Oyinyima 1
1
Ịtọpa Óhomorihi mẹmẹ tụ́ ẹhẹ
1Ịjị Ohomorihi nyima aa tụ́ ẹhẹ ộ tụ́ ẹbẹẹba ọnịrị ẹtẹ. 2Ẹtẹ vị ana vịdị tịtẹ juguu kẹnẹ, di o vi osusu nị. Enyi ọbanyị vi ene kú avaba ẹtẹ, dị avaba ẹtẹ vị ịrahụ ruma-ruma nị. Dị Ụhwẹ Ohomorihi yà ẹbẹẹba enyi ọnọọ, dị aa mẹ nanana nị. 3#2 Ịkọ 4.6Ohomorihi ộ kà a ka à nyị ẹtohweyi, dị a nyị ẹtohweyi nị. 4Ohomorihi ô re ka ẹtohweyi ọnọọ ô zoza. Di Ohomorihi mẹ ẹhwị yị ẹtohweyi ọnịrị ịrahụ nị. 5Di Ohomorihi ka ẹtohweyi ọ vị ọọdụ, di etohozi ọnị ọ̀ vị ịrahụ nị. Hụụnị ẹnẹnẹ na ngụ oruva dị ọ vị ẹkụhị ọnya nị. 6#2 Ipi 3.5Ịrẹma ọnọọ di Ohomorihi rẹ ka à nyị eguhi dị ọ̀ yà ịnị akakana enyi ọnọọ dị ọ̀ gà enyi ọnọọ hi ẹẹva. 7Dị Ohomorihi mẹ̀ ịsa ọnya ana ya anka itu avọọ dị ọ há enyi ọnọọ hì ẹẹva nị. Ọnya yà iruvo itu dị ọsa yà ẹbẹẹba anị nị. Ịzẹyịza dị ọ vavọọ yà nị. 8Ohomorihi ka itu ọnọọ ọ rị ẹbẹẹba nị. Hụụnị ẹnẹnẹ na ngụ oruva dị ọ rẹ vị ẹkụhị ọhụva nị. 9Di Ohomorihi rẹ ka enyi ene hi iruvo itu ẹ̀ kụ́ gụ hi aha ọnya di eteesu ò re oze tụ́ ẹhẹ. Dị ọ rẹ vavọọ yà nị. 10Dị ọ ka eteesu ọnọọ ọ vị ẹtẹ, di enyi ana kụ́ gụ ọnị vị òkū nị. Ịjị Ohomorihi vavọọ re e ô zee e eyi. 11Ohomorihi ọ rẹ kà a ka ọchị nịnị ẹ̀ chị hụụnị ẹtẹ hi ẹhẹ, ọchị irenyi-irenyi anaā nyị ẹtụtụ ọnịrị ihu evere ẹnịnị. Dị ẹ rẹ vavọọ, chị hi ẹhẹ nị. 12Dị ọchị irenyi-irenyi vavọọ chị hi ẹhẹ nị, ochị anaā nyị ihu evere ẹnịnị ọnịrị anaā tụ́ ẹtụtụ evere ẹnịnị. Ohomorihi mẹ vavọọ re e, ô zee e eyi. 13Hụrị ẹnẹnẹ na ngụ oruva, dị ọ rẹ tụ́ ọ ẹkụhị ọhụta nị. 14Dị Ohomorihi rẹ ka à nyị ẹtohweyi hi ini eguhi ẹbẹẹba, dị ọ̀ há ọọdụ ọnịrị ịrahụ hi, dị à rẹ zụ sịị yẹ ẹkụhị, ịrayị ọnịrị ụmẹ eche ahẹkẹ. 15Etohweyi ẹnẹẹ vaa za ẹbẹẹbẹ, dị ẹ̀ sị ẹtohweyi tụ́ ịnị ẹhẹ. Dị ọ rẹ vavọọ yà nị. 16Ohomorihi ộ mẹ̀ ịsa ẹbanyị ẹẹva anaā sịị ẹtẹẹ hweyi. Ana banyị hu aa zẹtẹ ọọdụ, di oweyi ọnị aa zẹtẹ ịrahụ nị. Di Ohomorihi rẹ mẹ ụzọmị nị. 17Dị ọ kụ́ wa hi ini eguhi ẹbẹẹba ka ẹ̀ẹ sị ẹtohweyi yị ẹhẹ, 18dị ẹ̀ẹ zẹtẹ ọọdụ ọnịrị ịrahụ, dị ẹ̀ rẹ há ẹtohweyi ọnịrị ịrahụ hi. Ohomorihi mè re e, ô zee e eyi. 19Hụụnị ẹnẹnẹ na ngụ oruva, dị ọ rẹ tụ ọ ẹkụhị ẹẹna nị.
20Ohomorihi rẹ ka ịsa anaā ra ini enyi ọrụrụ-ọrụrụ ẹ̀ chaka hi ini enyi, di inomi nịnị eè hira ẹbẹẹba ini eguhi. 21Ịzẹyịza di Ohomorihi mẹ uye ẹbanyị-ẹbanyị eneē hi ini enyi ọnịrị avaba ịsa anaā ra ini enyi beri inomi nịnị nị. Ohomorihi mè re e, ô zee e eyi. 22Di Ohomorihi ka vi o vee zee yị wa nị. Dị ọ ka wa naa ma dị waa rụrụụ hu avọọ nịnị, dị wa gwẹtẹ hi ini enyi nịnị ọnịrị ịnị òkū. Dị inomi nịnị ẹ̀ gwẹtẹ hi ẹhẹ. 23Hụụnị ẹnẹnẹ na ngụ oruva, dị ọ vị ẹkụhị ẹẹhị nị. 24Di Ohomorihi rẹ ka evere ịsa ana aa tụ́ ụhwẹ irenyi-irenyi ẹ̀ chaka hi ịrẹsụ ẹtẹ, ẹhụụ uye ẹbanyị uye eneē tura, ọnịrị uye ịnị avị. Evere ọzọza ẹ̀ gara hi ẹhẹ. Dị ọ rẹ vavọọ yà nị. 25Di Ohomorihi mẹ uye ini avị evere irenyi-irenyi ọnịrị ịsụpa ne beri uye eneē tura anka evere ọzọza nị. Ohomorihi mè re e ô zee e eyi. 26#1 Ịkọ 11.7Di Ohomorihi va ka, “Jẹẹ ya mẹ ọza vene ẹngụ ayị, dị ẹ̀ yà anka ị mẹ̀ yà. Ẹnị ẹ vaa vị ohirẹsụ ivovo ene hi ini enyi ọnịrị inomi ene hi ẹbẹẹba ne beri avaba uye nịnị, oweyi, ọbanyị, ini eehi ọnịrị ịnị avị.” 27#Oyn 5.1,2#Imt 19.4; Ịmk 10.6Ịzẹyịza di Ohomorihi mẹ ọza, dị ọ mẹ wa vene ẹngụ anị nị. Ọnọrụ ọnịrị ọnẹẹ ọ mẹ nị. 28Ohomorihi ka o vee zee yị wa, dị ọ ka, “Ẹ vaa ma ozii rụrụ, ezi ẹnịnị vaa ra avaba ẹhẹ, dị ẹ vi ohinọyị tụra ịrẹsụ ịsa ene hi ẹhẹ. Ẹ vaa nyị ọda tụra ivovo ọnịrị inomi ne beri avaba uye irenyi-irenyi. 29Mâ sị akụ ọnịrị apaapa ne beri ẹtụtụ irenyi-irenyi yị wụ nịnị ka waa rị wa nịnị. 30Ama inomi ọnịrị uye nịnị vị ọnị mị sị avị yị ka ẹẹ̀ rị ọ.” Ịzẹyịza dị ọ rẹ vavọọ yà nị. 31Ohomorihi mẹ̀ re avaba ịsa ọnị ọ mẹ, ô zee e eyi ẹtẹẹtẹrẹ. Hụụnị ẹnẹnẹ na ngụ oruva dị ọ vị ẹkụhị ịhịnọnyị nị.
Okuqokiwe okwamanje:
Oyinyima 1: EBTP
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Ebira First Bible © Bible Society of Nigeria, 2014.