MATIU Yeemagonɛi
Yeemagonɛi
Kenɛi Matiu gɔlɔ nyɛingɔi lɔ yɛpɛma kɔlooni ngowili yekpei ma kɛ Yesu lɔ Mbaomɔi le, na ngi sabui hu, Ngewɔ i guni a lahei nasia lahoula i mbumbuni ngi nungaa gama Hinda Yangilingɔ Wovei hu. Yeengoowili ji ii yɛni Juubleisia lekee valɔ, nasia lia ti Yesu ngoowumbuni ti ngi leni i loni hu haaŋ i dakpa yakpuani; sawo, i na nungaa kpɛlɛɛ lɔ va ti dunyei hu.
Kenɛi Matiu gɔlɛi hugbatɛngɔ pandawanda. I lɔtoi Yesu le hindei lɔ ma, i yɛpɛ kɔlongɔ ngi wuala ma a njɛi kɛɛ ngi gɔlɛlama. Kɛ i gbuja ngi yenge lɔtogbei ma i yɛ a Ngewɔ layie le, a yama a nungaa gaa la, kɛ a heegbɛbleisia hale ti yɛ Galili lɔlei hu. Ji wooma, i yamailɔ i pu kɔlɔ ma jɛsie Yesu yɛ ka gbuama Galili lɔlei hu i li i fo fa Jelusalɛm goohu, kpɛingɔ jiahuisia ma ti ngi malini kɛlɛma woki hu, na ngapaani ngi gbakpalei ma kɛɛ ngi hiyelei ma hee hu.
Yeengoowili yekpei ji lɔ kɛma leeŋ kɛ Yesu lɔ Kaamɔ wai le, na kpayei ngi yeya Ngewɔ jawei yeembui gɛ va, tawao a kaa gɛ kɔlooni Ngewɔ Mahayɛi ma. Ngi gaa gbotoma tɛngɔima ti heingɔ nguya na gungɔ a lɔɔlu: Haalayei mia a ngiye ma gaa kɔloongɔ ngelegoohu mahayɛi yeehubleisia ti makɛi ma, kɛɛ ti magbeisia, kɛɛ ti gbayeisia, kɛɛ ti yakpuama hindeisia (Ngu 5—7); Yeefelei mia a kaasia kaalopo-puu-mahu feleisia ti yengei fa (Ngu 10); Yeesawei mia a ndɔmiisia kɔloongɔ Ngelegoohu Mahayɛi ma (Ngu 13); yeenaaniyei mia a gbɔɔ kaalopoyɛi yeembui le (Ngu 18); kɛɛ na yeelɔɔlui, kɔloongɔ dunyei ji ngi gbɔyɔlalɔ ma kɛɛ Ngewɔ Mahayɛi ngi walei.
NGUISIA KƆLƐI JI GOOHU
Yesu le gbambii kɛɛ ngi lelei 1.1—2.23
Jɔn Nguamɔi yenge lokoisia 3.1-12
Yesu wua hindei kɛɛ ngi gɔlɛlei 3.13—4.11
Yesu Yenge lokoisia kpawama leeŋ Galili lɔlei hu 4.12—18.35
Ngi jɛsie a gbua Galili lɔlei hu i fo fa Jelusalɛm 19.1—20.34
Kɛlɛma woki hu Jelusalɛm goohu kɛɛ yee kpalateisa hu 21.1—27.66
Ndemɔi hiyelei hee hu kɛɛ Ngi gbualei nungaa yaama 28.1-20
Okuqokiwe okwamanje:
MATIU Yeemagonɛi: MENNT
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Mende New Testament © The Bible Society of Sierra Leone, 2002.