ĠWANNI 13
13
Kapitlu 13
Ġesù jaħsel saqajn id-dixxipli
1Qabel il-festa tal-Għid, billi kien jaf Ġesù li waslet is-siegħa tiegħu biex jgħaddi minn din id-dinja għal għand il-Missier, hu, li kien ħabb lil tiegħu li kienu fid-dinja, ħabbhom għall-aħħar.#Mt 26,45; Mk 14,41; Ġw 12,23; 16,28; 17,1. 2Kienu qegħdin għall-ikel. Ix-Xitan kien ġa webbel lil Ġuda ta’ Xmun l-Iskarjota u daħħallu f’rasu li jittradih.#Lq 22,3; Ġw 13,27. 3Ġesù kien jaf li l-Missier tah kollox f’idejh, u li hu kien ġie mingħand Alla u kien sejjer għand Alla.#Mt 11,27; Lq 10,22; Ġw 3,35; 16,28. 4Qam minn fuq il-mejda, neħħa l-mantar minn fuqu, ħa fardal u rabtu ma’ qaddu. 5Imbagħad ferragħ l-ilma fil-lenbija, u beda jaħsel saqajn id-dixxipli u jixxuttahomlhom bil-fardal li kellu ma’ qaddu.#Lq 7,44; Ġw 12,3. 6Mela wasal fuq Xmun Pietru, u dan qallu: “Int, Mulej, taħsilli saqajja?” 7Ġesù wieġbu: “Int għalissa ma tafx x’qiegħed nagħmel jien; tifhmu aktar ’il quddiem.” 8Qallu Pietru: “Ma jkun qatt li inti taħsilli saqajja!” Wieġbu Ġesù: “Jekk ma naħsillekx saqajk, ma jkollokx x’taqsam miegħi.” 9Qallu Xmun Pietru: “Mulej, mhux saqajja biss, imma idejja u rasi wkoll.” 10Qallu Ġesù: “Min hu maħsul, ma għandux għalfejn jinħasel kollu, ħlief saqajh, għax hu kollu kemm hu nadif, u intom indaf, imma mhux ilkoll.”#Ġw 15,3. 11Għax hu kien jaf min kien sejjer jittradih; għalhekk qal, ‘M’intomx ilkoll indaf.’#Ġw 6,64-71.
12Wara li ħaslilhom saqajhom, libes il-mantar u raġa’ qagħad fuq il-mejda; u qalilhom: “Tafu x’għamiltilkom? 13Intom issejħuli ‘l-Imgħallem’ u ‘il-Mulej’, u tgħidu sewwa, għax hekk jien.#Mt 23,8-10. 14Mela jekk jien, li jien il-Mulej u l-Imgħallem, ħsiltilkom saqajkom, hekk intom għandkom taħslu saqajn xulxin.#Mt 20,28; Lq 22,27; 1 Tim 5,10. 15Għax jien tajtkom eżempju, biex kif għamilt jien magħkom, hekk tagħmlu intom ukoll.#Fil 2,5; 1 Pt 2,21. 16Tassew tassew ngħidilkom, l-ilsir mhuwiex aqwa minn sidu, anqas il-messaġġier ma hu aqwa minn min jibagħtu.#Lq 6,40; Ġw 15,20. 17Jekk dawn il-ħwejjeġ tafuhom, henjin intom jekk tagħmluhom.#Ġak 1,25. 18Jien m’iniex ngħid għalikom ilkoll, għax jien naf x’nies għażilt, imma għandha sseħħ l-Iskrittura li tgħid, ‘Min kiel il-ħobż miegħi, tani bis-sieq.’#S 41,9. 19Dan qiegħed ngħidu minn issa, qabel ma jiġri, biex, meta jiġri, temmnu li jiena hu.#Ġw 8,24-28; 14,29; 16,4. 20Tassew tassew ngħidilkom, min jilqa’ lil min nibgħat jien, ikun jilqa’ lili, u min jilqa’ lili, ikun jilqa’ lil dak li bagħatni.”#Mt 10,40; Mk 9,37; Lq 9,48; 10,16.
Ġesù jħabbar it-tradiment ta’ Ġuda
(Mt 26,20-25; Mk 14,17-27; Lq 22,21-23)
21Wara li qal dan, Ġesù ħass ruħu jitħawwad, u stqarr bil-miftuħ: “Tassew tassew ngħidilkom li wieħed minnkom se jittradini!” 22Id-dixxipli qabdu jħarsu lejn xulxin, ma jafux għal min qal hekk. 23Wieħed mid-dixxipli tiegħu, dak li Ġesù kien iħobb, kien maġenbu fuq il-mejda#13,23: Kien maġenbu fuq il-mejda: kienu mimdudin fuq il-ġenb tax-xellug kif kienet id-drawwa dik il-ħabta., b’rasu ma’ sider Ġesù.#Ġw 19,26; 20,2; 21,7-20. 24Xmun Pietru għamillu sinjal u staqsieh: “Għal min qiegħed jgħid?” 25Dak, kif kien mimdud hekk fuq sider Ġesù, staqsieh: “Min hu, Mulej?”#Ġw 21,20. 26Wieġbu Ġesù: “Dak li għalih se nbill din il-loqma ħobż fil-platt u nagħtihielu.” Imbagħad bill biċċa ħobż, u qabad u taha lil Ġuda ta’ Xmun l-Iskarjota. 27Ġuda ħa l-biċċa ħobż u daħal fih ix-Xitan. Qallu Ġesù: “Dak li se tagħmel, agħmlu u ddumx.”#Lq 22,3; Ġw 13,2. 28Imma ħadd minn dawk li kienu fuq il-mejda ma kien jaf għalfejn qallu hekk. 29Billi Ġuda kien il-kaxxier, xi wħud stħajlu lil Ġesù jgħidlu, ‘Mur ixtri dak li neħtieġu għall-festa,’ jew biex imur jagħti xi ħaġa lill-foqra.#Ġw 12,6. 30Dak, wara li ħa l-biċċa ħobż, minnufih ħareġ ’il barra. Kien billejl.
Il-kmandament il-ġdid
31Kif ħareġ Ġuda, Ġesù qal: “Bin il-bniedem huwa gglorifikat issa, u permezz tiegħu huwa gglorifikat Alla.#Ġw 12,23; 17,1-5. 32Jekk Alla huwa gglorifikat permezz ta’ Bin il-bniedem, Alla wkoll permezz tiegħu nnifsu għad jigglorifika lilu, u dalwaqt jigglorifikah. 33Uliedi, ftit ieħor se ndum magħkom; intom tfittxuni, u bħalma għedt lil-Lhud, hekk ukoll ngħidu issa lilkom: Fejn sejjer jien, intom ma tistgħux tiġu.#Ġw 7,33-34; 8,21. 34Nagħtikom kmandament ġdid, li tħobbu lil xulxin. Bħalma ħabbejtkom jien, hekk ukoll ħobbu intom lil xulxin.#Ġw 15,12-17; 1 Ġw 2,8; 3,23; 2 Ġw 5. 35Minn dan jagħraf kulħadd li intom dixxipli tiegħi, jiġifieri, jekk ikollkom l-imħabba bejnietkom.”#1 Ġw 3,14.
It-taħbira taċ-ċaħda ta’ Pietru
(Mt 26,31-35; Mk 14,27-31; Lq 22,31-34)
36Qallu Xmun Pietru: “Fejn sejjer, Mulej?” U Ġesù wieġbu: “Fejn sejjer jien, int għalissa ma tistax tiġi miegħi; imma tiġi warajja aktar tard.”#Ġw 7,34-36. 37Qallu Pietru: “Għaliex, Mulej, ma nistax niġi miegħek issa? Għalik jiena nagħti ħajti!” 38Wieġbu Ġesù: “Inti, tagħti ħajtek għalija? Tassew tassew ngħidlek li s-serduk ma jkunx idden qabel ma tkun ċħadtni tliet darbiet!”
Okuqokiwe okwamanje:
ĠWANNI 13: MB20
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Maltese DC Bible © Malta Bible Society, 2020.