ATÜNNAK 2
2
1Cun ah khawpükpüi avan a tüisho cu pyi phleh ci. 2A hnüüp chih hnüüp ung Khanpughi cu a tüisho avan pyi phleh ci kyasei ng’düm ci. 3Khanpughi naw cun ah a chih hnüüp cu phyisä ne theingciim sak ci. A i ah kyasei ci ung cun ah hnüüp cu a tüisho a pyi phleh nak la angdüm nak ah kyak ci. 4Shin gui cu Khanpughi naw khankho la khomdek a tüisho nak ah hnüüp ah a mawng gui ah kyak ci.
Eden Khaw Duum
Bawipa Khanpughi naw khankho la khomdek a tüisho thai ung, 5khomdek khan ung a i phi kä phung ghing phak ci, a i geit m’shi phi kä ng’lihpyou phak ci. A i ah kyasei ci ung Bawipa Khanpughi naw khaw kä aa sak phak ci, khomdek bik khai phi a u kä om phak ci. 6Cun ung phi khomdek ungka tui lut law sei khomdek avan cawi ci.
7Cun kawn ah Bawipa Khanpughi naw m’dek cu la ne chang ah pyang neta, a hngakhawng hnun ghin nak cu yuk muut khäta, ani cu chang ghing ah kya lawk ci.
8Khanpughi naw hni law lam ah Eden ung khodum geitkaw neta a cun ung a tüi pyan ah chang cu om sak ci. 9Cun ah dum ung kyom ne, ei hlü vai ah m’theih ciah sing ghing a hlü hlü ghing sak ci. Dum ah ang lung ung ghin nak ah sing ghing phi om ci, akni la akshe m’chaa nak ah sing ghing phi om ci.
10Eden dum ung yung züi khai ah tuinu tumat cu khawng ne lut law ne tuilawng phli ah ng’phyeek ne long ci. 11A tumat nak ah tuilawng cu Pishon ming nak ci; ghui ah om nak ah Havilah khaw ung yu long ci. (12Cun ah khaw ung ghui akni om ci, sing k’pli tui la pyülung phi om ci.) 13A hnih nak ah tuilawng cu Kihon ming nak ci; Kush khaw ung yu long ci. 14Ak thum nak ah tuilawng cu Tikris ming nak ci; Assiria khaw hni law lam ung yu long ci. Ak phli nak ah tuilawng cu Euphratis ah kyak ci.
15 Bawipa Khanpughi naw chang cu la ne Eden dum cu bi ne m’htei khai ah tha ci. 16Khanpughi naw chang am, “Shin ah dum ung sing ghing ah m’theih phung na ei vai; 17Cun ung phi akni la akshe m’khoichaa nak ah sing ghing ah m’theih cu kä na ei vai, na ei ah a kyak ung acun ah hnüüp ung na si khenggeng khai” cine m’cäi ci.
18 Bawipa Khanpughi naw, “Chang pami a mät bäng a om cu kä bä ci, hnünthawh püi khai ah a paw cu ka pyang khai” cik ci. 19Bawipa Khanpughi naw m’dek ng’nai cu la neta khisa avan la kha gui avan cu tüi pyang ci. Cun kawn ah chang naw teng gui neta ami ming a sui gui vai ah law püi gui ci. Chang naw ak ghing gui avan cu ami ming sui gui sei, a sui gui phäh phäh ming nak ci gui. 20Chang naw khisa gui, phyukha gui avan ami ming sui yawp ci; cun ung phi chang awn amüi täng ciah a paw vai tumat phi kä om ci.
21Cun ah kya khätah Bawipa Khanpughi naw chang cu ip hniim khai ah ih sak ne, am hnaak guh tumat la neta, a hnün ung asa awn be ba sak ci. 22Bawipa Khanpughi naw pami ungka a laak ah am hnaak guh cu hnumi ah pyang neta, pami ah om nak ah law püi ci. 23Pami naw,
“Shin cu ka mät ah mäih tumat ah kyak ci.
Ka guh ungka guh, ka sa ungka sa ah kyak ci;
Pami ungka la ne pyan ah kyasei, A ming cu ‘Hnumi’ ah kyak khai nei” cik ci.
24Cun ah kyasei pami naw anu la apa nawng shüt ne, akchu cu ng’pungkhah püi sei, ngani cu tumat ah kya lawk ci goi.
25Pami la hnumi cu a nik plui ah om ci goi, cun ung phi lü ng’aa nak kä om ci.
Okuqokiwe okwamanje:
ATÜNNAK 2: CBC
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Cho Bible Common Language © Bible Society of Myanmar, 2016.