A Zã koe‑noogo 4
4
A Zeezi ne Samaari paga
1Zu-soabã bãngame tɩ Fariizẽ-dãmbã wʋmame tɩ bãmb paama karen-biis n yɩɩd a Zã, la b lisd-ba. 2Baoosgo, a Zeezi dag n ka lisd nebã b toor ye, dag n yaa b karen-biisã. 3Dẽ, bãmb yii Zʋʋde n na n kẽng Galɩle. 4Yaool n dag n yaa tɩlɛ tɩ bãmb pɩʋʋg Samaari soolem. 5#Sɩng 33.19, Zoz 24.32Dẽ, bãmb taa Samaari tẽng a yembr sẽn boond tɩ Sɩkaare, pʋʋg ning a Zakoob sẽn dag n kõ a bi-ribl a Zozɛfã sɛɛgẽ. 6A Zakoob bulgã dag n bee be. Kẽndã yaams yĩnga, a Zeezi zĩnda bulgã noore. Dẽ tɩ yaa wĩnto-sʋk sẽnẽ.
7Samaari pag a yembr n wa n na n yãk koom. A Zeezi yeela lame «Kõ-m koom tɩ b yũ wɛ.» 8Bala, bãmb karen-biisã dag n kẽnga tẽngã pʋgẽ n na n tɩ ra rɩɩbo. 9#Ɛsd 4.1-5, Neem 3.33,34Samaari pagã yeela bãmb yaa: «Yɩta a wãn tɩ yãmb sẽn yaa Zʋɩfã kot maam a Samaari nin‑paga koom n na n yũ?» (Sɩd me, Zʋɩf-rãmbã rag n ka baood n na n paam lagem-n-taar ne Samaari rãmbã ye.) 10A Zeezi leok-a lame n yeele: «Fo sã n dag n miẽ Wẽnnaam kũunã, la f mi ned ning sẽn kot-a foom koomã n na n yũ wã, yaa foom n dag n na n kos-a, la a rag n na n kõo foom ko-bundga.»#4.10 Koom sẽn yaa yɩlemde, n bundẽ n ka sɛtẽ ye, la a kõt vɩɩm. 11La pagã yeela bãmb yaa: «M kẽem sõngo, yãmb ka tar baa fɩ n na n toog koomã bulgẽ wã ye, tɩ bulgã yaool n zulmẽ. Dẽ, yãmb na n yãnda ko-bund-kãng yɛɛnẽ?» 12Yãmb yɩɩda tõnd yaab a Zakoob sẽn kõ-a tõnd bul‑kãngã wã la? Bãmb meng yũu a koom, tɩ b kom-dibli ne b rũm-bãgã me yũ. 13A Zeezi leok-a lame n yeele: Ned ning fãa sẽn yũud ko-kãngã, ko-yũud na n leb n yõka. 14La ned ning fãa sẽn na n yũ koom ning mam sẽn na n kõ-a wã ye, ko-yũud kõn leb n yõka ye: la koom ning mam sẽn na n kõ-a wã na n lebga ko-bundg sẽn na n buli, hal tɩ ta vɩɩm sẽn kõn sa wã pʋgẽ. 15Pagã yeela bãmba: «M kẽem sõngo, kõ-y maam ko-kãnga, tɩ ko-yũud da leb n yõk maam, tɩ m leb n wat ka n yãkd koomã ye.» 16A Zeezi yeel-a lame: «kẽng n tɩ bool f sɩdã, la f lebg n wa ka.» 17Pagã leokame: «Mam ka tar sɩd ye.» A Zeezi yeel-a lame yaa: «Fo maana neere, fo sẽn yeel tɩ f ka tar sɩdã. 18Bala, fo talla sɩdb a nu, la fo sẽn tar a soab moasã wã ka fo sɩd ye. Fo togsa sɩd yellã pʋgẽ.» 19Pagã yeela bãmb yaa: «M kẽem sõngo, mam neeme tɩ yãmb yaa Wẽnnaam no-rɛɛsa. 20Tõnd ba-rãmbã dag n pʋʋsda tãn-kãngã zugu. La yãmb Zʋɩf-rãmbã yetame tɩ zĩig ning b sẽn tog n pʋʋsã yaa Zeruzalɛm.» 21A Zeezi yeel-a lame yaa: «Paga, tẽ mam goamã! Wakat n wat tɩ ka tãn-kãngã zug wall Zeruzalɛm la yãmb na n pʋʋs y ba wã ye. 22Yãmb pʋʋsda y sẽn ka mi. Tõnd pʋʋsda d sẽn mi, bala, fãagrã yita Zʋɩf-rãmbã nengẽ. 23La wakat watame, la yaa moasã, tɩ tõnd ba wã waoogdb sɩd-sɩdã na n waoog bãmb ne b sɩɩse la ne sɩda. Bala, yaa waoogdb a woto buud la tõnd ba wã baooda. 24Wẽnnaam yaa Sɩɩga, la yaa tɩlɛ tɩ neb nins sẽn pʋʋsd bãmbã na pʋʋs ne b sɩɩse, la ne sɩda.» 25Pagã yeela bãmb yaa: «Mam miime tɩ Mesi wã, soab ning b sẽn boond tɩ Kirisã na n waame. B sã n wa, b na n wilga tõnd bũmba fãa.» 26A Zeezi yeela yẽnda: «Maam, soab ning sẽn gomd ne foomã, yaa maam la bãmba.»
27Dẽ, bãmb karen-biisã lebg n waa wakat-kãnga, la a yɛɛsa bãmb tɩ yã a Zeezi sẽn gomd ne pag, la bãmb ned baa a yembr ka sok bãmb b sẽn kot pagã bũmb ninga, wall b sẽn gomd ne-a bũmb ning yell ye. 28Dẽ, pagã basa a yʋʋrã be, n kẽng tẽngã pʋgẽ n tɩ yeel nebã yaa: 29Wa-y n ges-y rao sẽn togs maam bũmb nins fãa mam sẽn maanã! Dẽ yĩnga, ka na n yɩ Kirisã? 30Nebã yii tẽngã n kẽng a Zeezi nengẽ. 31Wakat-kãnga, a Zeezi karen-biisã dag n bõosda bãmb n yetẽ tɩ: «Karen-saamba, dɩ-y-yã.» 32La a Zeezi leoka bãmb yaa: «Mam tara rɩɩb yãmb sẽn ka mi, n na n dɩ.» 33Dẽ, karen-biisã goma ne taab n yeel tɩ daar ninga ned n tall rɩɩb n wa n kõ-ba. 34A Zeezi yeela bãmb yaa: «Mam rɩɩbã, yaa tɩ maan sẽn tʋm-a maamã raabo, la m baas tʋʋmd ning b sẽn kõ maam tɩ m maanã. 35Yãmb ka mi n yetẽ tɩ keta kiis a naas tɩ tigsg wakat ta wɛ? Ade, mam yeta yãmb tɩ y zẽk y nens n ges pʋtã sẽn pelg n dat tigsgã. 36Sẽn tigsd-a wã zoe n deegda a tʋʋm yaoodo, la a tigsda koodã wakat sẽn kõn sa yĩnga. Woto, sẽn bʋt-a wã ne sẽn tigsd-a wã naagda taab n kɩdme. 37Yel-bũnd ning sẽn yet tɩ ned a yembr n bʋt tɩ ned a to tigsã, yaa sɩda. 38Mam tʋma yãmb tɩ y tɩ n tigs pʋʋg yãmb sẽn ka tʋmẽ ye. Neb a taab n tʋme, tɩ yãmb wa n kẽ n dɩt a yõodo.
39Samaari tẽn-kãng neb wʋsg tẽe a Zeezi, pagã kaset yĩnga, a sẽn yeel t'a Zeezi togsa yẽnda bũmb nins fãa yẽ sẽn maanã yĩnga. 40La Samaari nebã sẽn yã a Zeezi, b kos-b lame tɩ b pa ne bãmba. La a Zeezi paa be rasem a yiibu. 41Neb nins sẽn tẽ a Zeezi b goamã yĩngã sõor n yɩɩda, la b yeela pagã yaa: 42«Ka leb n yaa fo goamã yĩng la tõnd sẽn tẽed a Zeezi wã ye. Bala, tõnd mensã wʋma b goamã, la tõnd miime tɩ sɩd yaa bãmb la dũni fãagdã.»
A Zeezi maaga rĩm tʋmtʋmd biiga
43Dasem a yiib-kãens zugẽ, a Zeezi yii be n na n kẽng Galɩle, 44#Mat 13.57, Mark 6.4, Luk 4.24bala, bãmb mengã dag n kɩsa kaset tɩ Wẽnnaam no-rɛɛs ka paamd waoogr a meng ba-yirẽ ye. 45#Zã 2.23Bãmb sẽn ta Galɩle, Galɩle nebã reega bãmba, b sẽn dag n yãnd bũmb nins fãa bãmb sẽn maan Zeruzalɛm, tigrã wakatã yĩngã. Bala, bãmb me dag n kẽnga tigrã. 46#Zã 2.1-11Dẽ, a Zeezi leba Galɩle Kana, tẽng ning bãmb sẽn dag n tek koom tɩ lebg reezẽ rãamã.
Rĩma tʋmtʋmd-kãseng a yembr n dag n be Kapɛrnaom, t'a bi-ribl ka keem ye. 47A wʋmame t'a Zeezi yii Zʋʋde n wa Galɩle, la a kẽnga bãmb nengẽ n tɩ bõos-b tɩ b wa n maag a biigã sẽn dag n kolg kũum. 48A Zeezi yeel-a lame yaa: Yãmb sã n ka yãt bõn-bãn la bõn-yɛɛsdse, yãmb ka na n tol n tẽ ye. 49Rĩmã tʋmtʋmd-kãsengã yeela bãmb yaa: «Zu‑soaba, wa‑y tao-tao tɩ m biigã ra wa ki ye.» 50A Zeezi yeel-a lame: «Kẽng tɩ f biigã vɩɩme.» Dao wã tẽe gomd ning a Zeezi sẽn yeelã, la a loogame. 51A sẽn be sorẽ n kuiisẽ, a tʋmtʋmdbã seg-a lame n yeel-a: «Yãmb biigã vɩɩme.» 52Tʋmtʋmd-kãsengã soka bãmb n na n bãng wakat ning biigã sẽn sɩng n sãoogã. La b yeel-a lame tɩ yaa zaamẽ wĩnto-sʋk sẽn loog lɛɛr a yembr la a yĩn-wɩngrã sig yã. 53Biigã ba bãngame tɩ yaa wakat-kãng bal la a Zeezi yeel yẽnda t'a bi-riblã vɩɩme wã. La yẽnda ne a yirã rãmb fãa tẽe a Zeezi. 54A Zeezi leb n maana bõn-bãn‑kãnga, a yiib soaba, b sẽn yi Zʋʋde n wa Galɩle wã poorẽ.
Okuqokiwe okwamanje:
A Zã koe‑noogo 4: MPBU
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Moore Bible © Bible Society of Burkina Faso, 2014.