Luka 8
8
Abanakashi abakonkele Yesu
1Ulo papitile inshita, Yesu alikwenda mumishi iikulu namumishi iinini, mukubilisha Ubutumi Bwawama ubwa Bufumu bwaku Lesa. Abakusambila ikumi na babili bayile nakwe. 2Nabo abanakashi abo aposeshe kumipashi iibi nakumalwele ambi balimukonkele. Amashina abo ninga: Maliya Magadala, uwo Yesu afumishemo imipashi iibi isano na ibili, 3Yoana, umukashi wakwa Chusa kabilo wamfumu Helodi, Susana nabambi abenji abanakashi abalikupela ubupe ubwakwafwilisha Yesu nabakusambila bakwe.
Ichelusho chawakuminsa
(Mat. 13.1-9; Mk. 4.1-9)
4Abantu abenji balikwisa kuli Yesu ukufuma kumishi nemishi. Ulo balongene, Yesu asosele muchelusho ati,
5“Kwali umuntu uwayile mukuminsa imbuto. Ulo ali kuminsa, imbuto shimbi shawile munshila, balishinyantawile, elo nefyuni fyalishile nokushilya. 6Shimbi shawile palubwelekese. Ulo shamenene, shalyumine pakuba tapali namuntonshi. 7Shimbi shawile muminga, iminga yalikulile pamo nembuto nokushitabilisha. 8Nomba shimbi mbuto shawile pamushili uuweme, shalimenene nokutwala nefitwalo umwanda umo.”
Pakulekelesha Yesu asosele ati, “Umfweni, ukwete amatwi akumfwa, omfwe!”
Ubulondoloshi bwafyelusho
(Mat. 13.10-17; Mk. 4.10-12)
9Abakusambila baku Yesu balimufumbile umo nchi chelusho chalolele. 10Yesu abasukile ati, “Kuli mwebo kwapelwa ifyamfiso ifyabufumu bwaku Lesa, ekuti kuli bambi nimufyelusho. Ukuti ukubona balikubona nomba tabalokubweneshapo, nokumfwa balikumfwa nomba tabalokumfwishapo.#Esa. 6.9
Yesu alondolola ichelusho chawakuminsa
(Mat. 13.18-23; Mk. 4.13-20)
11“Ichelusho chikoyalula mfi: Imbuto eshiwi lyaku Lesa. 12Imbuto shawile munshila ebantu abakoumfwa amashiwi aku Lesa. Nomba Satana alesa nokufumyamo mumitima yabo ukuti bechetekelapo nokupuluka. 13Imbuto ishawile mulubwelekese, ebantu abomfwa amashiwi aku Lesa nokuyapokelela elo nokusekelela, nomba tayenjilisha mumitima yabo. Bakochetekela pakashita akanini bwaka. Ulo inshita yakwesheka yaisa balanakuka. 14Imbuto shawile muminga, ebantu abomfwa amashiwi aku Lesa. Nomba amasakamiko nobusambashi namangalo aapanonshi, filabapulula, echo nefitwalo fyabo tafipyapo. 15Nomba imbuto shawile mumushili uuweme ebantu abomfwa amashiwi aku Lesa nokuyasunga mumutima uuweme nakmbi uwachumfwila. Balapitilila ukufikila batwala nefitwalo.
Inyali iyafunikwapo imbale
(Mk. 4.21-25)
16“Tapapo umuntu uwasha inyali nokwifunikapo munongo, nangu ukubika mwifungu. Nomba alabika apasansukile pakuti abantu bonse balokwinjila munanda umwabuta.
17“Chonse ichafisama chikaletwa apabuta, nachonse ichafunikilwa chikesa kufimbulwapo nokuba apabuta.
18“Nomba chenjeleni nefyo mukoumfwa, pakuti ukwete akubikilwapo. Nomba ukwete kanini akupokwa nako akwete.”
Banyina nabawabo baku Yesu
(Mat. 12.46-50; Mk. 3.31-35)
19Banyina nabawabo baku Yesu balishile kuli Ye, kuntu balifililwe ukufika apo ali pamulandu wabwinji bwabantu. 20Elo umuntu umo aebele Yesu ati, “Banyinenwe nabawenu bali panse bakofwaya ukumubona.”
21Elo Yesu abasukile ati, “Bama nabawesu nimbalya abakoumfwa amashiwi aku Lesa nokuyasunga.”
Yesu atalalika amatamba
(Mat. 8.23-27; Mk. 4.35-41)
22Akasuba kamo Yesu ayinjile mubwato pamo nabakusambila bakwe. Elo abebele ati, “Katwabukile kwishilya lyaku bemba.” Epo balimine nokuya. 23Ulo balikuya mubwato, Yesu alisepukile mutulo. Elo ichipupu chalimine pali bemba, namatamba atatikile ukwinjila mubwato. Ubwato bwali mupepi nokubunda. 24Elo abakusambila bayile kuli Yesu nokumubusha bati, “Bashikulu, Bashikulu! Tuli apepi nokufwa!”
Yesu alishibukile nokukalipila ichipupu namatamba. Fyonse fyalilekele, patalele chelele. 25Elo Yesu afumbile abakusambila bakwe ati, “Nga ichichetekelo chenu chili kwisa?”
Nomba bo balishimbilwe nokuba nomwenso uukulu. Balifumbene bati, “Nga yu muntu aba shani uwakuti aeba ichipupu namatamba neshiwi bwaka, nokumumfwila fyamumfwila?”
Yesu aposha umuntu uwali nemipashi iibi
(Mat. 8.28-34; Mk. 5.1-20)
26Yesu nabakusambila bakwe bayabukile kuchalo cha Gelasa#8.26 Gelasa: Kachalo akali apepi nabemba wa Galili. Kalishibikwa namashina ambi aya Gadala (Mat. 8.28) na Gelegesa. nchilya kwishilya lyaku bemba wa Galili. 27Ulo Yesu afumine mubwato pachabu, akumene nomwalalume uwafumine mumushi uwali nemipashi iibi. Alikwenda ubwamba inshita ishinji. Elo talikwikala munanda, kuntu kumanda. 28Ulo abwene Yesu, alilile neshiwi ilikulu nokufukama pamakasa akwe nokuti, “Nindo ukofwaya kuli nebo webo Yesu, we Mwana waku Lesa Uwapulamo? Napapata, winchu-shapo!” 29Asosele mfi pakuti Yesu aebele kale umupashi uubi ukufumamo muli ye. Inshita ishinji ulo alikuchula nomupashi ngu balikumulinda uwakakwa namangwelengwende elo nobunyololo kumaboko. Nomba fyonse alikufiputaula, elo nomupashi uubi wali kumutwala muchiswebebe.
30Elo Yesu alimufumbile ati, “Ishina lyobe niwe nani?”
Naye alimwasukile ati, “Nine Ibumba, pakuti tuli abenji.”#8.30 abenji: Amashiwi nga mu Chigikile ni Legion, ekwebati ibumba lyabashilikali amakana asano na limo. Umuntu ngulya aliitile ishina ndi pakuti imipashi iibi iyayinjile muli ye yali iinji kubati libumba ilikulu lyabashilikali. 31Elo imipashi iibi yafumbile Yesu ukuti eyitamfisha muchilindi chabula impelo.
32Elo kwalipo umukuni uwankumba uwalikulya mululamba lwalupili. Nomba imipashi iibi yalimupapatile Yesu ukuti ayisuminishe ukuya kwinjila munkumba. Naye alisuminishe. 33Imipashi nji yalifumine mumuntu nokuya kwinjila munkumba. Elo umukuni onse walifulumukile pachinekami nokuya kwibila muli bemba, nokufwa kashifwa.
34Ulo bachembela babwene mfi, babutukile kumusumba nakumishi yamumbali mukweba abantu ilyashi ndi. 35Abantu balile mukubona ichachitikile. Ulo bafikile kuli Yesu, basangile umuntu uwo imipashi yafuminemo alikele mupepi na Yesu, alifwite, namano akwe alibwelelemo. Elo bonse baliiketwe nomwenso. 36Bo ababweneko balisosele ifyo apolele. 37Abantu bonse abamuchalo cha Gelasa, balombele Yesu ukuti abafuminemo muchalo chabo pamulandu wakuti bali nomwenso uukulu. Elo Yesu ayinjile mubwato nokubwelela uko afumine. 38Umuntu uwo imipashi iibi yafuminemo alipapatile Yesu ati, “Lekeni ndokuya nenu.”
Yesu alimutumine nokweba ati, 39“Iyowo, bwelela bwaka kumyenu. Kabebe fyonse ifyo Lesa akuchitila.”
Nachine alile akoshimika mumishi yonse ifyo Yesu amuchitile.
Yesu abusha mwana Yayilo aposha nomwanakashi
(Mat. 9.18-26; Mk. 5.21-43)
40Ulo Yesu abwelele kwishilya linakwe ilyaku bemba, ibumba lyabantu lyalimupokelele, nokusekelela pakuti bonse balikumulindilila. 41Elo umuntu uwalikwitwa Yayilo ayishile. Ali umukulu wananda yakulombelamo Lesa. Elo afukeme pamakasa aku Yesu nokumupapatila ukwebati aye nakwe kunanda yakwe, 42pakuti akwete umwana umo umwanakashi uwamyaka ikumi na ibili, uwali apepi nokufwa.
Pakuya Yesu, abantu abenji abafumine mumbali shonse balimushingulukile nokumufininkisha. 43Mwibumba mwalipo nomwanakashi uwalikulwala umukunko pamyaka ikumi na ibili. Aliposayikile ifyuma fyonse akwete kung’anga, kuntu takwalipo nangu umo uwamuposeshe. 44Ayishile mwibumba kunuma yaku Yesu nokukumyako kumukope welaya lyakwe. Penkapo nomukunko walilekele.
45Yesu afumbile ati, “Ninani wankumya?” Bonse balikene. Elo Petulo asosele kuli Yesu ati, “We musambishi, abantu abamushingulukile ebamukumya.”
46Nomba Yesu asosele ati, “Umo ankumya pantu naumfwa ukuti ifiso fyanji fyafumamo muli nebo.” 47Ulo umwanakashi abwene ukuti ayishibikwa, alishile nokukanka, afukama napamakasa aku Yesu. Elo pamenso abantu bonse, alimwebele ifyo amwikatile, nomo apolele mukwangufyanya. 48Elo Yesu asosele kuli ye ati, “We mwana wanji, ichichetekelo chobe chakuposha. Endelapo umutende.”
49Ulo Yesu alikusosa mfi, intumi yalishile ukufuma kunanda yakwa chilolo nokuti, “Umwanansungu obe afwa. Mba nindo ukochushisha musambishi?”
50Pakumfwa mfi, Yesu asosele kuli Yayilo ati, “Witina, chetekela bwaka, umwanansungu obe akoyisa kuba nobumi.”
51Ulo Yesu afikile kunanda, tasuminishe nangu umo ukwinjila pamo nakwe, kano Petulo, Yohane, Yemusi, bawishi wamwana nabanyina. 52Abantu bonse balikulila nokulosha ngulya mwana. Elo Yesu asosele ati, “Lekeni ukulila, pakuba umwana tafwilepo, alele bwaka utulo!”
53Abantu bonse balimusekulukile Yesu pantu balishibile ukuti umwana alifwile. 54Nomba Yesu alikete umwana pakuboko nokumwita ati, “We mwana, buka!” 55Bwangu-bwangu ubumi bwakwe bwalibwelelemo, nokwima kayima. Elo Yesu abebele ukuti bapeleko umwana ichakulya. 56Abafyashi bamwana balishimbilwe ukwinekantu. Echo Yesu alibebele ati tekwesha ukwebako ichachitikile umuntu nangu umo.
Okuqokiwe okwamanje:
Luka 8: LalaNT
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Chilala New Testament © Bible Society of Zambia, 1998.