Matthew 6
6
Jesus tel di pipl seh dehn fi praktis dehn rilijan fahn dehn haat
1“Wach out, unu no fi du gud tingz fi God jos fi shuo aaf fronta pipl. If unu du dat, weh kain a blesin unu gwain get fahn unu Faada iina hevn? Notn ataal!
2“So enytaim unu deh gi somting tu di puor pipl dem, du'ih fahn unu haat, ahn no du'ih laik how di hipokrit dehn du weh mek wan paila naiz iina di sinigag ahn pan di ruod jos fi di pipl dehn si weh dehn gwain du ahn priez dem. Ah deh tel unu di chruut: dehn no gwain get no muo priez an weh dehn don gat! 3Bot wen unu gi di puor pipl dem somting, du'ih sieka dehn niid ih, ahn no sieka unu uon satisfakshan. 4So wen unu deh gi, du'ih iina siikrit, ahn unu Faada weh deh si unu iina siikrit, gwain pie unu bak.
Jesus tiich di pipl dem how fi prie
(Luke 11.2-4)
5“Ahn enytaim unu deh prie, no bii laik how di hipokrit dehn du iina di sinigag ahn lang di kaana dem pan di ruod jos fi di pipl dehn si dem. Ah deh tel unu di chruut: dehn no gwain get no muo priez an weh dehn don gat! 6Bot enytaim unu deh prie, go iina unu ruum, shet di duo ahn prie tu unu Faada huu gwain dedeh. Ahn unu Faada, weh deh wid unu iina siikrit, gwain bles unu plenty.
7“Wen unu deh prie, no seh di siem wod dem uova ahn uova laik how di Gentile pipl dehn du, bikaaz dehn biliiv God gwain hier dem jos sieka dehn deh seh som paila ting. 8Unu no fi bii laik dem, bikaaz unu Faada don nuo dah wada unu niid bifuor unu iivn aks im far ih. 9Dis dah how unu fi seh wen unu deh prie:
‘Fi wi Faada weh deh iina hevn,
mek wi kiip yo niem huoly.
10Mek yo Kingdom kom, ahn
mek weh yuu waahn fi hapm,
hapm pan ort,
jos laik how ih deh hapm iina hevn.
11Pliiz gi wi di fuud weh wi niid evry die,
12ahn fargiv wi sin dem,
jos laik wii fargiv evrybady
weh du wi bad tingz tu.
13Ahn kiip wi weh fahn temtieshan,
ahn fahn di Bad Wan weh waahn liid wi astrie.
[Bikaaz yu dah di ongli'is wan weh gat aal di Kingdom atarity,
di powa ahn di gluory fi aal di taim, Amen!]’
14“If unu paadn di bad tingz weh ada pipl du tu unu, unu Faada iina hevn gwain paadn unu tu. 15Bot if unu no paadn weh ada pipl du unu, unu Faada no gwain paadn fi unu sin dem niida.
Jesus tiich bout faastin
16“Enytaim unu faas, no mek'op unu fies laik if unu sad laik di hipokrit dehn du. Bikaaz dehn wi put dehn fies laik puor ting fi ada pipl biliiv dehn deh faas. Ah deh tel unu di chruut: dehn no gwain get no muo priez an weh dehn don gat! 17Bot wen unu deh faas, put ail pan unu hed ahn wash unu fies, 18so wen unu deh faas, unu no kaal pipl atenshan fi luk pahn unu. Den ongl unu Faada weh si evryting weh don iina siikrit gwain bles unu.
Richiz iina Hevn
(Luke 12.32, 34)
19“Unu no fi put'op richiz pan ort, bikaaz di ort ful a wud-lais ahn ros, ahn plenty tiif weh kyan brok iina unu hous ahn tiif weh unu gat. 20Unu ongl fi kiip deh put'op richiz iina hevn, weh paat non wud-lais ahn non ros no deh, ahn weh non tiif kyaahn kom iin ahn tiif unu. 21Bikaaz enywie weh paat unu richiz deh, dah rait dehso unu gwain kiip unu haat tu.
Di ai dah laik wan lait fi di bady
(Luke 11.34-36)
22“Unu ai dah laik di lamp fi unu bady. So, wen ih ongl luk pan gud tingz, den di huol a unu gwain ful'op a lait. 23Bot wen ih ongl luk pan bad tingz, den dah jos daaknis gwain deh kom iina unu haat. So, if di lait weh iina unu uova daak, den jos imajin how daak ih daak!
God ahn wi mony
(Luke 16.13; 12.22-31)
24“Nonbady kyaahn sorv two maasta. Ihn gwain iida hiet wan ahn lov di ada, or ihn gwain lif op wan ahn put dong di ada wan. So, unu kyaahn lov God ahn mony di siem taim.
25“Das wai Ah deh tel unu: no fret ahn wory bout unu laif, weh unu gwain iit or weh unu gwain drink, nar weh unu gwain wier, bikaaz laif dah muo an wat wi iit ahn wat wi wier, no chruut? 26Luk pan di likl bord dem iina di skai; dehn no plaant nar gyada nar put'op fuud iina wan stuor-hous, bikaaz unu Faada iina hevn fiid dem. Ahn unu wot plenty muo tu im an eny bord, dah no so? 27Unu tink seh if unu wory, unu kyan ad aan wan nada owa muo pan unu laif? Nuo, sah!
28“Ahn wai unu deh wory bout weh unu gwain wier? Luk pan di lily graas dem how dehn gruo. Dehn niida work nar mek kluoz; 29bot Ah deh tel unu: nat iivn King Solomon, wid aal ihn paila prity kluoz wehn luk gud laik dem. 30If dat dah how God dres op di graas weh deh iina di fiil, weh deh yahso tudeh, ahn weh dehn chruo iina di faiya tumaara, unu no tink seh ihn no gwain mek shuor seh unu dres op plenty beta? Wai unu gat so likl fiet, man?
31“So, no wory fi aks, ‘Dah wada wi gwain iit?’ or ‘Dah wada wi gwain drink?’ or ‘Dah wada wi gwain wier?’ 32Demde kain a tingz dah weh di Gentile pipl, weh no nuo God, dehn deh ron afta. Bot unu Faada iina hevn don nuo aredy weh aala unu niid. 33So, put God Kingdom work fos iina unu laif, ahn du weh gud iina ihn sait; den unu gwain get aal demde tingz tu. 34So, unu no fi wory tudeh bout weh gwain hapm tumaara. Tek'ih wan die at a taim ahn wory bout di die wen ih kom.
Okuqokiwe okwamanje:
Matthew 6: NTIC
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
The New Testament in Islander Creole © Sociedad Bíblica Colombiana and © Wycliffe Bible Translators, Inc., 2015.