܡܘܼܬܸܒ݂ ܠܹܗ ܣܵܗܡܵܐ ܦܝܼܫܵܐ ܕܪܘܼܚܹܗ ܥܲܠܲܝܗܝ؟ ܘܩܵܐ ܡܘܿܕܝܼ ܚܲܕ؟ ܒܸܒܥܵܝܵܐ ܝܗ݇ܘܵܐ ܙܲܪܥܵܐ ܕܐܲܠܵܗܵܐ. ܘܗܵܘܹܝܬܘܿܢ ܗܸܫܝܵܪ ܒܪܘܼܚܵܘܟ݂ܘܿܢ، ܘܐ݇ܢܵܫܵܐ ܥܲܠ ܒܲܟ݂ܬܵܐ ܕܥܠܲܝܡܘܼܬܹܗ ܠܵܐ ܥܵܒܹܕ ܚܵܝܝܼܢܘܼܬܵܐ. 16”ܣܵܒܵܒ ܟܹܐ ܣܵܢܹܝܢ ܪܲܦܵܝܬܵܐ،“ ܒܹܐܡܵܪܵܐ ܝܠܹܗ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ، ”ܘܟܹܐ ܟܲܣܹܐ ܙܠܘܼܡܝܵܐ ܥܲܠ ܠܒ݂ܝܼܫܬܹܗ،“ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ، ܘܗܵܘܹܝܬܘܿܢ ܗܸܫܝܵܪ ܒܪܘܼܚܵܘܟ݂ܘܿܢ، ܘܠܵܐ ܥܵܒ݂ܕܝܼܬܘܿܢ ܚܵܝܝܼܢܘܼܬܵܐ.
17ܡܘܼܓ̰ܥܹܐ ܠܵܘܟ݂ܘܿܢ ܠܡܵܪܝܵܐ ܒܚܲܒܪ̈ܵܘܟ݂ܘܿܢ. ܐܝܼܢܵܐ ܐ݇ܡܝܼܪܵܘܟ݂ܘܿܢ، ”ܒܡܘܿܕܝܼ ܡܘܼܓ̰ܥܹܐ ܠܲܢ ܐܸܠܹܗ؟“ ܒܗ̇ܝ ܕܟܹܐ ܐܵܡܪܝܼܬܘܿܢ، ”ܟܠ ܕܥܵܒܹܕ ܒܝܼܫܬܵܐ، ܨܦܵܝܝܼ ܝܠܹܗ ܒܥܲܝܢܹ̈ܐ ܕܡܵܪܝܵܐ، ܘܒܝܼܹܗ ܗ̇ܘ ܟܹܐ ܒܵܣܡܵܐ ܠܹܗ؛“ ܝܲܢ ܒܗ̇ܝ ܕܟܹܐ ܐܵܡܪܝܼܬܘܿܢ، ”ܐܲܝܟܵܐ ܝܠܹܗ ܐܲܠܵܗܵܐ ܕܕܝܼܘܵܢ؟“
Okuqokiwe okwamanje:
ܡܠܐܟ݂ܝ 2: ABTAB
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Aramaic Bible Translation Assyrian Bible © 2025 Aramaic Bible Translation