Yohanes 8
8
1It akhuni emenogo laga korlek, at Yesus tom Zaitun oba dageisikhe. 2Dageisikhesik, hubuluke hubenat siakhogon usa'ageikhesik, Allah ai halekma ukisikhemo, akhuni doalegat at oba wagoukhama, at ebe hurek lageikhesik nen, wene yakulisasikhe. 3Wene yakulisugunem, it ap Allah ane iteerek meke men, Farisi meke men, he ageikhe param hagakhunem inileken hasukhasik, Yesus oba wolok wagoukhasik, he etnogo ebe turlem meldiluk nen, 4Yesus men yogokhukha,
“Noe. He yi param hagakhunem hakhogosik nen hoba wolok wago o. 5Nen, Allah nen ninasuk wakhikhe wene etnogo baga, Musa nen holal waganhe dogolik, it humi nen, at he yi hagakhe iti hak hagakho halok, helekit oba inebe motok inasusak o, iluk yoknisasikhemo wene palek werek iti, hat nen nikithogon yoknisagein,” iluk yogokhukha. 6Wene itithogon yogokhukha meke, Yesus ape baga wene oko isinem ekarli warogo wene oba 'buogoluk isukha mekeat, at ut thoma iluk iki sisik nen agat oba holal waganhikhe. 7Itithogonat inane thogotdisalok holal waganhe korlek it nen,
“Yoknisan o, iluk yogokho motok hagakhe lagoukhama, at uroak lek isikhesik, men yogeisasikhe,
Hit welagap ya meke, ap ageikhe weak hagakhidek welagarek meke halok, at nen tak he yi helekit oba tunhogo wasuak o,” iluk 8yogeisasikhesik yabokane apuke ut thoma iluk iki sisik nenat, agat oba holal waganhe lageikheat. 9Itithogon holal waganhe korlek, it emenogo wene yogeisasikhe meke etnogo inasuk holhukhasik, it inarluetek tak dukhisukhama, yabokane inebe tha'bokhogonat opakitek dukhisukhama, at Yesus he etnogo ipisak inarligat dogolik, 10at Yesus etnogo uroak lek isikhesik, at he etnogo men yogokhikhe,
“He yira. Neru o. Ap emenogo re? It nen wene hoba 'bega etnogo, ap ageikhe nen hakhe a? Dek a,” iluk yogosigin apasikhe, 11at he etnogo nen,
“Noe. Motok dek o,” iluk yogokhikhemo, Yesus nen, men yogokhikhe,
“An meneke wene hoba 'biluk hasigin degat o. Haila lan o. Lalok nen he, hurli yogotak oba nen yabokane weak ageikhe hagakhe dogogun o,” iluk yogokhikhesik aila la'isikhe.]
Yesus nen, “Akhuni liarinakherek, anat o,” iluk yogeisasikhe wene
12Yabokane, at Yesus nen it akhuni emenogo wene ageikhe men yogeisasikhe,
“Akhuni agat oba meke liarinakherek iti, anat o. Tha nen an noporlik nekhe dogogin halok he, an nebe lia dogolik inilugurinakherek meke etnogoat woknabigin iti nen, at iti o mummo nekhe dogogin dek o,” iluk ekhe lageikhemo, 13it ap Farisi meke emenogo nen,
“Hat he, habok inilu asuagaluk, hekaerek nenat yogeisekhe lagan iti hekalat ekhe lagan o,” iluk yogokhukhama, 14at Yesus nen, men yogeisasikhe,
“An wagagi meke inom, ligin meke inom, hit hinokodek meke re, an anek nebe o etoma nen wagagi, nen yabokane o etoma ligin, iluk nilu iti nen, an nabok inilu asuagaluk nekaerek nenat yokhisekhe lagei iti re, wene iti eberogonat yokhisekhe lagei o. 15Hit nen wene noba 'bekhe lagap iti, hit akhuni-akhuni wene inoba 'bigik, kokhik, 'begethep hagat, wene noba 'bekhe lagap mekeat, an anek wene akhuni inoba 'bekhe lagei motok dek o. 16Meke re, an nen wene inoba 'bilema re, iti an narligat nen dek o. Nopase nen la'ani ageikhe meke etnogo nipisagat dogolik hagakhe lagei iti nen, wene mothogon akhuni inoba 'bile o. 17#Ulangan 17:6, 19:15 Wene, Allah nen ninasuk wakhikhe meke iti baga men isikhe,
Akhuni wene inoba 'bekhe dogosak halok he, ap wene erlo hagakha inilu meke inebe pere nen inane ipisak tak-tak anek isi halok, wene iti eberogonat usak o,
iluk isikhemo holal waganogo 'bisukha. 18Iti hakene, an nabok, nekaerek nen igik, nopase la'ani ageikhe meke nen igik, yokhisekhe lago iti,” iluk ekhe lageikhemo, 19it nen he,
“Hat hopase iti koma werek o?” iluk yogokhukhama, at Yesus nen he,
“An nebe yi men, nopase men, hinokodegat o. An nebe hinilu dogolepma re, nopase iti hinilu dogolebat o,” iluk yogeisasikhe. 20Wene itithogon yogeisasikhe iti, at ebe Allah ai halekma peti uang Allah hasik 'bisegarekma alilu dogolik isikhe. Itithogon isinem, at ebe hakhausak oba aban asi ageidek werek korlek nogo nen, it akhuni emenogo ageikhe nen hakhigidek tha'bokhogonat kamotdisukha.
Yesus nen, “O an liginmo etoma, hit lausak erlok dek o,” iluk yogeisasikhe wene
21Itithogon kamotdisukhama, at Yesus wene yabokane ageikhe it emenogo men yogeisasikhe,
“An nebe yabokane liginat o. Lalok etoma werekma, hit an heraknabugun meke re, o an liginmo etoma hit lausak erlok dek iti nen, hit weak hagakhe lagap meke wene hinoba werek korlegat hinebe watlasugun o,” iluk yogeisasikhemo, 22it ap koktek Yahudi meke nen he, men isukha,
“Ap yi nen yoknisekhe dogolik,
O an liginmo etoma hit lausak erlok dek o, iluk yoknisekhe iti, at ekaerek nen waragaluk iliogo a?” iluk isukhama, 23at Yesus nen men yogeisasikhe,
“An nebe re, pogot abel upuke meke wagagisik welagei o. Meke re, hit anek he, abel wemake yoma meke. Hinai erlo agat oba yomaat o. Meke re, an nai erlo agat oba yoma dek o. 24Iti nen he, an nen wene alep yokhisekhe dogolik,
Weak hagakhe lagap meke wene hinoba werek korlek watlasugun o, iluk yokhisigi etnogo, men hasik igi. Hit nen an nobasik he,
At ebe ikhok motok welagarek mekeat o, iluk hinetaiken noba hakotdugun dek halok, wene hinoba werek korlegat watlasugun iti nen igi o,” iluk yogeisasikhe. 25Itithogon yogeisasikhemo, it nen he,
“Hat hebe tha nogo?” iluk oba hinok wokhasukhama, at Yesus nen, men yogeisasikhe,
“Yabokane iti, wirlidikhogonat nenaluk yokhisagein. 26An nen yi wene ti wene doalegat yokhisigik, wene hinoba 'bigik, kokhik, hagasusak erlok mekeat he, at la'ani ageikhe meke etnogo ane eberogonat anek ekherek iti nen, at nen isinem nasuk holhe lagei meke itiat hit akhuni agat oba meke yoma yokhisekhe lagei o,” iluk yogeisasikhe. 27Itithogon yogeisasikhe mekeat, it nen he,
“At opase Allah hasik abok yoknisiliogo o,” iluk wene iti hutdigidek welagoukha. 28Itithogon hutdigidek werek korlek, at nen, men yogeisasikhe,
“An abat itaklasi agagi etnogo, hit nen an nebe o baga meldanugun itinem, hit nen,
Ikhok motok welagarek meke etnogo ebe yiat o. At nen wene yoknisekhe dogolik, akla nen kagalogo igidek. At opase nen yakulekherek meke anek yoknisekhe lagama, iluk, hinilu asugun o. 29At la'ani ageikhe meke etnogo, oba hotokhogon ekherek meke anek an nen hagakherek iti nen, at nen an nebe kolelogo thogotdanhidek nipisak hunik motok welagorek o,” iluk yogeisasikhe. 30Yesus nen wene itithogon yogeisekhe lageikhemo, akhuni inebe doalegat inetaiken at oba hakotdisukha.
Yesus nen, “Ebe wene baga hinebe herle hisalogo hinasokne 'binagagin,” iluk yogeisasikhe wene
31Inetaiken itithogon hakotdisukhama, at Yesus nen he, it ap Yahudi meke inetaiken at oba hakotdisukha meke men yogeisasikhe,
“Hit an nane hologo hagakhe dogogun halok he, hinebe an nagarumi ebe meke napma dogolik, 32wene ebe wene hinilu asigin o. Hinilu asumo, wene ebe wene iti bagaat hinebe herle hisalogo hinasokneat 'binagagin o,” iluk yogeisekhe lageikhemo, 33it nen he, men yogokhukha,
“Nit he, ap Abraham nen itago meke yoma, ninebe akhuni aperek nen thebelogo 'binaniluk inatuaneke ageidek meke anek welago mekeat he, hat nen ekhe dogolik,
Hinebe herle hisalogo hinasokne 'binagagin o, iluk egen iti hakla nikithogon apegetik nen egen?” iluk yogokhukhama, 34at Yesus nen he, men yogeisasikhe,
“Akhuni weak hagakharek meke iti inebe dopok weak hagakharek iti atuanekeat, iluk eberogonat yokhisigi o. 35Nen, it inatuaneke meke iti, inougi inom motogat welageikharek dek mekeat, ina'buri eberogonat meke anek, inom motogat welageikharek o. 36Iti hak, an Allah ebe a'but nen, hit herle hisalogo hinasokne 'binagagi halok, eberogonat herle hisalek hinasokneat dogogun o,” iluk yogeisasikhe.
“Hinopase Iblis at o,” iluk yogeisasikhe wene
37Itithogon yogeisasikhesik, ageikhe men yogeisasikhe,
“Meke re, hit he, ap Abraham nen itago meke welagap iluk, iti an nilu o. Mekeat he, hit hinakla nen an nane waganusak hina'it motok iti nen, hit nenat an nebe nasuogoluk nabok palhe lagap iti. 38An he, nopase nipisak dogolik nileken hekhe lagagi mekeat yokhisekhe korlek, hit anek he, hinopase etnogo nen ekherek meke ane hologo hagakhe lagap o,” iluk yogeisasikhe. 39Itithogon yogeisekhe lageikhemo, it nen,
“A! Nit ninopase Abraham at ha yoma re,” iluk isukhama, at Yesus nen he, men yogeisasikhe,
“Hit hinebe Abraham nen itago meke eberogonat dogolepma, Abraham hagakhe lageikhe mekeat hagakhe dogolep o. 40Meke re, an wene ebe wene Allah nen isinem nasuk holhigi meke yokhisekhe lagei mekeat, hit nen an nebe nasuogoluk nabok palhe lagap iti hak, at Abraham nen itithogon hagakhe lageikhe dek mekeat hagakhe lagap o. 41Hit he, hinopase etnogo hagakherek meke hagakhe lagap o,” iluk yogeisekhe lageikhemo, it nen he, men yogokhukha,
“A! Nit param yugunisake hagakhe dogolik itakninakha meke dek o. Nit ninopase Allah arligat o,” iluk yogokhukhama, 42at Yesus nen he, men yogeisasikhe,
“Hit hinopase Allah eberogonat dogolepma re, an nebe erlo Allah mekeat wagagisik welagei iti, an hinakmurogon dogolep o. An nabusagat nakla apalok wagagi 'buk. At nenat la'ani ageikhemo wagagi o. 43Itithogon wagagisik wene yokhisekhe lagei meke hit hutdigidek welagap iti nenaluk. Itithogon welagap iti, an nane holek dogosak hina'it iti nen, hutdigidek welagap o. 44Itithogon hina'it iti, hit hinopase Iblis atma, hit nen at warlok apekherek meke itiat warlok nen hagakhe lagap iti. At Iblis iti erlo baga nenat akhuni inakherek mekeat o. At wene ebe wene akla dek iti nen, wene ebeat wene isinem inane legekherek dek iti. Iblis ekalat ekherek iti, at obabut ikhogatma ekalat ekherek iti. Inekalat egarek iti, erlo arat o. 45Mekeat he, an nen wene ebe wene yokhisekhe lagei iti nenat, hit nen,
Eberogonat, iluk hutdekhe lagap dek. 46An nen weak hagakhunem, hit aperek nen hinileken neegep halok he, yoknitni ta. Dek o. An nen wene ebe weneat yakulhisekhe korlek, hutdekhe lagap dek iti nenaluk. 47Tha nen ebe Allah meke halok, Allah ane iti asuk hokherek mekeat, hit he, hinebe allah meke 'buk. Ninat meke iti nen he, at ane hinasuk holusak hina'it iti o,” iluk yogeisasikhe.
“Abraham aban itaklageidek werek korlek, an nikhogat welagarek o,” iluk yogeisasikhe wene
48At Yesus ne wene itithogon yogeisasikhemo, it ap Yahudi meke emenogo nen he, men isukha,
“Hat hebe ap Samaria meke yi re! Mokat obabut weak meke hakla ukekhesik werek o, iluk ekhe lago etnogo eberogonat yokhekhe lago higi,” iluk yogokhe lagoukhama, 49at Yesus nen, men yogeisasikhe,
“An mokat obabut weak meke nakla ukigidek o. An nen nopase hogorakho korlek mekeat, hit nen an netaga weak hagarogo 'bekhe lagap o. 50Meke re, an nekaerek hasik hogotnabuagaluk hagakherek 'buk. Dek o. At he, an hogotnabuagaluk, at ageikhe nen wene inoba 'bigik, kokhik, hagasigin meke werek o. 51Nen, tha nen an nane hologo hagakhe dogogin halok he, watlageidek iluk motok dogogin o, iluk eberogonat yokhisigi o,” iluk yogeisekhe lageikhemo, 52it ap Yahudi meke emenogo nen, men yogokhukha,
“Ap Abraham men, ap Allah ane yogeisekhe lagoukha meke emenogo men, arat watlarik lagoukha mekeat, hat nen ekhe dogolik,
Tha nen an nane hologo hagakhe dogogin halok, watlageidek iluk motok dogogin o, iluk egen iti nen, mokat obabut weak meke eberogonat hakla ukekhesik werek, iluk, hutdagago o. 53Nit ninopa Abraham ebe watlageikhe meke iti, ebe yekerek hakene. Meke re, hat anek he, hebe kok a? It ap Allah ane yogeisekhe lagoukha meke emenogo watlarik lagoukha mekeat he, hat hebe tha hak nen ekhe lagan nogo?” iluk yogokhukhama, 54-55at Yesus nen, men yogeisasikhe,
“An nekaerek nen hogorakeke dogolema, we yugunat hogorakeke dogole. At he, an nopase ebe nilu meke it, at ebe hit nen hutdigidek dogolik,
Nit ninopase Allah, iluk egethep etnogo, at ebe nenat, hogotnabiogo. An nen,
At ebe nokodek, iluk ilema, hit hinekalat egethep hagat, nekalat ile o. Meke re, at ebe nilu nogo nen, at ane hologo hagakhe lagei o. 56Nen, hit hinopa Abraham etnogo nen, an wisigin hasik ekhe dogolik,
At wagunem nileken higin, iluk an narlik halhe lageikhesikmo nogo nen, ileken arat neasikhesik akla arleken akhekhe,” iluk yogeisekhe lageikhemo, 57it ap Yahudi meke emenogo nen, men yogokhukha,
“Hat hebe itaklagagitik oba nen 50 tahun aban hagatlageidek mekeat, Abraham erlok hileken hasigitik nen ekhe lagan a? Erlok dek o,” iluk yogokhukhama, 58at Yesus nen, men yogeisasikhe,
“An nane eberogonat yokhisak o. Ap Abraham iti ebe aban itaklageidek werek korlek, an nikhok motogat welagarek o,” iluk yogeisasikhe. 59Itithogon yogeisekhe lageikhemo, it ap emenogo nen, at Yesus ebe helekit oba wasuogoluk inikimo waganhukha mekeat, Yesus ebe limak lageikhesik nen, o Allah ai halekma thogotdiluk werlekmake lageikhe.
Okuqokiwe okwamanje:
Yohanes 8: LAIDNT
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume