URA TIN AYRA TAKKIRA
TAKKIRA
Sem ma yam ana Genesna u vun mayra min di ni ana Ura Tin Ayra. Magaa ndaɗ ɓakŋi kay lira Lona li tlena hu duliyara halaŋga. Lira Lona li sa warnara, gijaŋ ma dla coa mba hu duliyarara u lassa mba kay suu warna bella, u garakka Lona duk hoŋom garak i u sa warnara. Ura Tin Ayra iriɗ borowi ni na mba'.
1. Ɓorowra 1—11 ɓakŋi kay lira Lona li tlena hu duliyara bella u gijaŋ dlara ɓak kay sa warnara. Hu ɓorow ndaɗta cani ka ɓakŋi kay gi Adam u Eva, Kain u Abel, Nowa u mbo ma kuluɓ yam ndaŋgara kina u zira fiyekka Babella.
2. Ɓorowra 12—50 ka ɓak dlara kay u bu ŋgolo suu Israelna suu col ay jewna. Ma fok jewna ni Abraham. Nammi sa ma fi jivira fok Lona u viimbana, ni u hum vun ma nam hum u Lonna. Ŋgoo daganni njaɗ dlara kay goroma Isaak u go ŋgolo mamma Yakob (ma sem mbuɗ ki ana Israelna). Olo ni ndaɗ ka ɓak kay goryoŋ Yakob suu doogo yam mbana. Asina ni suu gi u njaf suu Israel suu doogo yam mbana ayna. Dlara hin ɓak cocora ni kay goorom maa dew, ni Yosef. Nammi sa ma tuɗ Yakob u goryom suu hiniŋŋa ha ki hu mbassa Egipterana.
Magaa ndaɗta ka ɓak dlara vi suu warna. Fok jewra ndaɗ ka vi u dlara Lona laɗta kiyo. Gijaŋŋa ni di ana Lona li tlena hu duliyara halaŋŋi namu. Hu daɓ maɗta ni Lona vi vunum ana nam hin tak min mamba ki maŋ suu mamsina. Hu magaa ndaɗta halaŋ ka tak Lona ana nammi sa ma kaɓakŋa kay suu li dla cora. Nam ti mulla njun kay suu mamsina, gol u dlaasira may. Magaara basi ndaɗta ɓiiriɗ ni a tak vira vii suu tin hurusi kay dlaŋ Lonarana kiyo a njun usi hu viisira tuɗ ha fok na ɗow ɗowra may.
Takkira iriɗ ɓorowi ni ko wanda na
1. Lira Lona li tlena hu duliyara halaŋ
hin li suu warna. 1.1—2.25
2. Dla cora gijaŋŋa u lassa kay ndaŋgara. 3.1-24
3. Col ha kay Adam ta ta Nuwa. 4.1—5.32
4. Col ha ay Nowa ta ta ɓalakka Lona ɓeŋ
ndaŋgara i u mbonara. 6.1—10.32
5. Zira fiyekka Babella. 11.1-9
6. Col ha kay Sem ta ta Abraham. 11.10-32
7. Somira. Abraham, Isaak, Yakob. 12.1—35.29
8. Dee suu vi Ezawna 36.1-43
9. Yosef u gorsemma. 37.1—45.28
10. Suu Israelna tuɗ ki hu Egipte. 46.1—50.26
Okuqokiwe okwamanje:
URA TIN AYRA TAKKIRA: BMS
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Bible Moussey © Bible Society of Chad, 2002.