AmaHubo 44
44
Umkhuleko wabahlulwe yizitha
Kumholi wokuhlabelela. Elamadodana kaKora. IMaskili.*
1 Nkulunkulu, sizwile ngezindlebe zethu,
okhokho besilandisa ngesenzo
owasenzayo emihleni yabo,
emihleni yasendulo.
2 Nguwe owabaxosha abezizwe ngesandla sakho,
kepha bona wabatshala;
wazichitha izizwe, kepha bona wabandisa.
3 Ngokuba abalidlanga izwe ngenkemba yabo,
nengalo yabo ayibasindisanga;
kepha kwaba yisandla sakho sokunene, nengalo yakho,
nokukhanya kobuso bakho,
ngokuba wawubathanda.
4Wena Nkulunkulu uyinkosi yami;
yaleza ukusindiswa kukaJakobe.
5 Ngawe sizakulahla phansi izitha zethu;
ngegama lakho sizakunyathela abasivukelayo.
6 Ngokuba angiwethembi umnsalo wami,
nenkemba yami ayingisindisi;
7kepha nguwe owasisindisa ezitheni zethu,
wajabhisa abasizondayo.
8 Sizincoma ngoNkulunkulu usuku lonke;
igama lakho siyalibonga kuze kube phakade. Sela*
9 Nokho ususilahlile, wasijabhisa;
awusaphumi nezimpi zethu.
10Usihlehlisela emuva esitheni;
abasizondayo bayaziphangela.
11Usinikezele ukudliwa njengezimvu,
wasihlakaza phakathi kwabezizwe.
12 Uthengisa ngesizwe sakho ngokuyize;
awuzuzi lutho ngokubiza ngaso.
13 Usenza isihlamba kubakhelwane bethu,
inhlekiso nendumazo kwabasiphahlileyo.
14Usenza isaga kwabezizwe,
banikine ikhanda phakathi kwabantu.
15 Usuku lonke ukudunyazwa kwami kuphambi kwami,
namahloni amboza ubuso bami
16 ngenxa yoklolodayo nojivazayo,
ngenxa yesitha nomphindiseli.
17Konke lokho kusehlele,
kodwa asikukhohlwanga wena;
asisaphulanga isivumelwano sakho.
18Inhliziyo yethu ayibuyelanga emuva;
izinyathelo zethu aziphambukanga endleleni yakho,
19uze usiphahlaze endaweni yezimpungushe,
usimboze ngethunzi lokufa.
20Uma ngabe sikhohliwe igama likaNkulunkulu wethu,
sazelulela izandla zethu kunkulunkulu mumbe,
21 uNkulunkulu ubengayikukuhlola na?
Ngokuba yena uyazazi izimfihlakalo zenhliziyo.
22 Yebo, ngenxa yakho sibulawa usuku lonke,
siphathiswa okwezimvu zokuhlatshwa.
23 Vuka, Nkosi! Ulaleleni na?
Vuka, ungasilahli njalonjalo.
24 Ubufihlelani ubuso bakho,
ukhohlwe ukuhlupheka nokucindezelwa kwethu, na?
25Ngokuba umphefumulo wethu ukhothamele othulini;
umzimba wethu unamathele emhlabathini.
26Sukuma, usisize,
usihlenge ngenxa yomusa wakho.
Okuqokiwe okwamanje:
AmaHubo 44: ZUL59
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© Bible Society of South Africa 1959, 1997. Used with permission. All rights reserved.