JOHN 4
4
1Jesuh nih Johan nâk in zultu tam deuh a ser hna i baptisma a pêk hna ti kha Farasih hna nih an theih ti kha, Bawipa nih a theih tikah, 2(Jesuh Amah hrimhrim nih baptisma cu a pe hna lo, a lamkaltu hna nih an pêk hna), 3Galili ram kal dingah Judia ram kha a chuahtâk ṭhân. 4Samaria ram kha tanpah a herh. 5Cuticun Samaria ram i khua pakhat Saikhar an timi kha a phân, cu hmun cu Jakob nih a fapa Josef sin i loram a pêkmi pawng kha a si. 6Jokob tikhor zong cuka ah a um. Jesuh cu a khualtlawnnâk ah a battuk caah tikhor hramah a ṭhu. Cu cân cu chun suimilam hleihnih hrawng a si. 7Samaria nu pakhat tithan awkah a ra i Jesuh nih, “Din awk ka pe,” tiah a ti. 8Zeitintiah a lamkaltu kha rawl cawkah khua ah an kal dih. 9Samaria minu nih, “Zeiruangahdah, nang Judah mi nih kei Samaria nu sinah din awk naka hal?” tiah a ti. Zeitintiah Judah mi nih Samaria mi kha zeihmanh ah an hmang bal lo. 10Jesuh nih, “Pathian thilpêk le, dinawk ka pe, tiah an haltu hi hei hngal law cu, nangmah tu nih na hal lai i anih nih tinung an pêk ko hnga,” tiah a ti. 11Minu nih, “Kapu, tikhor le a thûk, thlainâk le na ngei lo, cu tinnung cu khuazeiindah na hmuh? 12Kan pa Jokob nâk in na ngan deuh maw? Anih nih hi tikhor hi a kan pêk, amah zong nih a din, a tefa le a saṭil zong nih an din,” tiah a ti. 13Jesuh nih, “Hi ti a dingmi pauh an ti a hal ṭhân lai, 14asinain an sin i ka pêkmi ti a dingmi pauh cu an ti a hal ti lai lo. An sin i ka pêkmi ti cu anmah ah ti hna a um lai i zungzal nunnâk tiangin a luanglan lai,” tiah a ti. 15Minu nih, “Kapu, ka ti a hal ti nâkhnga lo le, tithan awkah hi ka i ka rat ti nâkhnga lo, cu ti cu ka pe,” tiah a ti. 16Jesuh nih, “Nava va au law, hika ah ra ṭhân,” tiah a ti. 17Minu nih, “Va ka ngei lo,” tiah a leh. Jesuh nih, “Va ka ngei lo, na timi hi, bia dik na chim, 18zeitintiah va panga na ngei cang, atu i na ngeih liomi hi na va a si lo, na chimmi hi a dik,” tiah a ti. 19Minu nih, “Kapu, profet na si kha ka hngalh cang. 20Kan pupa hna nih hi tlângah hin Pathian an biak tawn, nannih Judah mi hna nih Jerusalem hi minih Pathian an biaknâk hmun a si, tiah nan ti tawn” tiah a ti. 21Jesuh nih, “Minu, Ka zum ko. hi tlâng le Jerusalem lawngah si loin minih Pathian an biak cân a phân deng cang. 22Nannih nih nan biakmi nan hngalh lo, kannih nih kan biakmi kha kan hngalh, zeitintiah khamhnâk cu Judah mi hna ta a si. 23Asinain a cân a phân lio i atu zongah a phân ko cang. Cu cân ah cun Pathian a biatu taktak hna nih thlarau le biatak in an biak lai, zeitintiah Pa nih Amah biatu dingah cubantuk cu a kawl hna. 24Pathian cu Thlarau a si, a biatu nih thlarau le biatak tein an biak awk a si,” tiah a ti. 25Minu nih, “Mesiah, (Krih an timi cu) ara lai tiah ka hngalh, Amah a rat tikah thil vialte a ka chimh te ko lai,” tiah a ti. 26Jesuh nih, “An chawntu hi Amah cu ka si,” tiah a ti. 27Culioah a lamkaltu kha an rak phân i nu a chawnhmi cu mak an ti ngaingai; asinain ahohmanh nih, “Zeidah na kawl?” “Zeiruangahdah nu na chawnh?” zong an ti lo. 28Cun minu nih a tibel kha kaltâkin khua ah a kal i mi sinah, 29“Ra u law, ka tuahmi thil pauh aka chimkhotu Mi pakhat hi rak zohtuah u. Krih a si kho hnga maw?” tiah a ti. 30Cuticun mi kha khua chungin an chuak i a sinah an ra. 31Cu chungah Lamkaltu nih, “Cawnpiaktu, ei tuah,” tiah an rak fial. 32Anih nih, “Nan hngalh lomi rawl ei ding ka ngei,” tiah a ti. 33A lamkaltu nih anmah le anmah, “A ei awk mi nih an rak kenpiak a si hnga maw?” tiah an i ti. 34Jesuh nih, “Ka rawl cu aka thlahtu duhnâk tuah le a rian lîm hi a si. 35Nannih nih rawlṭuannâk dingah thlali a duh rih, nan ti a si lo mei? Ngaihmanh u, kan chimh hna, cuan ulaw, lo khi hei zoh hna hmanh u, ṭuan awkah atu ah an hmin diam cang! 36Fangṭuantu nih hlawh an hmuh tawn, zungzal nunnâk ca ah a ṭuan lio pi a si, a tuhtu le a ṭuntu an i lomhṭi khawh nâkhnga. 37Zeitintiah pakhat nih a tuh i midang nih a thei an zun tawn, timi hi a dikmi a si. 38Thaba in nan ṭuan lomi theipar zûn dingin kan thlah hna, midang nih an ṭuan i nannih cu a bawmtu men nan si,” tiah a ti. 39Ka tuahmi thil poh a chim dih tiah a hngalhternâk bia thawngin Samaria mi tampi nih Amah kha an zumh. 40Cuticun samaria mi kha a sinah an ra i an sinah câm dingin an nawl i cuka ah ni hnih a câm. 41Cun mi tampi nih Amah bia thawngin an zumh. 42Cuticun minu sinah, “Atu cu na bia thawngin a zummi kan si ti lo, zeitintiah kanmah hrimhrim nih a bia kan theih i hihi Krih vawlei Khamhtu a si hrim hrim ko tiah kan hngalh,” tiah an ti. 43Cuticun ni hnih hnu ah cuka cun a chuak i Galili ah a kal. 44Zeitintiah Jesuh hrimhrim nih, “Profet cu amah khua mi hna nih an thangṭhat bal lo, tiah a rak hngalhter cang. 45Cubangin Galili a phâk tikah Galili mi hna nih an rak cohlan, Thô lio i Jerusalem khua ah a tuahmi thil vialte an rak hmuh, zeitintiah annih zong Thô ah an kal ve. 46Cuticun Jesuh cu Galili ram i Kana khua, ti misur hang i a canternâk kha arak phân ṭhân, hmaizahmi mi pakhat a um i a fapa cu kapernuam khua ah a zaw. 47Jesuh cu Judia ram in Galili ramah a rak phân ti kha a hngalh le cângkâ a sinah a ra i a fapa damter dingah a nawl lengmang, zeitintiah a thideng mangmi a si. 48Jesuh nih, “Hmelchunhnâk le khuaruahharnâk nan hmuh lo ahcun nan zum hrim lai lo,” tiah a ti. 49Hmaizahmi pa nih, “Ka pu, ka fapa thih hlanah ra ko sawh, tiah a nawl lengmang. 50Jesuh nih, “Kal ko cang, na fapa cu a nung cang,” tiah a ti. Cupa nih Jesuh chimmi kha a zumh i a kal. 51A kal lio ah a sinum hna nih an rak don i, “Na fapa cu a nung cang,” an rak ti. 52Anih nih zeitik cân set i nung dah a si tiah a hal hna, nizan chun suimilam pakhat hrawngah khan a tak lin a dai,” tiah an ti. 53Cu cân cu Jesuh nih apa sinah, “Na fapa cu a nung cang,” a ti lio cân kha a si ti kha a hun hngalh, cuticun amah le chungkhar dih lak nih an zumh. 54Cuthil cu Jesuh nih Judia ram in Galili ram i a kal ṭhân hnu i hmelchunhnâk a tuahmi voi hnihnâk a si.
Okuqokiwe okwamanje:
JOHN 4: HAKABSI
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.