Luka 7
7
Yesu aposha umubomfi wamukulu wabashilikali
(Mat. 8.5-13; Yoh. 4.43-54)
1Ulo Yesu ashilile ukusambisha abantu amashiwi akwe onse, ayinjile mu Kapenaumu. 2Umukulu uwabashilikali umo bachi Loma, alikwete umubomfi uwo atemenwe ukwinekantu. Umubomfi ngu ali alilwele mupepi nokufwa. 3Ulo umukulu wabashilikali aumfwile ifyo Yesu alikuchita, atumine abakulu bambi Abachiyuda ukuti bakamufumbe ese aposhe umubofi wakwe. 4Ulo bafikile kuli Yesu, abakulu mbalya balimupapatile ukwinekantu nokuti, “Ngu alingile ukumwafwa 5pakuti, alitemwa abantu besu, nakambi ewatwimakila inanda yakulombelamo Lesa.”
6Echo Yesu alile nabo. Nomba ulo apalamine kunanda, umukulu wabashilikali atumine kuli Yesu ifibusa fyakwe nokuti, “Bashikulu, mwiyichushapo, nshilingile ukuti mwise mwinjile munanda yanji. 7Echo nshimwene uulingile ukwisa kuli mwe. Nomba soseni bwaka ishiwi, umubomfi wanji akupola. 8Pakuti nandibo ndikwete isambu ishafuma kubakulu banchito. Elo ndikwete abashilikali abo ntungulula. Njeba kuli ngu, ‘Koya!’ naye kaya, nakuli umbi, ‘Isa!’ naye kaisa. Nakumupyungi wanji, ‘chita nchi!’ naye kachita.”
9Yesu alishimbilwe pakumfwa nchi. Apilibukile kwibumba ilyamukonkele nokusosa ati, “Nkomweba nati, tanshabala nsangapo ichichetekelo ichaba mfi nangu nimubena Isilaeli!”
10Ulo intumi shabwelele kunanda yaku mukulu wabashilikali, basangile umubomfi wakwe alipolele.
Yesu abusha umwana wachokolo
11Panuma yaku mfi, Yesu ayile kumushi uwitwa Naini. Abakusambila bakwe pamo nebumba ilikulu bayile nakwe. 12Ulo afikile mupepi napamulyango welinga lyamushi, Yesu akumenye abantu abatembele uwafwa. Ngu mwana umwalalume ali umo mpo muli banyina, bo abali nibachokolo. Abantu abenji abamumushi bali pamo nakwe. 13Ulo Bashikulu bamubwene, umutima wabo wayiketwe nenkumbu. Basosele kuli banyina ati, “Wilila.” 14Epo Bashikulu balipalamine nokwikata kumbokoshi yamfwa. Elo abatembele balimakene. Yesu asosele ati, “We mulumbwana, nkososa kuli webo nati, buka!” 15Bwangu-bwangu uwafwile alibukile nokwamba ukusosa. Bashikulu bamupele nakuli banyina.
16Elo abantu bonse balishimbilwe ukwinekantu. Epo batatikile ukuchinshika Lesa nokusosa ati, “Umusoseshi umukulu ayisa mukutandalila abantu bakwe!” Nakambi, “Lesa ayisa mukupulusha abantu bakwe.”
17Nomunkunta waku Yesu walikumene konse-konse muchalo cha Yudeya namumishi yonse iyashinguluka.
Intumi shafumine kuli Yohane Mubatishi
(Mat. 11.2-19)
18Yohane balimubushishe abakusambila bakwe fyonse mfi fintu. Elo ayitilepo abakusambila bakwe babili, 19nokubatuma kuli Bashikulu Yesu mukufumba ati, “Napo niwe basosa ukuti alinokwisa nangula tuli nokulindilila umbi?”#Mal. 4.5; Mat. 17.12
20Ulo abakusambila bafikile kuli Yesu, basosele ati, “Yohane Mubatishi atutuma kuli webo akofumba ati, ‘Napo niwe basosa ukuti alinokwisa, nangula tuli nokulindilila umbi?’”
21Panshita yenka njilya, Yesu alikuposeshe abantu abenji kumalwele nakumyalu nambalya abali nemipashi iibi, nempofu nasho shalikubona. 22Elo ayasukile abatuminwe ati, “Bwelelenimo mukamushimikileko Yohane ifyo mwabona nokumfwa: impofu shikobona, abalemana bakoyenda, abafyona bakopola, bankoma-matwi bakoumfwa, abafwa nabo bakobuka, nabachula bakoshimikilwa Ubutumi Bwawama. 23Balishuka abantu abatakayikapo pali nebo!”
24Panuma ulo intumi shakwa Yohane shafuminepo, Yesu atatikile ukusosa kumabumba abantu ifyakwa Yohane ati, “Ulo mwayile kuli Yohane muchiswebebe, findo mwalikufwaya ukubona? Napo mwalikufwaya ukubona ifyo itete lisunkana kumwela? 25Nindo mwafwayile ukuya mukubona? Napo muntu uufwite ifyakufwala ifyelele? Iyowo, abantu bafwala ifyelele basangwa mumananda amfumu! 26Njebeniko, findo mwayile ukubona? Napo musoseshi? Ina, nachine mwabwene umuntu umukulu ukuchila umusoseshi. 27Pakuti Yohane eye Amalembo asosapo ati,
‘Lesa asosele ati,
nakutuma intumi yanji,
nakwituma pantanshi yobe,
ukuti ikuwamishe inshila yobe.’#Mal. 3.1
28Nachine nkomweba ati, tapapo nangu umo umukulu uuchilile pali Yohane. Nomba umunini mubufumu bwaku Lesa, mukulu ukuchila pali ye.”
29Abantu bonse pamo nabamusonko baumfwile amashiwi akwa Yohane. Ulo balikubatishiwa na Yohane, balisumine ukuti Lesa e Mulungami. 30Nomba Abafalisi nabasambishi ba Mafunde balikene ukuchita ukufwaya kwaku Lesa, pakuba balikene ukubatishiwa na Yohane.
31Yesu asosele ati, “Kanshi nikundo ningabalinganyako mba bantu bamuli njino nkulo? Bakopalana nendo? 32Bali ukubati bana abekele pachisanke abakoyitana nabanabo ati,
‘Twalimulishishe tumitolilo twapabwinga,
nomba mwe namasha kayafishisha kumo!
Twalimbile inyimbo shapachililo,
nomba mwe nomusowa kawafishisha kumo!’
33Nachine Yohane Mubatishi alishile, alikwikanya ukulya nokunwa waini, kuntu mwebo mwalikusosa ati, ‘Ali nomupashi uubi!’ 34Elo Umwana wa Muntu alishile, alikulya nokunwa. Mwebo mwasosele ati, ‘Boneni ngu muntu! Wakumutoba, nichakolwa, nakambi nichibusa wabamisonko nembifi.’ 35Nomba umulangwe waku Lesa ulaboneka uwachine kuli bo abampokelela muchine.”
Yesu munanda yaku Simoni Umufalisi
36Umufalisi umo ayitile Yesu mukulya nakwe. Yesu alinjile munanda nokwikala nokulya pamo nakwe. 37Muli ngulya mushi mwalipo umwanakashi umo uwali mbifi, umuchende. Ulo aumfwile ukuti Yesu alimukulya munanda ya Mufalisi, ayishile nomusashi wamafuta aanunkila bwino. 38Alishile nokwimakana kunuma yaku Yesu kumakasa, akolila nokuponya iminsoshi pamakasa aku Yesu. Elo nokuasumuna nemishishi yakwe. Nakambi alifyomfyontele amakasa aku Yesu nokuasuba namafuta. 39Ulo Umufalisi uwayitile Yesu abwene mfi, alangulukile ati, “Ngu muntu nga aaba ati musoseshi, nga alishibile ifyo mwanakashi uukomukumya aba, nga ngu ayishiba ukuti nimbifi!”
40Nomba Yesu alisosele kuli ye ati, “Simoni, ndipo neshiwi lyakukweba.”
Simoni asosele ati, “Ina, we musambishi, njebeniko.”
41Yesu asosele kuli ye ati, “Kwalipo abalalume babili abakongwele indalama kumuntu umo. Umo akongwele indalama imyanda isano ishabuseke. Umunakwe naye amakumi asano. 42Pakuti tabakwetepo ifyakumubwesesha, alibanakilile bonse babili inkongole shabo. Nomba njebeniko, niwisa uwaku bo uwakuchilapo ukutemwesha?”
43Simoni ayasukile ati, “Nebo nkolanguluka ukuti ningulya uwakongwele ishinji.”
Yesu asosele ati, “Wayasuka bwino.” 44Elo ayalukile kumwanakashi nokusosa kuli Simoni ati, “Ulimubwene ngu mwanakashi? Nyinjile munanda yobe, kuntu taumpelepo amenshi yakusamba amakasa anji. Nomba ye anasha amakasa anji neminsoshi yakwe nokuasumuna nemishishi yakwe. 45Webo taumpelepo ukufyomfyonta ukwabuchibusa umo nyinjilile muno, kuntu ngu talekelepo ukufyomfyonta amakasa anji. 46Webo taunsubilepo umutwi wanji namafuta, kuntu ngu waasuba amakasa anji namafuta aabwema. 47Epo nkokweba ukuti pamulandu wakuti alintemenwe ukwinekantu, amabifyo akwe nangu apakile shani, anakililwa. Nomba umuntu uyo banakilila apanini, eukotemwa panini.”
48Yesu asosele kumwanakashi ngulya ati, “Amabifyo obe anakililwa.”
49Abayikele pakulya pamo nakwe batatikile ukusoshanya bati, “Nga uyu naye ninani uukonakilila amabifyo?”
50Nomba Yesu aebele umwanakashi ati, “Ukuchetekela kobe kwakupulusha. Endelapo umutende.”
Okuqokiwe okwamanje:
Luka 7: LalaNT
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Chilala New Testament © Bible Society of Zambia, 1998.