Matie 3
3
Lo tɛ Yoanɛ wa liɛngɔ batisimɔ
(Mar. 1.1-8; Luk. 3.1-18; Yoa. 1.19-28)
1Na ngoi ko ndo ko, Yoanɛ wa hɛ̃ngɔ batisimɔ asi ka bɛ ndo mɛ ka sese ti Yudea, lo pa tɛnɛ tɛ Nzapa hɛ̃ azi. 2Lo pa hɛ̃ la ya: “Ale ĩ gbinya bɛ ĩ, ta sanga ma, Nzapa adoli so lɛngɔ gbia ndo ĩ.”
3Yoanɛ ndo la Ezai mɛ wa pangɔ nyɔ Nzapa atɛnɛ tɛnɛ tɛ lo, na ngoi mɛ Ezai pa ya:
“Mbanga zo ndoto mbela ka bɛ ndo ya:
‘Ĩ lɛkɛ lege alo mbiri mbiri hɛ̃ Gbia oo!’ ”
4Alɛkɛ ndo bɔngɔ tɛ Yoanɛ na kwa ti tɛrɛ sa mɛ ili ni la samo. Lo ndogbe ndo gba ti pɔrɔ sa na gu ya lo. Lo ndotɛ ndo amɔnyɔkpɔ̃, lo ndosũ ndo nga kpɔ̃ lavũ ti ya ndo. 5Azi gba mɛ ka Yeruzalɛmɛ, na ala mɛ ka sese ti Yudea, nga na ala mɛ ka sese mɛ ka tɔ̃ ngu mɛ ili ni la Yurdɛnɛ, ndoga ndo ka tɛ Yoanɛ. 6Asiɔ ye mɛ ndo ala li ko, ala pa ndo ni na gbɛlɛ azi zu, la Yoanɛ ahɛ̃ la batisimɔ ka ya ngu ti Yurdɛnɛ.
7Ngoi mɛ Yoanɛ ĩ hũ ya, Afarizeo na Asaduseo gba ndoga ka tɛ ni so mungɔ batisimɔ ko, lo pa hɛ̃ la ya: “Ĩ asiɔ azi olo, zo mɛ afa ĩ na lege ti kpɛngɔ ngɔnzɔ mɛ Nzapa na lingɔ hɛ̃ asiɔ azi na? 8Wa ĩ li aye mɛ afa ya, ĩ gbinya bɛ ĩ. 9Ko ĩ zia nɛngɔ ka ya bɛ ĩ ya: ‘Abrahama adu kotara e.’ Ta sanga ma, mbi pa hɛ̃ ĩ ya, Nzapa alengbi ti mungɔ atɛnɛ olo gbinyangɔ ni tingɔ azi, ko azi ni ati atara Abrahama! 10Alɛkɛ lɛ dɔ so farangɔ na ambatana kɛkɛ wɛ. Ko kɛkɛ zu ko la ta ndole nzɔ̃ni ma ko, na dɛngɔ ni, bingɔ ya wá. 11Tɛ mbi ko, mbi ndoyɔrɔ ĩ na ya ngu so hɛ̃ngɔ ĩ batisimɔ, so fangɔ ya, ĩ gbinya bɛ ĩ. Kanda zo mɛ na gangɔ pɛ mbi ko, lo na sangɔ Tɔrɔ Santo tɛrɛ ĩ so hɛ̃ngɔ ĩ batisimɔ, ko Tɔrɔ Santo ni na lingɔ kwa nga ma wá. Zo ni aɔ mbi na nguru, ta mbi du zo mɛ mbi lengbi bɛ ti hãngɔ pɔrɔ tɛ lo na gɛrɛ lo ma. 12Zo ni agbɔ̃ lungu so ti lo, ya ni pɛ na le tɛ, wa sã ni agwe katɛ. Lo na bongɔ le tɛ ni ka ya gɔ tɛ lo, ko lo na zɔngɔ sã ni na wá mɛ ta ndomingɔ bɛ gbɔ ma.”
Yoanɛ ahí Yezo batisimɔ
(Mar. 1.9-11; Luk. 3.21-22)
13La Yezo alo ka Galilea agwe ka tɔ̃ ngu ti Yurdɛnɛ. Lo si ka tɛ Yoanɛ ya, lo hɛ̃ ni batisimɔ. 14La Yoanɛ akɛ̃, apa hɛ̃ Yezo ya: “Mɔ la mɔ lengbi ti hɛ̃ngɔ mbi batisimɔ, ko mɔ ti mɔ ga ge tɛ mbi ya, mbi hɛ̃ mɔ batisimɔ nga sia?” 15La Yezo apa hɛ̃ lo ya: “Ale mɔ ye ya, na olo ko, adu mɔ la mɔ lengbi ti hɛ̃ngɔ mbi batisimɔ. Ta sanga ma, se mɛ e lengbi ti lingɔ ye kwɛ na seni, nga ma se mɛ Nzapa aye la.” La Yoanɛ aye.
16Bo na ngoi mɛ Yoanɛ ĩ hɛ̃ Yezo batisimɔ ko, Yezo alo ka ya ngu ako gegi, ko lo hũ lɛ ndozu azi mbue. Lo hũ Tɔrɔ tɛ Nzapa aga nga ma mbipa, azu ndo lo. 17Ko legɔ̃ zo adu ka ndozu apa ya: “Zo olo adu Nyi mbi ti kpɔ̃ bɛ mbi, bɛ mbi ndode na lo tɛ lo sĩ.”
Okuqokiwe okwamanje:
Matie 3: NGB87
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Ngbandi New Testament © United Bible Societies, 1987.