BINZEN 3
3
Temi le Jozenmvu Kela
1Tsükatsü Npugü Sunggigü le thyü keshü nyukhu dan nyu peri gü le kelikelu tsin thyü, A-le tenugi ka, “Sunggigü le hai no chwinyu senbin lihi sha-e tyünya lotse zoshü ole?”
2Tsontsin tenu gi le peri gü ka, “Ai le chwi günyu terasha lihi-e tyü logwa, 3chwi lvuka kebin senbin gü ge kemvu we. Sunggigü le ayi no tsü gü sha tyü nmvue kesünya lotse zoshü le; ayi le sila lo keshvu genyu.”
4Peri gü le, “Tsüle ketsin mvu; hai le sila kemvui, tson shü. 5Sunggigü le, hai le tsü tyü lolo, Sunggigü hontseo nyule gwa lo nyu le gwamvu yo shalo la nrün shakebin genyu tson zokeshü le,” tsonshü.
6Tsüselo tenugi le, senbin tsügü shwipe zegwasa, a-sha le dihontse tyügwa yo, lo thasha chwiryü lo dihontse ndun thyü tiyo tse rüchün la. Tsügenyu a-le peha ryütyülo la. Lo a-le peha pe a-nyepfü tsüo a-ko tyü lola. 7Au le tsü tyülo ntsin thashakekha lo-o au kenben kehü shalo: tson-o au le kheronyü rikeshü pe au npfü au sunlo.
8Tsünyü ngwen ki Npugü Sunggigü le chwigü nyu tsonchü kehü khwe nyülo njio au le senbin dan nyu a-kebu bin. 9Ai Npugü Sunggigü le temi gü ko-o, “Nle diki hü nla?” tson.
10Tsontsin a-le, “Ale chwigü nyu nkhwenyülo; lo ale akenben kehü genyu nshvuo nkebu tin lale.”
11Tsüka Sunggigü le, “Segü le nle nkenben letse nka zoshü la?” “Nle ale nno tyünya lotse keshü terasha gü tyü la ole?”
12Tsontsin temi güle, “Nle no azen hü lotse khipe atsü keshü tenu gile senbin gü rasha pe atsü shüo ale tyüla le,” tsonshü.
13Npugü Sunggigü le tenu gi ka, “Nle nyuthyüo hihontse thyü la ola?” Tsontsin a-le, “Peri gü le a sa shüo ano tyülo la sele,” tsonshü.
Sunggigü le Jokera Keshü
14Tson-o Npugü Sunggigü le peri gü ka zoshü; “Nle tha higü thyü kela genyu, senru lo tehenthyü aphu nyeki n swetsü laso; Ntsoka gerho nno nginda pe nyon ti, lo nkeyhun then n nyon kenphü pe nchvü thyü ti. 15Ale tenu gi hai jaka keshwinyü kemvu khishü ti, a-tsipwen lo n tsipwen no a-zintse keshwinyü mvu hüti. A-le npe kedüren ti lo nno a-pha ndu ti.”
16Lo a-le tenu gika, “Ale nle nyuphu kepfü ka nkenjün kethyü thyü nchon shüti; lo nno kenjün thyüo nyu n nyuti, Hihontse bin-e nno n nyepfü nnyü ti, lo a-no nso gonti.”
17Lo a-le temi güka, “Nle nnu khwenyüo ale nno tyünya lo tse keshü terasha gü tyü kela genyu, ngenyu kazü gü swetsü laso. Nno nyhun then nhokelio thathyüo nchvü hyu tyüti. 18Tsüno tsehü- nyhen nyhun shüti, lo nno lonyu hense-kenjvü tyüti. 19N nyon pe nthyü keshü genyu, nle n nyon ngwa nila kemvuthen, nno nhokeli lo tseyhün-o nchvühyu tyüti. N nyon pe nthyüshü, lo nle n nyon thyü ni lati.”
20Adam le anu zan pe Eve thola, a-le temi aphu jvü gi genyu. 21Lo Npugü Sunggigü le Adam lo a-nu au genyu thyügi pe phi thyü lo-o a-le pe au nben shü.
Adam lo Eve hvu Eden chwi gü nyu nishwi la
22Tsüselo Npugü Sunggigü le, “Temi le ngun nme hontse nyu le gwa lo nyule gwamvu yo sha laso. A-no kerhüntsü bin ge terasha gü tyü lo-o kethonthen yhun tinla loshvu.” 23Tsügenyu Npugü Sunggigü le a-no pe a-rhenkeshü nnyon gü thathyü tyü hülo tseo Eden chwigü nyu a-nishwi la. 24A-le temi gü hüshwi la; tson-o Eden chwi nphozin Cherubim, lo jenthon lizin hizin kerü güla kehü mai hontse nme pe shüla. Hile temi ligü higü no kerhüntsü bin kho nni ryü mvu nrün genyu.
Okuqokiwe okwamanje:
BINZEN 3: REGSBSI
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.