Matyu 18
18
Kangrunaan ya kanunumuwan
Mar. 9:33-37; Luk. 9:46-48
1Ket dito adalan, imadenni da itun e̍ Je̍sus, nga kinunen da, “Nagan na kadi ya maibilang nga kangrunaan nga toley kadiya iturayan niya Nailangitan?” kunen da.
2Ket e̍ Je̍sus, pinalbe̍t na ya isa nga ebbing, ket nipasangu na igida. 3Ket kinunen na, “Tutu met nga pulus nga madi kayu makalak-am iya panangituray niya Nailangitan no madi kayu agbaliw kadiya pangpanggep nu, nga agbalin kayu nga arig mettas nga ebbing. 4Ngarud, ya kangrunaan kadiya iturayan niya Nailangitan, itu ya mangipababa iya pangpanggep na nga arig nga pangpanggep nidi nga ebbing. 5Ket ya mangrispitar iya isa nga agten idi nga ebbing gapu iyaken, ket iyaken met ya rinispitar na.”
Maipanggep kadiya toley nga makaigapu ka panagbasul
Mar. 9:42-48; Luk. 17:1-2
6“Ngem ya orey nagan na nga makaigapu ka panagbasul niya isa nga agten kadidi nga tekkut nga ebbing nga agtalec iyaken, nabarbaru met para iyan nga pakaigapuwan niya panagbasul, no pagbanagan na kuma ya mabaudan ka dackel nga takiyew ya tengnged na, se̍ mailned din iya nasalem niya baybay. 7Kackaasi ngarud diya taga-lubung ngi, ta adu diya pakasulisugan niya toley. Pe̍yeng ngarud nga uwed da mangsulisug ka toley nga madi mapalta, ngem kackaasi nad lugud ya pagbanagan diyan nga toley nga pakaigapuwan niya panagbasul diya duduma.
8“Ket iya agten iyan, no ya imam winno ya sakam ya pakaigapuwan niya panagbasul mu, putdem ngarud se̍ itemsit mu ngasin. Ta nabarbaru lugud no pukul winno piley ka nga makalak-am iya agnanayun nga biyag ngem ya uwed duwa nga imam winno sakam, ngem maipisuc ka ngas met iya agnanayun nga apuy enna impiye̍rnu. 9Ket agten pe̍ no ya matam ya pakaigapuwan niya panagbasul mu, kotkotem nga itemsit ngasin. Ta nabarbaru lugud no bulding ka nga makalak-am iya agnanayun nga biyag ngem ya uwed duwa nga matam, ngem maipisuc ka ngas met iya pagapuyan enna impiye̍rnu.”
To pangngarig maipanggep iya napukaw nga karne̍ru
Luk. 15:3-7
10“Agannad kayu kuma ngarud tasun madi kayu kuma laisen ya isa nga agten kadidi nga tekkut nga ebbing. Ipateg nu da kuma lugud, ta kinapudnu na, diya anghe̍l da ka langit, pe̍yeng nga uwed da iya imatang ne̍ Amac nga uwed ka langit. 11[Ket ya Anac nga Naipatoley, inumbe̍t met tasun isalakan na diya napukaw.]
12“Nagan ya kunen nu idi: No uwed kuma sangagasut nga karne̍ru niya isa nga toley, ket naiyaw-awanin ya isa kadito karne̍ru, nagan ngata ya wanglen niyan nga toley yin? Di na ngarud panawan diya siyam nga pulu ket siyam nga karne̍ru iya tageytey nga pagar-araban da, ket mawe̍ na sapsapulen ya naiyaw-awan? Ket tutu met! 13Ket no masmac nan, tutu met nga dacdackel pekkem ya ragsac na gapu iyan nga nasmac na nga karne̍ru, ngem iya ragsac na kadito siyam nga pulu ket siyam nga madi naiyaw-awan. 14Ket agten met pe̍ iyan ya tarigagayan niya Ama nu nga uwed ka langit. Ta madi na gabay no uwed orey is-isa ngas nga mapukaw kadiya agten kadidi nga tekkut nga ebbing.”
Maipanggep iya nakabasul nga kabsat
15“Ket no uwed kabsat mu nga nakabasul ikew, mawe̍ ka ngarud balakadan, ngem dacdakayu ngas nga duwa. Ket no ipangag naka, naariman mun ya panagkabsat nu. 16Ngem no madi naka ipangag, mawe̍ ka manin nga uwed kuma isa winno duwa nga toley nga itarey mu, tasun maariman kuma maikanatad ito naisurat iya Bibliya nga no uwed kanu duwa winno tellu nga mangpanecnec, mapatalgeddan ya amin nga maikagi. 17Ngem no madi nakayu pekkem nga ipangag, ipakaemmu mun iya bungguy mamati. Ket no madi na pekkem latta ikaskasu orey pe̍ ya pamagbaga niya bungguy, ibilang nun nga agten nas iya isa kadito bekken nga Hudyu nga madi mamati, winno kadito agsingsingir ka buis nga managbasul.
18“Ngarud, pudnu met nga ya orey nagan na nga iparit nu idi nga lubung, itu met ya maiparit enna langitin. Se̍ ya orey nagan na nga ipalubus nu idi nga lubung, itu pe̍ yin ya maipalubus enna langit.
19“Ket tutu met pe̍ nga no uwed orey duwa ngas dakayu idi nga lubung nga agtulag iya orey nagan na nga adngen nu ka kararag, ipaay ngarud niya Amac nga uwed ka langit para dakayu. 20Ta no uwed orey duwa winno tellu nga agtitipun nga sidadayaw gapu iyaken, uwed dac pe̍ iyan nga pagtitipunan da,” kunen na.
To pangngarig maipanggep iya panangpakawan
21Ket e̍ Pe̍dru, imadenni itun e̍ Je̍sus nga kinunen na, “Apu, no pe̍yeng nga makabasul iyaken ya kabsat ku, mame̍npiga kuma nga pakawanec? Kustu kadin ya mame̍npitu?” kunen na.
22Ket kinunen ne̍ Je̍sus igina, “Bekken nas nga mame̍npitu ya kunec nga kustu, no di lugud mame̍npitu nga pulu ket pitu. 23Agten ngarud iyan, ta no maipanggep iya panangituray niya Nailangitan, mabalin nga maiyarig iya isa nga ari nga gabay na nga emmuwen se̍ singiren diya eb-ebbonen na kadiya utang da igina. 24Ket ito madama nga agsingsingirin to ari, uwed naipasangu igina nga isa kadito eb-ebbonen na, nga nakautang ito ari ka minilmilyun nga pisus. 25Ket gapu ta awan pagbayad nidi nga eb-ebbonen, nibilin ngarud nito ari nga amu na, nga to eb-ebbonen, mailaku kanu ka sabali nga toley yin, nga agbalin nga tagabu win, agraman ya asawa na se̍ aanac na se̍ amin nga sanicwa na, tasun mabayadan to utang na.
26“Ket to eb-ebbonen, nagparintumeng ngarud nga nagpacpakaasi ito ari, nga kunen na, ‘Anusan nac kay pekkem, apu, ta bayadac nad met amin nga utang ku ikew,’ kunen na. 27Ket to ari nga amu nito eb-ebbonen, gapu ta naasiyan igina, pinakawan nan to utang na, se̍ na pinalubusanin.
28“Ket to eb-ebbonen, pimanaw ngarudin. Ket nasabet na met ya isa nga pada na nga eb-ebbonen, nga nakautang igina ka e̍teng ngas nga kuwarta. Tinengngel na mettin to pada na, ket be̍tkellen na, nga kinunen na met, ‘Bayadam mun to utang mu iyaken!’ kunen na.
29“Ket nagparintumeng ngarud to pada na nga eb-ebbonen, nga nagpacpakaasi igina, nga kinunen na, ‘Anusan nac kay pekkem, ta bayadac nad met ya utang ku ikew,’ kunen na.
30“Ngem madi na met kinaasiyan, no di lugud nawe̍ na nipabalud agingga nga mabayadan nito pada na to utang na. 31Ket dito duduma nga eb-ebbonen, ito nasingen da to napasamac, nalucsew dan. Ket nawe̍ da ngarud nipadamag ito ari nga amu da amin dito napasamac.
32“Ket itun, pinalbe̍t nito ari to eb-ebbonen, ket kinunen na, ‘Nagalas ka lugud nga eb-ebbonen nin! Ape̍ aya? Pinakawan ku mettin amin nga utang mu gapu ta nagpakaasi ka iyaken. 33Di ngarud aya rumbeng no kaasiyam kuma pe̍ to padam nga eb-ebbonen, nga agten mettas ito panangaasic ikew?’ kunen na. 34Ket nakaunget ngarudin to amu na, itu nga niyawat na mettin kadito makaemmu kadiya balbalud, tasun parigaten da kuma agingga ka di makabayad iya amin nga utang na.
35“Ket agten met pe̍ iyan ya wanglen niya nailangitan nga Amac iya tunggal isa dakayu, no madi kayu pakawanen nga sipupudnu ya kabsat nu,” kunen na.
Okuqokiwe okwamanje:
Matyu 18: YBT
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 1990 New Tribes Mission, Sanford, FL 32771-1487, USA.
Printed in the Philippines.